!Tekem Kwaet Fasin Olsem Klos Blong Yu!
“Oraet, God i jusumaot yufala finis, yufala i tabu, mo hem i laekem yufala tumas. Taswe, yufala i mas tekem sam fasin olsem we oli klos blong yufala. Yufala i mas gat sore long ol man, mo yufala i mas kaen long olgeta, tingting blong yufala i mas stap daon, yufala i mas kwaet man, mo yufala i mas gat longfala tingting.”—KOLOSI 3:12, NW.
1-3. ?Olsem wanem Pol i tokbaot kwaet fasin mo ol narafala gudfala fasin long Kolosi 3:12-14?
JEOVA i stap givim gudfala fasin long ol man blong hem we i olsem klos blong olgeta. Taswe olgeta we oli wantem se hem i laekem olgeta oli mas putum klos ya we oli wokem long ol strong tred—hemia kwaet fasin. Taem wan man i kros no i harem nogud long tingting blong hem from ol trabol, fasin ya i save mekem man ya i harem gud bakegen. Fasin ya i blokem ol rao.
2 Aposol Pol i talem long ol tabu Kristin se: “Oraet, God i jusumaot yufala finis, yufala i tabu, mo hem i laekem yufala tumas. Taswe, yufala i mas tekem sam fasin olsem we oli klos blong yufala. Yufala i mas gat sore long ol man mo yufala i mas kaen long olgeta, tingting blong yufala i mas stap daon, yufala i mas kwaet man, mo yufala i mas gat longfala tingting.” (Kolosi 3:12, NW) Grik tok ya we oli tanem i kam “tekem sam fasin olsem we oli klos blong yufala” i minim se ol man oli hareap taem oli mekem samting ya. Ol Kristin we God i jusumaot olgeta, oli tabu. Hem i laekem olgeta. Hem i wantem olgeta blong oli hareap blong putum kwaet fasin olsem klos blong olgeta.
3 Pol i gohed, i se: “Yufala i no mas kros long yufala, mo taem wan long yufala i faenem poen agens long narawan long yufala, be oltaem nomo tufala ya i mas fofogivim tufala. Jeova i glad blong fogivim yufala finis, nao long sem fasin, yufala tu i mas glad blong fogivim yufala. Mo i gat wan moa samting bakegen. Yufala i mas tekem fasin blong lav, olsem we hem i klos blong yufala, from we fasin ya i nambawan blong joenem ol man oli kam wan.” (Kolosi 3:13, 14, NW) Lav, kwaet fasin mo ol narafala gud fasin oli mekem ol Wetnes blong Jeova oli save “stap wanples, we oli gat wan tingting nomo.”—Ol Sam 133:1-3.
Elda i Mas Wan Kwaet Man
4. ?Nyufala “klos” blong ol trufala Kristin, oli wokem long wanem gudfala fasin?
4 Ol trufala Kristin oli traehad blong oli ‘kilimaot ol [nogud] fasin blong olgeta. Hemia ol fasin olsem. Ol man oli stap mekem nogud wetem woman, ol woman oli stap mekem nogud wetem man, mo olgeta oli stap mekem ol samting blong sem. Ol man oli stap wantem woman tumas, ol woman oli stap wantem man tumas, mo olgeta oli stap wantem tumas ol sin. Mo olgeta oli stap wantem evri samting.’ Oli stap tekemaot olfala “klos” ya we oli wokem long fasin blong kros, faerap long kros, badfren long narafala, tok agens long narafala man, mo yusum ol doti tok. (Kolosi 3:5-11) Oli tekemaot “olfala fasin” (i min se “olfala man”) mo oli putum “nyufala fasin” (no “nyufala man”) hemia i wan stretfala klos blong olgeta. (Efesas 4:22-24, Kingdom Interlinear) Nyufala klos blong olgeta oli wokem long fasin sore long man, kaen fasin, tingting daon, kwaet fasin, mo longfala tingting. Samting ya i givhan long olgeta blong oli save stretem ol trabol mo blong oli fasgud long God.—Matyu 5:9; 18:33; Luk 6:36; Filipae 4:2, 3.
5. ?Wanem samting i mekem se yumi glad blong kam haf blong Kristin kongregesen?
5 Tede ol man oli ting se oli mas gat strong fasin mo oli mas strong long ol narafala man blong oli save winim sam samting. (Proveb 29:22) Be i narakaen, taem yumi stap long medel blong ol man blong Jeova. Ol man blong wol we oli stap lukaot gud long bisnes, oli stap bos long fasin we i raf mo oli mekem ol man i harem nogud. Be insaed long Kristin kongregesen i no olsem. I gud tumas blong kam haf blong kongregesen. From ol man we oli gat gudhan blong tijim ol narafala Kristin insaed long kongregesen oli kwaet man. Fasin ya i kamaot from waes fasin we olgeta Kristin oli stap soemaot. Ol rul mo advaes we ol elda oli stap givim oli save mekem ol man oli glad. Oli stap tij, “wetem kwaet fasin we i blong waesman nomo.”—Jemes 3:13, NW.
6. ?From wanem ol Kristin elda oli mas kwaet man?
6 Gudfala tingting mo fasin blong ol man blong God i kamaot from we ol man blong lukaot long kongregesen oli kwaet man, oli no man blong rao mo oli gat fasin luksave. (1 Timote 3:1-3) Ol man blong Jeova oli olsem ol gudfala sipsip, oli no olsem ol stronghed nani, no wan sathed dongki, no ol wael dog. (Ol Sam 32:9; Luk 10:3) Oli olsem ol sipsip. Ol man oli mas gat kwaet fasin mo filing blong keagud long olgeta. (Ol Wok 20:28, 29) Yes, God i wantem se ol elda oli kwaet man, oli kaen, oli laekem ol sipsip blong hem, mo oli gat longfala tingting long olgeta.—Esikel 34:17-24.
7. ?Olsem wanem ol elda oli mas tijim ol narafala no givhan long olgeta we oli sik long saed blong speret?
7 Wan elda we i olsem “man blong wok blong Masta blong yumi, . . . i mas wan man blong mekem i gud long olgeta man, wan gudfala man blong tij, we tingting blong hem i longfala. Hem i mas wan man we i save stretem ol man we oli agens long hem, long fasin we i kwaet nomo. Maet God bambae i givim jans long ol man ya, blong oli tanem tingting blong olgeta from ol sin blong olgeta, blong kam we oli save ol trutok.” (2 Timote 2:24, 25) Ol sipsip ya oli blong God. Taswe taem ol Kristin man blong lukaot long ol sipsip oli wantem givhan long olgeta long saed blong speret, oli mas kaen mo keagud long olgeta. Ol elda oli no mas yusum olgeta blong kasem sam samting we olgeta nomo i wantem be oli mas kwaet man, olsem Nambawan Man blong lukaot long sipsip, Jisas Kraes.—Jon 10:11-13.
8. ?Wanem samting i hapen long kwaet man ya Moses mo from wanem?
8 Samtaem i hadwok blong wan elda i holem kwaet tingting. “Man ya Moses, tingting blong hem i stap daon moa i winim ol narafala man blong wol long taem blong hem.” (Namba 12:3) Ol man Isrel oli rao wetem Moses taem oli sot long wora long Kades. Oli talem se hem i fol blong hem, from we hem i lidim olgeta i aot long Ijip i go long drae ples ya. Moses i fesem ol nogud toktok olsem wetem tingting daon plante taem finis. Be long taem ya, hem i no moa holem tingting ya. Hem i kwik blong tok strong long olgeta. Hem mo Eron tufala i stanap long fored blong ol man ya mo tufala i pulum tingting blong ol man ya i go long tufala nomo. Moses i se: “!Naoia yufala i harem, yufala ol rebol! ?Yufala i ting se aot long ston ya mitufala i mas givim wora long yufala?” Nao Moses i kilim ston ya wetem stik blong hem tu taem, mo God i mekem “plante wora” i kamaot blong ol man mo ol anamol oli dring. Jeova i no glad from Moses mo Eron tufala i no leftemap Hem. Taswe Moses i no gat raet blong lidim ol man Isrel i go long Promes Lan.—Namba 20:1-13; Dutronome 32:50-52; Ol Sam 106:32, 33.
9. ?Olsem wanem kwaet fasin blong wan elda i save kasem traem?
9 Kwaet fasin blong wan Kristin elda i save kasem traem tu long plante rod. Pol i givim woning long Timote, se bambae i save gat man we “tingting blong hem i kam antap tumas” mo “we i wantem askem ol kwestin mo we i wantem rao long ol tok.” Pol i talem se: “Fasin ya i stap mekem ol man oli jelas, oli stap seraot, oli stap tok nogud long nem blong narafala man, oli stap tingting nogud long olgeta, we hemia i nogud tumas, mo oltaem oli stap rao.” Timote i wan elda, taswe hem i no mas gat strong fasin. Hem i no mas ‘go kolosap long ol samting ya. Hem i mas traehad blong mekem ol stret fasin, mo blong folem ol fasin blong prea we God i wantem. Bilif blong hem i mas strong mo hem i mas laekem tumas ol man. Hem i mas holem wok gogo kasem en blong hem, mo i mas kam wan kwaet man.’—1 Timote 6:4, 5, 11.
10. ?Taetas i talem wanem bakegen long ol kongregesen?
10 Ol elda oli mas gat kwaet man, be long semtaem oli mas stanap strong long samting we i stret. Taetas i olsem, hem i tok long olgeta long kongregesen blong Krit blong “bambae oli no tok nogud long nem blong narafala man, mo oli no man blong rao. Oli mas man we oli save frengud long ol man, mo oltaem oli mas [soemaot fasin we i kwaet olgeta long olgeta man, NW].” (Taetas 3:1, 2). Taetas i talem se ol Kristin oli mas soemaot kwaet fasin long olgeta man from we Jeova i kaen mo i laekem tumas olgeta. God i no stap sevem ol man blong bilif, from ol gudfala fasin blong olgeta nomo, no gat. Hem i sore long olgeta mo hem i yusum Jisas Kraes blong sevem olgeta. Kwaet fasin blong Jeova mo longfala tingting blong hem i mekem se yumi save kasem sef tu. Ol elda tede oli mas mekem olsem Taetas. Oli mas talemaot bakegen long ol kongregesen blong oli stap aninit long God. Ol man long kongregesen oli mas soemaot kwaet fasin long ol narafala man olsem we God i stap mekem.—Taetas 3:3-7; 2 Pita 3:9, 15.
Kwaet Fasin i Lidim Man Blong Givim Waes Advaes
11. ?Galesia 6:1, 2 i soemaot wanem rod we i stret blong givim advaes?
11 ?Olsem wanem sipos wan sipsip i go lus? Pol i talem se: “Ol brata mo sista. Sipos wan long yufala i foldaon, i mekem samting we i no stret, yufala we Speret blong God i stap long yufala, yufala i mas givhan long hem blong stretem hem. Be yufala i mas mekem long kwaet fasin. Mo yufala tu i mas lukaotgud long yufala, blong sam samting bambae i no kam traem yufala. Yufala i mas stap givgivhan long yufala long ol trabol blong yufala. Long fasin ya, bambae yufala i save mekem ol samting we loa blong Kraes i talem.” (Galesia 6:1, 2) Advaes i save wok moa gud sipos oli givim long kwaet fasin. Sipos ol elda oli stap traem blong givim advaes long wan man we i kros, oli mas bos long tingting blong olgeta, mo luksave se “man we i kwaet long toktok blong hem, i save brekem wan bun.” (Proveb 25:15) Taem yu toktok wetem wan man we fasin blong hem i strong olsem bun, long wan kwaet fasin nomo, bambae strong fasin blong hem i finis.
12. ?Olsem wanem tingting blong wan kwaet man i givhan long man blong givim advaes?
12 Jeova i wan tija we i gat kwaet fasin. From samting ya ol tijing blong hem oli save wok insaed long kongregesen. Ol elda oli mas mekem i sem mak taem oli givim advaes long wan man we i nidim help long saed blong speret. Disaepol Jemes i raetem se: “Sipos i gat sam long yufala we oli waes, oli man blong save, i gud oli soemaot samting ya [wetem kwaet fasin we i blong waesman nomo, NW]. Laef blong olgeta i mas stret, tingting blong olgeta i mas stap daon, mo fasin blong olgeta i mas waes.” Kwaet fasin i kamaot taem yu gat respek mo fasin tangkyu from “waes long heven,” mo taem yu stap luksave ol prapa mak blong yu wetem tingting daon. Wan kwaet man blong givim advaes we tingting blong hem i stap daon, hem i no stap toktok olbaot mo mekem ol mastik. Ol advaes blong hem i isi blong ol man i akseptem.—Jemes 3:13, 17.
13. ?Olsem wanem “kwaet fasin we i blong waesman nomo” i save givhan taem man i givim advaes?
13 “Kwaet fasin we i blong waesman nomo” i blokem wan man blong givim advaes blong i no kwik blong talemaot ol strong tok. Hem i tingtinggud fastaem. Be taem wan elda i wantem givim advaes long wan fren blong hem, hem i no mas letem filing blong hem i blokem hem. Mo tu hem i no mas slakem ol advaes blong hem blong mekem wan man i harem gud long hem. Wan elda i mas givim advaes we i laenap wetem Baebol long kwaet fasin. (Proveb 24:24-26; 28:23) Advaes we kasin blong Amnon i givim long hem i mekem Amnon i harem gud, be biaen i lusum laef blong hem from. (2 Samuel 13:1-19, 28, 29) Tede ol elda oli no mas haedem ol rul blong Baebol from we oli no wantem stikim tingting blong ol man. Sipos oli mekem olsem, bambae ol man oli save lusum laef blong olgeta from. Ol elda tede oli mas mekem olsem aposol Pol. Hem i talemaot long ol man “olgeta samting we God i wantem.” (Ol Wok 20:26, 27; 2 Timote 4:1-4) Kristin we i bigman long saed blong speret i stap soemaot se hem i fraet long God mo i stap givim ol stret advaes long kwaet fasin blong waesman.
14. ?From wanem wan elda i mas lukaotgud blong no mekem disisin we i blong narafala man?
14 Sipos wan elda i kwaet man mo i gat waes blong heven, hem i no save fosem ol man blong oli folem prapa tingting blong hem nomo. Hem i luksave se i no waes mo i no stret blong hem i mekem disisin we narafala man i mas mekem. Wan elda i save gat fol blong wan disisin we hem i mekem long narafala man sipos nogud frut i kamaot from. Wan elda i save tokbaot wanem Baebol i talem, be sipos i no gat loa long Baebol long bisnes ya, wanwan man i save jusum blong mekem no blong no mekem wan samting, folem prapa tingting blong hem. Olsem Pol i talem, se: “From we evri man i gat basket blong hem blong karem.” (Galesia 6:5; Rom 14:12) Wan elda i save yusum sam vas blong Baebol blong askem ol kwestin blong halpem man ya blong tingtinggud long ol rod we hem i save tekem long disisin blong hem.
15. ?Wan elda i mas mekem wanem sipos hem i no save ansa long wan kwestin?
15 Sipos wan elda i no save ansa long wan kwestin, i nogud blong hem i talemaot prapa tingting blong hem blong soemaot se hem i save. Kwaet fasin blong waesman, i blokem hem blong hem i no givim wan ansa we i olbaot. From biaen man we i kasem advaes i save harem nogud from. I gat “wan taem blong stap kwaet mo wan taem blong toktok.” (Eklesiastis 3:7; lukluk Proveb 21:23.) Sipos wan elda i save long ansa blong wan kwestin, hem i save “toktok.” Hem i save ansa tu long wan kwestin sipos hem i lukaotem mo faenemaot stret ansa blong hem. I no waes blong ansa long ol kwestin we oli no gat stret ansa blong ol.—Proveb 12:8; 17:27; 1 Timote 1:3-7; 2 Timote 2:14.
Taem i Gat Fulap Man Blong Givim Advaes
16, 17. ?From wanem i stret blong ol elda i toktok wetem ol narafala elda?
16 Prea mo stadi bambae i givhan long ol elda blong ansa long ol kwestin. Mo tu, taem ol bigfala trabol oli kamaot, ol elda oli save stretem. Oli mas tingbaot se “taem i gat fulap man blong givim advaes, bambae ol plan oli kamtru.” (Proveb 15:22) Wan elda i save kasem waes taem hem i stap toktok wetem ol narafala elda. (Proveb 13:20) Ol elda oli no gat sem ekspiryens mo save long Baebol. Kwaet fasin blong waes man i pusum wan elda we i no gat plante ekspiryens blong toktok wetem ol narafala elda we oli gat bigfala save long Baebol mo oli gat plante ekspiryens. Ol elda oli mas mekem olsem, taem oli wantem stretem wan bigfala trabol.
17 Ol elda we oli jusum olgeta blong oli stretem wan bigfala trabol oli save askem ol narafala elda blong givhan long olgeta. Bifo, Moses i jusum sam man blong halpem hem blong jajem ol man Isrel. Be ol man ya “oli mas man blong ona long God, mo oli mas man we ol man oli trastem olgeta. Mo bambae oli mas man we oli no save tekem pei blong haedem rong blong man.” Nating se olgeta ya oli bigman, be oli no gat plante save mo ekspiryens olsem Moses. Taswe taem oli mas jajem wan trabol “we oli no naf blong stretem, bambae oli save tekem i kam long [Moses] blong i stretem. Be ol smosmol trabol, olgeta nomo oli save stretem.” (Eksodas 18:13-27) Tede i stret nomo blong ol elda oli save askem ol narafala elda, we oli gat moa ekspiryens blong givhan long olgeta, taem oli no save stretem wan trabol. Be ol elda we oli lukaot long bisnes ya oli mekem laswan disisin.
18. ?Long wan kot-komiti wanem samting i save mekem se stret disisin i save kamaot?
18 Mishna, wan buk blong ol man Jyu bifo, i talem se long Isrel, namba blong ol man long velej kot i stap jenis. I dipen long trabol we oli mas jajem, sipos i bigfala trabol no i smolwan nomo. Taem i gat fulap man blong givim advaes, samting ya i save givhan blong mekem wan disisin we i stret. Be i no tru oltaem, from we nating se i gat fulap man, be evriwan i save mestem tu. (Eksodas 23:2) Baebol mo speret blong God, tufala nomo i save mekem ol disisin we i stret. Waes fasin mo kwaet fasin i save pusum ol Kristin blong stap aninit long ol samting ya.
Wetnes Wetem Kwaet Fasin
19. ?Olsem wanem kwaet fasin i givhan long ol man blong Jeova blong wetnes long ol narafala man?
19 Kwaet fasin i givhan long ol man blong Jeova blong wetnes long ol defren kaen man. (1 Korin 9:22, 23) Jisas i stap tijim ol man wetem kwaet fasin, taswe ol man oli no fraet long hem, olsem we oli stap fraet long ol lida blong jyos we oli gat strong fasin. (Matyu 9:36) Kwaet fasin blong hem i pulum ol “sipsip,” be i no ol “nani.” (Matyu 25:31-46; Jon 3:16-21) Jisas i stap tok strong long ol man we oli olsem nani, oli gat tu fes. Be ol Wetnes blong Jeova oli mas kwaet man taem oli talemaot ol mesej blong God blong jajem ol man. From we ol Wetnes blong Jeova oli no gat fasin luksave mo paoa olsem Jisas. (Matyu 23:13-36) Mesej blong Kingdom we ol Wetnes oli stap talemaot long kwaet fasin i mekem ‘olgeta ya we oli stret blong kasem laef we i no save finis oli bilif,’ olsem ol sipsip we oli haremsave voes Jisas.—Ol Wok 13:48.
20. ?Taem yumi tijim ol man wetem kwaet fasin, olsem wanem samting ya i givhan long ol studen blong Baebol?
20 Gudfala risal i kamaot taem yumi gat kwaet fasin blong prij mo tijim ol narafala man. Yumi mas soemaot klia long ol man ol risen blong ol samting, ol rul blong Baebol, mo trutok. Pita i raetem se: “Yufala i mas mekem Kraes i Masta blong yufala, yufala i mas putumap hem i nambawan long tingting blong yufala. Mo oltaem yufala i mas stap rere blong givim ansa long ol man. Sipos man i askem long yufala from wanem yufala i putum tingting blong yufala i stap strong long Kraes, bambae yufala i mas rere blong talemaot, be long kwaet fasin, we i gat ona long hem.” (1 Pita 3:15) Wan studen we oli tijim gud hem long kwaet fasin, bambae hem i tingting dip long stadi blong hem. Be sipos oli tijim hem long strong fasin, no oli agyu nomo wetem hem, bambae hem i no lesin gud. No maet bambae hem i save foldaon from. Nao ol minista we oli stap tij long kwaet fasin oli save talem olsem Pol, se: “Mifala i no wantem we sam man oli save faenem sam rabis poen long ol wok blong mifala. Nao mifala i stap traehad, blong mifala i no mekem sam fasin we narafala man bambae i save foldaon long hem.” (2 Korin 6:3) Samtaem ol man we oli stap agensem yumi oli save lesingud long yumi sipos yumi stap tij wetem kwaet fasin.
Evriwan i Mas Gat Kwaet Fasin
21, 22. ?Ol man blong Jeova oli kasem wanem from kwaet fasin?
21 Ol Kristin oli no soemaot kwaet fasin blong pulum ae blong ol man we oli stap afsaed long ogenaesesen blong Jeova, no gat. Ol man blong God oli mas gat fasin ya blong oli save joengud. (Kolosi 3:12-14; 1 Pita 4:8) Taem ol elda mo ol man blong givhan we oli gat kwaet fasin oli stap joengud blong wok tugeta, ol kongregesen oli kam strong long saed blong speret. Ol man blong Jeova oli mas soemaot kwaet fasin mo ol narafala fasin tu we oli impoten blong mekem. From we i gat “wan loa” nomo blong evriwan.—Eksodas 12:49; Levitikas 24:22.
22 Kwaet fasin i mekem ol man blong God oli gat pis mo glad taem. Hemia i wan fasin we i olsem kaliko blong wokem klos. Olgeta Kristin oli mas putum klos we oli wokem long kaliko ya, insaed long haos blong olgeta, long kongregesen, mo long sam narafala ples tu. Yes, olgeta man blong Jeova oli mas tekem kwaet fasin olsem klos blong olgeta.
?Olsem Wanem Yu Yu Ansa?
◻ ?From wanem ol Kristin elda oli mas kwaet man?
◻ ?Olsem wanem kwaet fasin i givhan blong givim waes advaes?
◻ ?Wanem samting i save kamaot taem i gat fulap man blong givim advaes?
◻ ?From wanem i impoten blong prij wetem kwaet fasin?
Garo Nalbandian
[Tok Blong Pija Long Pej 17]
Ol man blong Jeova oli olsem ol sipsip mo oli nidim blong ol man oli kea long olgeta wetem kwaet fasin
[Credit Line]
Garo Nalbandian
[Tok Blong Pija Long Pej 19]
Kwaet fasin i mekem se ol man blong Jeova oli wetnes long olgeta kaen man