?Baebol i Wan Presen We God i Givim?

“MI BILIF se Baebol i nambawan presen we God i givim long ol man.” Tok ya, Abraham Lincoln, namba 16 presiden blong Amerika i talem.a I no hem wan nomo we hem i soemaot fasin tangkyu long olfala buk ya.

William E. Gladstone wan bigfala man long gavman blong Engglan biaen long 1800, i talem se: “I gat samting i makem Baebol se hem i gat Spesel Stampa blong hem, mo hem i defren long ol narafala buk.” Sem tingting olsem, Patrick Henry wan haeman long gavman blong Amerika i stap tokbaot long ol yia we oli ron biaen long 1700, hem i se: “Baebol i gud moa bitim ol narafala buk we ol man oli stap wokem.” Hedgavman blong Franis, Napoléon Bonaparte we i laekem Baebol tumas i talem se: “Baebol i no wan buk olbaot, hem i Laef Samting, mo i gat paoa we i save winim ol enemi blong hem.”

Long sam man, Baebol i save givhan mo i save mekem olgeta oli haremgud. Wan haeman blong Amerika i talem se: “Oltaem long olgeta wari mo trabol blong mi, Baebol i stap soem rod mo givim paoa long mi.” Presiden blong Amerika, John Quincy Adams, i laekem buk ya mo hem i talem se: “Fasin blong mi long plante yia i kam se mi stap ridim ful Baebol wan taem evri yia.”

Sipos Big Man i givim Baebol long ol man, i mas gat pruf se hem i kamaot long Hem. Baebol i mas nambawan buk bitim ol narafala buk. Mo blong Baebol i kam olsem trufala stampa blong paoa mo buk blong tijim man, hem i mas buk we ol man oli save trastem hem. Taswe, i gat ol kwestin i stap yet se, ?Baebol i rili wan presen we God i givim? I gud yumi ansa long kwestin ya.

[Futnot]

[Foto pej 3]

William. E. Gladstone

[Credit line]

U.S. National Archives photo

Abraham Lincoln

[Credit line]

U.S. National Archives photo

Patrick Henry

[Credit line]

Harper’s U.S. History

Napoléon Bonaparte

Drawn by E. Ronjat

John Quincy Adams

[Credit line]

Harper’s U.S. History

Robert E. Lee

[Credit line]

U.S. National Archives photo