Ripot Long Wok Blong Kingdom
Trutok Blong Baebol i Mekem Wan Katolik Sista Long Bolivia i Kam Fri
PLANTE man we hat blong olgeta i gud oli stap ronwe long ol gyaman skul, oli lanem trutok blong Baebol, mo oli wosipim Jeova, trufala God. Bitim 7,600 man oli mekem sem mak long Bolivia, olsem wan Katolik sista.
Taem hem i gat 9 yia nomo, hem i mitim wan Wetnes blong Jeova. Hem i openem doa taem Wetnes i kam long haos blong hem, mo long fastaem blong hem, hem i harem nem blong God, Jeova. Nem ya i stap long tingting blong hem long plante yia.
From we hem nomo i gel long famle blong hem, famle i tingting blong mekem hem i kam wan Katolik sista. Hem i talem se, “Mi mi haremgud se bambae mi mi mekem wok blong God—olsem we mi bin tingting long hem long taem ya.” Be fasin glad blong hem i finis, hem i harem nogud taem hem i luk kruked fasin mo fasin blong no laekem wan man from kala no laen blong hem long haos blong ol Katolik sista. Hem i se: “Ating bambae mi neva fogetem ol nogud tingting mo ol faet long saed blong tingting mo bodi we oli mekem mi mi harem nogud, ol samting ya oli mekem se mi luk God olsem wan God we i no gat lav, be i olsem wan God blong panisim ol man nomo.”
Hem i gohed, i se: “Go kasem taem ya we mi kam wan Katolik sista, mi no faenem nem ya Jeova long Baebol. Mi stap faenem ‘Yahweh’ nomo mo mi no save mining blong hem. Wan dei mi traem lukaotem ol man we oli stap tokbaot Jeova, be mi no faenem olgeta.
“Taem i pas, mo wan dei taem mi stap wokbaot i go long haos blong famle blong mi, mi luk wan notisbod, ‘Haos-Kingdom blong Ol Wetnes blong Jeova.’ Mi wantem talem long olgeta se oli gyaman profet, be i no gat man long haos ya. Nekis Sande mi kambak bakegen. Oli gat wan miting, mo plante man oli sapraes blong luk wan Katolik sista we i putum ol klos blong hem, i kam long miting. Afta long miting, mi traem blong ronwe kwik. Be, wan Wetnes i talem halo long mi, nao mi askem hem se, ‘?From wanem yufala i tok nogud long Tabu Man taem yufala i yusum nem blong hem?’ Kwestin blong mi i mekem se mitufala i storeyan long Baebol, mo mi mekem ol plan blong hem i kam luk mi long haos blong famle blong mi. Ol papa mama blong mi oli sakemaot hem. Mitufala i luk mitufala bakegen, be, tu manis biaen nomo, mo hem i askem mi blong stadi Baebol long haos blong hem. Mi mi haremgud long ol save we hem i soemaot long mi, hem i pruvum se ol Kristin oli mas yusum nem blong God. Samting ya i givim paoa we mi nidim blong lego ol rabis bilif mo ol tijing we mi kasem taem mi stap olsem wan Katolik sista.
“Mi bin tingbaot plante samting we oli hapen long mi taem mi stap long haos we ol Katolik sista oli stap long hem. Eksampel, wan dei mi nidim moa kakae. Nao mi raet i go long papa mama blong askem olgeta blong sanem sam kakae long mi, mi no save se long ples ya we mi stap long hem oli stap openem ol leta mo jekem. Long nekis taem blong kakae, oli givim wan bigfala bred mo wan bigfala jam long mi, mo oli fosem mi blong kakae evriwan. Nao mi gat plante kakae tumas. Mi talem long ol fren blong mi, mo wan i talem long mi se mi save brebrekem bred we mi no save kakae long ol smosmol pis mo sakem long floa. Taem mi mekem olsem, wan Katolik sista i holem mi kwiktaem mo i sakem mi daon long floa, mo i talem se mi mas klinim ful floa ya wetem tang blong mi. Rum ya i bigwan. Taem mi stap obei long oda ya, mi harem plante long olgeta oli stap laf smosmol mo sam oli laf bigwan—oli no sore nating long mi.
“Naoia mi luk olsem wanem i gud blong stap fri long ol samting ya. I tru, i hadwok blong kam fri. Wan samting, papa blong mi i sakemaot mi long haos. Nating se i olsem, bifo we mi livim ples we mi stap long hem olsem wan Katolik sista, mi gat jans blong givhan long sam yangfala Katolik sista blong oli lanem trutok. !Mi glad blong talem se sam long mifala oli givim laef blong olgeta long Jeova God!
“Afta we mi livim ples we mi stap long hem olsem wan Katolik sista, i hadwok long papa blong mi blong luksave from wanem mi no wantem mekem wan wok we i gat plante mane long hem be hem i tekem plante taem blong mi. Be, mi wantem moa taem blong mekem wok blong God. Naoia mi wok olsem wan paenia, laef blong mi i isi mo mi haremgud from. Mo mi glad tumas, we mama mo ol brata blong mi oli joenem mi long wok blong Jeova.”
Tru ya, trutok blong Baebol i mekem man i fri long ol gyaman skul blong wol, mo i givim glad blong olwe.—Jon 8:32.