‘Plis Yu Givhan Long Mi From We Bilif Blong Mi i Smol’

“Papa blong pikinini ya i krae long hem, i se ‘Mi mi bilif, be bilif blong mi i smol. Plis yu givhan long mi.’”​—MAK 9:​24.

1. ?Wanem i pulum wan papa blong krae se: ‘Plis yu givhan long mi, from we bilif blong mi i smol’?

PAPA blong boe ya we i gat wan devel i stap long hem, i stanap fored blong Jisas Kraes. !Man ya i wantem tumas we Jisas i ronemaot devel long pikinini ya! Ol disaepol blong Jisas oli no save mekem, from we bilif blong olgeta i no naf. Be papa blong boe ya i krae long Jisas, i se: “Mi mi bilif, be bilif blong mi i smol. Plis yu givhan long mi.” Ale God i givim paoa long Jisas, nao Jisas i ronemaot devel. I klia se samting ya i mas mekem bilif blong papa blong boe ya i strong moa.​—Mak 9:​14-29.

2. ?Long saed blong bilif, ol Kristin man oli no sem blong mekem wanem tufala samting?

² Olsem papa ya we i wantem se Jisas i mekem boe blong hem i kamgud bakegen, wan trufala man blong Jeova i no sem blong talem se: “Mi mi bilif.” Ol man blong jikim God oli stap talem se God i no gat paoa, Tok blong hem i no tru, mo hem i no stap. Be ol trufala Kristin oli glad blong talemaot se oli bilif long Jeova God. Be taem oli tok wanwan wetem Papa blong olgeta long heven long prea, oli save askem se: ‘Plis yu givhan long mi from we bilif blong mi i smol.’ Oli no sem blong mekem olsem, from we oli save se ol aposol blong Jisas Kraes tu oli askem strong long hem, se: “Plis yu mekem bilif blong mifala i kam strong moa.”​—Luk 17:5.

3. ?Olsem wanem Jon i yusum wod ya “bilif” long Gospel blong hem? ?Mo from wanem samting ya i stret nomo?

³ Grik haf blong Baebol i talem plante samting long saed blong bilif. Gospel blong Jon i yusum plante defren Grik wod we oli joen wetem “bilif.” Jon i yusum 40% moa tok olsem i bitim ol tri narafala Gospel. Jon i makem strong se i no naf blong gat bilif nomo. I impoten tumas we yumi soemaot bilif. Taem hem i raetem leta blong hem samwe long 98 K.T., hem i luk we fasin blong apostasi,a we i olsem posen, i stat blong kasem sam Kristin we oli slak long bilif. (Ol Wok 20:​28-30; 2 Pita 2:​1-3; 1 Jon 2:​18, 19) Taswe i impoten tumas we oli soemaot bilif. Blong mekem olsem, oli mas mekem ol wok mo fasin we oli soemaot se oli stap fasgud long God. I no longtaem oli mas kasem hadtaem.

4. ?Olsem wanem ol man blong bilif oli naf blong mekem evri samting?

⁴ Bilif i save mekem se Kristin man i naf blong winim enikaen trabol. Jisas i talem long ol disaepol blong hem se sipos bilif blong olgeta “i olsem sid ya blong nambangga we i smol tumas,” i no gat wan samting we oli no naf blong mekem. (Matyu 17:20) Hem i makem long tingting blong olgeta se bilif, we hem i wan frut blong tabu speret, i gat paoa. Olsem nao Jisas i stap talem se ol man nomo oli no naf blong mekem plante samting. Bigfala samting, hemia speret no paoa blong God we hem i naf blong mekem olgeta samting. Ol man we speret ya i lidim olgeta, oli no letem ol smosmol ‘hil’ no trabol we i save blokem olgeta oli kam olsem ol bigbigfala hil. Tabu speret blong God i givim waes long olgeta. Nao waes ya i givhan long olgeta blong skelemgud olgeta samting. Ol bigbigfala trabol tu oli save kam smol, taem yumi yusum paoa blong bilif blong winim olgeta.​—Matyu 21:​21, 22; Mak 11:​22-24; Luk 17:​5, 6.

Yumi Prea Blong Bilif i No Save Foldaon

5-7. (a) ?Taem Jisas i stanemap Memoriol, hem i givim wanem woning long saed blong bilif? (b) ?Olsem wanem bilif blong Pita i givhan long hem blong mekem bilif blong ol brata blong hem i kam strong moa?

⁵ Long 33 K.T., Jisas i mekem laswan lafet blong Pasova wetem ol disaepol blong hem. Afta, taem hem i sanemaot Judas Iskariot finis, hem i stanemap selebresen blong Memoriol. Hem i se: “Mi mi mekem wan kontrak wetem yufala, olsem we Papa blong mi i mekem wan kontrak wetem mi nomo, long saed blong wan kingdom.” (NW) Nao Jisas i gohed, i se: “Saemon, Saemon, yu lesin gud. Setan i askem finis long God blong i save mekem plante trabol long yufala blong traem yufala, mo God i letem long hem olsem. Bambae hem i traem pulumaot sam long yufala i kam man blong hem. Be mi mi prea finis from yu, blong bilif blong yu bambae i no save foldaon olgeta. Mo taem yu tanem tingting blong yu, yu kambak, yu biaen long mi bakegen, bambae yu mas mekem tingting blong ol brata blong yu oli strong moa.”​—Luk 22:​28-32.

⁶ Jisas i prea se bilif blong Pita i no foldaon olgeta. Pita i tok flas se neva bambae hem i talem se hem i no save Jisas. Be i no longtaem biaen, hem i mekem olsem tri taem bakegen. (Luk 22:​33, 34, 54-62) Yes, taem profet tok ya i kamtru se man blong lukaot long sipsip i ded, ol sipsip oli go wanwan olbaot. (Sekaraea 13:7; Mak 14:27) Pita i foldaon from fraet long man. Be taem hem i tanem tingting blong hem, hem i girap, mo i mekem tingting blong ol brata blong hem long speret i strong moa. Hem nao i stanemap kwestin se hu bambae i tekem ples blong nogud man ya, Judas Iskariot. Long Pentekos long 33 K.T., ol aposol oli yusum hem olsem man blong talemaot tok blong olgeta. Nao hem i yusum faswan long “ol ki” we Jisas i givim long hem, blong openem rod blong ol man Isrel oli kam memba blong Kingdom. (Matyu 16:19; Ol Wok 1:15 kasem 2:41) Yes, Setan i talem finis se hem i wantem mekem plante trabol long ol aposol blong traem olgeta. Be God i lukaot long olgeta blong bilif blong ol i no foldaon olgeta.

⁷ ?Yu ting se Pita i harem olsem wanem taem Jisas i talem long hem se: “Mi mi prea finis from yu, blong bilif blong yu bambae i no save foldaon olgeta.”? !Tingbaot! Masta blong hem i prea se bilif blong Pita i no mas foldaon. Mo i tru, hem i no foldaon olgeta. Long dei blong Pentekos, Pita wetem sam narafala oli faswan man blong kasem tabu speret, blong kam ol speret pikinini blong God, we bambae oli save joen wetem Kraes long paoa blong hem long heven. Long taem ya tabu speret i kam long olgeta bigwan moa i bitim ol taem bifo. Taswe oli save soemaot ol frut blong hem, olsem bilif, long fasin we i bigfala moa i bitim ol taem bifo. !Hemia i nambawan ansa long krae blong olgeta, se: “Plis yu mekem bilif blong mifala i kam strong moa”!​—Luk 17:5; Galesia 3:​2, 22-26; 5:22, 23.

Fesem Ol Traem We Oli Stap Kam Wetem Bilif

8. ?Ogenaesesen blong God i givim wanem woning long stret taem blong hem long mining blong profet tok long 1 Tesalonaeka 5:3?

⁸ Blong mekem profet tok blong Baebol i kamtru, i no longtaem bambae yumi harem krae ya: “!Pis mo seftaem!” (1 Tesalonaeka 5:3, NW) ?Samting ya i save traem bilif blong yumi? Yes, yumi mas lukaot. From we sipos no, maet yumi no rere, maet yumi ting se pis ya we ol nesen oli talem se oli kasem i tru. Be Jeova God i no stap yusum wan ogenaesesen blong wol ya nating blong mekem pis. Tingting ya nao bambae i blokem yumi, blong yumi no agri wetem tingting blong ol man we oli stap talemaot pis. Jeova i gat rod blong hem blong mekem tru pis i kamtru. Bambae hem i yusum Kingdom blong hem long han blong Jisas Kraes nomo. Taswe, nating we bambae i luk olsem se ol nesen oli winim pis finis, be hem i wan gyaman pis nomo, mo bambae hem i stap blong smoltaem nomo. Blong givhan long yumi blong lukaot mo blong rere long samting ya, “slef we i stret mo waes” bambae i gohed blong prentem ol woning long stret taem blong ol. Olsem nao, ol man blong Jeova bambae oli rere, bambae oli no sek long gyaman tok ya, “pis mo seftaem” we ol nesen blong rabis wol ya bambae oli mekem, i no longtaem nao.​—Matyu 24:​45-47, NW.

9. ?Taem God i spolem Bigfala Babilon, olsem wanem bambae yumi nidim fasin no fraet mo bilif?

⁹ Taem ol nesen oli singaot se “!Pis mo seftaem!” hemia i makem taem we ‘wantaem nomo bigfala trabol i kam blong spolem’ Bigfala Babilon, hemia olgeta gyaman skul blong wol. (Revelesen 17:​1-6; 18:​4, 5) Samting ya tu bambae i traem bilif blong ol Kristin man. Taem ol gyaman skul oli stap foldaon raonabaot, ?bambae bilif blong ol Wetnes blong Jeova i stap strong? Yes. Samting ya we bambae i hapen, ol man nomo oli no mekem. Bighaf blong ol man bambae oli no rere mo oli no kasem save long mining blong hem. Be ol man oli mas save se, tru, hemia jajmen blong Jeova, blong leftemap nem blong hem we ol gyaman skul oli spolem longtaem tumas. ?Be olsem wanem ol man bambae oli save samting ya sipos i no gat man blong talem long olgeta? ?Mo hu bambae i talem long olgeta? !Ol Wetnes blong Jeova nomo!​—Skelem wetem Esikel 35:​14, 15; Rom 10:​13-15.

10. ?Taem Gog i agensem ol man blong Jeova, olsem wanem samting ya tu bambae i traem bilif blong olgeta?

¹⁰ Ol Wetnes blong Jeova we tabu speret i makemaot olgeta, mo kampani blong ol man we bambae oli laef long wol long fyuja, olgeta oli no fraet blong talemaot se kolosap nao Jeova bambae i mekem jajmen blong hem i kamtru long Bigfala Babilon mo ol narafala haf blong wol blong Setan. (2 Korin 4:4) Setan bambae i mekem wok blong Gog blong Magog long profet tok. Nem ya i min se Setan i stap daon olgeta we i sem we i sem. Bambae hem i hivimap ol ami blong hem long wol, nao bambae hem i yusum ful paoa blong hem agens long ol man blong God. Samting ya bambae i traem ol Wetnes blong Jeova, se oli bilif strong we paoa blong God i save protektem olgeta, no no gat. Be yumi save bilif long profet tok blong God, se Jeova bambae i sevem ol man blong hem.​—Esikel 38:16; 39:​18-23.

11, 12. (a) ?Long taem blong Bigfala Ren, wanem i sevem Noa mo famle blong hem? (b) ?Long taem blong bigfala trabol long fyuja, bambae yumi no nidim blong wari long wanem?

¹¹ Tede yumi no save wanem rod bambae Jeova i yusum blong sevem ol man blong hem oli aot long taem blong “bigfala trabol” long wol. Be hemia i no mas mekem bilif blong yumi i hafhaf, we yumi ting se bambae hem i no sevem ol man blong hem. (Matyu 24:​21, 22) Ol man blong God tede bambae oli harem olsem Noa mo famle blong hem, taem bigfala ren i foldaon. Oli stap insaed long sip, mo wora ya i ron bigfala, i stap spolem evri samting raonabaot long olgeta. Ating oli sapraes se paoa blong God i bigfala olsemia. Mo oli mas prea strong long taem ya. Be i no gat wan samting long Baebol blong soemaot se oli stap wari mo oli stap askem se: ‘?Sip ya i strong inaf, no bambae bigfala wora ya i spolem hem tu? ?Bambae mifala i sot long kakae? ?Taem ren i finis mo wol i jenis, mifala i naf blong gohed?’ Ol samting we oli kamaot biaen oli pruvum se oli no gat risen blong wari olsem.

¹² Blong stap sef, Noa mo famle blong hem oli mas soemaot bilif. Hemia i min se oli mas obei long ol oda we God i givim mo letem tabu speret i lidim olgeta. Long taem blong bigfala trabol long wol long fyuja, bambae i sem mak. Bambae yumi mas folem rod we tabu speret i soemaot mo yumi mas obei long ol oda we Jeova i givim tru long ogenaesesen blong hem. Sipos yumi mekem olsem, bambae yumi no gat risen blong wari no blong askem se: ‘?Olsem wanem bambae yumi kasem ol samting we yumi nidim long saed blong speret mo bodi? ?Olsem wanem long ol olfala mo olgeta we oli nidim spesel meresin? ?Olsem wanem bambae Jeova i mekem rod blong yumi go insaed long nyufala wol?’ From we bilif blong ol trufala man blong Jeova i strong, bambae oli livim evri samting long han blong hem, we hem i naf blong mekem olgeta samting.​—Skelem wetem Matyu 6:​25-33.

13. ?Taem bigfala trabol i stat finis, from wanem bambae yumi nidim bilif olsem Ebraham?

¹³ Taem bigfala trabol ya i stat, tru, bilif blong yumi bambae i kam strong moa bigwan. Yes, bambae yumi luk we Jeova i stap mekem ol promes blong hem oli kamtru. !Long ae blong yumi, bambae yumi luk we hem i stap mekem ol jajmen blong hem oli kamtru! ?Be taem yumi luk we God i stap spolem ol rabis man, bambae bilif blong yumi wanwan i naf blong trastem hem se bambae hem i sevem ol man blong hem? ?Bambae yumi olsem Ebraham, we hem i bilif se ‘Jaj blong olgeta man long wol bambae i mekem i stret,’ we hem i no save spolem ol stret man wetem ol rabis man?​—Jenesis 18:23, 25.

14. ?Wanem sam kwestin we oli mas pusum yumi blong skelem bilif blong yumi mo wok had blong mekem i moa strong?

¹⁴ !Taswe i impoten tumas we naoia nomo yumi mekem bilif blong yumi i strong moa! En blong rabis wol ya i kolosap we i kolosap, taswe yumi mas letem speret blong God i pusum yumi blong mekem “ol tabu fasin mo ol wok we oli givim ona long God.” (2 Pita 3:​11-14, NW) Sipos yumi mekem olsem, taem bigfala trabol i kamtru, bambae yumi no wari long ol kwestin olsem: ‘?Mi mi gud inaf blong Jeova i sevem mi? ?Mi bin wok strong long wok blong God, no mi bin slak? ?Mi mi bin traehad blong wokem ol fasin blong “nyufala laef ya”? ?Jeova i wantem se man we i gat fasin olsem mi i stap long nyufala wol?’ !Ol hevi kwestin olsem oli mas pusum yumi blong skelem bilif blong yumi naoia, mo blong wok had naoia blong mekem bilif ya i kam moa strong!​—Kolosi 3:​8-10.

Bilif Blong Mekem Yumi Gud Bakegen

15. ?Jisas i talem wanem long samfala we hem i mekem bodi blong ol i gud bakegen? ?Be from wanem store ya i no sapotem tijing tede se bilif nomo i save tekemaot sik long man?

¹⁵ Jisas i no wokem ol merikel long ol man we oli gat bilif nomo. (Jon 5:​5-9, 13) Taswe ol wok blong Jisas oli no sapotem tijing ya we i no stanap long Baebol, se bilif i save tekemaot sik long man. I tru se Jisas i bin talem long sam man we hem i mekem bodi blong olgeta i gud bakegen i se: “Bilif blong yu i mekem yu yu gud bakegen.” (Matyu 9:22; Mak 5:34; 10:52; Luk 8:48; 17:19; 18:42) Be taem hem i talem olsemia, hem i stap makem nomo wan trutok: Ol sikman ya oli bilif finis se Jisas i save mekem bodi blong olgeta i gud bakegen. Sipos no, oli no save kam askem long hem blong mekem olsem.

16. ?Tede Jisas i stap lidim wanem program blong givhan long ol man?

¹⁶ Tede, Jisas Kraes i stap lidim wan program blong mekem ol sikman long speret oli kamgud bakegen. Bitim fo milyan man oli rere blong kasem blesing from program ya. Hemia ol Wetnes blong Jeova, we oli harem gud long saed blong speret, nating we sam long olgeta oli sik long bodi. Sam long ol Kristin ya, tabu speret i makemaot olgeta, nao oli wet blong kasem laef long heven. Grup ya i ‘stap tingbaot ol samting ya we oli no save luk, we oli blong stap longtaem, gogo i no save finis.’ (2 Korin 4:​16-18; 5:​6, 7) Mo ol Kristin we oli wet blong kasem laef long wol, oli stap tingbaot ol merikel long nyufala wol blong God, we bambae oli mekem bodi blong ol i gud bakegen.

17, 18. ?Revelesen 22:​1, 2 i tokbaot wanem we Jeova i mekem blong givhan long ol man? ?Olsem wanem bambae yumi nidim bilif blong kasem blesing from ol samting we Jeova i givim?

¹⁷ Long Revelesen 22:​1, 2, (NW) aposol Jon i tokbaot ol samting we bambae God i mekem long fyuja blong givim laef blong olwe. Hem i se: “Hem i soemaot long mi wan reva blong wota blong laef. Wota ya i klin mo i saen olsem glas. Hem i stap kamaot long bigfala jea blong God mo blong Smol Sipsip. Wota ya i ron, i pas long medel blong bigfala rod blong taon ya. Mo long tufala saed blong hem, i gat ol tri blong laef we oli stap karem frut blong olgeta twelef taem long wan yia, wan taem long wan manis. Mo ol lif blong ol tri ya oli blong tekemaot ol sik blong olgeta nesen.” “Wota blong laef” ya i minim trutok blong Baebol mo ol narafala samting we Jeova bambae i givim mo i mekem blong tekemaot sin mo ded long ol man we oli obei long hem, mo blong givim laef we i no save finis from ransom sakrafaes blong Jisas. (Efesas 5:26; 1 Jon 2:​1, 2) Taem oli laef long wol yet, ol 144,000 tabu man blong Jisas oli yusum ol samting we God i givim from Kraes olsem we oli ‘dring’ wora. Baebol i kolem olgeta se “ol bigbigfala tri blong stret fasin.” (Aesea 61:​1-3; Revelesen 14:​1-5) Long wol oli karem fulap frut long saed blong speret. Nao taem oli laef bakegen mo oli go antap long heven, bambae oli joen wetem Kraes long Wan Taosen Yia Rul blong hem, blong mekem ol blesing blong ransom oli kasem ol man. Ol samting ya nao bambae oli “tekemaot ol sik blong olgeta nesen,” hemia sin mo ded.

¹⁸ Yumi mas bilif strong long ol samting ya we God i givim. Nao bambae yumi rere moa blong yusum olgeta long rod we tabu speret i lidim yumi long hem. I klia se long fyuja, taem man i soemaot bilif long Kraes mo i gohed long saed blong speret, semtaem bodi blong hem bambae i stap kam stret olgeta. Ol bigfala sik long man bambae oli kamgud wantaem from merikel blong God. Be biaen, man i mas gohed blong mekem wanem i stret, nao sloslou bambae hem i kam stret olgeta. Bambae hem i mas yusum oltaem ol samting we God i givim blong mekem man i kamgud bakegen from sakrafaes blong Kraes. Taswe bilif blong yumi bambae i givhan blong mekem bodi i strong mo i stret olgeta.

“Hem i Sevem Yufala From We Yufala i Bilif”

19. ?From wanem i impoten tumas we bilif blong yumi i stap strong?

¹⁹ !Gogo nyufala wol blong God i kamtru mo tudak blong rabis wol ya i lus blong olwe, i impoten tumas we bilif blong ol man blong Jeova i stap strong! Ol man “we oli no gat bilif” bambae oli go long “lugun blong faea mo salfa,” we i olsem seken ded ya. Laswan taem we samting ya i save hapen, hemia taem Wan Taosen Yia Rul blong Kraes i finis, nao laswan traem i kam long ol man. (Revelesen 20:​6-10, NW; 21:8, NW) !Tingbaot blesing long olgeta we oli gohed blong soemaot bilif mo oli stap laef mo harem gud long taem ya gogo i no save finis!

20. ?Olsem wanem bambae 1 Korin 13:13 i gat wan spesel mining long en blong Taosen Yia Rul blong Kraes?

²⁰ Long taem ya, ol tok blong Pol long 1 Korin 13:​13 (NW) bambae i gat spesel mining: “I gat trifala fasin oli stap: bilif, hop, mo lav. Be nambawan long trifala fasin ya, hemia lav.” Bambae yumi no moa nidim blong hop mo bilif se profet tok blong Jenesis 3:15 bambae i kamtru long fyuja. From we long taem ya i kamtru finis. Yumi ol man blong holemtaet bilif blong yumi, taswe bambae yumi gohed blong putum tingting blong yumi i stap strong long Jeova, blong bilif long hem mo Pikinini blong hem, mo blong laekem tufala from we tufala ya nao i mekem profet tok ya i kamtru. Mo tu, bigfala lav mo tangkyu long God from we hem i sevem yumi bambae i mekem se yumi fasgud long God, gogo i no save finis.​—1 Pita 1:​8, 9.

21. ?Tede yumi mas mekem wanem blong God i ‘sevem yumi from we yumi bilif’?

²¹ Jeova i stap yusum ogenaesesen blong hem long wol blong givim ol gudfala samting long yumi blong mekem bilif blong yumi i strong moa. Yumi mas yusum olgeta fulwan. Oltaem yumi mas kam long ol miting blong ol man blong God, mo ansa long ol. (Hibrus 10:​24, 25) Yumi mas traehad blong stadi long Tok blong God mo ol buk blong ol Kristin man. Prea long Jeova blong askem hem blong givim tabu speret long yumi. (Luk 11:13) Folem bilif blong olgeta we oli lidim kongregesen wetem tingting daon. (Hibrus 13:7) Blokem ol samting blong wol ya we oli save pulum yumi. (Matyu 6:​9, 13) Yes, yu wan yu mas fren gud moa wetem Jeova long olgeta rod we oli open long yu. Mo antap long ol samting ya, gohed blong soemaot bilif. Sipos yu yu mekem olsem, yu yu save stap wetem olgeta we oli mekem Jeova i glad, nao hem i sevem olgeta. Pol i talem se: “From gladhat blong God . . . hem i sevem yufala from we yufala i bilif. Be ol samting ya i no kamaot long yufala, hemia i wan presen we God i givim i go nomo long yufala.”​—Efesas 2:8, NW.

[Futnot]

?Yu Yu Ansa Olsem Wanem?

◻ ?Wanem ol samting blong traem bilif blong yumi we oli stap fored long yumi naoia?

◻ ?Bilif i save mekem se yumi kamgud long wanem tufala fasin?

◻ ?Olsem 1 Pita 1:​9 i talem, go kasem wetaem yumi save mekem bilif blong yumi i stap strong?

◻ ?Yumi gat wanem blong givhan long yumi blong mekem bilif blong yumi i kam strong moa?

[Tok Blong Pija Long Pej 15]

?Yu yu olsem papa blong boe ya we Jisas i mekem i gud bakegen? ?Yu harem se yu wan yu nidim moa bilif?

[Tok Blong Pija Long Pej 17]

Ol man we bambae oli laef tru long taem blong “bigfala trabol” long wol oli mas gat bilif olsem Noa mo famle blong hem