!Hop i Winim Tingting We i Foldaon!

LONG Webster’s Ninth New Collegiate Dictionary tok ya tingting we i foldaon i min se “man i lusum hop olgeta.” !Taswe, i klia se blong winim tingting we i foldaon, yumi nidim hop!

Man we i slip olbaot long rod bambae tingting blong hem i no foldaon olgeta sipos hem i gat hop. Hop i save givhan long olgeta we oli stap harem nogud blong mekem tingting blong olgeta i strong mo givim paoa long olgeta blong oli stanap strong go kasem en. !Be hop olsem i mas tru blong oli save dipen long hem! ?Hemia i minim wanem?

Stampa Blong Hop

Tingbaot samting we i hapen long Sera, waef blong olfala Ebraham. Taem hem i kasem 90 yia, hem i no gat pikinini yet nao tingting blong hem i foldaon hem i ting se bambae neva hem i save gat wan pikinini. Be, taem hasban blong hem i kasem 99 yia, Jeova i talem promes ya bakegen we hem i bin mekem long ol yia we i pas finis​—Ebraham bambae i gat wan “laen,” (NW) no wan pikinini. Ebraham i save se promes ya i tru. !Tingbaot olsem wanem Sera i haremgud taem merikel ya i kamtru, nao hem i bonem Aesak! (Jenesis 12:​2, 3; 17:​1-4, 19; 21:2) Bilif blong Ebraham long God i stap oltaem, aposol Pol i talem tu, se: “Tingting blong [Ebraham] i no seksek long promes blong God, bilif blong hem i stap strong. Mo hem i kasem paoa from we i bilif. Nao hem i leftemap nem blong God.”​—Rom 4:20.

Taem Pol i raet long ol man Jyu we oli kam Kristin long taem blong hem, hem i talem se oli save trastem promes blong God blong yusum Jisas blong sevem olgeta from i gat tu gudfala risen. Hem i tokbaot promes blong God long Ebraham mo promes we Hem i mekem long nem blong hem, aposol Pol i se: “Long fasin blong yumi man, taem man i wantem mekem tok blong hem i strong, hem i mas yusum nem blong wan man we i hae moa long hem. Mo taem man i mekem tok blong hem i strong olsem, bambae i no moa gat toktok biaen. Oraet, nao God i mekem promes finis, mo hem i wantem mekem olgeta ya we bambae oli save kasem ol samting we hem i promes, oli savegud we bambae tingting blong hem i no save jenis samtaem. Taswe hem i talem nem blong hem blong mekem promes blong hem i strong moa bakegen. Nao i gat tufala tok blong God i stap, tok ya blong promes blong hem, wetem tok ya blong mekem promes ya i strong.” (Hibrus 6:​16-18) Yes, ol promes blong God oli tru mo man i save trastem olgeta. Jeova i hae God mo hem i save mekem ol promes blong hem oli kamtru olsem we hem i talem.

Hop​—“I No Save Muf”

Taswe, Pol i talem se hop blong ol Kristin i “no save muf.” (Hibrus 6:19) Pol i save weples hop blong hem i gat rus long hem. Hem i eksplenem se: “[Hop ya] i olsem we hem i stap insaed finis long Tabu Ples ya blong God, we kaliko i blokem.” ?Hem i minim wanem? I klia se Pol i stap tokbaot tempel long Jerusalem bifo. Long tempel ya i gat wan ples we i Tabu we i Tabu, we kaliko i stap blokem. (Eksodas 26:​31, 33; Matyu 27:51) Be, tempel long Jerusalem bifo ol man oli spolem finis. Taswe, tede ?Tabu ples ya i laenap wetem wanem samting?

!Tabu ples ya hem i heven stret, ples ya we God i stap sidaon long jea blong king blong hem! Pol i eksplenem samting ya se, afta we Jisas i go antap hem “i no go insaed long wan tabu ples we ol man nomo oli stanemap, we i olsem pija nomo blong prapa tabu ples we i stap, no gat. Hem i go insaed long heven stret, mo naoia hem i stap stanap long fes blong God blong talemaot ol poen blong yumi.” (Hibrus 9:24) Taswe hop blong Kristin, we i blong givhan long yumi blong agensem tingting we i foldaon, i no kamaot long ol man blong politik long wol be hem i kamaot long plan we i stap long heven. I kamaot long Hemia we God i putumap hem, Jisas Kraes, we hem i givim laef blong hem olsem wan ransom blong tekemaot sin blong yumi mo naoia hem i stap stanap long fes blong God blong givhan long yumi. (1 Jon 2:​1, 2) Mo tu, oltaem magasin ya i stap tokbaot, se Jisas ya hem i King ya we God i makemaot hem blong i rul long Kingdom long heven mo hem i stap mekem olsem stat long 1914 finis i kam. Kingdom ya blong heven bambae i no longtaem i finisim ol samting we oli stap mekem tingting blong plante man i foldaon.

Hop​—“I Olsem Wan Angka Blong Holem Laef Blong Yumi”

Pol i pulum tingting blong ol man we oli ridim leta blong hem se hop ya blong olgeta blong kasem laef tru long Jisas, i stanap strong, hem i yusum wan pijatok. Hem i se: “Fasin ya we yumi putum tingting blong yumi i stap strong blong kasem ol samting ya, hem i olsem wan angka blong holem laef blong yumi.”​—Hibrus 6:19.

Ol man we oli stap wokbaot long sip blong go long narafala ples olsem Pol oli savegud ol angka. Ol angka blong bifo kolosap oli sem mak long ol angka long taem blong yumi, oli wokem olgeta long aean mo oli gat tu huk blong hem blong hukum ol ston aninit long solwora. Long trep we hem i mekem i go long Rom long yia 58 K.T., sip we Pol i stap go long hem i kasem trabol mo kolosap hem i rek. Be taem sip ya i stap go kolosap long ples we i no dip, ol boskru oli “tekem fo angka, oli sakem long af.” From ol angka ya nao sip ya i stap sef nomo long strong win.​—Ol Wok 27:​29, 39, 40, 44.

?Nao, wanem samting yu mas mekem blong hop blong yu i stap strong olsem wan angka taem yu kasem trabol long mane, taem bodi no tingting i kam nogud, no ol narafala samting we oli olsem “bigfala win”? Faswan samting se yu mas luksave se ol promes blong Baebol oli tru mo yu save trastem olgeta. “Yufala i mas traem olgeta samting fastaem.” (1 Tesalonaeka 5:21) Eksampel, taem ol Wetnes blong Jeova oli toktok wetem yu nekis taem, lesin long samting we oli stap talem long yu. Sipos oli no stap kam long ples blong yu plante taem, traem go luk olgeta long Haos Kingdom we i stap kolosap long ples blong yu. Bambae oli no fosem yu blong joen wetem olgeta, be bambae oli askem yu blong oli mekem wan fri Baebol stadi wetem yu, mo bambae oli mekem plan blong stadi wetem yu long weples mo wanem taem we i stret long yu.

Stadi olsem bambae i givhan long yu blong trastem God se hem “i stap mekem i gud long olgeta we oli stap traem faenem hem.” (Hibrus 11:6) Bambae yu lanem se i no longtaem Kingdom blong God aninit long King, Jisas Kraes, bambae i tekemaot ol kruked fasin mo ol nogud fasin we oli mekem tingting blong plante man i foldaon tede. Aninit long Kingdom ya, wol ya bambae i kam wan paradaes bakegen, mo God bambae i givim laef we i no save finis long ol man we oli laekem hem. (Ol Sam 37:29; Revelesen 21:4) !Wan gudfala hop ya!

Ridimgud Baebol blong luk sipos hop ya i tru. Nao yu mas traehad blong frengud wetem God, olsem we Ebraham i mekem. (Jemes 2:23) From we Jeova i “stap ansa long ol prea” i gud yu talemaot ol wari blong yu long hem. Taem yu kam long hem from we yu rili wantem, bambae prea blong yu i givhan long yu blong yu tekemaot ol baden blong yu mo yu save winim tingting we i foldaon. Speret blong God bambae i openem rod long yu mo i save jenisim samting we i stap mekem se yu harem nogud.​—Ol Sam 55:22; 65:2; 1 Jon 5:​14, 15.

!“Holemstrong”!

Afta we Pol i talem long ol narafala disaepol se oli mas “traem olgeta samting fastaem,” hem i gohed i se: “Nao yufala i save holemstrong ol samting we oli gud.” (1 Tesalonaeka 5:21) Wan rod blong mekem olsem taem yu joen wetem ol man we oli stap holemstrong long Kristin hop blong olgeta tu. Waes king Solomon i givim woning ya i se: “Man we i wokbaot wetem ol waesman, bambae hem tu i kam waes. Be man we i kampani wetem ol krangke man, bambae hem i kasem trabol from.” (Proveb 13:20) I nogud blong letem tingting blong no laekem ol man from kala no laen blong olgeta no fasin sem i blokem yu blong yu no lukaotem ol gudfala man blong joen wetem olgeta. Eksampel, i gat sam man long medel blong ol Wetnes blong Jeova we bifo oli no gat hop. Be stadi we oli mekem long Baebol mo gudfala kampani blong ol narafala man blong bilif, oli givhan long olgeta blong oli frengud wetem Jeova mo i mekem se oli trastem hop ya we i olsem wan angka. ?Samting ya i rili winim tingting we i foldaon? Yes.

Tingbaot store blong Anmari, tingting blong hem i foldaon from we hasban blong hem i kilim hem. Hem i eksplenem se: “Mi wantem finisim laef blong mi nomo, be mi no save from wanem mi stap tingting blong prea fastaem long God. Mi tingbaot se mi bin talem olsem se, ‘?From wanem yu no save givhan long mi? Longtaem finis i kam mi stap trastem yu, be yu no mekem wan samting long mi.’ Mi finisim prea blong mi mo mi ting se i no nid blong mi stap laef, taswe i gud sipos mi ded nomo. Long sem taem ya, wan man i noknok long doa. Mi no wantem tingbaot fastaem, mi stap ting se bambae man ya i go.

“Be hem i gohed blong stap noknok mo mi mi harem nogud from. Mi waepemaot wora blong ae blong mi mo mi go blong luk se hu ya i stap long doa, mo mi stap tingting blong mekem samting ya kwiktaem afta bambae mi kilim mi wan i ded. Be,” Anmari i gohed i se, “tangkyu tumas long Jeova, i no kamaot olsem we mi mi wantem, from we taem mi openem doa, mi luk tu woman i stap stanap. Tru ya, mi mi no save wanem samting bambae mi mekem, mo mi no rili save wanem samting oli stap talem long mi. Be tufala i givim wan buk long mi we bambae i talemaot risen blong laef. Hem i samting we mi nidim blong mi save intres long laef blong mi.” Tufala ya we i kam luk hem tufala i mekem plan blong stadi Baebol wetem hem oltaem. Anmari i lanem blong kam wan fren blong God. Samting ya i mekem se hem i luksave from wanem hem i stap laef. Nao hem i stap givhan long ol narafala man tu blong oli trastem God.

Ating yu yu wantem winim tingting we i foldaon, be maet yu no save ol samting we i mas hapen blong mekem olsem. Be sipos yu stap prea se: “Yu mekem kingdom blong yu i kam. Yu mekem ol samting we yu yu wantem oli kamaot long wol, olsem we oli kamaot finis long heven,” olsemia nao yu stap prea from Kingdom blong God we Kraes i rul long hem blong i kam, we bambae hem i finisim ol samting we oli stap mekem tingting blong ol man we oli gat gud hat i foldaon. (Matyu 6:10, NW) Stadi Baebol yu wan mo joen wetem ol narafala we oli gat sem tingting olsem yu, bambae i givhan long yu blong holemtaet hop long Kingdom blong Jeova blong i mekem Paradaes i kamaot long wol. (1 Timote 6:​12, 19) Hemia gudfala hop we magasin ya i stap talemaot long olgeta haf we oli stap kamaot oltaem. Tingbaot gudfala hop ya blong yu save agensem tingting we i foldaon. Tru ya, hop ya i mekem se “yumi no save sem.”​—Rom 5:5.

[Tok Blong Pija Long Pej 7]

Baebol stadi i givim wan hop long yumi we i olsem “wan angka blong holem laef blong yumi”