Ol Ples Long Promes Lan

Wokbaot i Go Long Silo Ol Gudfala Pikinini Mo Ol Nogud Pikinini

TAEM yu tingbaot ol taon mo ol eria long Promes Lan, ?olsem wanem, samtaem yu stap tingbaot ol wanwan man mo woman we Baebol i tokbaot olgeta? Ating yes, from plante we Baebol i tokbaot olgeta hemia ol bigman. ?Be olsem wanem long ol pikinini long taem ya? ?Yu yu stap tingbaot olgeta tu long taem ya?

Ol pija we yumi luk antap i save givhan long yumi blong tingtinggud long ol store we oli tokbaot ol yangfala, we sam oli gudfala eksampel blong ol Kristin tede mo samfala oli ol eksampel long saed blong ol woning. Raon hil we i stap long medel blong pija, hem i soemaot ples we Silo i stap long hem.a

Ating yu rimemba se taem ol man Isrel oli go insaed long Promes Lan, fastaem oli stanemap haos wosip blong God long Gilgal kolosap long Jeriko. (Josua 4:19) Be taem oli seraotem graon ya long plante haf, tabu haos tapolen ya​—⁠stret ples blong wosip blong ol man Isrel​—⁠oli muvum i go long Silo. (Josua 18:⁠1) Hemia i samwe long 30 kilomita not long Jerusalem long ol graon blong Ifrem we i gat plante hil long hem. Olgeta man mo woman blong Isrel oli stap wokbaot i go long Silo. Bigfala grup blong man oli save hivap wanples long medel blong ol hil long saot blong ples ya we haos prea blong God i stap long hem. (Josua 22:12) ?Yu save mekem wan pija long tingting blong yu se ol pikinini tu oli stap kam long ples ya?

Sam pikinini oli kam. Wan gudfala eksampel we ating yumi save long hem, hemia yangfala Samuel. Papa mo mama blong hem, Elkana mo Ana, tufala i stap long wan taon narasaed long ol hil long saed blong wes. Evri yia oli kam long Silo, mo ating tufala i karem wetem tufala sam pikinini blong narafala woman blong Elkana tu. Be i no longtaem afta, Jeova i blesem Ana, mo hem i karem wan pikinini boe we nem blong hem Samuel. Biaen papa mo mama blong hem oli tekem hem i kam long Silo blong hem i save wok long haos prea blong Jeova wetem hae pris ya, Eli.​—⁠1 Samuel 1:​1 kasem 2:⁠11.

Yangfala boe ya i gat sam wok blong mekem long haos blong God, mo hem i mas gat plante jans blong wokbaot long ol hil we i stap kolosap. (1 Samuel 3:​1, 15) Sam long ol ples ya oli flat mo oli fulapgud long ol oliftri, olsem yu luk long pija. Makem smol haos ya we i hae we oli wokem wetem ston. Olgeta man blong wok long garen no olgeta man blong lukaot sipsip we oli stap wanwan olbaot, oli stap go blong lukluk antap long smol haos ya, be traem tingbaot, yangfala Samuel tu i stap klaem i go antap mo hem tu i stap lukluk. (Skelem wetem 2 Kronikel 20:24.) Ples ya i wan gudfala ples we man i save stap long hem blong lukaot ol wael anamol.

Long taem bifo, long ples ya ol tri oli moa plante bitim naoia, wan bigfala bus we ol wael anamol oli stap wokbaot long hem. (Josua 17:​15, 18) Yumi save samting ya from wan samting we i bin hapen long Elaesa, taem hem i jes kam olsem bigfala profet blong God. Elaesa i aot long Jeriko mo i stap wokbaot i go long Betel, mo hem i stap long ples ya samwe 16 kilomita saot blong Silo. Betel i wan stampa ples blong wosip long buluk we oli mekem wetem gol. ?Be olsem wanem, oli mekem welkam long Elaesa? (1 King 12:​27-33; 2 King 10:29) I luk olsem se ol bigman oli wantem rao wetem profet blong Jeova, mo tingting ya i kasem ol pikinini blong olgeta tu.

Long buk blong 2 King 2:​23, 24 i talem long yumi se wan grup blong ol yangfala oli laf long profet blong Jeova mo oli talem long hem se: “!Yu go antap, bolhed! !Yu go antap, bolhed!” Ale long ansa we Elaesa i givim long olgeta, hem i “singaotem trabol i kam long olgeta long nem blong Jeova. Nao i gat tufala woman bea we oli kamaot long ol wud mo tufala i kilim i ded fotetu long ol pikinini ya.” Long ples ya, ol braon bea blong Siria oli save kam kros sipos oli sek long wan samting mo oli save kros tu taem oli ting se wan samting bambae i spolem ol smosmol pikinini blong olgeta. (2 Samuel 17:8; Proveb 17:12; 28:15) God i yusum bea blong panisim olgeta we oli bin spolem man we hem i putumap, i olsem se oli stap spolem Jeova hem wan.

Taem yumi tingbaot ol wael anamol ya we oli stap long ol hil raonabaot long Silo, we wan pikinini i save faenem taem hem i stap wokbaot, samting ya i givhan long yumi blong luksave se papa mama blong Samuel tufala i gat strong bilif, taem tufala i wokbaot blong karem Samuel i kam blong mekem wok long haos blong God.

Wan narafala man we i stap folem trufala wosip mo hem i bin soemaot bilif blong hem mo fasin blong fasgud long God, hemia​—⁠Jaj Jefta. Hem i stap long Giled long is saed blong Jodan reva, long kantri ya we i gat plante hil. Hem i gat strong tingting long Jeova taem hem i stap mekem faet agensem ol man Amon, mo Jefta i promes se faswan we i kamaot long haos blong hem blong mitim hem, bambae hem i givim long Jeova olsem wan sakrifaes. Mo yangfala gel blong Jefta nao hem i faswan blong kamaot blong mitim hem. Ale hem i karem pikinini blong hem, wan nomo we hem i gat, i kam long haos prea blong Jeova long Silo, mo pikinini gel blong Jefta i gohed strong blong mekem wok blong Jeova blong plante yia.​—⁠Jajes 11:​30-40.

Fasin blong holemstrong long Jeova mo blong stap kolosap long hem we Samuel mo gel blong Jefta oli soemaot long yumi long eria blong Silo, i defren olgeta long eksampel blong fotetu pikinini we oli stap laf long profet blong Jeova long sem eria ya.​—⁠Skelem wetem 1 Korin 10:​6, 11.

[Futnot]

[Foto Credit Line Blong Pija Long Pej 8]

Pictorial Archive (Near Eastern History) Est.

[Foto Credit Line Blong Pija Long Pej 9]

Pictorial Archive (Near Eastern History) Est.

[Foto Credit Line Blong Pija Long Pej 9]

Safari Zoo, Ramat-Gan, Tel Aviv