?I Rong Blong Givimbak?

Long wan bigfala rod long Yunaeted Stet, wan ka i no slou daon blong letem narafala ka i pas. Draeva blong namba tu ka ya i kros mo i sutum ka ya we i mekem nogud long hem, mo i kilim wan man i ded.

Wan yangfala gel i no tekem pat long wan pleplei long skul from wan narafala gel i tekem ples blong hem. Ale hem i givimbak, hem i gyaman long boefren blong gel ya se hem i luk gel ya i go wetem wan narafala boe blong wan narafala skul. Ale hem i spolem tufala. Tufala i no moa fren.

PLANTE man oli harem se i stret nomo blong givimbak long ol man we oli ting se oli mekem i no stret long olgeta. Ating oli stap folem tok ya se: “Yu no kam krangke from kros, yu mekem i sem mak long hem.” Tede fasin blong laekem narafala man hem i stap godaon, mo tingting blong givimbak hem i stap kam antap.​—Matyu 24:12.

?Wanem tingting blong yu long fasin blong givimbak? Sipos yu yu bilif long Baebol ating yu harem se i rong blong givimbak long wan man we i mekem nogud long yu. Yumi stap laef long wan wol we i fulap long ol rabis fasin. Taswe oltaem yumi no save fogivim ol man we oli stap mekem i nogud long yumi. Fasin fogif i narakaen long fasin blong givimbak. ?Olsem wanem sipos wan man i gyaman long yu no i stilim yu? ?Olsem wanem taem wan man i no tingbaot yu no i daonem yu long fored blong ol narafala man? ?Bambae yu givimbak no bambae yu fogivim hem?

Tingting Blong Givimbak i Save Spolem Yu

Ol trabol we ol man oli save mekem long yumi oli no sem mak. Be plante man oli wantem givimbak long enikaen trabol we ol man oli mekem long olgeta. Ol trabol ya maet oli no bigwan olsem fasin stil no fasin blong wantem kilim man i ded. Oli olsem ol “trabol” we yumi tokbaot long stat blong stampa tok ya. Be long tingting blong ol man we oli wantem givimbak, ol trabol ya oli bigfala samting long olgeta.

Yumi no mas gat tingting blong givimbak. Long Proveb 24:​29, Baebol i talem se: “Yu no mas talem se: ‘Bambae mi mi mekem long hem stret olsem we hem i mekem long mi. Bambae mi mi givimbak long ol man wanwan, stret olsem we olgeta nomo oli mekem finis.’” ?From wanem? From wan samting se, tingting ya i save spolem filing blong yu mo bodi blong yu tu. Ol tingting blong givimbak i tekemaot pis long tingting mo i stopem yumi blong tingtinggud. Tingbaot ripot long nyus ya: “Tu man blong wokem garen oli sutsutum tufala wetem masket mo tufala evriwan i ded long trak blong tufala. Tufala ya i stat blong no laeklaekem tufala taem tufala i pikinini nomo mo naoia fote yia i pas finis, tufala i jes kilim tufala i ded from.” Traem tingbaot, long olgeta laef blong tufala, tingting blong tufala i kam nogud from tingting blong givimbak.​—Proveb 14:​29, 30.

Yumi no mas gat tingting blong givimbak. From ol man we oli stap spolem ol narafala man oli save jenis. Aposol Pol i mekem olsem. Long wan taem ‘hem i harem i stret nomo, we olgeta oli kilim i ded’ disaepol ya Steven mo ‘i stap tok strong, i stap mekem promes blong kilim ol man blong Masta blong yumi oli ded.’ Be biaen hem i jenis. Sam yia afta, aposol Pita​—we bifo laef blong hem i stap long denja from Pol​—hem i tokbaot Pol se “gudfala brata ya blong yumi Pol.” (Ol Wok 8:1; 9:1; 2 Pita 3:15) Ol Kristin oli save traem blong givimbak long Pol taem hem i blaen gud i stap long Damaskas. (Ol Wok 9:​3-15) Be hemia bambae i wan bigfala mastik, sipos oli mekem olsem.

Taswe Pol i talem long Rom 12:20 se: “Sipos wan enemi blong yu i hanggri, yu mas givim kakae long hem. Sipos hem i tosta, yu mas givim wora long hem.” ?From wanem? From we sipos yumi givimbak long enemi blong yumi, bambae fasin blong hem i kam moa strong. Mo hem i kam wan badfren blong yumi stret. Be sipos yumi gud long man we i stap mekem i no stret long yumi no i stap spolem yumi, maet yumi save daonem strong fasin blong hem. Nao wan enemi blong yumi bifo i save kam wan fren blong yumi.

Yumi mas luksave ol slak fasin blong yumi blong winim nogud tingting. Nogud tingting i save lidim yumi blong wantem givimbak taem man i mekem nogud long yumi. Man blong raetem ol Sam i askem se: “?Sipos yu yu stap raetemdaon ol sin blong mifala, hu bambae i save stanap long fes blong yu, we yu no save jajem hem?” (Ol Sam 130:3) Yumi evriwan i stap mekem ol narafala man i harem nogud. Ating yumi glad tumas from we oli no givimbak long yumi. Taswe i stret nomo blong yumi blokem kros blong yumi. Jisas i talem se: “Yufala i mas mekem long ol narafala man, olsem we yufala i wantem blong ol narafala man oli mekem long yufala.”​—Matyu 7:12.

I tru ya, Baebol i talem se: “Yufala i mas no laekem nating rabis fasin.” (Ol Sam 97:​10, NW; Emos 5:15) Be Baebol i no talem se yumi mas no laekem nating ol man we oli stap mekem i no stret long yumi. Jisas i talem long yumi se: “Yufala i mas laekem ol enemi blong yufala, mo yufala i mas prea from olgeta we oli stap ronem yufala.” (Matyu 5:44) Sipos yumi pembak long wan man we i mekem i no stret long yumi, yumi stap folem tingting blong rabis man ya. Wan proveb blong bifo i talem se: “Yu no mas talem se: ‘Bambae mi pembak ol rabis fasin.’ Yu mas gat hop long Jeova mo hem bambae i sevem yu.” (Proveb 20:22) I waes blong mekem olsem. Hem i gud tumas blong soemaot se yumi win taem yumi stap blokem tingting ya blong folem fasin blong ol rabis man.​—Jon 16:33; Rom 12:​17, 21.

?Hu Bambae i Givim Panis?

Sam trabol oli moa nogud bitim ol nogud filing we yumi kasem from ol man i daonem yumi. ?Olsem wanem sipos wan man i kilim wan long yumi? Yumi wantem ol man blong oli mas mekem wan samting blong stretem. ?Be wanem samting? Long sam ples i stret nomo blong ol man oli save givimbak. Be rod ya i mekem plante man oli ded. Loa blong God i no letem olsem. Mo tu plante loa blong ol man i no letem ol wanwan man i givimbak. Loa ya i gud, mo i blokem ol trabol blong ded i no kamaot.

?Olsem wanem, man i mas stap olsem nomo blong ol man oli stap mekem nogud long hem? No gat. Sipos ol man oli mekem nogud long yumi no oli spolem ol samting blong yumi, i gat ol haeman oli stap blong oli givhan long yumi. Yu save singaot long ol polis. Long ples blong wok, yu save go luk bos blong yu. Long skul, yu save go luk hedmasta. Oli stap long ples blong olgeta blong oli kipim stret fasin i stap. Baebol i talem long yumi long saed blong ol haeman se: “Mo gavman i olsem man blong God, blong jajem olgeta olsem we God i wantem.” (Rom 13:4) Stret fasin i save kamaot sipos gavman i yusum gud paoa we hem i gat blong stopem ol rabis fasin mo givim panis long ol rabis man.

I tru samtaem stret fasin i tekem longtaem blong kamaot. Wan man we i les long ol fasin blong wol ya i raetem se: “Stret fasin i olsem wan tren we kolosap oltaem nomo hem i stap let.” Samtaem i tru, tren ya i neva kasem ples blong hem. Ol man blong brekem loa maet oli strong tumas blong ol haeman oli save winim olgeta. Nating se i olsem, yumi mas bos long tingting blong yumi. Baebol i talem se: “Wan man we i krangke hem i lego long speret blong hem, be man we i gat waes fasin hem i holemtaet hem i stap kwaet go kasem en.”​—Proveb 29:11.

?Hu Bambae i Givimbak?

Taem yumi no givimbak long narafala man samting ya i save givhan long yumi. Yumi stap kwaet yumi stap wet. From yumi save finis se God bambae i mekem stret fasin i kamaot long prapa taem blong hem. Jeova i save se sipos ol man oli no stretem ol rong blong olgeta, rabis fasin bambae i kam antap moa. (Eklesiastis 8:11) Bambae hem i no letem ol rabis man oli stap spolem ol man blong olwe. From samting ya aposol Pol i talem se: “Sipos wan man i mekem trabol long yufala, bambae yufala i no traem blong mekem trabol long hem bakegen. Yufala i mas livim i stap, blong God bambae i jajem hem, i givim panis long hem. From we Baebol i talem se ‘Hae God i talem se “Fasin ya blong givimbak long man we i mekem i nogud, mi nomo mi gat raet blong mekem. Mo mi bambae mi givimbak long olgeta.”’” (Rom 12:19) Baebol i stap tokbaot wan dei blong givimbak. Dei ya i blong God. ?Dei ya blong givimbak i olsem wanem? ?Dei blong givimbak blong God bambae i go long hu? Yumi save tokbaot samting ya long nekis haf.

[Bokis blong pija long pej 4]

Blong yumi no gat tingting blong givimbak yumi mas tingbaot se

□ God i stap tingbaot stret fasin

□ holem tingting blong givimbak i save spolem yumi

□ fasin kaen i mekem se ol trabol blong yumi wetem ol narafala man i save godaon

□ plante nogud fasin we yumi stap mekem long ol narafala man, olgeta oli no stap tingbaot

□ olgeta we oli stap mekem i nogud long yumi maet oli save jenis

□ yumi winim wol taem yumi no folem ol rod blong hem