Ol Prea We God i Harem
I GAT sam prea we God bambae i ansa long ol. Ol prea ya oli stret long ol samting we Jisas i talem long Lodsprea, we hem i givim olsem wan eksampel long ol disaepol blong hem. Hem i se: “Yufala i mas prea olsem: ‘Papa blong mifala we yu yu stap long heven, plis, yu mekem nem blong yu i tabu. Yu mekem kingdom blong yu i kam. Yu mekem ol samting we yu yu wantem oli kamaot long wol, olsem we oli kamaot finis long heven.’”—Matyu 6:9-13, NW.
Lodsprea ya, ol man oli talem bakegen plante milyan taem. Kraes i no wantem se ol trufala man blong hem oli lanem prea ya baehat. Be sipos man i prea we i askem ol samting we i kolosap sem mak long Lodsprea, bambae God i ansa long prea ya. (Matyu 6:7, 8) ?Oraet, olsem wanem blong mekem nem blong God i tabu? ?From wanem yumi mas prea se Kingdom blong God bambae i kam? ?Mo from wanem yumi mas askem God blong mekem ol samting we hem i wantem oli kamaot long wol?
“Yu Mekem Nem Blong Yu i Tabu”
Jisas i prea long “Papa blong mifala we yu yu stap long heven.” Prea blong hem i go long Jeova nomo, we hem i “hae king blong olgeta ples long wol.” (Ol Sam 83:18) God i olsem “Papa” long ol man Isrel bifo, from we hem i mekem olgeta oli fri, oli aot long kalabus long Ijip. Mo tu, hem i mekem wan kontrak wetem olgeta. (Dutronome 32:6, 18; Eksodas 4:22; Aesea 63:16) Tede, ol tabu Kristin oli laekem tumas we Jeova hem i Papa blong olgeta. (Rom 8:15) Mo ol fren blong olgeta we oli hop se bambae oli laef long wol, olgeta tu oli singaot Jeova God se Papa blong olgeta.—Jon 10:16; Revelesen 7:1-9.
?Be from wanem yumi mas prea long God blong hem i mekem nem blong hem i tabu? From we stat long taem we Adam mo Iv tufala i mekem stronghed long garen blong Iden, plante samting i daonem nem blong God. Blong ansa long prea ya, Jeova bambae i kliarem ol sem mo doti we ol man oli bin sakem long gudfala nem blong hem we i mas stap blong olwe. (Ol Sam 135:13) Bambae hem i mekem olsem ya taem hem i spolem ol rabis fasin long wol. Long saed blong taem ya, God i talem wan profet tok long Esikel, i se: “Mo tru, bambae mi mi mekem we mi hae moa, mi tabu. Mo plante nesen bambae oli lukluk, nao oli save mi. Mo olgeta man bambae oli mas save se mi mi Jeova.”—Esikel 38:23.
Jeova God hem i tabu mo hem i klin. From samting ya, nem blong hem tu i mas klin, i mas antap long ol narafala samting from we hem i tabu. Bambae God i soemaot tabu mo klin fasin blong hem taem hem i leftemap nem blong hem long fored blong olgeta samting we hem i wokem. (Esikel 36:23) Ol man we oli wantem se Jeova i glad long ol mo i givim laef blong olwe long ol, oli mas fraet long Jeova. Mo blong mekem nem blong hem i tabu, oli mas holem nem ya i stap hae antap long ol narafala mo i defren long ol narafala nem. (Levitikas 22:32; Aesea 8:13; 29:23) Taswe, Jisas i talem long ol man blong hem se oli mas prea olsem: “Plis, yu mekem nem blong yu i tabu.” No “mekem we ol man oli holem nem ya i antap olgeta, olsem we i tabu mo i klin.” Yumi save se God bambae i ansa long haf ya blong Lodsprea we Jisas i talem.
“Yu Mekem Kingdom Blong Yu i Kam”
Mo Jisas i talem long ol man blong hem blong prea olsem: “Yu mekem kingdom blong yu i kam.” Bambae God i harem ol prea we oli blong askem Kingdom blong hem i kam. Kingdom ya hem i hae rul blong Jeova. Hem i yusum gavman blong Mesaea long heven we i stap long han blong Pikinini blong hem Jisas Kraes, mo kampani blong “ol tabu man,” blong rul long nem blong hem. (Daniel 7:13, 14, 18, 22, 27; Aesea 9:6, 7) Longtaem finis, ol Wetnes blong Jeova oli yusum Baebol blong soemaot se Jisas i kam king long heven long 1914. ?Sipos i olsem, from wanem ol man oli mas prea yet blong Kingdom ya i “kam”?
Taem yumi prea blong Kingdom i kam, yumi rili stap askem se Kingdom ya bambae i faetem olgeta we oli agensem rul blong God long wol. I no longtaem “kingdom [blong God] . . . bambae i smasem mo i finisim olgeta kingdom [blong wol], mo hem nomo bambae i rul gogo i no save finis.” (Daniel 2:44) Samting ya bambae i leftemap moa tabu nem blong Jeova.
“Yu Mekem Ol Samting We Yu Yu Wantem Oli Kamaot Long Wol”
Mo tu, Jisas i talem long ol disaepol blong hem blong prea olsem: “Yu mekem ol samting we yu yu wantem oli kamaot long wol, olsem we oli kamaot finis long heven.” Taem yumi prea olsemia, yumi stap askem long Jeova blong mekem ol samting we hem i wantem oli kamaot long wol. Hemia i kolosap sem mak long tok blong man we i raetem ol Sam, i se: “Hem [Jeova] i stap mekem olgeta samting we hem i wantem, long skae mo long graon, mo long solwora mo long dipsi daon. Hem i stap mekem ol klaod oli aot long narasaed wol oli kam, mo i stap mekem laetning i kam long hariken, mo i stap tekemaot win long ples blong hem, i mekem i kam blu long yumi. Hem nao we bifo i kilim ol fasbon pikinini blong ol man Ijip, wetem ol fasbon pikinini blong ol anamol blong olgeta tu oli ded. Long ples ya, hem i mekem ol merikel mo ol bigbigfala wok tu, blong panisim king blong Ijip wetem olgeta haeman blong hem. Hem i spolemgud ol man blong plante narafala kantri, mo i kilim ol king we oli strong tumas, oli ded.”—Ol Sam 135:6-10.
Taem yumi prea long Jeova blong hem i mekem ol samting we hem i wantem oli kamaot long wol, yumi stap askem long hem blong mekem plan blong hem i kamtru long wol. Insaed long plan ya, bambae hem i tekemaot ol man we oli agensem hem blong olwe, olsem hem i bin mekem long smol fasin long taem bifo. (Ol Sam 83:9-18; Revelesen 19:19-21) Ol prea blong askem Jeova blong mekem ol samting we hem i wantem long heven mo long wol, oli sua blong kasem ansa blong ol.
Taem Kingdom i Rul
Defren long ol rabis fasin we i fulap long wol naoia, ?wanem bambae i kamaot long wol mo long heven taem Kingdom blong God i rul mo ol samting we God i wantem oli kamaot? Aposol Pita i talem se: “God i promes finis blong putum nyufala skae mo nyufala wol, we stret fasin nomo bambae i stap long hem. Mo yumi stap wet blong ol nyufala samting ya.” (2 Pita 3:13) “Nyufala skae” i minim ol stret speret man we bambae oli rul, hemia Jisas Kraes wetem 144,000 man we bambae oli rul wetem hem long Kingdom blong heven. (Rom 8:16, 17; Revelesen 14:1-5; 20:4-6) “Nyufala wol” i no minim nyufala graon. Hem i minim ol stret man nomo we bambae oli laef long wol.—Skelem wetem Ol Sam 96:1.
Aninit long rul blong Kingdom ya, wol bambae i jenis i kam Paradaes long evri ples. (Luk 23:43) Long taem ya, ol man we oli obei long God, bambae oli harem gud long tru pis mo seftaem. (Ol Sam 72:1-15; Revelesen 21:1-5) Yu yu save stap wetem kampani blong ol hapi man ya sipos yu yu fas gud long wok blong talemaot Kingdom blong Mesaea we i rul long ol man we oli obei. Ol man we oli talemaot rul ya, oli prea strong se Jeova bambae i mekem nem blong hem i tabu, i mekem Kingdom blong hem i kam, mo i mekem ol samting we hem i wantem oli kamaot. Ol prea ya we oli mekem wetem ful hat blong olgeta, oli sua blong kasem ansa blong ol.