Oli Fri Be Oli Mas Talemaot Fasin Blong Olgeta Long God
“Nao bambae yufala i save ol trutok, mo trutok ya bambae i mekem yufala i friman.”—JON 8:32.
1, 2. (a) ?Olsem wanem ol man oli lukaot fasin fri? (b) ?Hu nomo i fri olgeta? Talem from wanem.
FASIN fri. !Hemia wan tok we i gat bigfala paoa! Ol man oli stap gotru long plante faet mo ol faet we ol grup blong man oli mekem mo tu ol man oli stap harem nogud from we oli wantem kam fri. Yes, buk ya The Encyclopedia Americana i talem se: ‘Stat long taem bifo kam kasem taem ya we ol man oli gat plante save, i no gat wan tingting we i impoten moa bitim tingting blong kam fri.’
2 ?Be hamas man oli rili fri? ?Hamas man oli save wanem ya fasin fri? Buk ya The World Book Encyclopedia i talem se: “Blong ol man oli fri olgeta, i no mas gat ol rul we oli blokem ol samting we oli wantem tingbaot, tokbaot, mo mekem. Oli mas save long ol samting we oli jusum, mo oli mas gat raet blong jusum wanem oli wantem.” ?Yu save wan man we i rili fri olsemia? ?Hu man i save talem se i no “gat ol rul we oli blokem tingting, toktok, mo fasin blong olgeta”? I gat wan man nomo long olgeta ples long heven mo wol we i olsemia—Jeova God. Hem nomo i fri olgeta. Hem nomo i save jusum wanem samting hem i wantem blong mekem mo hem i save mekem, nating se ol man oli save agensem hem. Hem i “Hae God.”—Revelesen 1:8; Aesea 55:11.
3. ?Ol man oli mas mekem wanem sipos oli wantem haremgud long fasin fri blong olgeta?
3 Ol man we oli daon moa, oli no save fri olgeta. Smol fasin fri we yumi gat, plante taem sam haeman oli givim no oli promes blong givim long yumi, sipos yumi stap aninit long paoa blong olgeta. Wan man i save fri nomo sipos oltaem hem i ona long haeman we i givim fasin fri long hem. Eksampel, ol man we oli laef long “wan kantri we i fri” oli haremgud long plante samting, olsem fasin fri blong wokbaot, fasin fri blong toktok, mo fasin fri blong wosip. ?Hu i givim ol fasin fri ya? Loa blong kantri ya. Man i save haremgud long fasin fri ya sipos hem i obei long ol loa ya. Sipos hem i no yusumgud fasin fri blong hem mo i brekem loa, bambae hem i mas talemaot fasin blong hem long fes blong ol haeman ya, mo bambae hem i stap long kalabus hem i no moa fri.—Rom 13:1-4.
Fasin Fri We God i Givim—Mo Talemaot Long Fes Blong God
4, 5. ?Wanem fasin fri we ol man blong wosip long Jeova oli haremgud long hem, mo wanem samting oli mas talemaot long fes blong God?
4 Long faswan handred yia, Jisas i tokbaot fasin fri. Hem i talem long ol man Jyu se: “Sipos yufala i obei long ol tok ya blong mi, hemia, yufala i prapa man blong mi. Nao bambae yufala i save ol trutok, mo trutok ya bambae i mekem yufala i friman.” (Jon 8:31, 32) Hem i no stap tokbaot fasin fri blong toktok no fasin fri long saed blong skul. No gat. Hem i no stap tokbaot olsem wanem oli save kam fri long paoa blong ol man Rom, we plante man Jyu oli wantem tumas. No gat, fasin fri we hem i stap tokbaot i gud moa, fasin fri ya i no kamaot from ol loa blong man no from tingting blong sam haeman, be hem i kamaot long Jeova, Hae God blong heven mo wol. Hem i fasin fri long ol gyaman bilif, fasin fri long ol gyaman skul, mo ol narafala samting moa. Fasin fri we i kamaot long Jeova hem i trufala fasin fri, mo hem i blong olwe.
5 Aposol Pol i talem se: “Jeova i Speret. Mo weples speret blong Jeova i stap, long ples ya i gat fasin fri.” (2 Korin 3:17, NW) Bitim plante handred yia finis Jeova i stap intres long ol man blong mekem se ol man we oli holemstrong long hem bambae oli save haremgud long nambawan mo gudfala fasin fri, hemia “olgeta samting ya we God i mekem bambae oli fri olgeta, olsem ol pikinini blong hem.” (Rom 8:21) Naoia, Jeova i stap yusum trutok blong Baebol blong givim fasin fri long yumi, mo yumi mas talemaot ol fasin blong yumi long fes blong hem sipos yumi no yusumgud fasin fri ya. Aposol Pol i talem se: “I no gat wan samting nating long wol ya we God i mekem, we i save haed long fes blong God. Olgeta samting oli stap olsem long klia ples nomo, stret long fes blong hem. Mo long fes blong hem nomo, yumi evriwan i mas talemaot ol fasin blong laef blong yumi.”—Hibrus 4:13.
6-8. (a) ?Wanem fasin fri we Adam mo Iv i haremgud long hem, mo wanem samting i mekem se tufala i save holem fasin fri ya? (b) ?Wanem samting Adam mo Iv i lusum mo from samting ya ol pikinini blong tufala tu oli no kasem?
6 Store blong faswan papa mo mama blong yumi, Adam mo Iv, i soemaot klia fasin ya we man i mas talemaot ol samting we hem i mekem long fes blong God. Jeova i wokem tufala mo i givim wan presen hemia fasin fri long tufala. Sipos tufala i yusumgud fasin fri ya, bambae tufala i haremgud long ol narafala blesing, olsem fasin fri long fraet, fasin fri long sik, fasin fri long ded, mo fasin fri blong tufala i kam long Papa blong tufala long heven wetem voes blong hat we i klin. Be taem tufala i no moa yusumgud fasin fri ya, olgeta samting oli jenis.
7 Jeova i putum Adam mo Iv long garen blong Iden, mo blong mekem tufala i haremgud hem i givim ol frut blong olgeta tri long garen ya long tufala—be wan nomo hem i no givim long tufala. Hemia i blong hem nomo. “Hemia tri ya we frut blong hem i save mekem yu yu save ol fasin we i gud mo ol fasin we i nogud.” (Jenesis 2:16, 17) Sipos tufala i no kakae long frut blong tri ya, samting ya i soemaot se Adam mo Iv tufala i luksave se Jeova nomo i fri olgeta blong talem wanem i gud mo wanem i nogud long tufala. Sipos tufala i obei mo tufala i no kakae long tri ya we i tabu, Jeova bambae i gohed blong givim ol narafala fasin fri long tufala.
8 Sore tumas, Iv i lesin long gyaman tok blong Snek se i gud hem nomo i “save ol fasin we i gud mo ol fasin we i nogud.” (Jenesis 3:1-5) Fastaem Iv i kakae long frut ya, mo biaen Adam tu i kakae long hem. From samting ya, taem Jeova God i kam blong toktok wetem tufala long garen blong Iden, tufala i sem mo tufala i haed. (Jenesis 3:8, 9) Naoia tufala i kam man blong sin, tufala i lusum gudfala tingting we tufala i fri blong kam long God wetem wan voes blong hat we i klin. Taswe, tufala i lusum fasin fri long saed blong sik mo ded, tufala i lusum fasin fri ya blong tufala mo blong ol pikinini blong tufala tu. Pol i talem se: “Bifo, fastaem olgeta, wan man nomo [Adam] i statem fasin blong sin long wol ya. Mo from we hem i mekem sin, hem i ded. Be frut blong samting ya, hemia we ol man oli stap ded, from we olgeta oli mekem sin.”—Rom 5:12; Jenesis 3:16, 19.
9. ?Hu ya oli yusumgud fasin fri blong olgeta?
9 Be, ol man oli fri yet blong jusum wanem samting we oli wantem mekem, mo biaen nomo, sam long ol man we oli gat sin oli yusumgud fasin fri ya blong olgeta blong mekem wok blong Jeova. Nem blong olgeta oli stap yet. Ol man olsem Ebel, Inok, Noa, Ebraham, Aesak, mo Jekob (Isrel) olgeta ya oli yusumgud fasin fri ya blong mekem wil blong God. Mo oli haremgud from.—Hibrus 11:4-21.
Fasin Fri Blong Ol Man Blong God
10. ?Wanem samting ol man blong Jeova oli mas mekem aninit long kontrak we Jeova i givim long olgeta?
10 Long taem blong Moses, Jeova i mekem ol pikinini blong Isrel oli kam fri—long taem ya namba blong olgeta i kasem plante taosen—oli kam fri long wok slef long Ijip mo God i mekem wan kontrak wetem olgeta blong oli kam man blong hem. Aninit long kontrak ya, ol man Isrel oli gat ol pris mo oli gat fasin blong mekem sakrifaes wetem ol anamol olsem wan saen blong kavremap sin blong olgeta. Long rod ya, oli gat fasin fri blong kam long God long wosip. Mo tu oli gat ol loa mo ol rul blong mekem olgeta oli fri long ol gyaman fasin mo gyaman wosip. Biaen, bambae oli kasem Promes Lan olsem wan prapa ples blong olgeta, mo God bambae i givhan long olgeta blong oli faet agens long ol enemi blong olgeta. Blong holem kontrak ya, ol man Isrel oli mas obei long Loa blong Jeova. Ol man Isrel oli agri long samting ya, oli talem se: “Bambae mifala i mekem olgeta samting we Hae God i talem.”—Eksodas 19:3-8; Dutronome 11:22-25.
11. ?Wanem samting i kamaot taem Isrel i no holem kontrak wetem Jeova?
11 Bitim 1,500 yia, ol man Isrel oli stap olsem wan spesel laen we Jeova i jusumaot. Be samtaem oli no mekem ol samting we oli stap long kontrak ya. Oltaem bakegen gyaman wosip i pulum olgeta mo oli kam slef long fasin blong wosip long ol gyaman god mo gyaman bilif, ale God i letem ol enemi blong olgeta oli tekem olgeta oli go kalabus. (Jajes 2:11-19) Oli no haremgud long ol blesing blong fasin fri we i kamaot taem oli holem kontrak ya, be oli kasem panis nomo from we oli brekem kontrak ya. (Dutronome 28:1, 2, 15) Nao, long 607 B.K.T., Jeova i letem Isrel i go kalabus long Babilon.—2 Kronikel 36:15-21.
12. ?Biaen, wanem samting i kam klia long saed blong kontrak blong Loa blong Moses?
12 Oli harem nogud tumas from samting ya. Oli mas lanem se i impoten blong holem Loa. Be, afta long 70 yia, taem ol man Isrel oli gobak long prapa graon blong olgeta, oli gohed yet blong no folemgud kontrak blong Loa. Biaen long wan handred yia we oli gobak long prapa graon blong olgeta, Jeova i talem long ol pris blong Isrel, i se: “Yufala ya—yufala i no moa folem rod blong mi. Yufala i mekem plante man oli foldaon from loa ya. Yufala i spolem kontrak blong Livae.” (Malakae 2:8) Yes, nating se i gat ol gudfala man long medel blong ol man Isrel be oli no kasem mak blong Loa ya we i stretgud olgeta. Loa ya i no wan blesing long olgeta, i kam, olsem tok blong aposol Pol i talem, i se, “promes ya blong lus.” (Galesia 3:13) I klia se, i mas gat wan samting we i gud moa bitim kontrak blong Loa ya blong Moses, blong mekem ol man we oli no stretgud olgeta, be oli stap holemstrong long God oli kasem nambawan fasin fri olsem ol pikinini blong God.
Rod Blong Kristin Fasin Fri
13. ?Wanem samting i mekem fasin fri i gud moa?
13 Samting ya we i gud moa bitim kontrak blong Loa hemia, ransom sakrafaes blong Jisas Kraes. Kolosap long yia 50 K.T., Pol i raetem leta long kongregesen blong ol Kristin we tabu speret i makemaot olgeta long Galesia. Hem i tokbaot olsem wanem Jeova i mekem olgeta oli fri blong slef long kontrak blong Loa, i se: “Taem Kraes i mekem yumi fri, hem i mekem blong yumi stap fri oltaem. From samting ya, yufala i mas stanap strong. Bambae yufala i no letem Loa ya i fasem yufala, olsem we yufala i kam slef bakegen.” (Galesia 5:1) ?Olsem wanem Jisas i mekem ol man oli fri?
14, 15. ?Olsem wanem Jisas i mekem ol man Jyu mo olgeta we oli no man Jyu oli kam fri?
14 Afta long ded blong hem, ol man Jyu we oli luksave Jisas olsem Mesaea oli kam disaepol blong hem nao oli kam aninit long nyufala kontrak, we i tekem ples blong olfala kontrak blong Loa ya. (Jeremaea 31:31-34; Hibrus 8:7-13) Aninit long nyufala kontrak ya, olgeta we oli man Jyu—mo biaen, olgeta we oli no man Jyu, we oli bilif nao oli kam joen long olgeta—evriwan oli kam haf blong wan nyufala nesen olsem ol man blong God long saed blong speret we i tekem ples blong Isrel long saed blong bodi. (Rom 9:25, 26; Galesia 6:16) Olsemia nao, oli haremgud long fasin fri we Jisas i promes long olgeta, taem hem i se: “Trutok ya bambae i mekem yufala i friman.” Antap long fasin fri from panis blong Loa blong Moses, trutok i mekem ol man Jyu we oli Kristin oli kam fri long ol hevi kastom we ol lida blong skul oli fosem olgeta blong oli folem. Mo i mekem ol Kristin we oli no man Jyu oli fri long wosip long ol gyaman god mo ol gyaman bilif long skul blong olgeta bifo. (Matyu 15:3, 6; 23:4; Ol Wok 14:11-13; 17:16) Mo i gat ol narafala samting moa.
15 Taem Jisas i stap tokbaot trutok we i mekem man i fri, hem i se: “Tru mi talem long yufala, olgeta man we oli mekem sin, be sin ya i olsem masta blong olgeta, we i holemtaet olgeta finis. Olgeta oli slef blong hem nomo.” (Jon 8:34) Stat long taem we Adam mo Iv tufala i sin i kam, evri man i sinman mo i kam slef blong sin. Jisas hem wan nomo i no gat sin, mo sakrafaes blong Jisas i mekem ol man we oli bilif long hem oli fri long sin ya. Oli no stretgud olgeta yet mo oli save ded. Be naoia, oli save tanem tingting blong olgeta long ol sin blong olgeta mo from sakrafaes blong Jisas oli save askem God blong fogivim olgeta mo oli save bilif se God bambae i harem prea blong olgeta. (1 Jon 2:1, 2) From ransom sakrafaes blong Jisas, God i luk olgeta olsem we oli stret man, mo oli save kam long hem wetem voes blong hat we i klin. (Rom 8:33) Mo tu, ransom sakrafaes ya i openem rod blong laef bakegen long ded, blong kasem laef we i no save finis, mo bakegen trutok ya i mekem olgeta oli fri long fasin fraet blong ded.—Matyu 10:28; Hibrus 2:15.
16. ?Olsem wanem Kristin fasin fri i moa gud bitim fasin fri we wol i save givim?
16 Kristin fasin fri ya i nambawan, enikaen man mo woman i save kasem fasin fri ya nating se oli olsem wanem. Ol puaman, ol man we oli stap long kalabus, ol man we oli stap wok slef, oli save kam friman. Be, ol haeman blong ol nesen we oli no lesin long mesej blong Kraes oli stap yet olsem slef long gyaman bilif, sin, mo fasin fraet long ded. Yumi neva mas stop blong talem tangkyu long Jeova from fasin fri ya we yumi stap haremgud long hem. I no gat wan samting long wol we i save kasem mak blong fasin fri ya.
Oli Fri Be Oli Save Talemaot Fasin Blong Olgeta Long God
17. (a) ?Olsem wanem sam man long faswan handred yia oli lusum Kristin fasin fri blong olgeta? (b) ?From wanem yumi no mas letem wol blong Setan i gyaman long yumi long fasin fri blong hem?
17 Long faswan handred yia, bighaf blong ol Kristin we tabu speret i makemaot olgeta oli glad long fasin fri blong olgeta mo oli holemstrong bilif blong olgeta nating se oli save kasem trabol from. Be sam man oli kasem Kristin fasin fri wetem ol blesing blong hem mo biaen oli livim, oli gobak blong stap slef long wol. ?From wanem i olsem? From we plante long olgeta oli kam slak long bilif, mo oli “lusum rod.” (Hibrus 2:1) Sam man “tingting blong olgeta i stap tok long olgeta, be oli no wantem lesin, nao long fasin ya, bilif blong olgeta i foldaon finis.” (1 Timote 1:19) Maet sam oli foldaon long fasin blong wantem tumas ol samting blong wol no from wan rabis fasin long saed blong seks. !Taswe i impoten se yumi lukaotgud long bilif blong yumi mo wok long hem, yumi mas bisi blong mekem stadi blong yumi wanwan, joen wetem ol brata sista, prea, mo mekem Kristin wok! (2 Pita 1:5-8) !Yumi neva mas stop blong gat fasin tangkyu from Kristin fasin fri blong yumi! Tru ya, fasin les blong ol man afsaed long kongregesen maet i save traem sam long yumi, maet sam man oli save ting se olgeta ya long wol oli fri moa long yumi. Be, samting we i luk olsem fasin fri long ol man blong wol oltaem hem i fasin les blong olgeta nomo. Sipos yumi no slef blong God, yumi slef blong sin mo fasin blong slef ya i gat nogud frut blong hem.—Rom 6:23; Galesia 6:7, 8.
18-20. (a) ?Olsem wanem sam man oli kam “enemi blong gud nyus blong ded blong Kraes long [pos, NW]”? (b) ?Olsem wanem sam man oli ‘yusum fasin fri blong olgeta, blong haedem sam fasin we i no stret’?
18 Mo tu, long leta we Pol i raetem long ol man Filipae, hem i se: “Mi mi talem tok ya long yufala plante taem finis, mo naoia mi talem bakegen, we wora i stap ron long ae blong mi. I gat plante man naoia we long laef blong olgeta, oli enemi blong gud nyus blong ded blong Kraes long [pos, NW].” (Filipae 3:18) Yes, olgeta ya oli bin stap olsem ol Kristin bifo we naoia oli kam olsem ol enemi blong bilif, maet oli kam man blong apostasi.a !I impoten se yumi no folem rod blong olgeta ya! Pita i talem tu, i se: “Yufala i friman finis, mo fasin blong yufala i mas soemaot samting ya. Be i nogud yufala i yusum fasin ya we yufala i friman, blong haedem sam fasin we i no stret, from we yufala i man blong wok blong God, mo fasin blong yufala i mas soemaot samting ya tu.” (1 Pita 2:16) ?Olsem wanem wan man i save yusum fasin fri ya blong haedem sam fasin we i no stret? Taem hem i mekem ol bigfala sin—maet hem i mekem ol sin ya long fasin haed—be hem i stap gohed yet blong joen wetem kongregesen.
19 Tingbaot Diotrefes. Jon i tokbaot hem, i se: “Diotrefes, hem i laekem tumas blong i lida blong olgeta [insaed long kongregesen], nao hem i no save lesin long tok blong mifala. . . . Be rabis fasin blong hem i no finis long ples ya tu. Hem i no save tekem ol brata ya blong yumi oli kam long haos blong hem, be antap bakegen, i stap blokem olgeta we oli wantem tekem ol brata ya oli go long haos, mo i stap ronem olgeta oli goaot long jyos.” (3 Jon 9, 10) Diotrefes i yusum fasin fri ya blong hem, blong haedem sam fasin we oli no stret olsem ol samting we hem nomo i wantem mekem.
20 Disaepol ya Jud i se: “Mi mi harem olsem from we sam man we oli agensem God, oli kam joen long kampani blong yufala, we yufala i no luk. Olgeta ya oli tekem tok ya we i talem se ‘Long gladhat blong God, hem i sevem yumi,’ be oli tanem, oli mekem i olsem eskyus blong olgeta blong mekem ol rabis fasin blong olgeta. Mo oli stap talem se oli no wantem Jisas Kraes, be hem nomo i [Masta, NW] blong yumi.” (Jud 4) Taem oli stap joen wetem kongregesen, olgeta ya oli stap mekem kongregesen i doti. (Jud 8-10, 16) Long buk blong Revelesen yumi ridim se long kongregesen blong Pegamam mo Tuatira, i gat ol man we oli stap mekem ol man oli seraot, oli stap wosip long gyaman god, mo oli gat ol rabis fasin long saed blong seks. (Revelesen 2:14, 15, 20-23) !I nogud blong yusum Kristin fasin fri olsem!
21. ?Wanem samting i rere long ol man we oli no yusumgud Kristin fasin fri blong olgeta?
21 ?Wanem samting i stap rere long ol man we oli no yusumgud Kristin fasin fri blong olgeta? Tingbaot samting we i kamaot long Isrel. Isrel i wan nesen we God i jusum, be biaen Jeova i no moa laekem hem. ?From wanem? From we ol man Isrel oli yusum gudfala fasin frengud wetem God olsem wan eskyus blong mekem ol rabis fasin. Oli tok flas se olgeta oli pikinini blong Ebraham nao oli no wantem Jisas we i Laen ya blong Ebraham mo hem i Mesaea ya we Jeova i jusumaot. (Matyu 23:37-39; Jon 8:39-47; Ol Wok 2:36; Galesia 3:16) “Isrel blong God” olsem wan nesen bambae i no mekem sem mak olsem olgeta ya. (Galesia 6:16) Be sipos wan Kristin i mekem kongregesen i doti long saed blong speret bambae hem i kasem fasin stretem, mo wan nogud jajmen tu. Yumi evriwan yumi mas talemaot long fes blong God olsem wanem yumi yusum Kristin fasin fri blong yumi.
22. ?Olgeta we oli yusum Kristin fasin fri blong olgeta blong slef long God oli glad long wanem?
22 I gud moa blong stap slef blong God mo kasem trufala fasin fri. Jeova nomo i save givim fasin fri we i prapawan. Proveb i se: “Pikinini blong mi, yu mas waes, mo yu mas mekem hat blong mi i glad, blong bambae mi save ansa long hem we i stap jikim mi.” (Proveb 27:11) I gud yumi yusum Kristin fasin fri blong yumi blong leftemap nem blong Jeova. Sipos yumi mekem olsem, laef blong yumi bambae i fulwan, bambae yumi mekem Papa blong yumi long heven i haremgud long yumi, mo biaen bambae yumi stap long medel blong ol man we oli haremgud long nambawan fasin fri blong ol pikinini blong God.
[Futnot]
a Fasin blong lego trutok mo agensem.
?Yu Save Eksplenem?
◻ ?Hu nomo i fri olgeta?
◻ ?Wanem fasin fri we Adam mo Iv tufala i haremgud long hem, mo from wanem tufala i lusum?
◻ ?Wanem fasin fri ol man Isrel oli haremgud long hem taem oli obei long kontrak blong Loa wetem Jeova?
◻ ?Wanem fasin fri i kam long ol man we oli bilif long Jisas olsem Mesaea?
◻ ?Olsem wanem sam man long faswan handred yia oli lusum Kristin fasin fri no oli no yusumgud Kristin fasin fri blong olgeta?
[Tok Blong Pija Long Pej 13]
Fasin fri we Jisas i givim i moa gud bitim fasin fri we man i save givim