Mekem Wosip Long Jeova Wetem Glad

“!Yumi glad, yumi mekem wosip long [Jeova, NW]! !Yumi kam long fes blong hem, yumi singsing!”​—⁠OL SAM 100:⁠2.

1, 2. (a) ?Long Belin long Jemani, wanem i kamaot bifo, we i blong leftemap wan nesen antap long ol narafala nesen? ?Oli traehad blong stanemap wan “Taosen Yia Reich,” be wanem i hapen? (b) ?Samting we i hapen long stad ya Olympia long 1936 i narakaen long wanem samting we i kamaot long ples ya long Julae 1990? ?Wanem stampa blong glad blong grup ya we oli kamaot long plante defren nesen, nao oli joen wanples?

PLES, hem i stad we oli kolem Olympia, long taon ya Belin. 54 yia bifo, trabol i bin kamaot long gudfala stad ya. Strong lida blong ol Nasi, nem blong hem Adolf Hitler, i tok nogud long wan blakman Amerika. ?From wanem? From we man ya i winim sam resis long stad ya, mo i kasem fo medel we oli wokem long gol. !Hitler i bin talem se “ol man Yurop oli moa gud, bitim ol narafala man!”a Taswe taem blakman Amerika ya i win long resis, Hitler i harem i nogud tumas. Be long dei ya, Julae 26, 1990, olkaen man, blakman, waetman, yeloman, we oli kamaot long 64 nesen, oli kam wanples. 44,532 man oli hivap long stad ya long “Klin Lanwis” Distrik Asembli blong ol Wetnes blong Jeova. !Long Tasde aftenun ya, ol man ya oli glad bitim mak! Taem oli mekem tok blong baptaes finis, 1,018 man oli singaot se, “Ja!” mo bakegen “Ja!” we long lanwis Jemani tok ya i min se ‘yes.’ Oli soemaot se oli givim laef blong olgeta i go long Jeova God finis, blong mekem wok blong hem.

² Ol nyufala Wetnes ya oli goaot long stad nao, mo oli wokbaot long ples we bambae oli baptaes long wora. Samting ya i tekem 19 menet. Long ol 19 menet ya, ol man long stad oli klaphan strong, noes ya i olsem tanda nomo. Ol man we bifo oli win long ol resis we oli kolem ‘Olympic Games,’ oli neva harem noes olsem ya. Ol man long stad ya oli klaphan strong blong talem welkam long fulap handred nyufala brata mo sista blong olgeta we oli kamaot long plante defren nesen, nao oli stap soemaot bilif ya we i save winim wol. (1 Jon 5:​3, 4) Oli save se taem Kraes i rul long Kingdom blong God blong wan taosen yia, bambae hem i givim fulap blesing long ol man. Hemia nao stampa blong glad blong olgeta.​—⁠Hibrus 6:​17, 18; Revelesen 20:​6; 21:​4, 5.

3. ?Fasin blong ol man we oli hivap long asembli ya i soemaot wanem trutok bakegen? ?Olsem wanem?

³ Long ples ya i no gat wan man we i no laekem narafala man from kala no nesen blong hem. ?From wanem? From we olgeta evriwan oli toktok klin lanwis blong Baebol. Samting ya i makem long tingting blong yumi bakegen se tok ya blong Pita i tru, i se: “Naoia mi mi luk we God i stap mekem i sem mak nomo long olgeta man. Hemia wan trutok ya. Sipos wan man i ona long God, mo i mekem ol samting we i stret long fes blong hem, bambae God i glad long hem, i nating we hem i wan man Isrel, no i kamaot long wan narafala laen olgeta.”​—⁠Ol Wok 10:​34, 35; Sefanaea 3:⁠9.

4. ?Taem bighaf blong ol man long asembli oli kasem bilif, oli stap long wanem trabol taem? ?Olsem wanem Jeova i ansarem ol prea blong olgeta?

⁴ Plante man we oli kam long asembli ya long Belin oli kasem bilif long trabol taem. I stat long taem blong rul blong ol Nasi (1933-45), mo biaen, long rul blong ol Komunis long Is Jemani, i gat plante yia we ol gavman ya oli agensem ol Wetnes blong Jeova, mo oli putum tabu long wok blong olgeta. Long Maj 14, 1990, oli jes letem olgeta oli fri long saed blong loa blong mekem wok blong olgeta bakegen. Taswe plante blong olgeta, taem oli harem tok ya blong gud nyus, ‘oli kasem plante trabol, be Tabu Speret i mekem olgeta i harem gud tumas.’ (1 Tesalonaeka 1:⁠6) Naoia oli fri moa blong mekem wosip long Jeova, mo glad blong olgeta i no gat mak blong hem.​—⁠Skelem wetem Aesea 51:11.

Taem Blong Glad

5. ?Olsem wanem ol man Isrel oli makem bigfala merikel we Jeova i mekem long Red Si blong sevem olgeta?

⁵ Long Is Yurop mo naoia long sam haf blong Afrika mo Esia, oli letem ol brata blong yumi oli fri blong mekem wok blong Jeova. Samting ya i mekem yumi tingbaot olsem wanem Jeova i bin sevem ol man blong hem long taem bifo. Yumi save tingbaot bigfala samting we Jeova i mekem long Red Si, mo olsem wanem ol man Isrel oli singsing strong blong talem tangkyu long Jeova. Oli bin talem se: “[Jeova, NW], ol narafala god long wol ya, be i no gat wan long olgeta we i olsem yu. Yu yu gudfala tumas, yu yu tabu tumas. Yu yu stap mekem ol merikel mo ol bigbigfala wok. I no gat narafala god nating we i olsem yu.” (Eksodas 15:11) ?Tede tu, yumi stap harem gud long ol bigbigfala samting we Jeova i stap mekem blong givhan long ol man blong hem? !Yes yumi harem gud tumas from!

6. ?Yumi save lanem wanem long store blong ol man Isrel long 537 B.K.T., taem oli singaot from glad?

⁶ Long 537 B.K.T.,b taem ol man Isrel oli aot long kalabus long Babilon, nao oli gobak long ples blong olgeta, oli glad bitim mak. Olsem profet tok blong Aesea i talem finis, nesen ya blong Jeova i save talem se: “!Yu luk! God i sevem mi. Bambae mi mi trastem hem, mo mi no save fraet. From we Ja Jeova i givim paoa long mi, mo hem i mekem mi mi strong. Hem i sevem mi.” !Hemia i bigfala glad ya! ?Mo olsem wanem nesen ya bambae i soemaot glad ya? Aesea i gohed i se: “Long taem ya bambae yufala i talem se: ‘Yufala i mas talem tangkyu long Jeova. Singaotem nem blong hem. Talemaot long ol man ol samting we hem i bin mekem. Talemaot se ol man oli mas leftemap nem blong hem. Singsing long Jeova, from we hem i mekem ol samting we oli nambawan tumas.’ ” Yes long taem ya, nesen ya i “singaot long glad,” oli “talemaot long olgeta ples long wol” ol bigbigfala wok blong Jeova. Ol man blong Jeova tede oli mekem i sem mak, from we i olsem we olgeta tu oli kamaot long kalabus, nao oli friman.​—⁠Aesea 12:​1-6.

Glad Blong Mekem Wok Blong Jeova

7. ?Long 1919, ol man blong God oli glad tumas from we oli gofri long wanem tufala fasin?

⁷ Long taem blong yumi, ol man blong Jeova oli stat blong singaot from glad long 1919, taem God i mekem wan bigfala samting, blong oli save kam friman. Long Maj 26, 1919, oli letem ol memba blong Hed-Kampani oli gofri long presin blong Yunaeted Stet. Naen manis finis oli bin holem olgeta oli stap kalabus from sam gyaman ripot, se oli stap agensem gavman. !Taem oli letem olgeta oli gofri long kalabus, olgeta long Bruklin Betel oli mekem wan bigfala lafet blong talem welkam long olgeta bakegen! Long taem ya, olgeta blong smol kampani we tabu speret i makemaot olgeta, oli glad from wan narafala samting tu. Oli fri nao long saed blong speret, oli no moa kalabus long Bigfala Babilon, hemia ol gyaman skul we Setan i stap yusum blong holem ol man blong wol oli stap aninit long paoa blong hem.​—⁠Revelesen 17:​3-6; 18:​2-5.

8. ?Ol man we oli hivap long asembli long Seda Poen long 1919, oli sapraes taem Sosaete i talemaot wanem nyufala magasin? ?Long taem ya oli singaot olgeta blong mekem wanem?

⁸ Long 1919 plante bigfala samting oli kamaot. Be antap long ol samting ya, long Septemba 1 kasem 8, long Seda Poen, Oayo, U.S.A., ol man blong God oli mekem wan asembli. Namba faef dei blong asembli ya, oli kolem “Dei Blong Ol Man We Oli Wok Tugeta.” Presiden blong Watch Tower Sosaete, J. F. Rutherford, hem i wekemap tingting blong ol 6,000 man we oli stap lesin, long wan tok we nem blong hem: “Talemaot Kingdom.” Fastaem, hem i storeyan long Revelesen 15:2 mo Aesea 52:⁠7. Afta, hem i talem long ol man ya se bambae i gat wan nyufala magasin, nem blong hem, The Golden Age (naoia oli kolem Wekap!). Evri tu wik bambae oli prentem nyufala namba blong magasin ya, mo bambae ol man oli mas seremaot ol magasin ya long wok blong prij. Hem i klosem toktok blong hem olsem ya, i se: “Olgeta man we oli givim laef blong olgeta fulwan long Masta, olgeta we oli no fraet, we hat blong olgeta i klin, we oli laekem God mo Masta blong yumi Jisas wetem olgeta tingting, olgeta paoa, olgeta laef, mo olgeta bodi blong olgeta, bambae oli gat jans blong joen long wok ya. Mo bambae oli harem gud tumas from. Yufala i mas askem long Masta blong yumi blong lidim yufala, nao hem i save mekem yufala olsem ol tru ambasada blong hem, we yufala i wok gud long wok blong hem mo bilif blong yufala i stap strong. Afta, yufala i save goaot blong mekem wok blong hem wetem wan singsing blong glad long hat blong yufala.”

9, 10. ?Olsem wanem Jeova i bin blesem wok blong prentem tufala magasin ya, Wajtaoa mo Wekap!?

⁹ !Long olgeta ples long wol, man i save harem “singsing blong glad” ya! Fulap man oli stap ridim Wekap! magasin. From samting ya, naoia mifala i prentem 12,980,000 kopi blong evri namba blong magasin ya, long 64 defren lanwis. Wekap! i gat paoa, hem wetem narafala magasin ya Wajtaoa, tufala tugeta i pulum plante man oli kam long trutok. Long wan kantri long Orian, wan sista we hem i paenia, hem i wokem wan rod blong magasin. Taem hem i karem ol nyufala namba blong ol magasin oli go long wan man, sista ya i sapraes tumas, from we evri taem man ya i givim 7 dola (U.S.) blong givhan long wok blong ol Wetnes blong Jeova long olgeta ples long wol. !Man ya i rili tinghae long gudfala wok ya blong talemaot Kingdom!

¹⁰ Yia ya, hem i namba 113 yia we mifala i prentem Wajtaoa magasin. Naoia mifala i stap prentem 15,290,000 long evri magasin long 111 lanwis. Long 59 lanwis ya, Wajtaoa i kamaot long semtaem, mo i gat sem store insaed, long lanwis blong olgeta wanwan. Smol kampani we tabu speret i makemaot olgeta oli stap gohed long wok blong ‘slef we i stret.’ Oli stap “seraot ol kakae [long saed blong speret] long stret taem blong hem.” (Luk 12:​42, NW) Long 1990, ol Wetnes blong Jeova oli mekem rod blong 2,968,309 man oli save kasem tufala magasin ya long sabskripsen. Hemia i 22,7 % antap long namba blong ol nyufala sabskripsen long 1989.

Fulap Moa Long Glad

11. (a) ?Long 1922 long Seda Poen, oli singaot ol man blong God blong mekem wanem? (b) ?Olsem wanem bigfala glad long taem ya i kam bigwan moa kam kasem tede?

¹¹ Long Septemba 1922, 10,000 man blong God oli hivap bakegen long seken asembli long Seda Poen. Nao oli fulap moa long glad. I gat 361 man oli tekem baptaes long asembli ya. Brata Rutherford i givim wan tok we i stanap long Matyu 4:​17, nem blong hem, “Kingdom Blong Heven i Kam Kolosap Nao.” Hemia bigfala poen blong tok blong hem: “Ol man long wol oli mas save se Jeova i God, mo Jisas Kraes i King blong ol king mo Masta blong ol masta. Taem ya i bigfala taem long histri. !Yufala i luk, King i rul finis! Yufala i man blong talemaot hem. Taswe, yufala i mas talemaot, talemaot, talemaot King ya mo Kingdom blong hem.” Taem hem i talem olsem ya, ol man we oli stap lesin oli singaot bigwan from glad. Ale namba blong olgeta i stap kam antap kamkam long 1989, bitim 6,600,000 man oli hivap long 1,210 asembli blong ol Wetnes blong Jeova long plante defren ples long wol. I gat 123,688 man oli tekem baptaes long ol asembli ya.

12. (a) ?Tede ol man blong God oli kasem nambawan glad from wanem? (b) ?Olsem wanem yumi save mekem wok blong Jeova, mo wantaem yumi save obei long ‘ol haeman mo gavman blong wol’?

¹² Ol Wetnes blong Jeova oli glad se oli friman, mo oli stap lukaot gud long fasin fri blong olgeta. Antap long ol narafala samting, oli glad we profet tok blong Jisas i stap kamtru long olgeta, se: “Nao bambae yufala i save ol trutok, mo trutok ya bambae i mekem yufala i friman.” !Oli glad tumas we oli fri long ol kastom mo tijing blong ol gyaman skul! !I no gat tok blong talemaot glad we oli harem from we oli save Jeova mo Pikinini blong hem, mo oli stap wok tugeta wetem tufala! !Mo long semtaem, oli save tingbaot we long fyuja bambae oli save kasem laef we i no save finis! (Jon 8:32; 17:3; 1 Korin 3:​9-11) Ol man blong God oli mas stap laef long wol ya we ‘ol haeman mo gavman’ oli bos long hem. Be oli glad tumas taem ol haeman mo gavman ya oli letem olgeta oli fri blong talemaot gudfala hop blong laef long fyuja aninit long rul blong Kingdom blong Jeova long han blong Kraes. Oli rere blong ‘givimbak long Sisa ol samting we i blong Sisa.’ Semtaem, ‘samting we i blong God oli givimbak long God.’​—⁠Rom 13:​1-7; Luk 20:25.

13. ?Olsem wanem ol Wetnes blong Jeova oli soemaot glad blong olgeta, taem ol haeman oli letem olgeta oli fri moa blong mekem wok blong Jeova?

¹³ Be sipos ol gavman mo haeman oli traem blokem ol Wetnes blong Jeova, blong oli no save mekem wok blong God, oli ansa olsem ol aposol bifo, se: “Mifala i mas obei long God, mifala i no save obei long ol man nomo.” Taem ol haeman ya oli lego ol aposol ya oli gofri, ol aposol “oli goaot . . . oli stap harem i gud tumas.” ?Olsem wanem oli soemaot se oli glad? “Evri dei, insaed long haos blong God, mo insaed long ol haos blong ol man, oli stap tijim ol man, mo oli stap talemaot gud nyus ya blong Jisas, se hem i Mesaea.” (Ol Wok 5:​27-32, 41, 42) Long sem fasin, ol Wetnes blong Jeova tede oli harem i gud tumas taem oli fri moa blong gohed long minista wok blong olgeta. Long plante kantri, Jeova i openem rod blong olgeta. Blong soemaot bigfala glad blong olgeta, ol Wetnes oli wok strong blong talemaot nem blong Jeova mo Kingdom blong Jisas Kraes we i no longtaem bambae hem i kam.​—⁠Skelem wetem Ol Wok 20:​20, 21, 24; 23:11; 28:​16, 23.

Stanap Strong Wetem Fasin Glad

14. ?Olsem wanem frut ya blong tabu speret, glad, i moa gud olgeta, i bitim glad we diksonari i tokbaot?

¹⁴ ?Wanem bigfala glad we ol trufala Kristin oli gat? Hemia i no olsem glad blong smoltaem we ol man oli gat, taem oli win long resis long ‘Olympic Games.’ No gat. Glad ya i stap dip insaed long hat blong man, mo i stap oltaem. Hem i wan frut blong tabu speret blong God. God i stap givim frut ya long “ol man we oli obei long hem.” (Ol Wok 5:32) Diksonari we oli kolem Webster’s i talem se taem man i glad, ‘i no se hem i harem gud nomo, be hem i glad dip insaed long hat blong hem. I no se man ya i harem i glad nomo, be hem i stap soemaot glad ya long fes mo long fasin blong hem.’ Long laef blong ol Kristin man, glad i gat wan bigfala mining antap bakegen. Glad blong yumi i stanap long bilif blong yumi, taswe hem i gat paoa, i save mekem yumi stanap strong. “Glad blong Jeova, i stap givim paoa long yufala.” (Nehemaea 8:10) Ol man blong God oli mas wokem fasin glad ya long Jeova. Hem i no olsem glad blong smoltaem we ol man blong wol oli kasem from ol pleplei blong wol mo ol rabis fasin long saed blong bodi. No gat. Glad ya long Jeova i moa gud olgeta.​—⁠Galesia 5:​19-23.

15. (a) ?Olsem wanem ol trufala Kristin we oli stanap strong oli kasem glad? (b) Talem sam vas we oli save givhan long yumi blong mekem tingting blong yumi i strong blong stap glad.

¹⁵ Tingbaot ol brata blong yumi long Yukren. Jes biaen long 1950, ‘gavman mo ol haeman’ oli aotem plante taosen brata long kantri ya, oli sanem olgeta oli go long Saebiria. Long ples ya oli stap trabol tumas. Biaen, taem gavman i letem olgeta oli gofri, ol brata ya oli talem tangkyu, be i no olgeta evriwan we oli gobak long ples blong olgeta. ?From wanem? From we bigfala wok we oli bin mekem long Is i pulum olgeta blong tingbaot tok blong Jemes 1:​2-4: “Ol brata mo sista, taem plante samting oli stap kam blong traem yufala, bambae yufala i save luk olgeta olsem samting blong harem gud from. From we yufala i save, taem bilif blong yufala i strong, nao yufala i winim ol samting ya blong traem yufala, bambae yufala i save kam strong moa blong stanap longtaem.” Yes, olgeta oli harem gud tumas long wok blong pikimap kakae long saed blong speret long ples ya, taswe oli wantem stanap strong longtaem moa long wok ya. Mo long ol asembli we ol Wetnes blong Jeova oli jes mekem long Polan, oli glad tumas blong mekem welkam long plante Wetnes we oli kam longwe long Is long ol ples we oli stap kolosap long solwora we oli kolem Pasifik. Fasin stanap strong mo fasin glad, tufala fasin ya i bin joen blong mekem gudfala frut ya i kamaot. Tru ya, olgeta man blong God we oli stanap strong longtaem wetem fasin glad long wok blong Jeova, oli save talem se: “Mi, bambae mi mi harem gud long Jeova nomo. Mi bambae mi glad long God we i sevem mi. Haefala Masta ya Jeova, hem i givim bigfala paoa long mi.”​—⁠Habakuk 3:​18, 19; Matyu 5:​11, 12.

16. ?Olsem wanem gudfala eksampel blong Jeremaea mo Job i save leftemap tingting blong yumi long wok blong prij?

¹⁶ ?Be olsem wanem yumi save stap glad taem yumi mas prij long ol stronghed we oli agensem trutok? Tingbaot: Ol profet blong God long taem bifo oli kasem ol trabol olsemia, be oli stap glad. Taem Jeremaea i kasem wan bigfala traem, hem i talem se: “Mi mi faenem ol tok blong yu, nao i olsem we mi mi kakae olgeta. Ol tok blong yu i leftemap tingting blong mi, i mekem hat blong mi i harem gud. O Jeova, God blong ol Ami, nem blong yu i stap long mi.” (Jeremaea 15:16) !Tingbaot nambawan blesing ya! !Nem blong Jeova i stap long yumi! !Yumi stap wetnes long nem ya! Sipos yumi wanwan i stadi Baebol oltaem, mo yumi joen fulwan long ol Kristin miting, samting ya i save leftemap tingting blong yumi blong gohed, nao yumi save harem gud tumas long trutok. Bambae yumi soemaot glad ya long fasin blong yumi long wok blong prij, mo long smael we i stap long fes blong yumi from we yumi talemaot Kingdom. Nating we Job i kasem wan strong traem, be hem i save talem long saed blong ol enemi blong hem se: “Mi mi save smael long olgeta​—⁠olgeta oli no save bilif​—⁠mo glad long fes blong mi oli no save tekemaot.” (Job 29:24) Olsem Job we i stanap strong long bilif blong hem, yumi no mas letem tingting blong yumi i foldaon taem ol man oli agensem yumi, no oli jikim no daonem yumi. !Gohed blong smael! Fes blong yumi i save soemaot glad blong yumi, mo samting ya i save pulum plante man blong lesin long mesej we yumi stap talemaot.

17. ?Olsem wanem fasin stanap strong wetem fasin glad i save karem frut?

¹⁷ Oltaem yumi stap prij long sem teritori bakegen. Yumi mitim ol man we yumi bin prij long olgeta finis. From samting ya, plante man we hat blong olgeta i stret oli save luk fasin stanap strong mo glad we yumi soemaot, nao samting ya i save pulum olgeta blong tingbaot mo stadi moa long gudfala hop we yumi holem long hat blong yumi. !Yumi save kasem fulap glad long ol Baebol-stadi we oltaem yumi stap mekem long olgeta! !Mo taem hat blong olgeta i kam fulap long ol gudfala trutok blong Baebol, nao oli joen wetem yumi blong mekem wok blong Jeova, yumi harem i glad tumas! Long taem ya, yumi save talem olsem aposol Pol i bin talem long ol nyufala Kristin long taem blong hem, i se: “Tingting blong mifala i stap strong, se taem Jisas, Masta blong yumi bambae i kamtru, bambae hem i glad long mifala. ?Be tingting blong mifala i stap strong olsem from wanem? From yufala ya nao. Long Dei ya, bambae yufala i save mekem mifala i harem gud. Bambae yufala i olsem praes blong flasem mifala. Bambae mifala i save tok flas from yufala. Yufala ya nao i save flasem mifala, yufala i save mekem mifala i harem gud.” (1 Tesalonaeka 2:​19, 20) Tru ya, taem yumi tijim wan man long trutok blong Baebol, mo yumi givhan long hem gogo hem i givim laef blong hem i go long God, nao i tekem baptaes blong kam wan Wetnes blong Jeova, yumi harem glad tumas from.

Glad We i Givim Paoa Blong Stanap Strong

18. ?Wanem i save givhan long yumi blong winim ol traem we oli kamaot long laef blong yumi tede?

¹⁸ Evri dei yumi kasem sam traem, nao yumi mas stanap strong blong winim olgeta. Maet yumi kasem wan sik, maet tingting blong yumi i foldaon, no maet yumi gat trabol long saed blong mane. ?Olsem wanem wan Kristin man i save stap glad, blong hem i save winim ol traem olsemia? Tok blong God i save leftemap tingting blong hem mo lidim hem. Sipos hem i ridim ol sam no hem i lesin long ol sam we oli putum long kaset, samting ya i save mekem hem i harem gud, nating we hem i kasem traem. Lesin long waes advaes ya blong Deved: “Yufala i mas putum ol trabol blong yufala long [Jeova, NW], nao hem bambae i blokem yufala, i sevem yufala. Hem i no save letem stret man i lus.” (Ol Sam 55:22) Tru tumas, Jeova hem i “Man blong harem prea.”​—⁠Ol Sam 65:​2, NW.

19. ?Yumi save gat wanem strong tingting, olsem Deved mo Pol?

¹⁹ Paoa blong yumi, ol man, i smol nomo. Be oltaem ogenaesesen blong Jeova i stap rere blong givhan long yumi. Ol buk we ogenaesesen i prentem, mo ol elda long kongregesen, oli blong givhan long yumi blong winim ol trabol we yumi kasem. Deved i givim gudfala advaes ya se: “Yu mas givim laef blong yu long [Jeova, NW], yu mas trastem hem, nao bambae hem i halpem yu.” Deved i save talem se: “Naoia mi mi olfala, mi stap longtaem, be neva mi luk wan gudfala man we [Jeova, NW] i lego hem, no ol pikinini blong man olsem we oli stap asaskem kakae olbaot.” Sipos yumi stap joen oltaem wetem kongregesen blong ol Kristin man, bambae yumi luksave se “[Jeova, NW] i stap sevem ol stret man, i stap lukaotgud long olgeta long taem blong trabol.” (Ol Sam 37:​5, 25, 39) Oltaem yumi mas folem advaes blong Pol, we hem i talem se: “From samting ya, neva tingting blong mifala i kam nogud long ol trabol we i kasem mifala. . . . Mifala i no moa tingbaot ol samting ya we yumi save luk long ae blong yumi. Mifala i stap tingbaot ol samting ya we yumi no save luk. From we ol samting ya we yumi save luk long ae blong yumi, oli blong stap smoltaem nomo. Be ol samting ya we yumi no save luk, oli blong stap oltaem, gogo i no save finis.”​—⁠2 Korin 4:​16-18.

20. ?From bilif blong yumi, yumi save luk wanem? ?Olsem wanem samting ya i save givim paoa long yumi blong gohed?

²⁰ From bilif blong yumi, i olsem we yumi save luk nyufala wol blong Jeova, i kolosap nomo. !Yumi no save talem ol blesing mo ol glad we bambae i kamaot long taem ya! (Ol Sam 37:34; 72:​1, 7; 145:16) Blong yumi rere long gudfala taem ya, yumi mas harem tok blong Sam 100:2: “!Yumi glad, yumi mekem wosip long [Jeova, NW]! !Yumi kam long fes blong hem, yumi singsing!”

[Ol futnot]

Tingtingbak:

◻ ?Tede yumi glad blong luk wanem samting we i pruvum se man i save blokem fasin blong tinghae moa long wan kala no laen i bitim ol narawan?

◻ ?From wanem ol man blong God long taem bifo oli singsing mo oli singaot from glad?

◻ ?Long taem blong yumi, olsem wanem trufala glad i kam antap moa?

◻ ?Olsem wanem fasin stanap strong mo fasin glad tufala i joen?

◻ ?Wanem samting i save givim paoa long yumi blong stap glad?