Yumi Mas No Fraet Blong Talemaot Kingdom Blong Jeova

“Hem i glad blong tekem olgeta we oli kam blong luk hem, oli kam insaed. Hem i stap talemaot [Kingdom blong God long olgeta, NW].”​—​OL WOK 28:​30, 31.

1, 2. ?Olsem wanem aposol Pol i save se God i stap sapotem hem? ?Mo hem i givim wanem eksampel long yumi?

OLTAEM Jeova i stap sapotem ol man we oli stap talemaot Kingdom blong hem. !Samting ya i tru long aposol Pol tu! From we God i givim paoa long hem, hem i stanap long fored blong ol haeman, hem i stanap strong taem ol man oli mekem kampani blong agensem hem, mo hem i no fraet nating blong talemaot Kingdom blong Jeova.

² Taem we Pol i stap kalabus long Rom tu, “hem i glad blong tekem olgeta we oli kam blong luk hem, oli kam insaed. Hem i stap talemaot [Kingdom blong God long olgeta, NW].” (Ol Wok 28:​30, 31) !Hemia wan nambawan eksampel long ol Wetnes blong Jeova tede! Yumi save lanem plante samting long saed blong minista wok blong Pol long ol store we Luk i raetemdaon long ol laswan japta blong Ol Wok Blong Ol Aposol​—20:1 kasem 28:31.

Tingting Blong Ol Brata i Kam Strong

3. ?Long Troas wanem i hapen? ?Samting ya i sem mak long wanem samting we i stap hapen long taem blong yumi?

³ Taem rao long Efesas i godaon finis, Pol i gohed long namba tri misinari trep blong hem. (20:​1-12) Hem i rere blong tekem wan sip blong kambak long Siria, be i harem we ol man Isrel oli mekem wan plan blong spolem hem. Maet oli mekem plan blong tekem sem sip we Pol i go long hem, mo blong kilim hem long sip ya. Taswe Pol i jenisim tingting blong hem bakegen, nao hem i pas long Masedonia. Long Troas, hem i stap wan ful wik blong leftemap tingting blong ol brata blong hem, olsem ol elda we oli stap goraon long ol kongregesen blong ol Wetnes blong Jeova tede oli mekem. Long naet bifo we Pol i aot long ples ya, hem i storeyan gogo kasem medel naet. Nao wan yang man we nem blong hem Yutikas, hem i sidaon long windo. Ating hem i taed from ol wok we hem i bin mekem long dei ya. Ale bodi blong Yutikas i stap kam hevi we i hevi, nao hem i slip. Nao hem i foldaon long windo ya we i stap antap long wan haos we i gat tri store blong hem, i kasem graon. Nao taem oli godaon blong luk hem, hem i ded finis. Be Pol i mekem hem i laef bakegen. !Traem tingbaot olsem wanem olgeta oli glad taem Pol i mekem samting ya! Nao traem tingbaot bigfala glad we bambae i kamaot long nyufala wol, taem plante milyan man oli laef bakegen long ded.​—Jon 5:​28, 29.

4. ?Long saed blong minista wok, Pol i tijim ol elda long Efesas long wanem samting?

⁴ Pol i stap go long Jerusalem. Nao hem i kamtru long wan ples, nem blong hem Maelitas. Long ples ya, hem i singaot ol elda blong Efesas oli kam, ale hem i mekem miting wetem olgeta. (20:​13-21) Hem i talem bakegen long olgeta se hem i bin tijim olgeta long ‘ol haos wanwan’. Mo tu, hem i talem se: “Long fes blong ol man Isrel mo ol hiten man tu, mi mi stap talemaot ol trutok long olgeta. Mi talem stret long olgeta, se oli mas tanem tingting blong olgeta from ol sin blong olgeta blong kam long God, mo oli mas bilif long Jisas, Masta blong yumi.” Olgeta we biaen oli tekem wok blong elda, fastaem oli tanem tingting blong olgeta from ol sin blong olgeta, mo oli gat bilif. Mo tu, aposol ya i bin trenem olgeta blong no fraet blong talemaot Kingdom long ol man we oli no gat bilif, long olgeta haos wanwan. Ol Wetnes blong Jeova tede tu oli mekem sem wok.

5. (a) ?Pol i givim wanem eksampel we i soemaot olsem wanem blong letem tabu speret i lidim yumi? (b) ?From wanem Pol i givim advaes long ol elda blong ‘lukaot gud long ol man’ blong God?

⁵ Pol i givim wan gudfala eksampel olsem wanem blong letem tabu speret blong God i lidim yumi. (20:​22-30) “Tabu Speret i fasem hem.” (NW) Hemia i min se Pol i save we hem i mas folem rod we tabu speret i soemaot long hem. Taswe aposol ya i mas go long Jerusalem, nating we long ples ya bambae oli mekem trabol long hem mo oli holem hem. Pol i tinghae long laef blong hem, be samting we i impoten moa long hem bitim ol narafala samting se hem i mas holemtaet bilif blong hem long God. Yumi mas tingting olsemia tu. Pol i talem long ol elda se oli mas ‘stap lukaot gud long ol man ya we tabu speret i putum olgeta oli stap finis long han blong olgeta.’ Hem i talem se taem bambae ‘hem i aot long olgeta’ (taem hem i ded), “olgeta ya we oli olsem wael dog nomo” bambae oli kam, ‘bambae oli ronem ol man blong Jisas, olsem we oli sipsip nomo.’ Ol man nogud ya bambae oli kamaot long medel blong ol elda nomo. Mo sam man blong Jisas we oli no gat gudfala fasin luksave, bambae oli bilif long ol gyaman tijing blong ol man ya.​—2 Tesalonaeka 2:6.

6. (a) ?From wanem Pol i save livim ol elda long han blong God? (b) ?Olsem wanem Pol i folem rul blong Ol Wok 20:35?

⁶ Blong blokem apostasi (fasin blong lego trufala tijing mo tijim wan doktrin we i narakaen), ol elda oli mas stap wekap long saed blong speret. (20:​31-38) Aposol ya i bin tijim olgeta long ol Hibru haf blong Baebol mo long ol tijing blong Jisas. Tok ya i gat paoa blong mekem olgeta oli klin long fes blong God. Samting ya i save givhan long olgeta blong kasem Kingdom blong heven, hemia “gudfala samting we God i promes finis blong givim long ol man blong hem.” Pol mo kampani blong hem oli wok had blong kasem ol samting we oli nidim long saed blong bodi. Samting ya i pulum ol elda tu blong wok had. (Ol Wok 18:​1-3; 1 Tesalonaeka 2:9) Sipos yumi folem rod ya we Pol i soemaot mo yumi givhan long ol narafala blong kasem laef we i no save finis, bambae yumi luksave mining blong tok blong Jisas we i talem se: “Man we i stap givim presen i go, hem i save harem gud moa, i winim man we i stap kasem presen blong hem.” Tok ya i no stap long ol fo gospel, be oli gat sam tok we i kolosap sem mak. Pol nomo i raetemdaon tok ya blong Jisas. Maet wan man i bin givim toktok ya long Pol, no maet God nomo i givim long hem. Sipos yumi rere blong livim sam samting blong mekem wok blong God olsem Pol, yumi save harem gud tumas tu. Hem i givim fulap taem mo paoa mo samting blong hem blong givhan long ol brata blong hem. Taswe taem hem i talem tata long ol elda blong Efesas, olgeta oli harem nogud tumas.

Letem Samting We Jeova i Wantem i Hapen

7. ?Pol i givim wanem eksampel blong soemaot olsem wanem blong folem samting we God i wantem?

⁷ Namba tri misinari trep blong Pol, kolosap i finis (56 K.T.). Nao hem i soemaot nambawan rod olsem wanem blong folem samting we God i wantem. (21:​1-14) Long Sisaria, Pol wetem ol fren blong hem oli go stap long haos blong Filip. Hem i gat fo gel blong hem we oli no mared yet, mo we “oli stap talemaot tok” we tabu speret i givim long olgeta. Long ples ya, wan Kristin profet, nem blong hem Agabas, hem i tekem strap blong Pol, i fasem han mo leg blong hem long strap ya. Nao hem i talemaot tok blong tabu speret, se ol haeman blong ol man Isrel long Jerusalem, bambae oli fasem man blong strap ya long fasin ya nomo. Bambae oli putum hem long han blong ol hiten man. Taem Pol i harem tok ya, hem i se: “Mi mi rere finis blong oli fasem mi olsem. Be i no hemia nomo. Mi mi rere blong ded long Jerusalem, from nem blong Jisas, Masta blong yumi.” Ale ol disaepol oli no moa traem pulum hem, oli livim nomo, oli se: “Mifala i stap prea we bambae i olsem we [Jeova, NW] i wantem.”

8. ?Sipos samtaem yumi faenem i strong blong lesin long gudfala advaes, yumi save tingbaot wanem?

⁸ Pol i storeyan long ol elda long Jerusalem olsem wanem God i yusum hem blong mekem minista wok long ol hiten man. (21:​15-26) Sipos yumi faenem se i strong blong harem gudfala advaes we narafala i givim long yumi, yumi save tingbaot eksampel blong Pol. Ol elda oli talem long hem se hem i mas mekem ol samting we loa i talem se i mas mekem blong kam klin long fes blong God. Mo hem i mas mekem wetem fo narafala man, mo i mas pem ol samting we fofala i nidim blong folem fasin ya. Hem i mas mekem olsem blong soemaot se hem i no stap tijim ol man Isrel we oli stap long ol ples blong ol hiten man “blong oli lego Loa ya blong Moses.” Nating we ded blong Jisas i tekemaot Loa blong Moses, be Pol i no mekem i rong taem hem i folem ol tok blong Loa long saed blong strong promes we man i mekem long God.​—Rom 7:​12-14.

Ol Man Oli Holem Pol, Be Samting Ya i No Blokem Hem

9. Ol man oli girap oli agensem Pol. ?Olsem wanem samting ya i kamaot long ol Wetnes blong Jeova tede tu?

⁹ Plante taem sam man oli mekem kampani, nao oli holem mo kilim sam Wetnes blong Jeova. Be samting ya i no save brekemdaon bilif blong ol Wetnes blong Jeova. (Yu save ridim sam eksampel long 1975 Yearbook of Jehovah’s Witnesses, pej 180-190.) Sem mak long taem blong Pol. Sam man Isrel we oli kamaot long Esia Maena, oli mekem olgeta man oli girap oli agensem Pol, nao oli holem hem. (21:​27-40) Oli luk wan man Efesas, nem blong hem Trofimas, we hem i stap wokbaot wetem Pol insaed long taon. Nao oli mekem gyaman toktok se Pol i stap mekem haos blong God i doti, from we hem i tekem sam hiten man Gris i kam insaed long hem. Ol man ya oli rere blong kilim Pol i ded, be wan komanda blong ol soldia blong ol man Rom, nem blong Klodias Lisias, hem i tekem sam kapten wetem sam soldia, nao oli kamdaon, oli kwaetem ol man ya. Olsem profet tok i talem finis, Lisias i talem long ol soldia blong oli holem Pol, oli fasem hem long jen. Be ol man Isrel nomo oli stampa blong samting ya. (Ol Wok 21:11) Kolosap ol soldia oli tekem Pol i go insaed long barik blong ol soldia we i joenem haos blong prea. Nao Lisias i harem we Pol i no agensem gavman nating. Hem i wan man Isrel, we i gat raet blong wokbaot insaed long haos blong prea. Pol i askem long komanda ya blong letem hem i tok, ale hem i tok long ol man Isrel long lanwis blong olgeta, Hibru.

10. ?Ol man Isrel long Jerusalem oli mekem wanem taem Pol i tok long olgeta? ?From wanem oli no wipim hem?

¹⁰ Pol i no fraet blong wetnes long olgeta. (22:​1-30) Hem i talem long olgeta se hem i wan man Isrel, we hem i skul long nambawan tija ya Gameliel, we ol man oli tinghae long hem. Aposol ya i eksplenem se bifo hem i stap ronem ol man we oli folem rod blong Jisas, blong kilim olgeta oli ded. Hem i stap wokbaot i go long Damaskes blong mekem olsemia, nao wantaem nomo, wan bigfala laet long skae i saenaot i kam kasem hem. Taem hem i luk bigfala laet ya we i saenaot long paoa blong Jisas Kraes, ae blong hem i blaen. Biaen, Ananaeas i mekem ae blong hem i kamgud bakegen. Afta, Masta i talem long Pol, i se: “Yu go. From we bambae mi mi sanem yu yu go longwe, long ol hiten man.” Las tok ya blong Pol i mekem olgeta i faerap. Taem oli harem tok ya, oli singaot bigfala, oli wantem kilim Pol i ded. Oli stap sakem klos blong olgeta i go olbaot, mo oli stap tekem graon blong rod, oli stap sakem i go antap, smok blong hem i go, blong soemaot we oli kros tumas. Nao komanda ya, Lisias, i talem long ol soldia blong hem blong oli tekem Pol i go insaed long barik. Nao hem i talem long olgeta blong oli wipim Pol blong mekem hem i talemaot, from wanem ol man Isrel ya oli stap agens long hem olsem. (Blong wipim man long taem ya, oli yusum wan wip we i gat plante smol rop we oli wokem long skin blong buluk. Long en blong ol rop ya wanwan, oli wokem not, no oli fasem sam pis aean no bun.) Oli rere blong wipim Pol, nao Pol i askem se: ‘?Olsem wanem? ?I stret long loa blong yufala blong wipim wan man we i anda long flaeg blong Rom, we oli no jajem hem yet?’ Taem we Lisias i harem se Pol i stap anda long flaeg blong Rom, hem i fraet tumas. Hem i wantem harem stret wanem poen we ol man Isrel oli agensem Pol from. From samting ya, hem i tekem Pol, i mekem hem i stanap long fes blong kot ya, Sanhedrin.

11. ?From wanem Pol i save talem se hem i wan Farisi?

¹¹ Blong statem toktok blong hem, Pol i talem long ol memba blong kot ya Sanhedrin se ‘tingting blong hem i no jajem hem nating long fes blong God.’ Nao hae pris Ananaeas, hem i talem long olgeta we oli stap stanap kolosap long Pol, blong wan i slavem maot blong hem. (23:​1-10) Pol i talem long hem se: “Yu yu olsem laenwol blong haos we waetwas nomo i holem. God bambae i kilim yu yu foldaon.” Samfala oli talem long Pol se: “!Yu yu stap tok nogud long hae pris blong God ya!” From we ae blong Pol i nogud, maet hem i no luksave Ananaeas. Be hem i luk we haf blong kaonsel ya oli Sadusi mo narafala haf oli Farisi, nao hem i talem se: ‘Mi mi wan Farisi be oli wantem traem mi long ples ya tede, from we mi mi putum tingting blong mi long tok ya we i talem se man we i ded, bambae i save laef bakegen.’ Taem hem i talem tok ya, wantaem nomo ol Farisi wetem ol Sadusi oli seraot long tu haf. From we ol Sadusi oli stap talem se ol dedman oli no save laef bakegen long ded, be ol Farisi oli bilif se man i save laef bakegen. Nao rao blong olgeta i kam strong tumas. From samting ya, Lisias i fraet se bambae oli brebrekem bodi blong hem. Nao hem i sanemaot ol soldia blong hem blong oli tekemaot Pol long kaonsel ya.

12. ?Olsem wanem plan blong olgeta blong kilim Pol i ded long Jerusalem i no kamtru?

¹² Nao ol man oli mekem wan plan blong kilim Pol i ded, be plan blong olgeta i no kamtru. (23:​11-35) Foti man Isrel oli mekem plan ya, nao oli mekem wan strong promes long God se bambae oli no kakae bakegen no dring bakegen gogo oli kilim Pol i ded. Be pikinini blong sista blong Pol, hem i harem nyus blong plan ya. Nao hem i girap, i talemaot long Pol mo long Lisias. Nao Lisias i talem long ol soldia blong hem se oli mas tekem aposol ya i gotru long hed gavman Antonias Filiks long Siseria, we hem i stampa taon blong gavman blong ol man Rom long Judia. Filiks i promes long Pol se bambae i mekem kot long bisnes blong hem. Nao hem i talem long ol soldia blong oli holem Pol long haos ya blong King Herod, we hem tu i mekem hedkwota blong hem long hem.

Pol i No Fraet Blong Stanap Fored Long Ol Haeman

13. ?Pol i wetnes long Filiks long saed blong wanem? ?Ol tok blong Pol oli gat paoa long Filiks olsem wanem?

¹³ I no longtaem aposol ya i stap stanap fored blong Filiks, i stap wetnes long hem, we i no fraet nating, mo i stap talemaot ol gyaman toktok blong ol man we oli agensem hem. (24:​1-27) Long fored blong ol man Isrel we oli agensem hem, Pol i talemaot se hem i no mekem ol man oli girap, oli agens long hem, no gat. Hem i talem se hem i bilif long olgeta tok blong Loa blong Moses, mo long ol buk blong ol profet tu. Mo hem i bilif se “God bambae i mekem olgeta man oli laef bakegen long ded, ol man we oli stret, wetem ol man we oli no stret.” Hem i bin go antap long Jerusalem blong “tekem mane i go” long ol man ples blong hem. (Hemia mane we oli givim olsem wan presen long ol man blong Jisas we oli pua tumas. Maet samting ya i kamaot from we ol man i mekem trabol long olgeta.) Mo tu, Pol i mekem hem i klin finis long fes blong God, olsem ol man jyu oli mekem. Nao Filiks i no jajem Pol, hem i satem kot blong bisnes ya fastaem. Biaen, Pol i prij long Filiks wetem woman blong hem, Drusila (hem i gel blong King Herod Agripa namba 1). Pol i stap tokbaot fasin blong bilif long Jisas Kraes, ol gudfala fasin, mo bisnes ya se man i mas blokem ol samting we hem nomo i wantem, mo dei we God bambae i jajem ol man. Taem Filiks i harem tok blong Pol, hem i seksek gud. Nao hem i sanemaot Pol. Be biaen, oltaem hem i stap singaot Pol blong i kam. Hem i stap ting se maet Pol i givim sam mane long hem blong letem hem i gofri, be no gat. Filiks i save se Pol i no gat poen long hem. Be hem i livim Pol i stap long kalabus, from we hem i wantem mekem ol man Isrel oli harem gud long hem. Tu yia i pas, nao Posyas Festas i tekem ples blong Filiks.

14. ?Taem hem i stanap long fes blong Festas, Pol i yusum wanem rod we i stret long loa? ?Olsem wanem samting olsem i stap hapen tede tu?

¹⁴ Pol i no fraet blong talemaot ol poen blong hem long fes blong Festas tu. (25:​1-12) Hem i talem se sipos hem i brekem loa, hem i mekem sam samting we i stret blong hem i ded from, oraet. Be sipos tok blong olgeta blong talemaot ol poen long hem i no tru, i no gat man we i gat raet blong putum hem long han blong ol man Isrel. Ol man we oli stap aninit long flaeg blong Rom, oli gat raet blong askem blong pas long kot long Rom. (Long taem ya oli mas stanap fored long Nero.) Taswe Pol i talem se: “Mi mi wantem go talemaot bisnes ya blong mi long fes blong Sisa, long Rom.” Festas i agri long samting ya. Olsem profet tok i talem finis, bambae Pol i “wetnes long Rom.” (Ol Wok 23:​11, NW) Tede tu, ol Wetnes blong Jeova oli yusum evri rod blong ‘blokem ol enemi blong gud nyus mo mekem hem i stanap long saed blong loa.’​—Filipae 1:7, NW.

15. (a) ?Taem Pol i stanap fored long King Agripa mo Sisa, wanem profet tok i kamtru? (b) ?Olsem wanem Sol i mekem olsem wan buluk we ‘i stap kikbak long stik ya we i wipim hem’?

¹⁵ King Herod Agripa namba 2 mo sista blong hem Benis, tufala i aot long not long Judia, tufala i kamdaon long Siseria blong luk Festas. (Tufala i slip wanples olsem we tufala i mared.) Nao long taem ya, Herod i letem Pol i talemaot ol poen blong hem. (25:13 kasem 26:23) From we Pol i wetnes long fored long Agripa mo Sisa, hem i mekem profet tok ya i kamtru, we i talem se bambae hem i talemaot nem blong Masta long ol king. (Ol Wok 9:15) Pol i storeyan long Agripa long ol samting we i hapen long hem long rod we i ron i godaon long Damaskes. Pol i talemaot tok blong Jisas long taem ya se: “Yu yu olsem buluk we taem masta i wipim long stik, be i stap kikbak long stik ya.” Olsem wan stronghed buluk i mekem nogud long hem wan sipos hem i stap kikbak long stik ya, Sol tu i stap mekem i nogud long hem wan from we hem i stap agens long ol man blong Jisas, we God i stap givim paoa long olgeta.

16. ?Taem Festas mo Agripa tufala i harem store blong Pol, tufala i talem wanem?

¹⁶ ?Taem Festas mo Agripa tufala i harem tok blong Pol, tufala i mekem wanem? (26:​24-32) Festas i no save kasem mining blong tok blong Pol long saed blong laef bakegen long ded. Mo tu, hem i sapraes tumas we bilif blong Pol i strong olsemia. Taswe hem i talem se: “!Pol, yu yu krangke! Yu stap lukluk insaed long bisnes ya tumas. !Naoia, hed blong yu i krangke finis!” Sem mak tede, samfala oli talem se ol Wetnes blong Jeova tu oli krangke. Be ol Wetnes blong Jeova oli stap mekem olsem Pol nomo, ‘ol tok we oli stap talem oli stret nomo mo oli tru.’ Agripa i talem se: “Smoltaem moa, bambae yu pulum mi mi kam Kristin man.” (NW) Agripa i finisim toktok blong Pol long ples ya. Mo hem i talem nomo se sipos Pol i no bin talem se hem i wantem go stanap long fes blong Sisa, bambae i isi nomo blong letem hem i gofri.

Denja Long Solwora

17. Storebaot ol trabol we oli kamaot long Pol long solwora, taem hem i stap go long Rom.

¹⁷ Taem Pol i stap go long Rom, kolosap hem i lusum laef blong hem “long medel solwora.” (2 Korin 11:​24-27) Oli putum Pol mo sam narafala man blong kalabus long han blong wan kapten blong ol soldia, nem blong hem Julias. Ale oli aot long Siseria long sip, oli stap go from Rom. (27:​1-26) Taem oli kamtru long Saedon, Julias i letem Pol i gosoa blong luk ol brata blong hem. Oli leftemap tingting blong hem long saed blong speret. (Skelem tok ya wetem 3 Jon 14.) Long Esia Maena long taon ya Maera, Julias i faenem wan sip we i stap go long Itali, i stap karem ol sid blong wit i go. Nao i putum olgeta presin man oli go long sip ya. Sip ya i ron slo nomo, from we win i blokem hem. Be nating, olgeta oli kam kasem wan ples we oli kolem Gudfala Pasis, we i kolosap long taon ya Lasea, long aelan ya Krit. Taem oli aot long ples ya, oli stap go from Finiks, wan bigfala win i girap. Win ya, oli kolem notis win. Win ya i kamdaon i kasem olgeta, i stap tekem olgeta i go. Olgeta ya oli fraet, from we afsaed long not Afrika, i gat wan ples, nem blong hem Sitis, we solwora i no dip, mo sanbij i sopsop tumas. Nao oli ting se maet sip i gosoa long ples ya. From samting ya “oli slakem sel i kamdaon.” Mo oli pulum sam rop i goraon aninit long sip, nao oli fasem strong olgeta blong holem sip. Bigfala win ya i stap blu tumas, nao long nekis dei oli stap sakem ol kago blong sip i go long solwora. Mo long nekis dei bakegen, olgeta ya oli sakem ol samting blong sip tu i go (ol sel no ol jenis blong mas blong sip). Olgeta oli no moa save tingbaot se bambae olgeta i laef. Be long naet wan enjel blong God i kamtru long Pol, i talem long Pol se hem i no mas fraet, from we bambae hem i mas go stanap long fes blong Sisa long Rom. Ol man oli harem gud lelebet taem aposol ya i talem long olgeta se win ya bambae i dragem sip ya i gosoa long wan aelan.

18. ?Long en blong bisnes ya, wanem i hapen long Pol mo ol narafala man long sip?

¹⁸ Olgeta long sip oli no lus. (27:​27-44) Olgeta i stap gogo i kasem namba 14 dei long bigfala win ya. Long naet blong hem, ol boskru oli ting se olgeta i stap kam kolosap long soa samples. Nao oli sakem wan ledlaen blong luk se wora i dip olsem wanem, mo oli faenem se i tru we oli stap kam kolosap long soa. Nao oli fraet se sip ya bambae i brok long ol ston. Nao oli tekem fo angka, oli sakem. Nao Pol i talem strong long olgeta se oli mas kakae. Ale ol 276 man long sip oli kakae. Nao taem olgeta evriwan oli kakae finis, oli tekemaot ol bag wit we i stap long sip, oli sakem i go long solwora blong mekem sip i emti. Taem i brok delaet, ol boskru oli katem ol rop blong fo angka ya, nao oli lusumaot ol rop we oli stap fasem ol bigfala parel ya we oli yusum blong stia. Nao oli pulum sel long fored, blong win i tekem sip i go. Nao sip i kasem sanbij daon, long wan ples we solwora i no dip. Fored blong hem i fas, mo ol bigsi oli stap brekemaot ol timba blong hem long af. Be olgeta man long sip oli kasem sanbij, i no gat wan i lus.

19. ?Long Molta, wanem i hapen long Pol? ?Hem i mekem wanem blong givhan long sam narafala long ples ya?

¹⁹ Taem olgeta oli gosoa finis oli harem we nem blong aelan ya, se Molta. Olgeta oli wetwet evriwan, oli kolkol mo taed. Be ol man blong ples ya, “oli mekem i gud tumas” long olgeta. (28:​1-16) Pol i pikimap wan hip stik, i sakem olgeta long faea. Nao wan snek i kamaot long ol stik ya, from we i hot tumas, nao i kakae han blong Pol. (Tede, i no gat posen snek long Molta. Be snek ya, Baebol i talem se taem hem i kakae man, “be man i mas ded from.”) Ol man Molta oli ting se Pol i man blong kilim man. Oli ting se “ol god oli no save letem hem i stap laef.” Be taem oli luk we han blong Pol i no solap, mo Pol i no foldaon wantaem nomo i ded, olgeta oli stap talem se Pol i wan god. Nao bigfala jif blong Molta, nem blong hem Publias. Papa blong hem, hem i sik, nao Pol i mekem hem i gud bakegen. Mo i mekem plante narafala sikman long aelan ya oli gud bakegen tu. Olgeta i stap tri manis long ples ya. Nao, Pol, Luk, mo Aristakas, trifala i klaem long wan sip we i tekem nem ya “Ol Pikinini Boe blong Sas” (Kasto mo Polakis, hemia nem blong tufala god ya we i twin. Ol man oli ting se tufala god ya i stap lukaot gud long ol man we oli stap long solwora). Nao olgeta oli kamtru long ples Puteoli. Nao Julias i lidim olgeta i go long Rom. Ol brata long Rom oli kam blong faenem olgeta long rod. Ale oli mitim olgeta long wan ples we Apias i putum haos blong maket long hem, mo long ples ya we i gat tri hotel long hem. Taem Pol i luk olgeta, hem i talem tangkyu long God from, mo tingting blong hem i kam strong moa. Taem olgeta i kamtru long Rom, gavman i letem Pol i tekem wan haos blong i stap long hem. Mo i putum wan soldia blong lukaot long hem.

Gohed Blong Talemaot Kingdom Blong Jeova

20. ?Pol i stap bisi long wanem wok long haos blong hem long Rom?

²⁰ Long haos blong hem long Rom, Pol i no fraet blong talemaot Kingdom blong Jeova. (28:​17-31) Hem i talem long ol haeman blong ol man Isrel, i se: “From hop blong yumi man Isrel, oli fasem mi long jen ya.” (NW) Hop ya i minim se bilif long Mesaea. Yumi tu, yumi mas rere blong harem nogud long bodi blong yumi from samting ya. (Filipae 1:29) Nating we bighaf blong ol man Isrel oli no bilif, be plante hiten man mo wan smol kampani blong ol man Isrel oli gat gudfala hat. (Aesea 6:​9, 10) Nao long tu fulyia (59-61 K.T.) Pol i stap long haos ya. Mo hem i glad blong tekem olgeta we oli kam blong luk hem, oli kam insaed. “Hem i stap talemaot [Kingdom blong God long olgeta, NW], mo i stap tijim ol man long Jisas Kraes, Masta blong yumi. Mo hem i stap tok olsem, be tingting blong hem i no seksek, mo i no gat man i save blokem hem.”

21. ?Go kasem we laef blong hem i finis long wol, Pol i soemaot wanem nambawan eksampel?

²¹ I luk olsem we Nero i talemaot se Pol i no gat poen, ale hem i lego hem i gofri. Nao aposol ya i joen bakegen wetem Timote mo Taetas, mo trifala i wok wanples. Be hem i kalabus bakegen long Rom (65 K.T.), mo i luk olsem we hem i ded long ples ya long han blong Nero. (2 Timote 4:​6-8) Go kasem we laef blong Pol i finis, hem i soemaot wan nambawan eksampel olsem wanem blong talemaot Kingdom blong God, long fasin we man i no fraet nating. Ol man tede tu we oli givim laef blong olgeta i go long God finis, oli mas soemaot sem fasin. Long ol las dei ya, oli mas no fraet blong talemaot Kingdom blong Jeova.

?Bambae Yu Yu Ansa Olsem Wanem?

◻ ?Long saed blong minista wok, Pol i givim wanem trening long ol elda long Efesas?

◻ ?Pol i soemaot wanem rod long saed blong fasin blong mekem ol samting we God nomo i wantem?

◻ Ol man oli girap oli agensem Pol. ?Olsem wanem samting ya i sem mak long samting we i kamaot long ol Wetnes blong Jeova tede?

◻ ?Taem Pol i stanap long fored blong hed gavman Festas, hem i yusum wanem rod we i stret long loa? ?Olsem wanem ol Wetnes blong Jeova tede oli mekem samting ya tu?

◻ ?Pol i bisi long wanem wok long haos blong hem long Rom? ?From samting ya, hem i givim wanem eksampel long yumi?