Ripot Long Wok Blong Kingdom
Trutok Blong Baebol i Winim Kastom
OL KASTOM blong jyos oli save fas gud long tingting blong man. Ol milyan man oli gat tingting se i nogud blong jenisim jyos blong ol. Man ya Sol we biaen i kam aposol Pol, fastaem hem i gat tingting olsem. Hem i talem se: “Long taem ya, mi mi stap strong moa long ol fasin blong skul blong ol man Isrel, mi bitim plante man we mifala i bon wantaem.” Be taem we hem i kasem trutok, hem i livim skul blong ol man Jyu mo hem i kam Kristin. (Galesia 1:13-l6) Tede, plante man oli luksave se trutok blong Baebol i hae moa long kastom blong man. Traem tingbaot olsem wanem trutok blong Baebol i win long Itali.
Wan woman i talem se: “Mi mo sista blong mi, mitufala i gruap long wan famle we mifala i plante long hem mo famle blong mifala i folem longtaem finis ol kastom blong Katolik jyos. Mitufala i strong long jyos blong mifala. Nao mi mi mared, be biaen mi lusum hasban blong mi mo mi laef plante yia mi wan nomo wetem ol pikinini blong mi. Pikinini blong sista blong mi i stap tijim ol pikinini long Sande Skul mo hem i stap askem oltaem sam kwestin long Baebol long pris, be hem i no glad long ol ansa we pris i mekem.
“Wan taem, mi mi go smol long taon ya we mi mi bon long hem. Nao mi mitim ol Wetnes blong Jeova mo mi statem wan Baebol stadi wetem olgeta. Plante olfala fren blong mi we oli Katolik oli stap jikim mi from we mi mi stadi long Baebol. Be nating, mi mi no kam slak from. Hemia fastaem we mi gat wan Baebol mo i no gat wan man we bambae i tekemaot Baebol ya long mi. Sista blong mi tu i tanem hem i go long Jeova. Ale, tu yia i no pas yet, nao mitufala tugeta i tekem baptaes.
“Fastaem, taem mi livim jyos, mi mi krae from we mi mi fraet lelebet blong lego long ol kastom we mi bin folem long 76 yia. Be naoia, mi stap wokbaot long ol rod blong Jeova mo mi mekem bes blong mi blong halpem ol narafala man blong oli kamaot long tudak long saed blong speret. !Mi glad tumas from!”—Ridim 1 Pita 2:9.
Wan Man Blong Katem Hea i Stretem Sam Rong Tingting
Wan man Japan, hem i man blong katem hea blong man. Taem hem i stap wok, hem i laekem tumas blong talemaot ol store we oli narakaen, olsem store blong devel mo store blong ol defren samting we oli flae long skae. Be afta, hem i stat blong stadi long Baebol. Ale, hem i luksave se fasin blong storeyan blong hem i save mekem trabol long hem. Nao hem i stat blong singaot long ol man we oli kam long ples blong hem blong oli kam joen wetem hem long stadi blong hem. Long ol yangfala, hem i soemaot we God nomo i wokem evri samting long heven mo wol. Evri wik, hem i askem long Wetnes we i mekem stadi long hem, blong hem i karem sam Baebol mo sam buk Yu Save Laef Foreva Long Paradaes Long Wol i kam long hem. Mo biaen hem i livim ol buk ya long ol kastoma blong hem.
Long faswan yia we hem i stadi, nating se hem i no Wetnes yet, hem i seremaot 30 Baebol mo 30 buk Laef Foreva. Mo 25 man oli stat blong stadi long Baebol afta we hem i tekem evri jans blong talemaot gud nyus long olgeta. Samtaem, moa long 10 man oli joen wetem hem long Baebol stadi blong hem. Seven man we hem i givim wetnes long olgeta taem we hem i stap katem hea blong olgeta oli stretem ol rong tingting blong olgeta mo oli kam Wetnes blong Jeova.