?Net Mo Fis i Minim Wanem Long Yu?

“Yufala ya, God i openem rod long yufala blong yufala i save ol tok haed blong [kingdom blong heven, “NW”].”​—MATYU 13:11.

1, 2. ?From wanem yumi intres long ol parabol blong Jisas?

?YU YU laekem save mining blong wan tok haed no faenemaot ansa blong wan ridel? ?Olsem wanem sipos yu mekem olsem nao bambae yu luksave wok we yu save mekem long plan blong God? Yu yu save kasem save ya long wan parabol we Jisas i talem. Ol man oli no kasem save taem oli harem mo kam kasem naoia ol man oli no save mining blong parabol ya yet, be yu save kasem mining blong hem.

² Tingbaot tok ya long Matyu japta 13, Jisas i talem from wanem hem i stap yusum parabol. Ol disaepol blong hem oli askem se: “?Yu yu stap tok long olgeta long parabol from wanem?” (Matyu 13:10) Yes, ?from wanem Jisas i yusum ol parabol we plante man bambae oli no kasem save long olgeta? Long vas 11 kasem 13, hem i ansa i se: “From we yufala ya, God i openem rod long yufala blong yufala i save ol tok haed blong [kingdom blong heven, NW]. Be olgeta ya, hem i no openem rod long olgeta olsem. . . . Taswe mi stap tok long olgeta long parabol, from we oli lukluk, be oli no luksave long hem mo oli stap lesin, be oli no harem, mo oli no haremsave tu.”

3. ?Olsem wanem save long ol parabol blong Jisas i save givim blesing long yumi?

³ Long taem ya Jisas i yusum tok blong Aesea 6:​9, 10, blong tokbaot ol man we sora blong olgeta oli fas mo oli blaen long saed blong speret. Be, yumi ya, yumi no mas kam olsem olgeta ya. Sipos yumi kasem save long ol parabol ya mo yumi mekem samting we yumi kasem save long hem, yumi save haremgud tumas​—naoia mo blong olwe long fyuja. Jisas i givim tok ya long yumi, i se: “Be yufala ya, yufala i save harem gud, from we ae blong yufala i save luk ol samting ya, mo sora blong yufala i save harem ol tok ya.” (Matyu 13:16) Long ples ya Jisas i stap tokbaot olgeta parabol blong hem, be i gud yumi tingbaot wan sot parabol blong net, we i stap long Matyu 13:​47-50.

Wan Pijatok We i Gat Bigfala Mining

4. ?Jisas i wantem talem wanem taem hem i yusum parabol, olsem Matyu 13:​47-50 i talem?

⁴ “Mo bakegen, [kingdom blong heven, NW] i olsemia. Taem ol man oli sakem net long solwora, oli save pulum ol narnarafala fis long hem. Taem net i fulap gud, ol man oli pulum i kamsoa. Nao oli sidaon, oli seraot ol fis, oli putum ol gudfala fis oli go long basket blong olgeta, be ol rabis fis, oli sakem. Bambae long en blong wol, fasin blong hem i olsem. Bambae ol enjel oli go, oli seraot ol man, ol man nogud oli go wansaed, ol gudfala man oli go wansaed. Nao bambae oli sakem ol man nogud oli go long bigfala faea ya, we ol man oli stap krae, oli stap kakae tut blong olgeta.”

5. ?Wanem ol kwestin oli kamaot from mining blong net long parabol ya?

⁵ Maet yu bin luk sam man we oli stap pulum fis wetem net, maet long sinima no long video, taswe parabol blong Jisas i no had tumas blong tingbaot. ?Be olsem wanem long ol samting we oli kamaot long store ya mo mining blong hem? Eksampel, Jisas i talem se parabol ya i olsem “kingdom blong heven.” (NW) Be, i no save minim ‘olgeta’ man, olgeta we oli gud mo olgeta we oli nogud olsem ol rabis man, bambae oli stap insaed long Kingdom ya. ?Mo, hu i mekem wok blong pulum fis long net? ?Wok ya blong pulum fis mo seraotem i kamaot long dei blong Jisas, no maet i save kamtru long taem blong yumi hemia “long en blong wol”? ?Yu yu stap long parabol ya? ?Olsem wanem, yu save ronwe long medel blong ol man we bambae oli krae mo oli kakae tut blong olgeta?

6. (a) ?From wanem yumi mas intres blong kasem save long parabol blong net? (b) ?Wanem samting i save givhan long yumi blong kasem save long hem?

⁶ Ol kwestin olsem oli soemaot se parabol ya i gat bigfala mining. Be, yu no mas foget se: “Yufala ya, yufala i save harem gud, from we ae blong yufala i save luk ol samting ya, mo sora blong yufala i save harem ol tok ya.” Yumi traem luk sipos yumi save faenemaot mining blong hem blong mekem se sora blong yumi i haremsave mo ol ae blong yumi oli no save sat. Yumi lanem wan impoten samting finis blong halpem yumi blong faenemaot mining blong hem. Haf we i bin kamaot fastaem i tokbaot Jisas se hem i askem ol man blong pulum fis long Galili blong lego wok blong olgeta mo mekem wok blong pulum fis long saed blong speret olsem “pulum man.” (Mak 1:17) Hem i talem long olgeta, i se: “I stat naoia, bambae yu yu man blong pulum man.”​—Luk 5:10.

7. ?Ol fis long parabol blong Jisas oli minim wanem?

⁷ From samting ya, ol fis long parabol ya i minim ol man, taswe, taem vas 49 i tokbaot wok blong seraotem ol rabis fis mo ol gudfala fis, hem i no stap tokbaot ol gudfala fis no ol rabis fis blong solwora, be ol gudfala fis mo ol rabis fis olsem ol man. Sem mak, vas 50 i no minim se ol anamol blong solwora oli stap krae no oli stap kakae tut blong olgeta. No gat. Parabol ya i minim wok blong hivimap ol man mo biaen oli seraotem olgeta, wok ya blong seraotem ol man i impoten tumas, olsem frut we bambae i kamaot biaen bambae i soemaot.

8. (a) ?Wanem samting i kamaot long ol nogud fis? (b) ?From samting ya, wanem samting yumi save talem long saed blong Kingdom?

⁸ Makem se ol fis we oli nogud, hemia, ol rabis man, bambae oli sakem olgeta i go long bigfala faea, we bambae oli stap krae, oli stap kakae tut blong olgeta. Long wan narafala ples bakegen, Jisas i tokbaot ol man we oli stap krae mo oli kakae tut blong olgeta, olgeta ya oli stap afsaed long Kingdom. (Matyu 8:12; 13:​41, 42) Long Matyu 5:22 mo 18:​9, hem i tokbaot “faea blong Gehena,” (NW) taem hem i tok long ol man we bambae oli lus blong olwe. ?From samting ya yu ting se i impoten blong kasem save mining blong parabol ya mo blong wok folem parabol ya? Yumi save se ol rabis man oli no stap long Kingdom blong God no bambae oli save stap long hem. Taswe, taem Jisas i se ‘kingdom blong heven i olsem wan net,’ i min se wok long saed blong Kingdom blong God i olsem wan net we ol man oli sakem i godaon blong kasem ol defdefren kaen fis.

9. ?Wanem wok ol enjel oli mekem long parabol blong net ya?

⁹ Afta we oli sakem net ya mo oli pulum ol fis i kam, bambae i gat wok blong seraotem. ?Jisas i talem se hu bambae i mekem wok ya? Matyu 13:49 i soemaot se ol enjel bambae oli mekem wok ya. Jisas i stap tokbaot wok blong ol enjel blong lukaot long wan tul long wol we God i yusum blong makemaot ol man​—sam oli gud mo oli stret long Kingdom blong heven, mo sam oli nogud.

?Wok Blong Pulum Fis i Stat Wetaem?

10. ?From wanem yumi save talem se wok blong pulum fis i gohed plante yia?

¹⁰ Ol vas blong Baebol we oli stap oli givhan long yumi blong faenemaot wetaem wok ya i stat. Bifo long parabol ya, Jisas i stap tokbaot parabol long saed blong planem ol gudfala sid, be nao wan man i planem ol sid blong ol rabis gras tu long garen, we i minim wol ya. Long Matyu 13:38 (NW), Jisas i eksplenem se gudfala sid ya i minim “ol pikinini blong kingdom. Be ol rabis gras oli pikinini blong rabis man, Devel Setan.” Tufala i stap gru tugeta long plante handred yia finis, kam kasem taem blong karem kakae long garen long en blong wol. Nao oli seraotem ol rabis gras long ol gudfala gras mo biaen oli bonem ol rabis gras. Parabol ya i laenap wetem parabol blong net, yumi luk se fasin blong pulum ol fis long net ya i gohed long plante yia finis i kam.​—Matyu 13:​36-43.

11. ?Long faswan handred yia olsem wanem bigfala wok blong pulum fis i stat long olgeta ples long wol?

¹¹ Olsem parabol blong Jisas, ol fis ya oli no seraot, i min se, net ya i pulum tu kaen fis, ol gudfala fis mo ol fis we i nogud. Taem ol aposol oli laef yet, ol enjel we oli lukaot long wok blong pulum fis oli yusum Kristin ogenaesesen blong God blong kasem “fis” hemia ol Kristin we tabu speret i makemaot olgeta. Yu save talem se bifo long Pentekos long yia 33 K.T., wok blong Jisas blong pulum man olsem fis i kasem samwe long 120 disaepol. (Ol Wok 1:15) Be taem kongregesen blong ol Kristin we tabu speret i makemaot olgeta i stanap finis, fasin blong pulum man olsem fis wetem net ya i stat, mo oli kasem plante taosen gudfala fis. Long yia 36 K.T. wok blong pulum ol man olsem fis i kasem ol wora long olgeta ples long wol, olsem ol Hiten man oli kam Kristin mo oli kam memba blong tabu kongregesen blong Kraes.​—Ol Wok 10:​1, 2, 23-48.

12. ?Wanem samting i kamaot afta we ol aposol oli ded?

¹² Long ol handred yia afta we ol aposol oli ded finis, i gat sam Kristin we oli stap yet mo oli stap traehad blong faenem mo holem trutok blong God. Mo sam long olgeta ya God i agri long olgeta, mo hem i makemaot olgeta wetem tabu speret blong hem. Be i tru se taem ol aposol oli ded, oli no moa save blokem fasin blong apostasi, ale fasin ya i gru i kam bigwan. (2 Tesalonaeka 2:​7, 8) Wan ogenaesesen i stap gru i gyaman se hem i kongregesen blong God. Hem i gyaman se hem nao i tabu nesen we God i makemaot wetem tabu speret blong hem blong nesen ya i rul wetem Kraes.

13. ?From wanem yumi save talem se Krisendom i mekem wok blong pulum fis wetem net?

¹³ ?Yu ting se ol gyaman Kristin ya oli joen long parabol blong net ya? Yes, mo i gat risen blong ansa olsem. Krisendom i olsem net tu. Yes, long plante yia finis Katolik Skul i traem blong haedem Baebol long olgeta we oli no haeman. Be, bitim plante handred yia finis ol memba blong Krisendom oli gat impoten wok blong tanem Baebol i go long narafala lanwis, mekem kopi long hem, mo givimaot Tok blong God. I no longtaem ol skul oli stanemap no oli sapotem ol kampani blong wokem Baebol, we oli tanem Baebol i go long ol lanwis blong ol ples we oli longwe. Oli sanem ol misinari we oli dokta mo oli tija, blong pulum ol man oli kam Kristin from ol kakae mo ol narafala samting we oli stap kasem long saed blong bodi. Samting ya i hivimap bigfala namba blong ol fis we i nogud, ol fis we God i no agri long olgeta. Be oli stap pulum plante milyan hiten man oli lukluk Baebol mo oli kasem wan laef olsem Kristin, nating se oli no trufala Kristin.

14. ?Olsem wanem Krisendom i givhan long wok blong pulum ol gudfala fis?

¹⁴ Long taem ya, ol man we oli stap long olgeta ples mo oli holemstrong long Tok blong God oli traehad blong mekem olsem. Oli olsem trufala kongregesen blong God we i makemaot long wol long taem ya. Mo yumi save tu se olgeta ya oli stap pulum fis, no man, we plante long olgeta God bambae i luk olgeta olsem ol gudfala fis mo hem i save makemaot olgeta wetem speret blong hem. (Rom 8:​14-17) Ol trufala Kristin ya oli tekem ol trutok blong Baebol i go long plante man we oli kam Kristin from ol samting we oli kasem long saed blong bodi no oli kasem smol save nomo long Baebol we ol kampani blong Baebol blong Krisendom oli tanem i kam long lanwis blong olgeta. Tru ya, fasin blong kasem ol gudfala fis i stap gohed, nating se plante fis we Krisendom i kasem oli no gudfala fis long tingting blong God.

15. ?Wanem mining blong net ya?

¹⁵ Net ya i minim wan tul long wol ya we i talem se hem i kongregesen blong God mo i stap pulum ol fis. Hemia Krisendom mo tu kongregesen blong ol Kristin we tabu speret i makemaot olgeta, kongregesen we tabu speret i makemaot oli stap gohed yet blong kasem ol gudfala fis, ol enjel oli lidim olgeta blong mekem wok ya olsem Matyu 13:49 i talem.

Taem Blong Yumi i Impoten

16, 17. ?From wanem taem blong yumi i impoten tumas olsem parabol blong Jisas long saed blong net i soemaot?

¹⁶ Yumi traem tingbaot taem blong samting ya. Long plante handred yia finis net ya i tul blong kasem ol gudfala fis mo tu ol nogud fis, olsem ol rabis man. Nao taem i kam blong ol enjel oli mekem impoten wok blong seraotem ol man. ?Wetaem? Long vas 49 i talemaot klia se hem i kamaot “long en blong wol.” Samting ya i laenapgud wetem parabol blong Jisas long saed blong sipsip mo ol nani: “Long taem ya we mi, mi Pikinini blong Man, bambae mi kamtru wetem olgeta enjel, bambae mi mi king, mi gat olgeta paoa blong mi, nao mi go sidaon long bigfala jea blong mi. Nao olgeta man blong wol bambae oli kam stanap long fes blong mi, mo mi bambae mi seraot olgeta, olsem we man blong lukaot long sipsip i save seraot ol sipsip blong hem long ol nani blong hem.”​—Matyu 25:​31, 32.

¹⁷ Taswe, olsem Matyu 13:​47-50 i soemaot, impoten wok blong seraotem ol man we ol enjel oli lukaot long hem i stap gohed stat “long en blong wol” long 1914. Samting ya i kam klia moa afta long 1919, taem ol Kristin we tabu speret i makemaot olgeta oli fri long kalabus we oli stap long hem smoltaem long saed blong speret, mo oli kam wan tul we i karem moa frut long wok blong pulum ol man olsem fis.

18. ?Olsem wanem ol gudfala fis oli kam insaed long basket?

¹⁸ ?Wanem samting bambae i kamaot long ol gudfala fis? Vas 48 i talem se ol enjel we oli seraotem ol fis “oli putum ol gudfala fis oli go long basket blong olgeta, be ol rabis fis, oli sakem.” Ol basket ya oli holem ol gudfala fis oli save stapgud insaed long olgeta. ?Samting ya i kamaot long taem blong yumi? Yes. Taem ol man oli kasem ol gudfala man olsem gudfala fis, oli tekem olgeta long ol kongregesen blong ol trufala Kristin. Ol basket olsem ol kongregesen oli givhan blong blokem mo holem ol gudfala fis i stap blong oli mekem wok blong God. ?Yu yu agri long samting ya? Maet sam man oli save ting se, ‘Hem i stret mo i gud. ?Be olsem wanem samting ya i save gat paoa long laef blong mi naoia mo long fyuja?’

19, 20. (a) ?From wanem i impoten tede blong kasem save long parabol ya? (b) ?Wanem impoten wok blong pulum fis i stat long 1919?

¹⁹ Wok we parabol ya i soemaot i no stat long taem blong ol aposol kam kasem 1914 nomo. No gat. Long taem ya bifo, net ya i wan tul blong pulum ol gyaman Kristin mo ol trufala Kristin. Yes, hem i stap pulum tu kaen fis, ol nogud fis mo ol gudfala fis. Mo tu, wok we ol enjel oli mekem blong seraotem ol man olsem fis i no finis long 1919. No gat. Wok blong parabol blong net ya i gohed yet kam kasem taem blong yumi. Yumi stap insaed long wok ya mo fyuja blong yumi tu i stanap long hem. Yumi mas luksave olsem wanem mo from wanem ol samting oli kamaot olsem sipos yumi wantem ol tok ya oli tokbaot yumi: “Yufala ya, yufala i save harem gud, from we ae blong yufala i save luk ol samting ya, mo sora blong yufala i save harem ol tok ya” wetem fasin luksave.​—Matyu 13:16.

²⁰ Maet yu save se afta long 1919 ol Kristin we tabu speret i makemaot olgeta oli bisi long wok blong prij wetem ol enjel, oli stap gohed blong yusum net ya blong pulum ol fis i go long so, blong seraotem ol gudfala fis long ol nogud fis. Namba blong ol man long taem ya i soemaot se fasin blong pulum ol gudfala fis we God i stap makemaot olgeta wetem tabu speret blong hem, i gohed kam kasem laswan memba blong 144,000 i kam insaed long net ya. (Revelesen 7:​1-4) Samtaem long ol yia 1933 kasem 1936, wok blong pulum ol gudfala fis blong God i makemaot olgeta wetem tabu speret blong hem kolosap i finis. ?Olsem wanem, kongregesen blong ol Kristin we tabu speret i makemaot olgeta oli save lego net, mo oli save wet nomo blong kasem praes blong olgeta long heven? !No gat!

Yu Yu Save Pulum Man Olsem Fis

21. ?Wanem narafala wok blong pulum fis i stap kamaot long taem blong yumi? (Luk 23:43)

²¹ Parabol blong Jisas long saed blong net i makem ol gudfala fis we oli save kasem pei long Kingdom blong heven. Be, i gat narafala mining long wok blong pulum fis we i stap kamaot long fasin we i bigwan moa, olsem we yumi tokbaot finis long faswan stadi long magasin ya. Wok ya, i no blong pulum ol gudfala fis blong tabu speret i makemaot olgeta olsem we Jisas i soemaot long parabol blong hem, be blong pulum ol man olsem ol fis mo givim wan gudfala hop ya blong laef long wan paradaes long wol.​—Revelesen 7:​9, 10; lukluk Matyu 25:​31-46.

22. ?Bambae yumi haremgud long wanem, no yumi save kasem wanem narafala frut?

²² Sipos yu gat hop ya, nao yu save haremgud from we Jeova i letem wok ya blong pulum fis i stap gohed kam kasem naoia. Samting ya i mekem se yu yu save kasem wan gudfala fyuja from. ?Gudfala fyuja? Yes, hemia i stret tok ya blong yusum, from we fyuja blong yumi i dipen sipos yumi stap gohed blong holemstrong long Man we i stap lukaot long wok blong pulum fis. (Sefanaea 2:3) Tingbaot parabol ya se i no evri fis we net ya i kasem oli save haremgud. Jisas i talem se ol fis we oli nogud, no ol rabis man, bambae oli seraotem olgeta long ol gudfala man. ?Blong oli kasem wanem? Long Matyu 13:50 Jisas i tokbaot wan samting we bambae i kamaot long ol nogud fis ya, no ol rabis man. Bambae oli sakem olgeta i go long bigfala faea, i minim se bambae oli lus blong olwe.​—Revelesen 21:8.

23. ?Wanem samting i mekem se wok blong pulum fis tede i impoten?

²³ Ol gudfala fis we God i makemaot olgeta, mo tu ol fis we bambae oli kasem laef blong olwe long wol, oli gat wan gudfala fyuja. From samting ya, ol enjel oli stap lukluk se wok blong pulum fis olsem man i karem gudfala frut long olgeta ples long wol. !Mo oli pulum plante man! Yu save talem se i wan merikel, olsem ol fis we ol aposol oli stap glad blong pulum taem oli sakem ol net olsem we Jisas i talem.

24. ?Wanem samting yumi mas wantem blong mekem blong pulum ol fis long saed blong speret?

²⁴ ?Yu yu stap joen fulwan long wok ya blong pulum fis long saed blong speret? Nating se kam kasem naoia yumi stap joen bigwan long wok ya no no gat, yumi save haremgud blong luk bigfala wok ya blong pulum fis blong sevem ol man we i stap gohed naoia long olgeta ples blong wol. !Taem yumi mekem olsem tingting ya i pusum yumi blong yumi save gohed moa blong sakem ol net blong yumi blong kasem ol fis long fyuja!​—Lukluk Matyu 13:23; 1 Tesalonaeka 4:1.

?Yu Yu Tingbaot Ol Poen Ya?

◻ ?Wanem mining blong tu defren kaen fis long parabol blong net?

◻ ?Olsem wanem ol skul blong Krisendom oli mekem wok ya blong pulum fis long net?

◻ ?From wanem wok blong pulum fis olsem ol man i impoten long taem blong yumi?

◻ ?Parabol blong net i lidim yumi blong skelem wanem samting?

[Tok Blong Pija Long Pej 14]

Wok blong pulum fis i stap gohed long Lugun blong Galili long plante handred yia finis

[Credit Line]

Pictorial Archive (Near Eastern History) Est.