?Hu Ya Olgeta We Oli Bon Bakegen?

?OLGETA stret man, bambae evriwan oli go long heven? Plante man oli gat tingting olsem, be Jisas i no agri wetem tingting ya. Nikodimas, wan haeman blong ol man Isrel, i bin haed mo i kam luk Jisas long wan naet, ale Jisas i stap toktok wetem hem, mo i talem se: “I no gat man we i go antap long heven samtaem.”​—⁠Jon 3:⁠13.

Jisas i joenem tok blong hem, mo i soemaot long Nikodimas se i gat taem i kam we sam man bambae oli gat jans blong go insaed long Kingdom blong heven. From samting ya, Jisas i talem se: “Sipos man i no bon long wora mo long Tabu Speret, bambae hem i no save kam we God i king blong hem. Hem we i bon long man, hem i man, i blong wol ya. Hem we i bon long Tabu Speret hem i speret, i blong nyufala wol ya. I nogud yu sapraes from we mi talem long yu se ‘Yu yu mas bon bakegen.’ ” Be Nikodimas i sapraes tumas blong harem se man i save bon bakegen. Nikodimas i wantem save olsem wanem wan man i save bon bakegen.​—⁠Jon 3:​1-9.

Ating yu tu yu wantem save mining blong tok blong Jisas. ?Tok blong Jisas i stret long olgeta we oli talem se oli bin gat wan ekspiryens we tabu speret i kam fulap long olgeta nao wantaem nomo samting olsem wan merikel i jenisim laef blong olgeta?

Filing Mo Maen

Samfala man oli talem se, wan man we i bon bakegen, bigfala samting se, hem i haremsave ol paoa blong speret. Taswe hat mo maen blong yumi i save lidim yumi i go krangke, samting ya i tru moa taem ol strong filing oli gat paoa long hat mo maen.​—⁠Jeremaea 17:⁠9.

William Sargant, wan man blong stadi long ol trabol long filing mo maen blong ol man, i talem se man i mas “lukaotgud long ol bilif we yumi kasem taem ol filing blong yumi oli strong, long taem ya we bren blong yumi i save gyaman long yumi.” Sargant i talem se, wan eksampel hemia paoa we ol karismatik prija mo ol tok blong panisim man long helfaea i gat long tingting blong ol man we oli lesin. ?Bambae hu i no wantem bon bakegen blong go long heven sipos i gat wan narafala rod nomo, hemia i blong go blong harem nogud blong olwe? Sargant i talem se taem ol tok olsem oli gat paoa long filing blong yumi, “yumi no moa folem gudfala fasin ya blong yusum bren blong yumi blong skelem ol samting, ale yumi folem ol tingting mo ol bilif we yumi no save nating long olgeta.”​—⁠The Mind Possessed.

?Be, olsem wanem wan man i save talem sipos bilif ya long saed blong bon bakegen i wan bilif we hem i bin ‘agri long hem be i no gat gudfala save long hem nating’? I waes blong yumi letem evri tok blong God we tabu speret blong hem i bin givhan long ol man bifo blong raetemdaon oli lidim yumi. Baebol i pulum ol Kristin blong mekem wosip long God wetem ‘tingting blong olgeta’ mo oli mas sua se samting we oli stap bilif long hem i tru.​—⁠Rom 12:​1, 2; 1 Tesalonaeka 5:⁠21.

Taem wan man i bon bakegen, samting ya i openem wan bigfala wok long hem we i no olgeta man evriwan oli save mekem. Samting ya i joen wetem wan spesel fasin we God i yusum blong mekem plan blong hem i kamtru. Taem yumi luksave se ol samting ya i tru, maet yumi save askem kwestin olsem hemia: ?Hu ya olgeta we oli bon bakegen? ?Samting ya bambae i kamaot olsem wanem? ?Wanem fyuja i stap long fored blong man olsem? ?Mo olsem wanem, olgeta nomo bambae oli kasem laef?

[Tok Blong Pija Long Pej 3]

Nikodimas i wantem save olsem wanem man i save bon bakegen