?God i Ansa Long Prea Blong Hu?

JEOVA, hem nao i God we i save ansa long prea. Tok blong hem, Baebol i talem se hem i ‘Man blong harem prea.’ (Ol Sam 65:2) Hem i rere blong ansa long ol prea. ?Be hem i ansa long prea blong hu?

God i ansa long prea blong ol man we hem i glad long olgeta. Long tingting mo long fasin blong olgeta oli ona long God oltaem, olsem man we i raetem ol Sam. Hem i talem se: “God, mi mi wantem blong yu yu kam long laef blong mi, olsem we wan anamol i wantem tumas blong dring wora long reva. God, yu yu laef we yu no save ded. Mi mi wantem yu tumas, olsem we mi tosta, mi wantem tumas blong dring wora.” (Ol Sam 42:​1, 2) ?Be wanem samting i pruvum se Jeova i save ansa long prea blong ol man we oli mekem tru wosip long hem?

Ol Samting We i Pruvum Se God i Save Ansa Long Prea

Baebol i talem fulap eksampel blong pruvum se Jeova i save ansa long prea blong ol gudfala man blong hem. Wan eksampel: King Jeosafat blong Juda i prea blong God i sevem hem. God i ansa long prea blong hem. Hem i mekem se hem i win long faet blong hem. Hem i mekem ol enemi blong hem oli faet agens long olgeta nomo. (2 Kronikel 20:​1-26) Samting olsem i kamaot long King Esekaea. Hem i mas faet agens long wan bigfala strong ami. Nao hem i prea wetem tingting daon blong askem God blong givhan long hem. Esekaea i luk we Jeova i sevem hem, taem wan enjel i kilimdaon 185,000 man Asiria long wan naet nomo.​—Aesea 37:​14-20, 36-38.

?From wanem God i ansa long ol prea ya? From we tufala king ya i talem strong long God se sipos tufala i lus long faet blong tufala, samting ya bambae i daonem nem blong Jeova. (2 Kronikel 20:​6-9; Aesea 37:​17-20) Tufala i wantem leftemap nem blong Jeova nomo. Wan buk (The International Standard Bible Encyclopedia) i talem se: “Bigfala risen blong prea i no blong mekem i gud long man we i prea, be i blong ona long nem blong God.” From samting ya, ol tru man blong Jeova oli save sua se bambae hem i givhan long olgeta “blong leftemap nem blong hem.” Ol store blong bifo oli soemaot we God i ansa long ol prea olsem. Taswe ol man blong God oli sua se hem i save harem ol prea blong olgeta.​—Ol Sam 91:​14, 15; 106:​8, NW; Proveb 18:10.

Be nating we wan prea i blong askem samting blong leftemap nem blong Jeova, be God nomo i tekem disisin se bambae hem i ansa long prea ya, no no gat. Ating hem i gat gudfala risen from wanem hem i no ansa long sam prea. Sipos yumi harem se God i no ansa long ol prea blong yumi, i gud yumi tingbaot from wanem i olsem ya.

?From Wanem God i No Ansa Long Sam Prea?

Jeova i talem long ol man Isrel bifo, se: “Nating se yufala i mekem plante prea, be mi mi no save lesin.” Nao hem i talem from wanem hem i no lesin, i se: “Blad i fulap long han blong yufala.” (Aesea 1:15) ?Olsem wanem? ?Man i save sakem loa blong Jeova mo long semtaem i ting se Jeova bambae i harem prea blong hem? Wan proveb blong Baebol i givim klia ansa long kwestin ya. Hem i se: “Man we i satem sora blong hem from we hem i no wantem lesin long loa​—be prea blong hem i wan rabis samting nomo.”​—Proveb 28:9.

Baebol i givim wan narafala risen from wanem God i no harem sam prea. Hem i se: “Taem yufala i askem long God, yufala i no kasem from we tingting blong yufala i no stret. Yufala i stap askem ol samting ya long God, we tingting blong yufala nomo i wantem.” (Jemes 4:3) Yes, Jeova i no save ansa long prea blong ol man we oli wantem mekem ol fasin we oli no stret. Mo tu yumi mas tingbaot se man i no gat raet blong talem long God wanem we hem i mas mekem. Hem nomo i tekem disisin olsem wanem bambae hem i ansa long prea blong yumi.

Yumi save se God i ansa long prea we i kamaot long hat we i klin, long tingting we i stret mo tru, mo we i pas long rod we God i makemaot, hemia tru long Jisas Kraes. (Jon 14:​6, 14) Be ol man we oli folem ol rul ya, samtaem olgeta tu oli harem we God i no ansa long prea blong ol. ?From wanem God i no ansa wantaem long sam prea blong ol man blong hem?

Jeova i save wanem taem i stret blong ansa long ol prea. Tingbaot: Wan boe i save askem long papa blong hem blong pem wan baskel blong hem. Be maet papa i no pem gogo boe ya i gat naf yia blong ron long baskel, we i no kasem kil from. Sem mak long sam prea blong ol man we oli laekem God. God i save wanem i gud long olgeta. Mo hem i givim wanem we oli nidim long stret taem blong hem.

Be ol man blong Jeova oli no kasem evri samting we oli prea from. Oli sinman, taswe samtaem oli wantem samting we i no gud long olgeta. Papa blong olgeta long heven we i laekem olgeta tumas, i no save givim samting we i mekem olgeta oli harem nogud. Hem i givim “evri samting we oli gud mo evri presen we oli nambawan.” (Jemes 1:17) Mo tu, God i no save givim samting we hem i ting se yumi no nidim. (Skelem wetem 2 Korin 12:​7-10.) Hem i ansa long ol prea we oli stret long wil blong hem mo plan we hem i gat long ol man blong hem.​—1 Jon 5:​14, 15.

“God i Harem” Jisas

Jisas Kraes i man blong prea. (Matyu 6:​9-13; Jon 17:​1-26) Hem i bilif fulwan se Papa blong hem long heven bambae i harem mo i ansa long prea blong hem. Jisas i talem se: “Papa, . . . mi save we oltaem yu stap harem mi.” (Jon 11:​41, 42) ?Be olsem wanem long en blong laef blong Jisas long wol? ?Tingting blong hem i foldaon taem hem i kraeaot long God se: “?God blong mi, God blong mi, olsem wanem yu yu livim mi mi stap olsem ya?”​—Matyu 27:46.

Taem Jisas i talem ol tok ya, i klia se hem i stap mekem wan profet tok i kamtru long saed blong ded blong hem. (Ol Sam 22:1) Mo tu, maet Jisas i minim se blong traem bilif blong hem fulwan, Jeova i tekemaot han blong hem, i no moa protektem hem, mo i letem hem i harem nogud mo i sem gogo hem i ded. Taem yumi tingtinggud long ol samting we i hapen long laswan dei blong laef blong Jisas long wol, yumi luksave se God i harem ol prea blong hem.

Long naet we oli holem Jisas, hem i prea long garen blong Getsemane. Tri taem hem i askem strong long God se: “Papa, sipos yu save mekem samting ya, plis yu tekemaot kap ya, blong bambae mi mi no dring long hem.” (Matyu 26:​39, 42, 44) Vas ya i no minim se Jisas i no wantem givim laef blong hem olsem wan ransom blong pemaot ol man we oli bilif. No gat. Be i luk olsem we hem i wari bigwan se sipos hem i ded long pos olsem wan man we i tok nogud long God, samting ya i save sakem doti long nem blong Papa blong hem we Jisas i laekem hem tumas. ?Jeova i harem prea ya blong Jisas?

Sam yia biaen, aposol Pol i talem se: “Long laef blong hem long wol ya, Kraes i stap prea long God, i stap askem ol samting long hem, i stap krae bigfala, we wora i stap kamaot long ae blong hem. God i gat paoa blong sevem hem long ded, mo from we tingting blong Kraes i stap daon, God i harem hem.” (Hibrus 5:7; Luk 22:​42, 44) Yes, long naet bifo we Jisas i ded, we hem i harem nogud tumas long bodi blong hem, “God i harem” hem. ?Olsem wanem?

Jeova i sanem wan enjel, i aot long heven, “i kamtru long Jisas, i mekem hem i strong bakegen.” (Luk 22:43) Enjel ya i givim paoa long Jisas, nao hem i naf blong stanap strong taem hem i harem nogud long bodi blong hem gogo hem i ded long pos. I luk olsem we long taem ya, Jeova i mekem hem i luksave se ded blong hem long pos ya bambae i no sakem doti long nem blong God. Hem i luksave se ded blong hem i mekem rod blong leftemap nem blong God mo mekem hem i tabu. Tru ya, ded blong Jisas long pos i mekem rod blong sevem plante man Isrel. Sipos hem i no ded, Loa ya we oli stap aninit long hem bambae i jajem olgeta se oli mas ded.​—Galesia 3:​11-13.

Tri dei biaen, Jeova i givim laef bakegen long Jisas. Hem i kliarem ol gyaman toktok agens long Jisas se hem i tok nogud long God, from we hem i leftemap hem, i givim haenem long hem long heven. (Filipae 2:​7-11) !Long nambawan rod ya, God i ansa long prea blong Jisas long saed blong “kap ya”! Jeova i ansa long prea ya, be long rod we hem i wantem. Mo Jisas i kasem ol nambawan blesing from we hem i bin talem long Papa blong hem long heven se: “Be yu no mekem olsem we mi mi wantem, yu mekem olsem we yu nomo yu wantem.”​—Luk 22:42.

?Tede Jeova i Ansa Long Ol Prea Olsem Wanem?

Ol man tede we oli wantem mekem Jeova i glad, oli mas folem eksampel blong Jisas. Oltaem oli mas askem God blong mekem olsem we hem nomo i wantem. Oli mas bilif se Jeova bambae i ansa long prea blong olgeta long rod we hem i save se i moa gud long olgeta. Yes, “paoa ya blong God i save mekem antap moa long olgeta samting we yumi stap askem long hem, mo we yumi stap tingbaot.”​—Efesas 3:20.

Wan yang Kristin woman i luksave olsem wanem vas ya i kamaot tru long laef blong hem. Hem i stap wetem papa mama blong hem we tufala i no bilif. Ale Watch Tower Sosaete i sanem wan leta long hem, i askem long hem blong go mekem wok blong misinari long wan ples, mo i talem long hem blong prea long saed ya. Long hat blong hem, hem i wantem tumas blong stap wetem papa mama blong hem, from we hem i wantem givhan long tufala blong tufala i kam Kristin man tu. Taswe hem i prea long God se: “?Yu yu wantem wanem? ?Yu yu wantem we mi mekem wok blong misinari nating we papa mama blong mi tufala i agensem mi? ?No yu yu wantem we mi stap wetem tufala mo givhan long tufala?” Evri taem we woman ya i prea long bisnes ya, voes blong tingting blong hem i pulum hem blong mekem misinari wok. Ale hem i tekem disisin ya, from we hem i luksave se hemia nao ansa we Jeova i givim.

God i givim paoa long woman ya blong mekem disisin blong hem i stanap. Sosaete i sanem hem i go long wan aelan long Japan, nem blong hem Awaji. Papa mama blong hem tufala i sek from, mo tufala i agensem hem moa. Be tufala i no save jenisim tingting blong hem. Taswe mama blong hem i agri blong stadi Baebol, blong traem faenemaot from wanem dota blong hem i tekem disisin olsemia. Tri manis biaen, papa mama blong woman ya tufala i go luk hem. Tufala i luk we ol Wetnes blong Jeova oli lukaot gud long hem. Samting ya i tajem hat blong papa blong hem, nao hem i krae taem hem i stap hem wan. I no longtaem, hem tu i stadi long Baebol. Biaen, papa mama blong yangfala woman ya tufala i baptaes, mo tufala i mekem tru wosip long Jeova. ?Jeova God i blesem Kristin woman ya antap moa long samting we hem i askem long hem? Yes.

God i Ansa Long Prea Blong Ol

?Yu yu save tingtingbak long tok blong woman long faswan store long magasin ya? Hem i talem se hem i harem we neva God i ansa long prea blong hem. Be biaen hem i luksave se God i ansa long prea blong hem. Woman ya i raetemdaon ol samting we hem i askem long ol prea blong hem. Nao wan dei hem i ridim bakegen ol samting ya, mo hem i luksave se Jeova i harem bighaf long ol prea blong hem. !Mo hem i harem sam prea we woman ya i fogetem se hem i bin askem long hem tu! Taswe hem i save se God i stap lukaot long hem mo hem i ansa long ol prea blong hem long rod we i kaen gud mo i mekem i moa gud long woman ya.

Sipos yu yu harem se yu no kasem ansa long ol prea blong yu, traem askem long yu se: ‘?Mi mi stap fren gud wetem Jeova, we hem i ‘Man blong harem prea’? ?Sipos no, mi mi stap mekem sam samting blong kasem save long hem mo blong kam wan man blong hem we i givim laef i go long God?’ God i ansa long prea blong olgeta we oli laekem hem mo oli mekem ol samting we hem i wantem. Olgeta oli “stap prea oltaem.” Mo God i harem prea blong ol, olsem we hem i harem Jisas. (Rom 12:12) Taswe, ‘yu mas talemaot olgeta samting we i stap long hat blong yu’ long Jeova, mo yu mas mekem ol samting we hem i wantem. (Ol Sam 62:​8, NW) Olsem ya nao, God i save harem prea blong yu.

Tede, plante milyan man oli stap prea from wan spesel samting. Yes, mo God i harem ol prea blong olgeta. Naoia yumi storebaot from wanem yumi save se God i ansa long ol prea olsem.