Wokbaot Wetem Fasin Fraetgud Long Jeova

“Nao [kongregesen] i stap wokbaot wetem fasin fraetgud long Jeova, mo tabu speret i stap givhan long hem, i stap mekem hem i strong moa. Taswe namba blong ol man i kam antap moa.”​—⁠OL WOK 9:⁠31, NW.

1, 2. (a) ?Wanem i kamaot long Kristin kongregesen taem hem i gat kwaet taem? (b) ?Sipos Jeova i letem trabol i kam long yumi, be bambae hem i mekem wanem narafala samting?

LONG taem ya, wan disaepol i stap fesem wan bigfala traem. ?Bambae hem i stanap strong, i holemtaet bilif long God, no no gat? !Yes! Hem i stap wokbaot wetem fasin fraetgud long God. Hem i stap onagud long Bigfala Man we i wokem hem. Taswe, hem i holemtaet bilif blong hem olsem wan trufala Wetnes blong Jeova.

² Man ya we i stap tru long God mo i fraetgud long hem, nem blong hem Steven. Hem i “wan man we bilif blong hem i strong, mo we Tabu Speret i fulap long hem.” (Ol Wok 6:⁠5, NW) Oli kilim hem i ded, nao samting ya i statem wan taem blong bigfala trabol long ol disaepol long ples ya. Be biaen, ol kongregesen olbaot long evri ples long Judia, mo long Galili, mo long Sameria oli gat kwaet taem mo oli kam strong moa long saed blong speret. Mo tu, kongregesen “i stap wokbaot wetem fasin fraet gud long Jeova mo tabu speret i stap givhan long hem, i stap mekem hem i strong moa. Taswe namba blong ol man i kam antap moa.” (Ol Wok 9:31) Sem mak tede. Yumi ol Wetnes blong Jeova, yumi save se nating we yumi gat kwaet taem no trabol taem, be God bambae i blesem yumi, olsem Ol Wok japta 6 kasem 12 i soemaot. Taswe yumi mas wokbaot wetem fasin fraet gud mo ona long God taem yumi kasem trabol. Mo sipos trabol i stop blong smol taem, yumi save yusum taem ya blong leftemap tingting blong yumi long saed blong speret mo blong mekem moa long wok blong God.​—⁠Dutronome 32:​11, 12; 33:⁠27.

Holemtaet Bilif Go Kasem En

3. ?Oli winim wanem trabol long kongregesen long Jerusalem? ?Olsem wanem oli winim?

³ Samtaem trabol i save kamaot long kwaet taem tu. Be ol gudfala rul blong ogenaesesen oli save winim trabol ya. (6:​1-7) I gat sam man Isrel long Jerusalem we oli stap yusum lanwis blong man Gris. Nao oli stap talem se evri dei, taem ol man oli seraot ol kakae, oli no lukaotgud long ol wido long saed blong olgeta. Oli stap talem se oli lukaotgud moa long ol wido blong ol man Isrel we oli stap yusum lanwis blong olgeta nomo. Blong stretem rao ya, ol aposol oli jusumaot seven man, oli putumap olgeta blong “oli lukaot long bisnes ya.” Wan long ol seven man ya, hemia Steven.

4. ?Steven i mekem wanem taem oli talem ol gyaman toktok long hem?

⁴ Be i no longtaem, Steven we i fraetgud long God i fesem wan traem. (6:​8-15) I gat sam man we oli girap, oli agensem Steven. Sam long olgeta ya oli memba blong wan haos blong prea we oli kolem “Haos blong Prea blong ol Friman.” Ating olgeta oli man Isrel we ol man Rom oli bin tekem olgeta oli go kalabus, nao biaen oli letem olgeta oli gofri. No maet ol man ya oli slef fastaem, nao biaen oli kam joen wetem ol man Isrel. Nao ol enemi blong Steven oli no save winim hem, from we tabu speret i stap mekem Steven i waes tumas. Nao oli girap, oli holem hem, oli tekem hem i kam stanap long fes blong Kaonsel ya, Sanhedrin. Long ples ya sam gyaman wetnes oli girap, oli talem se: ‘Mifala i harem man ya i talem se Jisas bambae i brekemdaon haos ya blong God, bambae i jenisim ol fasin ya we Moses i givim long yumi longtaem finis.’ Ol man ya, nating we oli agensem Steven, be oli luk we tingting blong hem i kwaet mo fes blong hem i kam olsem wan enjel, wan man we i karem mesej blong God, we i save se God i stap givim paoa long hem. !Be fes blong ol enemi blong Steven oli luk narakaen olgeta! !Fes blong olgeta i nogud, from we oli letem olgeta oli go long han blong Setan!

5. ?Wanem sam bigfala samting we Steven i makem taem hem i stap wetnes long olgeta?

⁵ Hae pris, nem blong hem Kaeafas, hem i askem kwestin long Steven, nao Steven i no fraet nating, hem i girap i givim wan gudfala wetnes long hem. (7:​1-53) Hem i talem bakegen histri blong ol man Isrel blong soemaot plan blong God se taem Mesaea i kamtru, bambae God i finisim Loa wetem ol wok we ol man Isrel oli stap mekem oltaem long haos blong God. Steven i talem se ol man Isrel oli stap talem se oli ona long Moses from we hem i lidim ol bubu blong olgeta, oli aot long Ijip. Be ol man Isrel bifo oli no wantem harem Moses, olsem we ol man Isrel long taem blong Steven oli no wantem Man ya we bambae i sevem olgeta long wan fasin we i bigwan moa. Steven i talem se God i no save stap long haos we wan man nomo i wokem. From tok ya hem i soemaot se haos prea mo fasin blong wosip we i joen wetem hem, bambae oli finis. Ol jaj we oli stap lesin long Steven oli no fraet long God mo oli no wantem save wil blong God, taswe Steven i talem se: ‘Man, hed blong yufala i strong tumas. Yufala i stap blokem tabu speret oltaem. Olgeta profet ya blong bifo, be olfala ya blong yumi oli ronem olgeta evriwan. Mo ol man ya blong talemaot Tok blong God, we oli talemaot fastaem se Stret Man ya blong God bambae i kam, be ol olfala blong yumi oli kilim olgeta oli ded. Mo naoia, yufala i gyaman, yufala i goraon long baksaed blong Stret Man ya, nao yufala i kilim hem i ded.’

6. (a) ?Bifo we Steven i ded, wanem samting i kamaot long hem, we i mekem bilif blong hem i kam strong we i strong? (b) ?From wanem i stret nomo we Steven i askem se: “Jisas, Masta, plis yu tekem mi mi go stap wetem yu”?

⁶ Steven i no fraet blong talem tok ya long olgeta, ale samting ya i pulum olgeta blong oli kilim hem i ded. (7:​54-60) Ol memba blong Kaonsel oli kros tumas, from we tok blong Steven i soemaot se olgeta oli gat fol from ded blong Jisas. Be bilif blong Steven i kam strong we i strong taem hem i ‘lukluk i go antap long heven, nao hem i luk bigfala laet we i saenaot long God, mo Jisas we i stap stanap long raet saed blong hem.’ Nao Steven i no fraet blong stanap long fored blong ol enemi blong hem, hem i save se hem i mekem samting we God i wantem. Ol Wetnes blong Jeova tede oli no save luk visen. Be taem yumi kasem trabol, God i save mekem tingting blong yumi i kwaet, olsem hem i mekem long Steven. Ale, ol enemi blong Steven oli holem hem, oli tekem hem i go afsaed long Jerusalem, nao oli stonem hem long ston. Taem oli stap stonem hem, Steven i singaot i se: “Jisas, Masta, plis yu tekem mi mi go stap wetem yu.” I stret nomo we Steven i askem samting ya from we God i givim paoa finis long Jisas blong hem i save mekem man i laef bakegen long ded. (Jon 5⁠:26; 6⁠:40; 11⁠:​25, 26) Nao Steven i nildaon, i singaot bigfala, i se: “[Jeova, NW], plis yu no makem sin ya blong olgeta, taem yu jajem olgeta.” Hem i talem tok ya finis, nao hem i ded. Hem i ded from we hem i holemtaet strong bilif blong hem, olsem plante man blong Jisas oli mekem biaen long taem blong Steven, mo long taem blong yumi tu.

Trabol Ya i Mekem Gud Nyus i Goaot Long Ol Ples Raonabaot

7. ?Wanem i kamaot from ol trabol we oli mekem long ol disaepol blong Kraes?

⁷ Ded blong Steven i mekem se gud nyus i goaot long evri ples raonabaot. (8:​1-4) Olgeta we oli mekem trabol long ol disaepol oli ronem olgeta oli go wanwan, oli goaot long evri ples long Judia mo Sameria. Ol aposol nomo oli stap. Sol i harem i stret nomo we olgeta oli kilim Steven i ded. Olsem wan wael anamol, hem i ronem olgeta blong kongregesen blong spolem olgeta. Hem i stap go long ol haos wanwan, blong tekemaot olgeta we oli bilif long Jisas, mo i stap putum olgeta long kalabus. Be ol disaepol we oli goaot long ol ples raonabaot oli fraetgud long God, oli gohed nomo long wok blong talemaot Kingdom. Taswe plan blong Setan i foldaon, i no save blokem wok ya from trabol we hem i mekem long ol man blong God. Sem mak tede. Plante taem trabol we ol man oli mekem blong blokem gud nyus blong i no goaot long ol man, hem i givhan moa long wok blong talemaot Kingdom.

8. (a) ?Wanem i kamaot from wok blong prij long Sameria? (b) ?Olsem wanem Pita i yusum seken ki we Jisas i givim long hem?

⁸ Wan man blong talemaot gus nyus, nem blong hem Filip, hem i kamdaon long Sameria blong “talemaot tok blong Mesaea long ol man long ples ya.” (8:​5-25) Ol man long taem ya oli harem i gud tumas long gud nyus we hem i talemaot, mo from we i gat devel i kamaot long plante man, mo i gat plante sikman we bodi blong olgeta i kam gud bakegen. Nao ol aposol long Jerusalem oli sanem Pita mo Jon, tufala i kam long Sameria. Taem tufala i prea from ol nyufala disaepol we oli jes baptaes, mo tufala i putum han long olgeta, ol nyufala disaepol ya oli kasem tabu speret. Saemon i wan nyufala disaepol we hem i jes tekem baptaes. Fastaem hem i wan man blong mekem majik. Nao hem i tekem mane i kam long Pita mo Jon, blong hem i pem tufala blong givim paoa ya long hem tu. Be Pita i talem long hem se: ‘!Mane ya blong yu i go lus wetem yu tu! Tingting blong yu i no stret long fes blong God.’ Hem i talem long Saemon se hem i mas tanem tingting blong hem from rabis bisnes ya blong hem mo hem i mas prea long Jeova blong hem i fogivim hem. Nao Saemon i askem long tufala aposol ya blong prea from hem. Store ya i mas pusum ol man tede we oli fraet long Jeova blong prea blong askem God blong givhan long olgeta blong lukaotgud long hat blong olgeta. (Proveb 4:23) (I gat wan wod i kamaot from store ya, we long Engglis hem i “simony,” mo long Franis “simonie.” Hem i minim se “fasin blong pem no salem haenem no wok long jyos.”) Pita mo Jon tufala i talemaot gud nyus long plante velej long Sameria. Long taem ya nao, Pita i yusum seken ki we Jisas i givim long hem blong openem rod long ol man ya. Ale, olgeta oli kasem save long Kingdom blong heven mo oli gat jans blong go insaed long hem.​—⁠Matyu 16:⁠19.

9. ?Hu ya man Itiopia we Filip i storeyan long hem? ?From wanem i no gat wan samting we i stap blokem man ya, se i no save baptaes?

⁹ Nao enjel blong God i givim wan nyufala wok long Filip. (8:​26-40) Long rod we i aot long Jerusalem, i godaon long Gasa, Filip i faenem wan man, i stap sidaon long wan kat we hos i pulum. Man ya, wan ‘yunak.’ (Samtaem, tok ya i min se olgeta oli “mekem natamap long hem finis.”) Hem i nambawan man blong lukaot long mane blong kwin blong ol man Itiopia, nem blong hem Kandes. Oli no rili mekem natamap long man ya, from we sipos i olsem, hem i no gat raet blong joen wetem kongregesen blong ol man Isrel. Be hem i go finis long Jerusalem blong joen wetem olgeta long wosip, from we hem i sakomsaes finis. (Dutronome 23:⁠1) Taem Filip i faenem man ya, hem i stap ridim buk blong profet Aesea. Hem i askem long Filip blong jyam antap, blong kam sidaon wetem hem long kat. Filip i eksplenem profet tok blong Aesea long man ya, mo hem i “talemaot gud nyus blong Jisas long hem.” (Aesea 53:​7, 8) Nao tufala i kam long wan ples we i gat wora long hem, ale man Itiopia ya i talem se: “Yu luk. Hemia wan wora i stap. ?I gat sam samting i stap blokem mi yet, se mi no save baptaes?” No, i no gat wan samting i stap blokem hem, from we hem i gat save finis long saed blong God, mo naoia hem i gat bilif long Kraes tu. Taswe Filip i baptaesem man Itiopia ya, mo hem i stap go long rod blong hem bakegen, we i stap harem i gud tumas long tingting blong hem. ?I gat sam samting i stap blokem yu yet, se yu yu no save baptaes?

God i Tanem Fasin Blong Wan Man Blong Mekem Trabol

10, 11. ?Wanem i hapen long Sol blong Tasas, long rod we i stap go long Damaskes? ?Mo smoltaem biaen, wanem i hapen long hem?

¹⁰ Nao Sol i stap tok strong yet, i stap mekem promes blong sakem ol disaepol blong Jisas oli go long kalabus, no blong kilim olgeta oli ded. Hem i tok olsem from we hem i traem fosem olgeta blong lego bilif blong olgeta. (9:​1-18a) Hae pris ya, (ating Kaeafas) i raetem sam leta i go long ol haos blong prea blong ol man Isrel long Damaskes, mo i givim ol leta ya long Sol. Ol leta ya oli givim raet long Sol, se sipos hem i faenem sam man no woman we oli stap folem “Rod blong Masta” blong yumi, no sipos oli stap folem eksampel blong Kraes, bambae hem i save holem olgeta. Hem i gat raet blong pulum olgeta oli kambak long Jerusalem bakegen. Kolosap long taon ya Damaskes, samwe long medel dei, wantaem nomo i gat wan laet long skae i saenaot, i kasem Sol. Mo wan voes i askem long hem se: “!Sol! !Sol! ?Weswe yu yu stap ronem mi olsem?” Ol man we oli biaen long Sol long rod, olgeta tu oli “harem tok ya,” be oli no kasem save long hem. (Skelem wetem Ol Wok 22:​6, 9.) Long taem ya, Jisas, we i stap long heven finis, i mekem smol haf blong glori blong hem nomo i saenaot. Be hemia i naf blong blaenem ae blong Sol. God i yusum wan disaepol, nem blong hem Ananaeas, blong mekem ae blong Sol i kamgud bakegen.

¹¹ Ale Sol i tekem baptaes, nao ol man oli mekem trabol long hem, olsem we fastaem hem i mekem trabol long ol narafala disaepol blong Kraes. (9:18b-25) Nao ol man Isrel long Damaskes oli tokrere blong kilim Sol. Be wan taem long naet, ol disaepol oli tekem Sol, oli putum hem insaed long wan bigfala basket, nao oli slakem hem i godaon, i pastru long wan hol long stonwol blong taon ya. Basket ya, ating oli wokem long rop no long wan kaen smol wud. (2 Korin 11:​32, 33) Hol ya, maet hem i windo blong haos blong wan disaepol we haos blong hem i joen long stonwol we i goraon long taon ya. Samting we oli mekem i no min se Sol i fraet, no gat. Be hem i wantem ronwe long ol enemi blong hem blong gohed long wok blong prij.

12. (a) ?Wanem i hapen long Sol long Jerusalem? (b) ?Wanem i kamaot long kongregesen long taem ya?

¹² Long Jerusalem, ol disaepol oli no save bilif se Sol i kam wan man blong Jisas. Ale, Banabas i stap givhan long olgeta blong luk hem olsem wan brata nomo. (9:​26-31) Be Sol i no fraet. Long Jerusalem, hem i stap agyu wetem ol man Isrel we oli stap yusum lanwis blong man Gris. Nao olgeta ya oli wantem kilim hem i ded. Taem ol brata oli harem nyus blong samting ya, oli tekem Sol i godaon long Sisaria, oli sanem hem i go longwe long Tasas, ples blong hem long Silisia. Nao olbaot long evri ples long Judia, Galili, mo long Sameria, kongregesen “i gat kwaet taem, i stap kam strong moa” long saed blong speret. From we oli ‘stap wokbaot wetem fasin fraetgud long Jeova, mo tabu speret i stap givhan long olgeta, namba blong ol man i kam antap moa.’ !Hemia i soemaot rod long ol kongregesen tede, olsem wanem oli save kasem blesing blong Jeova!

!Sam Hiten Man Oli Bilif!

13. ?God i givim paoa long Pita blong mekem wanem merikel long Lida mo long Jopa?

¹³ Pita tu i stap wok strong. (9:​32-43) Long wan ples, nem blong hem Lida (naoia nem blong hem Lod) long flat ples ya we oli kolem Seron, i gat wan man nem blong hem Aeneas, we haf bodi blong hem i ded. Nao Pita i mekem bodi blong man ya i kamgud bakegen. Samting ya i tanem tingting blong plante man, oli biaen long Masta blong yumi. Long Jopa, i gat wan disaepol, nem blong hem Tabita (Dokas) we ol disaepol oli laekem hem tumas. Ale hem i kasem wan sik, nao hem i ded. Taem Pita i kamtru long ples ya, ol wido we oli stap krae from Dokas, oli stap soem long Pita ol klos we Dokas i somap taem hem i stap laef yet. Klos ya, maet oli stap werem long taem ya nomo. Ale Pita i mekem Dokas i laef bakegen. Nao nyus ya i goraon long evri ples raonabaot, mo plante man oli bilif from. Pita i stap longtaem lelebet long Jopa, long haos we i kolosap long solwora. Haos ya i blong wan man, nem blong hem Saemon, we hem i man blong wokem ol samting long skin blong buluk. Ol man we oli mekem wok ya oli draonem skin blong buluk long solwora. Afta, oli putum wan samting we oli kolem ‘laem’ long hem, ale biaen oli rabem blong tekemaot hea long skin ya. Nao oli pentem ol skin ya long wan wora we oli mekem long sam kaen gras, blong mekem se skin ya i kam olsem leda.

14. (a) ?Hu ya man ya Konilyas? (b) ?Olsem wanem long ol prea blong Konilyas?

¹⁴ Long taem ya, (36 K.T.a), i gat wan bigfala samting i stap kamaot long wan narafala ples. (10:​1-8) Long Sisaria, i gat wan man i stap, nem blong hem Konilyas. Hem i kapten blong wan handred soldia blong ol man Rom, mo hem i wan man blong prea. Hem i hed blong kampani blong soldia we oli kolem “Kampani blong Itali.” I luk olsem we long kampani ya i gat sam nyufala soldia blong ol man Rom wetem sam man Itali we bifo oli slef, nao oli kam friman. Konilyas i stap ona long God, be hem i no joen long jyos blong ol man Isrel. Nao hem i luk samting olsem wan drim. Long drim ya, wan enjel blong God i talem long hem se God i harem finis ol prea blong hem, mo ‘hem i stap tingbaot hem yet.’ Nating we Konilyas i no givim laef blong hem i go long Jeova yet, be God i harem prea blong hem. Nao enjel i talem long hem se hem i mas sanem sam man oli go lukaot Pita, ale Konilyas i mekem olsem.

15. ?Taem Pita i stap prea antap long ruf blong haos blong Saemon, wanem i hapen?

¹⁵ Pita i stap prea antap long ruf blong haos blong Saemon. Semtaem, hem i luk samting olsem wan drim we God i soemaot long hem. (10:​9-23) Long drim ya, hem i luk we heven i open, mo wan samting olsem wan bigfala tapolen i stap kamdaon long wol. Insaed long hem, i gat ol anamol mo ol snek mo ol pijin we Loa blong Isrel i talem se oli no klin. Nao hem i harem wan tok we i talem long hem blong kilim wan anamol blong kakae. Be Pita i talem se hem i neva kakae wan samting we i doti long fes blong God. Nao hem i harem tok ya bakegen, i se: ‘Samting we God i talem finis se i klin, yu no save talem se i doti.’ Nao Pita i stap trabol lelebet blong save mining blong drim ya. Be nating, hem i mekem ol samting we speret blong God i lidim hem blong mekem. Taswe, hem wetem sikis brata blong hem we oli man Isrel, oli girap, oli biaen long ol man we Konilyas i sanem olgeta blong faenem Pita.​—⁠Ol Wok 11:⁠12.

16, 17. (a) ?Pita i talem wanem long Konilyas mo kampani we i hivap long haos blong hem? (b) ?Taem Pita i stap tok yet, wanem i hapen?

¹⁶ I no longtaem, bambae sam hiten man oli harem gud nyus. Hemia nao fastaem we samting ya i kamaot. (10:​24-43) Taem Pita mo kampani blong hem oli kamtru long Sisaria, Konilyas wetem famle blong hem mo ol gudfala fren blong hem oli stap wet long olgeta. Nao Konilyas i kamaot, i foldaon long leg blong Pita. Be aposol ya i gat tingting daon, i no wantem we man ya i ona long hem, ale hem i leftemap hem bakegen. Hem i storeyan long olgeta olsem wanem Jeova i makemaot Jisas wetem tabu speret mo i givim paoa long hem blong mekem wok blong Mesaea. Mo hem i eksplenem se ol man we oli bilif long hem, God bambae i tekemaot ol sin blong olgeta.

¹⁷ Nao Jeova i mekem wan samting. (10:​44-48) Taem Pita i stap tok yet, God i givim tabu speret long ol hiten man ya we oli bilif. Long ples ya nomo, hem i makemaot olgeta wetem tabu speret, nao oli stap toktok long ol narafala lanwis, oli stap leftemap nem blong God. Taswe, i no gat wan samting i save blokem olgeta, se oli no save baptaes long nem blong Jisas. Long taem ya nao, Pita i yusum namba tri ki blong openem rod long ol hiten man we oli ona long God. From samting ya, oli kasem save long Kingdom blong heven, mo oli gat jans blong go insaed long hem.​—⁠Matyu 16:19.

18. ?Taem Pita i eksplenem olsem wanem ol hiten man oli ‘baptaes long tabu speret,’ ol brata we oli blong laen blong ol man Isrel oli mekem wanem?

¹⁸ Biaen, long Jerusalem, sam man blong Jisas we oli stap holemstrong fasin blong mekem sakomsaes long ol hiten man, oli kam long Pita mo oli tok nogud long hem. (11:​1-18) Nao Pita i talemaot ol samting we i hapen, olsem wanem ol hiten man ya oli ‘baptaes long tabu speret.’ Ale ol brata blong hem we oli blong laen blong ol man Isrel, oli no moa tok nogud long hem bakegen, oli stap leftemap nem blong God se: “Samting ya i min se God i mekem rod finis blong ol hiten man tu oli save tanem tingting blong olgeta from ol sin blong olgeta, blong oli kasem laef.” Yumi tu, taem yumi luksave samting we God i wantem, i klia nomo, yumi mas rere blong mekem.

Kongregesen Blong Ol Hiten Man i Stanap

19. ?Olsem wanem ol disaepol oli tekem nem ya Kristin?

¹⁹ Ale, faswan kongregesen blong ol hiten man i stanap. (11:​19-26) Taem ol disaepol oli go wanwan long ol ples olbaot from trabol we i kamaot long taem blong ded blong Steven, samfala oli go long Antiok, long Siria. Ol man long taon ya oli strong blong wosip long ol gyaman god, mo fasin blong olgeta i nogud nomo. Long ples ya, ol disaepol oli talemaot gud nyus long ol man Isrel we oli yusum lanwis blong man Gris. “Nao paoa blong Jeova i stap long olgeta ya,” (NW) mo plante man oli bilif. Banabas mo Sol, tufala i stap wan ful yia long ples ya blong tijim ol man. Mo “long ples ya Antiok, ol man afsaed oli givim wan nem long ol man blong Jisas, se oli Kristin man, mo hemia fastaem we nem ya i kamaot.” I klia nomo we Jeova i bos long bisnes ya, from we Grik tok ya khre·ma·tiʹzo, i minim se “God nomo i givim nem ya.” Baebol i yusum Grik tok ya oltaem blong talemaot samting we God i mekem.

20. ?Agabas i talemaot wanem profet tok? ?Ol brata long kongregesen blong Antiok oli mekem wanem?

²⁰ Sam profet we oli fraetgud long God mo oli ona long hem, oli aot long Jerusalem, oli kam long Antiok tu. (11:​27-30) Wan long olgeta ya, nem blong hem Agabas, hem i talemaot “long paoa blong Tabu Speret, we bambae i no longtaem, olgeta man long wol oli kasem hadtaem we bambae oli no gat kakae.” Profet tok ya i kamtru long taem we Klodias i hed gavman blong ol man Rom. (41-​54 K.T.) Man blong raetemdaon histri, nem blong hem Josefus, hem i talem se long taem ya “ol man oli trabol tumas from we oli no gat kakae.” (Jewish Antiquities, XX, 51 [ii, 5]; XX, 101 [v, 2]) Ol brata long kongregesen long Antiok oli laekem tumas ol brata blong olgeta long Judia, taswe oli sanem hamas mane we oli save sanem blong givhan long olgeta.​—⁠Jon 13:⁠35.

Trabol i No Save Blokem Ol Disaepol

21. ?King Herod Agripa 1 i mekem wanem trabol long Pita? ?Be wanem i kamaot from?

²¹ Kwaet taem ya i finis taem king Herod Agripa 1 i stat mekem trabol long ol man we oli fraetgud long Jeova long Jerusalem. (12:​1-11) Herod i talem long ol man blong hem blong tekem naef blong faet, blong go kilim Jemes i ded. Maet oli bin katemaot hed blong hem. Nao hem i faswan aposol we hem i ded from bilif blong hem. Mo taem Herod i luk we samting ya i mekem ol man Isrel oli harem gud, hem i gohed, i talem long ol man blong hem blong holem Pita mo putum hem long kalabus. I luk olsem we wan soldia i stap long lefsaed blong Pita mo wan soldia i stap long raetsaed blong hem, nao oli fasem lefhan blong hem long soldia blong lefsaed, mo raethan blong hem oli fasem long soldia blong raetsaed. Tu narafala soldia, tufala i mekem gad long doa blong presin. Samting ya i kamaot stret long taem blong lafet blong Pasova, mo taem we oli kakae bred we i no gat is, i olsem bisket nomo. (Naesan 14-21) Herod i mekem plan se taem lafet ya i finis, bambae hem i kilim Pita i ded. Be ol brata long kongregesen oli stap prea long God from Pita, nao God i harem prea blong olgeta, jes bifo we Herod i wokem rabis plan blong hem. Plante taem God i harem prea blong yumi long sem fasin. Nao God i sanem wan enjel, ale hem i mekem merikel long fes blong ol man ya, hem i mekem aposol ya i fri long kalabus.

22. ?Wanem i kamaot taem Pita i go long haos blong mama blong Mak, Meri?

²² I no longtaem, Pita i kamtru long haos blong Meri (mama blong Jon Mak). I luk olsem we ol Kristin oli yusum haos ya blong mekem miting long hem. (12:​12-19) Taem Pita i kasem get blong haos, ples i tudak finis, mo get i lok tu. Ale Pita i singaot, nao wan haosgel, nem blong hem Roda, hem i haremsave voes blong Pita. Be hem i no go openem get. Ating fastaem ol disaepol oli ting se God i sanem wan enjel we i olsem Pita mo i tekem voes blong hem. Nao oli go openem get, nao Pita i talem long olgeta blong go talemaot long Jemes mo ol narafala brata se hem i fri (ating ol brata ya oli elda long kongregesen). Nao hem i goaot, i go haed long wan ples. Be hem i no talem long olgeta ples we bambae hem i go long hem, from we hem i no wantem mekem trabol long olgeta no long hem wan, sipos sam man oli kam blong lukaotem hem. Herod i traehad blong faenem Pita, be hem i no save faenem hem. Ale hem i panisim ol gad blong hem, ating hem i kilim olgeta oli ded.

23. ?Rul blong king Herod Agripa 1 i finis olsem wanem? ?Store ya i tijim yumi long wanem samting?

²³ Long 44 K.T., wantaem nomo rul blong king Herod Agripa 1 i finis long Sisaria. Long taem ya, hem i gat 54 yia blong hem. (12:​20-25) Hem i kros tumas long ol man Taea, wetem ol man Saedon. Taswe oli pem wan man blong Herod, nem blong hem Blastas, blong mekem wan miting we oli save askem long Herod blong wokem pis wetem olgeta. Nao Herod i “putum wan dei” (hemia stret dei we oli mekem lafet blong ona long Klodias Sisa tu), nao Herod i putum ol spesel klos blong hem, i sidaon long bigfala jea blong hem, i givim tok long olgeta. Nao olgeta oli singaot bigfala, oli talem se: “Hemia i no man nomo ya, we i stap tok. Hemia wan god ya.” Nao wantaem nomo, wan enjel blong Jeova i kilim Herod, i foldaon “from we hem i no save leftemap nem blong God.” Ale “ol wom oli kakae gat blong [Herod], nao hem i ded.” Store ya i givim woning long yumi se yumi mas stap wokbaot long fasin fraetgud long Jeova, yumi mas blokem fasin flas, mo yumi mas givim ona i go long God nomo from ol samting we yumi ol man blong hem yumi mekem.

24. ?Nekiswan haf blong magasin ya i soemaot se biaen, wanem i hapen long kongregesen?

²⁴ Nating we Herod i mekem bigfala trabol long ol disaepol blong Kraes, be “tok blong [Jeova, NW] i stap goraon moa, mo i gat plante man moa oli stap bilif long hem.” Long nekiswan haf blong magasin ya, bambae yumi luk we namba blong kongregesen i kam antap moa yet. Ol disaepol oli no mas sapraes long samting ya. ?From wanem? From we oli “stap wokbaot wetem fasin fraetgud long Jeova.”

[Futnot]

?Yu Yu Ansa Olsem Wanem?

◻ ?Olsem wanem Steven i soemaot se hem i stap fraetgud long Jeova, olsem plante man blong God we oli biaen long hem oli bin mekem?

◻ ?Ded blong Steven i mekem wanem i kamaot long saed blong wok blong prij? ?Olsem wanem samting olsemia i hapen long taem blong yumi?

◻ ?Olsem wanem Sol blong Tasas we fastaem hem i stap mekem bigfala trabol long ol Kristin, i kam wan man we i fraetgud long Jeova?

◻ ?Hu ya ol faswan hiten man we oli bilif?

◻ ?Olsem wanem Ol Wok japta 12 i soemaot se trabol i no save blokem ol man we oli stap fraetgud long Jeova?

[Tok Blong Pija Long Pej 10]

Wantaem nomo wan laet i saenaot long skae, mo wan voes i talem se: “!Sol! !Sol! ?Weswe yu yu stap ronem mi olsem?”