Ol Tru Kristin Oli Mas Talemaot Gud Nyus
“Mekem wok ya blong talemaot gud nyus [no, misinari].”—2 TIMOTE 4:5.
1. ?Wanem gud nyus ya blong ol man blong talemaot gud nyus long faswan handred yia?
?TOK ya kam man blong talemaot gud nyus i minim wanem tede? ?Yu yu wan man olsem? Grik tok ya eu·ag·ge·li·stesʹ, i minim se “wan man blong talemaot gud nyus.” Stat long taem we oli stanemap Kristin kongregesen long 33 K.T., gud nyus blong ol Kristin i soemaot klia rod blong God blong sevem man mo i talemaot we Jisas Kraes bambae i kambak blong statemap rul blong hem blong Kingdom long olgeta man.—Matyu 25:31, 32; 2 Timote 4:1; Hibrus 10:12, 13.
2. (a) ?Olsem wanem mesej blong gud nyus i kam bigwan moa long taem blong yumi? (b) ?Wanem samting ol tru Kristin oli mas mekem tede?
2 Stat long 1914, ol samting oli stat blong soemaot se saen we Jisas i bin talem blong soemaot se hem bambae i kambak finis mo yumi no save luk hem, hem i stap kamtru fulwan. (Matyu 24:3-13, 33) Mo bakegen, gud nyus i save joen wetem tok ya “nyufala wol ya we God i king long hem, bambae i no longtaem hem i kamtru.” (Luk 21:7, 31; Mak 1:14, 15) Tru ya, taem i kam finis we profet tok blong Jisas long Matyu 24:14 i stap kamtru fulwan: “Nao bambae ol man oli stap talemaot gud nyus ya se God i king blong olgeta man. Bambae oli talemaot long olgeta ples long wol, blong oli wetnes blong hem long fes blong olgeta man. Nao biaen, bambae Lasdei i save kam.” Olsemia nao, wok blong talemaot gud nyus naoia i blong soemaot se Kingdom blong God i stanap finis mo i soemaot tu ol blesing we bambae i karem i no longtaem long ol man we oli obei. Evri Kristin oli stap aninit long oda blong mekem wok ya mo blong “go long ol man long olgeta ples long wol, blong pulum olgeta oli kam man blong [Jisas].”—Matyu 28:19, 20; Revelesen 22:17.
3. (a) ?Wanem mining blong tok ya “man blong talemaot gud nyus”? (Lukluk Insight on the Scriptures, Volyum 1, pej 770, kolon 2, paragraf 2.) (b) ?From samting ya yumi save askem ol wanem kwestin?
3 Mo tu, long saed blong wok blong talemaot gud nyus, Baebol i yusum tok ya “man blong talemaot gud nyus” long wan spesel fasin, long saed blong olgeta we oli lego prapa teritori blong olgeta blong talemaot gud nyus long ol ples we i no gat man i wok long olgeta yet. Long faswan handred yia, i gat plante misinari we oli man blong talemaot gud nyus, olsem Filip, Pol, Banabas, Saelas, mo Timote. (Ol Wok 21:8; Efesas 4:11) ?Be olsem wanem long spesel taem blong yumi stat long 1914? ?Ol man blong Jeova tede oli mekem olgeta oli fri blong kam man blong talemaot gud nyus long ples blong olgeta, mo olsem misinari?
Wok i Kam Moa Gud Stat Long 1919
4, 5. ?Wanem lukluk i stap long wok blong talemaot gud nyus samtaem biaen long 1914?
4 Taem Namba Wan Bigfala Faet Blong Wol i kasem en blong hem long 1918, ol man we oli lego tru wosip mo oli agens long hem, mo tu ol lida blong Krisendom mo ol man blong politik we oli joenem olgeta, oli agensem moa ol man blong God. Olsemia nao, tru Kristin wok kolosap i stop long Jun 1918, taem olgeta we oli stap lidim Watch Tower Sosaeti long Yunaeted Stet kot i jajem olgeta se oli mas go 20 yia long kalabus. Be ol poen we ol man oli agensem olgeta long hem oli gyaman nomo. ?Ol enemi blong God oli win blong finisim wok blong talemaot gud nyus?
5 Ol man oli sek long wanem i hapen: long Maj 1919 olgeta we i lukaot long Watch Tower Sosaeti oli kamaot long kalabus mo biaen oli fri long ol gyaman poen we i putum olgeta long kalabus. Taem oli fri bakegen, ol tabu Kristin ya oli luksave se i gat plante wok yet blong mekem bifo we bambae oli go kasem presen blong olgeta long heven long Kingdom blong God.—Rom 8:17; 2 Timote 2:12; 4:18.
6. ?Olsem wanem wok blong talemaot gud nyus i gru long 1919 go kasem 1939?
6 Long 1919 namba blong olgeta we oli stap talemaot gud nyus hem i no bitim 4,000. Long twante yia biaen, sam man oli givim laef blong olgeta olsem misinari blong talemaot gud nyus, mo oli bin sanem sam long olgeta oli go long ol kantri olsem Afrika, Esia, mo Yurop. Long 1939, afta 20 yia we oli talemaot Kingdom, namba blong ol Wetnes blong Jeova i go antap long 73,000. Oli kasem gudfala namba ya nating se ol man oli ronem olgeta. Hemia i sem mak long wanem i hapen long Kristin kongregesen blong bifo.—Ol Wok 6:7; 8:4, 14-17; 11:19-21.
7. ?Long yia 47 K.T. mo 1939, wanem sem samting i hapen long wok blong talemaot gud nyus?
7 Be bighaf blong ol Wetnes blong Jeova long taem ya oli stap long ol kantri blong Protestan skul we oli toktok engglis. Olsemia nao, bitim 75% long 73,000 man blong talemaot Kingdom oli blong Ostreylia, Engglan, Kanada, Nyu Silan mo Yunaeted Stet. I olsem long 47 K.T., oli nidim wan samting blong leftemap tingting blong ol man blong talemaot gud nyus blong tingting strong moa long ol narafala kantri long wol we wok i no go long olgeta yet.
8. ?Long 1992, Skul Blong Giled i mekem wanem i kamtru?
8 Ol hadtaem blong faet mo ol strong traem oli no save stopem tabu speret blong Jeova blong pusum ol man long wok blong hem blong rere blong mekem wok i go moa. Long 1943, taem Namba Tu Bigfala Faet Blong Wol i kasem bigwan blong hem, ogenaesesen blong God i putumap Watchtower Baebol Skul Blong Giled wetem wan tingting blong seremaot gud nyus i go moa long olgeta ples long wol. Long Maj 1992, skul ya i sanem 6,517 misinari i go long 171 defren kantri. Antap moa, ol man oli kasem trening blong lukaot long ol branj blong Watch Tower Sosaeti long ol narafala kantri. Olsem long 1992 blong ol 97 man blong lukaot long Branj Komiti, 75 oli bin kasem trening long Giled.
9. ?Wanem ol program we i kamaot blong mekem wok blong talemaot gud nyus mo wok blong mekem disaepol oli kam antap?
9 Antap bakegen long Giled Skul, i gat ol narafala program blong trenem ol man blong Jeova blong mekem gud nyus i go moa mo blong mekem wok blong talemaot gud nyus i kamgud moa. Wan eksampel, Tiokratik Skul we i stap long olgeta kongregesen blong ol Wetnes blong Jeova long olgeta ples long wol. Skul ya, wetem Miting Blong Mekem Disaepol we i stap long evri wik, i trenem plante milyan man blong talemaot Kingdom blong oli nafgud blong prij long pablik. I gat Kingdom Ministri Skul tu, we i givim inaf trening long ol elda mo ol man blong givhan blong olgeta oli nafgud blong lukaot long ol kongregesen we namba blong olgeta i stap kam antap. Paenia Skul i halpem plante fultaem man blong talemaot gud nyus blong oli kamgud moa long wok blong prij. I no longtaem, Skul Blong Trenem Ol Elda Mo Ol Man Blong Givhan i stap long defren kantri blong halpem ol elda mo ol man blong givhan we oli no mared yet blong kam olsem Timote blong taem blong yumi.
10. ?Wanem frut i kamaot long gudfala trening ya we ogenaesesen blong God i mekem? (Lukluk toktok insaed long bokis.)
10 ?Wanem frut i kamaot long ol trening ya? Long 1991, namba blong ol Wetnes blong Jeova i go antap bitim fo milyan man blong talemaot Kingdom we oli stap wok long 212 kantri. Be defren long wanem we i hapen long 1939, bitim 70% blong ol man ya oli blong Katolik kantri, Otodoks kantri, ol kantri we oli no Kristin, no ol narafala kantri, we Engglis i no faswan lanwis we oli toktok long hem.—Lukluk bokis “Wok i Bigwan Moa Stat Long 1939.”
From Wanem i Karem Frut
11. ?Aposol Pol i talem se hu i mekem minista wok blong hem i gudfala?
11 Ol Wetnes blong Jeova oli no ting se wok blong olgeta nao i mekem namba ya i go antap olsem. Be oli tingbaot wok blong olgeta olsem Pol i tingbaot hem bifo. Hem i talem long ol man Korin se: “Yufala i luk. ?Apolos i wanem man? ?Mi Pol, mi wanem man? Mifala i olsem ol man blong wok nomo, we mifala i tekem yufala i kam bilif long Kraes. Mifala i stap mekem ol wok ya nomo we Masta blong yumi i givim long mifala wanwan, blong mifala i mekem. I olsem we mi mi brekem graon, nao Apolos i planem yam, be God nomo i stap mekem ol yam ya oli gru gud. I olsem we mitufala i stap joen wetem God blong mekem wok blong hem. Mo yufala i olsem garen blong God.”—1 Korin 3:5-7, 9.
12. (a) ?Olsem wanem Baebol i givhan blong mekem wok blong ol Kristin blong talemaot gud nyus hem i gud? (b) ?Hu nao oli putumap hem olsem Hed blong Kristin kongregesen, mo wanem wan impoten rod blong soemaot se yumi stap aninit long rul blong hem?
12 Ol Wetnes blong Jeova oli gru from we Jeova i blesem olgeta. Hemia i wok blong God ya. From we oli luksave samting ya, olgeta i gohed blong stadi long Tok blong God oltaem. Evri samting we oli tijim long wok blong prij i stanap long Baebol. (1 Korin 4:6; 2 Timote 3:16) Wan narafala impoten samting i mekem olgeta oli nafgud blong mekem wok ya, oli luksave fulwan Hemia we God i putumap hem olsem Hed blong kongregesen, Masta Jisas Kraes. (Efesas 5:23) Ol Kristin blong faswan handred yia oli soemaot samting ya taem oli joengud wetem olgeta we Jisas i jusumaot olgeta olsem ol aposol. Ol man ya, wetem ol narafala elda blong kongregesen blong Jerusalem, oli olsem Hed Kampani blong faswan handred yia. Taem Masta Jisas Kraes i stap long heven finis hem i yusum grup ya blong ol Kristin we oli bigman long saed blong speret blong stretem ol samting mo lidim wok blong talemaot gud nyus. From we Pol i strong blong folemgud rod ya we God i yusum, namba blong ol kongregesen we hem i visitim oli gru. (Ol Wok 16:4, 5; Galesia 2:9) Sem mak tede, taem yumi fasgud long Tok blong God mo joengud wetem rul we i kam long Hed Kampani, ol Kristin man blong talemaot gud nyus oli save mekem gudfala wok long minista wok blong olgeta.—Taetas 1:9; Hibrus 13:17.
Luk Ol Narafala Oli Gud Moa Long Yufala
13, 14. (a) ?Wanem advaes aposol Pol i givim we i stap long Filipae 2:1-4? (b) ?From wanem i impoten blong tingbaot advaes ya taem yumi joen long wok blong talemaot gud nyus?
13 Aposol Pol i soemaot tru lav long olgeta we oli stap lukaot trutok mo hem i no soemaot se hem i hae moa no i agensem narafala kala blong man. Taswe, hem i save talem long olgeta we oli bilif se “yufala i mas stap luk ol narafala man olsem we oli gud moa long yufala.”—Filipae 2:1-4.
14 Long sem fasin, ol tru Kristin blong talemaot gud nyus tede, oli no tinghae long olgeta taem oli stap joen wetem ol man we oli gat narafala kala mo defren kastom. Wan Wetnes blong Jeova long Yunaeted Stet we i go blong wok olsem misinari long Afrika, i talem se: “Mi save we yumi no hae moa. Ating yumi gat plante mane mo yumi skulgud, be olgeta [ol man ples] i gat ol fasin we i bitim yumi.”
15. ?Olsem wanem olgeta we oli wok long narafala kantri oli soemaot tru respek long ol man we bambae oli kam disaepol?
15 I tru nomo, taem yumi soemaot tru respek long olgeta we yumi stap talemaot gud nyus long olgeta, hem i moa isi blong olgeta i akseptem mesej blong Baebol. I givhan long olgeta tu taem wan misinari blong talemaot gud nyus i soemaot we hem i glad blong stap wetem ol man we hem i wantem halpem olgeta. Wan misinari we i karem frut i pasem 38 yia long Afrika. Hem i se: “Mi wan mi harem se hemia i hom blong mi mo olgeta long kongregesen oli brata mo sista blong mi. Taem mi gobak long Kanada long taem blong holidei, mi no rili harem olsem se mi stap long hom blong mi. Kolosap laswan wik we mi stap long Kanada, mi wantem tumas blong gobak long wok blong mi. Oltaem mi harem olsem. Mi talemaot long ol Baebol stadi blong mi mo ol brata mo sista se mi hapi tumas blong kambak, mo olgeta oli glad tumas se mi wantem blong stap wetem olgeta.”—1 Tesalonaeka 2:8.
16, 17. (a) ?Wanem samting plante misinari mo ol man ples we oli man blong talemaot gud nyus oli akseptem blong mekem blong kamgud moa long minista wok blong olgeta? (b) ?From we hem i toktok lanwis blong ol man ples, wan misinari i gat wanem ekspiryens?
16 Taem ol misinari oli go stap long lokol teritori blong olgeta, samfala i traehad blong lanem lanwis blong ol man ples. Taem oli mekem olsem, oli soemaot se oli luk ol narafala oli gud moa. Wan misinari i talem se: “Long ol ples blong saot Afrika, samtaem i gat filing ya se ol man Afrika oli no trastem ol man Yurop, mo olgeta ya oli filim sem samting. Be taem yumi tok long lanwis blong olgeta, kwiktaem filing ya i lus.” Taem yumi toktok long lanwis blong man ples long olgeta ya we yumi stap talemaot gud nyus long olgeta, hem i wan bigfala help blong save tajem hat blong olgeta. Samting ya i min se yumi mas hadwok mo yumi mas gat longfala tingting. Wan misinari blong kantri ya Esia i se: “Taem yumi mestem oltaem mo oltaem oli laf from rong blong yumi samting ya i save kam wan traem. Ating i moa isi blong lego nomo.” Be lav blong hem long God mo ol narafala man i halpem misinari ya blong stanap strong.—Mak 12:30, 31.
17 Yumi no sapraes se ol man oli laekem taem wan man blong narafala kantri i traehad blong talemaot gud nyus long olgeta long lanwis blong man ples. Samtaem ol blesing oli kamtru i no olsem we yu tingbaot. Wan misinari i stap long kantri ya Lesoto, long Afrika. Wan dei hem i stap toktok long Sesoto lanwis long wan narafala woman, we i wok long wan stoa we oli salem ol samting blong flasem haos. Wan minista blong gavman blong wan narafala kantri long Afrika hem i stap lukluk insaed long stoa ya mo hem i harem tufala i storeyan. Hem i kam long misinari mo i leftemap hem from we hem i toktok long lanwis Sesoto. Nao woman ya i stat toktok long minista blong gavman ya long prapa lanwis blong hem. Ale man ya i askem se: “?From wanem yu no kam long [kantri blong mi] mo wok long medel blong ol man blong mifala, from se yu yu save lanwis blong mifala Suaili?” Wetem wan gudfala tok, misinari ya i ansa se: “Bambae i gud olsem. Be mi mi wan long ol Wetnes blong Jeova, mo naoia oli blokem wok blong mifala long kantri blong yufala.” Hem i ansa se: “Plis, yu no mas ting se mifala evriwan i agensem wok blong yufala. Plante long mifala oli agri long wok blong ol Wetnes blong Jeova. Ating wan dei bambae yu fri blong tijim ol man blong mifala.” Samtaem biaen, misinari ya i sapraes mo i glad blong harem se ol Wetnes blong Jeova oli fri blong mekem wosip long kantri blong man ya.
Rere Blong Blokem Samting We i Stret Blong Kasem
18, 19. (a) ?Long wanem impoten rod Pol i traehad blong folem eksampel blong Masta blong hem, Jisas Kraes? (b) Talemaot wan ekspiryens (hemia we i stap long haf ya no hemia we yu save) blong soemaot se i impoten blong lukaot se fasin blong yumi i no mas mekem trabol long olgeta we yumi stap talemaot gud nyus long olgeta.
18 Taem aposol Pol i raetem: “Yufala i mas folem fasin blong mi, olsem we mi mi stap folem fasin blong Kraes,” hem i jes finis blong tokbaot nid blong traem blokem fasin we i save mekem trabol long ol narafala, se: “Be long olgeta samting we yufala i kakae mo yufala i dring, mo long olgeta fasin blong yufala, oltaem yufala i mas leftemap nem blong God. Yufala i mas no mekem samtaem we bambae ol man Isrel, no ol hiten man, no ol memba blong jyos blong God oli save trabol long fasin blong yufala.”—1 Korin 10:31-33; 11:1.
19 Ol man blong talemaot gud nyus olsem Pol, we oli rere blong mekem ol sakrifaes from intres blong ol man we oli prij long olgeta, oli kasem ol blesing. Wan eksampel, long wan kantri blong Afrika, wan famle we i misinari i go long wan hotel blong mekem kakae blong tingbaot dei blong mared blong tufala. Fastaem tufala i tingting blong pem sam waen wetem sam kakae, from we Baebol i no blokem fasin blong tekem smol waen. (Ol Sam 104:15) Be afta famle ya i tingting blong no mekem olsem from we ating i save spolem ol man ples. “Samtaem biaen,” hasban ya i talem, “mifala i mitim man we i bos long hotel ya mo mifala i statem wan Baebol stadi wetem hem. Longtaem biaen we hem i stat blong stadi hem i talem long mifala i se: ‘?Yu rimemba taem ya we yu kam long hotel blong kakae? Mifala evriwan i stap biaen long doa blong kijin blong lukluk yu. Yu save, ol misinari blong jyos oli talem long mifala se hem i rong blong mifala i dring. Be yet, taem oli kam long hotel, oli odarem waen. Long taem ya mifala i plan se sipos yu oda long sam waen blong dring, bambae mifala i no lesin long yu taem bambae yu kam blong prij long mifala.’” Tede, bos ya mo sam narafala we oli wok long hotel ya oli baptaes olsem Wetnes blong Jeova.
Plante Wok Yet Blong Mekem
20. ?From wanem i impoten tumas se yumi stanap strong olsem ol man blong talemaot gud nyus, mo wanem jans ya we i save mekem yumi glad we plante i save folem?
20 From we en blong fasin nogud ya i stap kam kwik, plante man oli wantem tumas blong harem gud nyus, mo hem i impoten moa i bitim bifo se evri Kristin oli mas stanap strong olsem man blong talemaot gud nyus. (Matyu 24:13) ?Bambae yu joen moa long wok ya blong kam wan man blong talemaot gud nyus long wan spesel fasin olsem Filip, Pol, Banabas, Saelas, mo Timote? Kolosap plante man i mekem olsem taem oli joen long wok blong paenia mo oli mekem olgeta oli fri blong wok long ol ples we i gat bigfala nid long hem.
21. ?Long wanem rod i gat wan “doa we i open finis” blong wok long ol man blong Jeova?
21 I no longtaem, ol bigfala ples blong talemaot gud nyus i open long ol kantri olsem Afrika, Esia, mo Is Yurop, we bifo wok blong ol Wetnes blong Jeova oli bin putum tabu long hem. I sem mak long wanem i hapen long aposol Pol we i talem se: “From we long ples ya i gat olsem doa we i open finis” long ol man blong Jeova. (1 Korin 16:9) Blong eksampel, ol misinari blong talemaot gud nyus we i no longtaem oli kam long Mosambik long Afrika oli no gat i naf taem blong stadi long olgeta we oli wantem stadi Baebol, from we oli plante tumas. !Yumi save glad tumas from we wok blong ol Wetnes blong Jeova i open long kantri ya long Febuwari 11, 1991!
22. ?I nating sipos yumi stap long wan teritori we yumi wok long hem oltaem no no gat, wanem samting yumi evriwan i mas mekem?
22 Long ol kantri we oltaem yumi fri blong wok long hem, ol brata blong yumi oli glad blong luk we namba i stap go antap oltaem. Yes, weples yumi stap long hem, oltaem i gat plante “wok ya blong Masta blong yumi.” (1 Korin 15:58) From samting ya, yumi mas waesgud blong yusumgud taem we i stap yet olsem we yumi wanwan ‘yumi mas mekem wok ya blong talemaot gud nyus blong Kraes, mo yumi mas finisim olgeta wok ya we God i givim long yumi blong mekem.’—2 Timote 4:5; Efesas 5:15, 16.
?Yu Save Ansa?
◻ ?Man blong talemaot gud nyus i minim wanem?
◻ ?Afta 1914, olsem wanem mesej blong gud nyus i kam bigwan moa?
◻ ?Olsem wanem wok blong talemaot gud nyus i kam antap stat long 1919?
◻ ?Wanem stampa rod we i givhan blong mekem wok blong talemaot gud nyus i karem gud frut?
[Bokis blong pija long pej 19]
Wok i Bigwan Moa Stat Long 1939
Lukluk long ol eksampel blong ol tri kantri ya we ol misinari we oli kamaot long Giled oli go long hem. Lukluk bakegen long 1939 i gat 636 man blong talemaot Kingdom nomo we oli givim ripot blong olgeta long Wes Afrika. Long 1991, namba ya i go antap bitim 200,000 long 12 kantri blong Wes Afrika. Ol misinari oli givhan tu blong mekem bigfala namba i kam antap long ol kantri blong Saot Amerika. Wan kantri olsem hemia Brasil, we i kam antap long 114 man blong talemaot Kingdom long 1939 i go kasem 335,039 long Epril 1992. Sem mak bakegen namba i kam antap tu, taem ol misinari oli go long ol kantri blong Esia. Long taem blong Namba Tu Bigfala Faet Blong Wol, smol namba blong ol Wetnes blong Jeova blong Japan oli kasem bigfala traem, mo kolosap wok blong olgeta i stop. Biaen, long 1949, 13 misinari oli kam blong givhan blong mekem wok i gohed gud bakegen. Ripot blong wok blong yia ya i soemaot se i gat kolosap 10 pablisa we oli prapa man Japan oli givim ripot blong olgeta long ful kantri ya, be long Epril 1992 ful namba blong ol pablisa i kasem 167,370.
[Bokis blong pija long pej 21]
Krisendom Mo Ol Lanwis
Sam misinari blong Krisendom oli traehad blong lanem wan lanwis blong narafala kantri, be plante long olgeta oli wantem se ol man ples oli toktok lanwis blong waetman. Olsem we Geoffrey Moorhouse hem i talem long buk blong hem The Missionaries:
“Hemia nao trabol, plante taem oli lanem lanwis blong man ples olsem wan rod blong save transletem Baebol nomo. Be ol misinari mo ol ogenaesesen we oli sanem olgeta, oli no talem long wan misinari se hem i mas lanem lanwis blong man ples, we i save mekem tu man blong defren kantri oli savsavegud tingting blong tufala. I gud we evri misinari oli lanem ol vokabulari long lanwis blong man ples . . . Be oli toktok wan pijin engglis we i saon narakaen blong pulum ol man ples oli lanem lanwis blong waetman. Wan samting we i nogud moa, fasin ya i wan narafala rod blong tinghae long saed blong kala blong man.”
Long 1922 Skul blong Orientel mo Afrikan Stadi blong London i mekem wan ripot long trabol blong lanwis. Ripot i talem se: “Mifala i luksave tingting ya, se level we ol misinari oli kasem blong save toktok lanwis blong ol man ples, . . . hem i daon tumas, mo samting ya i nogud tumas.”
Oltaem ol misinari blong Watch Tower Sosaeti oli luk se oli mas lanem lokol lanwis, fasin ya i givhan blong save from wanem ol misinari ya oli mekem gudfala wok.