‘?Mi Save Baptaes?’

LONG evri disisin we yumi wantem mekem long laef, ating i no gat wan we i impoten moa long hemia: ‘?Mi save baptaes?’ ?From wanem kwestin ya i impoten tumas? From we disisin blong yumi long saed blong kwestin ya i gat paoa long laef blong yumi naoia, be tu i gat paoa long fasin blong haremgud long laef blong yumi long fyuja.

?Yu yu stap tingting long disisin ya? Ating yu stap stadi Baebol longtaem finis wetem ol Wetnes blong Jeova. No papa mama blong yu tufala i tijim yu long Baebol i stat taem yu smol yet. Mo naoia yu kasem wan mak we yu mas tekem disisin blong yu long wanem yu mas mekem. Blong givhan long yu blong mekem wan stret disisin, yu nidim blong savegud se baptaes i joen wetem wanem mo hu i save baptaes.

Baptaes i Joen Wetem Wanem

Kolosap olsem wan mared, baptaes i wan seremoni we i soem se tu man i frengud. Long saed blong wan mared, man mo woman tufala i frengud finis. Seremoni ya blong mared i soemaot long pablik we tufala i tekem disisin finis taem tufala i stap tufala nomo, se naoia tufala i joen oltaem long mared. Samting ya i openem rod long ol blessing we tufala i save haremgud long hem mo ol responsabiliti we tufala i mas mekem long laef blong tufala.

Samting ya i kolosap sem mak long baptaes. Taem yumi stap stadi Baebol yumi save wanem ol gudfala samting we Jeova i mekem long yumi. Jeova i no givim laef mo ol samting we yumi nidim nomo blong mekem se laef ya i gud, be hem i givim stret Pikinini blong hem tu blong hem i openem rod long ol sinman blong oli save frengud wetem Hem mo blong kasem laef we i no save finis long paradaes long wol. ?Taem yumi tingbaot ol samting ya, bambae oli no pusum yumi blong mekem wan samting?

?Yumi save mekem wanem? Jisas Kraes, Pikinini blong God i talem long yumi se: “Man we i wantem kam biaen long mi i mas blokem ol samting we hem nomo i wantem, nao i mas karem [pos, NW] blong hem, i mas biaen long mi.” (Matyu 16:24) Yes, taem yumi folem eksampel blong Jisas Kraes blong mekem ol samting we Papa blong hem Jeova i wantem, yumi save kam ol disaepol blong hem. Be, blong mekem olsem yumi mas ‘blokem’ ol samting we yumi nomo i wantem we i min se yumi putum wil blong God long fasples long ol samting we yumi nomo i wantem. Samting ya i min se yumi mas givim laef blong yumi blong mekem wil blong hem. Blong soemaot long ol man se yumi nomo i tekem disisin ya finis long prapa tingting blong yumi, i gat wan pablik seremoni blong mekem. Baptaes long wota nao hem i seremoni ya blong soemaot long pablik we yumi givim laef blong yumi i go long God.

?Hu i Save Baptaes?

Jisas Kraes i tijim ol man blong hem blong ‘go mo mekem disaepol long ol man blong olgeta nesen, mo oli mas baptaesem olgeta long nem blong Papa, mo long nem blong Pikinini, mo long nem blong tabu speret. Mo oli mas tijim olgeta blong oli folem olgeta loa we hem i givim finis long olgeta.’ (Matyu 28:​19, 20, NW) I klia se olgeta we oli wantem baptaes oli mas strong long saed long speret, long tingting mo hat blong olgeta. Long stadi blong olgeta wanwan long Tok blong God, oli luksave se oli mas ‘tanem tingting blong olgeta from ol sin blong olgeta’ long ol samting we oli mekem bifo. (Ol Wok 3:19) Biaen, oli luksave nid blong mekem wok blong talemaot gud nyus we Jisas Kraes i bin mekem, nao oli kam ol disaepol blong hem. Blong tekem baptaes oli mas mekem ol samting ya fastaem.

?Yu yu kasem mak ya finis long saed blong speret? ?Yu yu gat tingting blong mekem wok blong God? Sipos i olsem, i gud blong prea mo tingtinggud long saed blong store ya blong Baebol long man Itiopia we Ol Wok japta 8 i tokbaot. Taem oli eksplenem ol profet tok long man ya se Jisas i Mesaea, hem i traem luksave wanem samting i stap long tingting mo hat blong hem mo i askem se: “?I gat sam samting i stap blokem mi yet, se mi no save baptaes?” I klia nomo se i no gat wan samting i blokem hem, ale hem i baptaes.​—⁠Ol Wok 8:​26-38.

Tede plante man oli askem sem kwestin ya: “?I gat sam samting i stap blokem mi yet, se mi no save baptaes?” Ansa we i kamaot long 1991 i gat 300,945 man oli baptaes. Samting ya i karem bigfala glad long olgeta man blong Jeova, mo ol elda blong olgeta kongregesen oli glad blong halpem ol narafala we oli gat gudhad blong gruap mo kam naf blong baptaes.

Be ating samtaem ol elda blong kongregesen blong yu oli wantem se yu wet fastaem. No, sipos yu yu wan yangfala, ating papa mama blong yu oli wantem se yu wet fastaem. ?Bambae yu yu mekem wanem nao? Yu no mas letem tingting blong yu i foldaon. Yu no mas foget se fasin blong yumi wanwan blong kam fren wetem Hemia we i Hae Moa i wan bigfala samting. Yu mas gat ol gudfala fasin mo yu mas soemaot olgeta oltaem. Olsemia nao yu mas lesin long ol samting we olgeta oli talem mo mekem olgeta i wok long fulhat blong yu. Sipos yu no savegud olgeta risen we oli givim, yu save askem ol kwestin long olgeta gogo kasem we yu savegud wanem samting yu nidim blong mekemrere. Yu yu no mas sem.

Antap long hemia, ating samfala man oli fraet blong mekem impoten disisin ya. ?Yu yu wan long olgeta? I tru, ating i gat sam risen from wanem yu mas wet bifo yu save givim laef blong yu i go long God mo baptaes. Be sipos yu yu nafgud mo yu stap fraet yet, i gud blong askem yu wan se: “?I gat sam samting i stap blokem mi yet, se mi no save baptaes?” Long prea, tingtinggud long laef blong yu mo luk sipos i rili gat wan gudfala risen we i blokem yu blong frengud wetem Jeova, olsem we hem i stap askem yu blong mekem.

‘Mi Yangfala Yet’

Ating yu yu gat tingting olsem sipos yu yu wan yangfala man se ‘mi mi yangfala yet.’ I tru se taem ol yangfala oli stap holem fasin obei long ol Kristin papa mama blong olgeta mo oli traehad blong mekem ol tok blong Baebol i wok long laef blong olgeta, oli save trastem se Jeova i luk olgeta olsem oli “tabu.” Yes, Baebol i talem long yumi se God i agri long ol pikinini we oli dipen long papa mo mama we oli gat stret fasin. (1 Korin 7:14) Be, Baebol i no givim wan yia we mak blong dipen long olgeta i finis long hem. Olsemia nao, i impoten tumas long ol yangfala Kristin blong luklukgud kwestin ya se: ‘?Mi save baptaes?’

Baebol i leftemap tingting blong ol yangfala blong ‘tingbaot Bigfala Man ya we i Wokem olgeta taem oli yang yet.’ (Eklesiastis 12:⁠1) Taem yumi tingbaot vas ya yumi gat eksampel blong yang Samuel, we “i mekem wok blong Jeova, olsem wan boe.” Yumi gat eksampel blong Timote tu we taem hem i yangfala i mekem trutok we mama mo bubu woman blong hem tufala i tijim, i wok long laef blong hem.​—⁠1 Samuel 2:18; 2 Timote 1:5; 3:​14, 15.

Tede i sem mak, plante yangfala oli givim laef blong olgeta blong mekem wok blong Jeova. Akifusa, wan yangfala blong 15 yia, i talem se wan haf blong Miting Blong Mekem Disaepol i halpem hem blong tekem disisin blong hem blong tekem baptaes. Ayumi i tekem baptaes taem hem i gat ten yia nomo. Hem i wantem mekem wok blong Jeova from we hem i laekem Jeova tumas. Naoia Ayumi i gat 13 yia mo hem i luk Baebol stadi blong hem we i gat 12 yia nomo i tekem baptaes from we hem tu i laekem Jeova. Hikaru we hem i yangfala brata blong Ayumi, hem tu i tekem baptaes taem hem i gat ten yia nomo. Hem i talem olsem se: “Samfala oli talem se mi mi yang tumas, be Jeova i save filing blong mi. Mi mi wantem tekem baptaes taem mi tekem disisin blong mi blong givim laef blong mi blong mekem wok blong hem wetem olgeta samting we mi mi gat.”

Yumi save luk long ekspiryens blong wan yangfala sista olsem wanem eksampel blong papa mama tu i wan rod. Papa blong gel ya i blokem mama blong hem blong mekem Baebol stadi long hem wetem brata mo sista blong hem. Papa ya i kilim olgeta mo hem i bonem ol buk blong olgeta. Be from we mama blong gel ya i stanap strong mo i gat bilif, ol pikinini oli luksave se i impoten blong mekem wok blong Jeova God. Taem yangfala gel ya i gat 13 yia, hem i baptaes mo yangfala brata mo sista blong hem tufala i folem eksampel blong hem.

‘Mi Olfala Finis’

Man blong raetem Ol Sam i se: “Yufala ol olfala wetem ol boe . . . yufala i presem nem blong Jeova.” (Ol Sam 148:​12, 13, NW) Yes, ol olfala tu oli mas luksave nid blong sapotem Jeova. Be sam man we oli olfala finis oli ting se oli no save jenis. Olgeta oli gat tingting ya se “yu no save tijim ol nyufala trik long wan olfala dog.” Yet, yumi rimemba man blong bilif ya Ebraham we i gat 75 yia taem Jeova i talem long hem se: “Yu mas aot long ples ya blong yu, mo long ol famle blong yu mo long haos blong papa blong yu nao bambae yu mas go long wan narafala kantri, we mi bambae mi soemaot long yu.” (Ol Wok 7:3; Jenesis 12:​1, 4) Taem Moses i gat 80 yia, Jeova i talem long hem se: “Go luk king blong Ijip, blong yu tekemaot ol man ya blong mi.” (Eksodas 3:10) Ol man ya mo ol narafala man tu oli folem prapa fasin blong laef blong olgeta longtaem finis taem Jeova i askem olgeta blong soemaot lav mo givim laef blong olgeta i go long hem. Oli no fraet blong obei long tok blong Jeova.

?Olsem wanem long tede? I gat 78 yia finis we Sisumu i stap long skul blong Buda taem hem i stat blong stadi Baebol. Ol famle blong hem oli agensem hem mo oli no letem hem tu blong i stadi long prapa haos blong hem. Wan yia biaen nomo, hem wan i luksave nid blong givim laef blong hem long Jeova, mo hem i tekem baptaes. ?From wanem hem i jenis? Hem i se: “Long plante yia finis gyaman skul i mekem mi mi krangke. Mo mi wantem gohed blong kasem trutok blong Jeova blong olwe.”

“Baptaes Ya We i Sevem Yufala Naoia”

Taem i stap spid naoia. Ol laef, mo laef blong yu tu, i save lus no no gat. From samting ya i impoten we yu mas luklukgud disisin ya blong givim laef blong yu wan long Jeova mo soemaot samting ya taem yu tekem baptaes long wora. Aposol Pita i soemaot samting ya taem hem i talem se: “Wora ya . . . i saen blong baptaes ya we i sevem yufala naoia.” Hem i gohed blong talem se baptaes i “no we yufala i wasemaot ol doti long bodi blong yufala” (wan man i save mekem samting ya finis bifo we hem i kam naf blong tekem baptaes) “i we yufala i mekem promes long God we tingting blong yufala i no save jajem yufala from.”​—⁠1 Pita 3:⁠21.

Wan disaepol we i baptaes i kasem ol mak we Jeova i askem long hem, nao hem i gat wan gudfala voes blong hat mo tingting. Taem hem i traehad blong gohed blong mekem wok blong Jeova, hem i gat pis long tingting mo hem i haremgud. (Jemes 1:25) Antap long hemia, hem i save lukluk fored long ol blesing ya we i no save finis we Jeova bambae i givim long nyufala fasin. Samting ya i save kamtru long yu sipos yu ansa ‘yes’ long kwestin ya se: ‘?Mi save baptaes?’

[Tok Blong Pija Long Pej 21]

Taem hem i wan boe, Samuel i mekem wok blong Jeova

[Tok Blong Pija Long Pej 22]

Moses i gat 80 yia taem Jeova i yusum hem

[Tok Blong Pija Long Pej 23]

Tede ol yangfala mo ol olfala we oli tekem baptaes oli save lukluk fored long ol blesing ya we i no save finis long nyufala fasin blong God