Risen From Wanem Sam Man Oli Bon Bakegen

“SIPOS man i no bon bakegen blong i kam nyufala man, bambae hem i no save luk rod blong kam we God i king blong hem.” (Jon 3:3) Moa long 1,900 yia finis Jisas i bin talem tok ya mo kam kasem tede tok ya i gat bigfala paoa long plante man mo plante man oli stap konfyus yet long hem.

Blong kasem stret save long tok blong Jisas long bon bakegen, fastaem yumi mas ansa long ol kwestin ya: ?Wanem plan blong God long olgeta man? ?Wanem i hapen long sol taem man i ded? ?Kingdom blong God bambae i mekem wanem wok?

Plan Blong God Long Olgeta Man

Faswan man, Adam, God i mekem hem olsem pikinini blong hem we i stretgud olgeta. (Luk 3:38) Jeova God i no mekem Adam blong hem i mas ded. Adam wetem woman blong hem, Iv, oli save gat wan bigfala famle we oli no gat sin we oli save laef blong olwe mo fulumap wol ya we i olsem wan paradaes. (Jenesis 1:28) Ded i no wan haf blong plan blong God long olgeta man mo woman. Ded hem i kam insaed nomo from fasin blong agensem mo brekem loa blong God.​—Jenesis 2:​15-17; 3:17-19.

Fasin blong agens ya i stanemap ol bigfala kwestin, olsem: ?God i gat ful raet blong rul? ?Oltaem ol man oli save folemgud ol loa blong hem? Taswe i nidim taem blong ansa long ol kwestin ya we oli bin kamaot. Be plan blong Jeova God long olgeta man i no jenis, mo hem i no save mestem wanem samting we hem i wantem mekem. Hem i gat plan blong fulumap wol wetem ol stret man we bambae oli save glad blong laef foreva long Paradaes. (Ol Sam 37:29; 104:5; Aesea 45:18; Luk 23:43) Yumi mas holem stampa trutok ya long tingting blong yumi taem yumi tingbaot tok blong Jisas long saed blong bon bakegen.

?Wanem i Hapen Long Sol Taem Man i Ded?

Ol man Gris we oli gat bigfala save oli trabol tumas blong faenem mining blong laef, from oli no save samting we tabu speret blong God i soemaot long ol man we oli raetem Baebol. Oli no save bilif se man i save laef blong sam yia nomo, plante taem oli harem nogud long laef blong olgeta, mo afta oli ded. Long tingting ya, tok blong olgeta i stret. Be long saed blong wanem i hapen long man biaen long ded, tingting blong olgeta i rong. Oli talem se ol man oli stap gohed blong laef yet long sam narafala fasin bakegen afta long ded mo oli talem se insaed long evriwan i gat wan sol we i no save ded.

Ol tingting ya oli gat paoa long ol man Jyu wetem plante man we oli talem se oli Kristin. Buk ya Heaven​—A History i talem se: “Weples ol man Jyu we oli stap laef afsaed long Palestaen oli mitim ol man Gris we oli gat bigfala save, oli stap tokbaot tingting ya se sol blong man i no save ded.” Buk ya i gohed blong talem se: “Bilif blong ol man Gris long sol i kam wan tingting blong ol man Jyu mo biaen i kam olsem wan Kristin bilif. . . . Taem Filo [wan man Jyu long faswan handred yia long Aleksandria we i gat big save] i joenem ol save blong Plato wetem ol kastom blong Baebol, hem i mekemrere wan isi rod long ol Kristin we oli kam biaen we oli save tingting plante.”

?Wanem bilif blong Filo? Semfala buk ya i talem se: “Long hem, ded i mekem sol i gobak long prapa ples blong hem, we i bin stap long hem bifo, taem hem i no bon yet. From we sol i blong wan wol we ol speret nomo oli stap long hem, laef long bodi blong man i kam nating nomo olsem wan ekspiryens we i sot nomo.” Be, ‘bifo we Adam i laef,’ hem i no bin laef nating samples. Baebol i soemaot se, i no plan blong God nating se man i mas stap long wol fastaem, olsem wan stap we hem i mas kasem, mo biaen hem i ded mo i jenis kwiktaem i go long wan narafala ples we i hae no i daon.

Tok blong God, Baebol, we i kamaot from tabu speret i no tijim yumi nating long bilif ya se sol blong man i no save ded. I no gat wan tok nating we i talem se “sol i no save ded.” Baebol i talem se God i mekem Adam we hem i wan sol be i no mekem hem wetem wan sol. Jenesis 2:7 i talem se: “Nao Jeova God i tekem sam graon, i wokem man long hem, mo hem i blu long nus blong man ya, i putum win blong laef long hem. Nao long fasin ya, man ya i kam wan laef sol.” (NW) Neva God i mekem plan se man bambae i go long heven blong kasem laef we i no save finis no blong go long helfaea blong harem nogud blong olwe. Baebol i soemaot se sol, no ol man, we oli ded oli no save wan samting nating. (Ol Sam 146:​3, 4; Eklesiastis 9:​5, 10; Esikel 18:4) Taswe, ol man we oli gat big save long saed blong waes blong man, ol tingting blong olgeta long saed blong sol oli no laenap wetem Baebol. Yumi mas ronwe long ol tingting we oli no stret we i save blokem save blong yumi long tok blong Jisas long saed blong bon bakegen.

Bon Bakegen Blong Rul Olsem King

Jisas i talem long Nikodimas se olgeta we oli “bon bakegen . . . [oli save go insaed long Kingdom blong God, NW].” (Jon 3:​3-5) ?Wanem Kingdom ya? Long wan profet tok we God i talem taem histri blong man i jes stat, Jeova God i talemaot plan blong hem blong yusum wan spesel “laen” (NW)​—wan rula we bambae i kam​—blong smasem hed blong Snek ya blong bifo, Devel Setan. (Jenesis 3:15; Revelesen 12:9) Taem ol yia oli stap pas, Baebol i talemaot se, “laen” ya i stret nomo long Jisas Kraes, we bambae i rul wetem sam man long wan spesel fasin we i soemaot hae rul blong God, hemia Kingdom blong Mesaea. (Ol Sam 2:​8, 9; Aesea 9:​6, 7; Daniel 2:44; 7:​13, 14) Hemia nao Kingdom blong heven, wan gavman long heven we bambae i leftemap hae rul blong Jeova mo bambae i tekemaot olgeta man we oli stap kalabus long sin mo ded.​—Matyu 6:​9, 10.

Olgeta we bambae oli joen wetem Kraes blong rul hemia 144,000 we Kraes i pemaot olgeta long medel blong olgeta man long wol. (Revelesen 5:​9, 10; 14:​1-4) God i jusum sam long ol pikinini blong Adam we oli no stretgud olgeta blong oli kam “tabu man blong God ya we i Antap Olgeta,” we bambae oli rul wetem Kraes long Kingdom blong Mesaea. (Daniel 7:27; 1 Korin 6:2; Revelesen 3:21; 20:6) Ol man mo woman ya oli gat strong bilif long Jisas Kraes, mo hem i talem se bambae oli “bon bakegen.” (Jon 3:​5-7) ?Olsem wanem mo from wanem olgeta ya oli bon bakegen?

Ol wanwan man ya oli bin baptaes long wora olsem ol man blong folem Jisas. God i fogivim finis ol sin blong olgeta from ransom sakrifaes blong Jisas, nao hem i talem se oli stret man long fes blong hem, mo hem i tekemaot olgeta olsem oli speret pikinini blong hem. (Rom 3:​23-26; 5:​12-21; Kolosi 1:​13, 14) Pol i tokbaot olgeta ya i se: “Mo Tabu Speret ya we God i givim finis long yufala, . . . Speret ya i blong mekem yufala i pikinini blong God. Mo long paoa blong Speret ya, yumi stap singaot God, se “[Abba, “NW”] Papa blong mifala.” Speret ya blong God i kam joen long tingting blong yumi, blong talemaot we yumi pikinini blong God. Nao from we yumi pikinini blong hem, bambae yumi save kasem ol gudgudfala samting we God i putum olgeta oli tabu, se bambae oli blong ol man blong hem. Mo bambae yumi save joen long Kraes blong kasem haf long ol gudgudfala samting we God i putum olgeta oli tabu, se bambae oli blong Kraes. Mo from we yumi joen long Kraes blong harem nogud olsem we hem i harem nogud, be bambae yumi save joen long hem bakegen, blong kasem gudfala laef blong hem long heven.”​—Rom 8:​15-17.

Olsem oli man blong Kraes, oli bon bakegen long wan nyufala fasin, no wan nyufala stat, blong laef. Samting ya i givim wan strong tingting long olgeta se bambae oli joen wetem Jisas long wan gudfala laef long heven. (Luk 12:32; 22:​28-30; 1 Pita 1:23) Aposol Pita i tokbaot fasin ya we oli save bon bakegen olsem: “God ya, hem i sore tumas long yumi, nao from samting ya, hem i mekem yumi olsem we yumi bon bakegen, yumi gat nyufala laef. Samting ya, hem i mekem taem hem i mekem Jisas Kraes i laef bakegen long ded. . . . Mo yumi save, bambae yumi kasem ol gudfala samting ya we God i putum oli tabu, oli stap, oli blong ol man blong hem. Ol gudfala samting ya oli blong yufala, mo oli no save kam nogud, oli no save kam rotin, oli no save lus, from we God i stap lukaot gud long olgeta long heven.” (1 Pita 1:​3, 4) Ol man ya oli save kasem nyufala laef long heven from we God i mekem olgeta oli laef bakegen olsem we hem i mekem Jisas i laef bakegen long ded.​—1 Korin 15:​42-49.

?Olsem Wanem Long Wol?

Samting ya i no minim se olgeta man we oli obei oli save bon bakegen mo oli kamaot long wol ya blong go long heven. Rong tingting olsem i kolosap sem mak long tingting blong ol man we oli gat bigfala save olsem Filo, we hem i ting se “laef we i stap insaed long bodi hem i blong nating mo i blong smoltaem, plante taem i no glad, mo plante narafala samting we i stap spolem laef blong man.” Be i no gat wan samting nating we i rong taem Jeova God i mekem olgeta samting long wol.​—Jenesis 1:31; Dutronome 32:4.

Laef blong man i no blong smoltaem nomo mo i no blong harem nogud. Jisas Kraes wetem olgeta we oli bon bakegen blong rul olsem king mo pris wetem hem long heven, bambae oli tekemaot olgeta trabol soa we yumi kasem from we Setan i agensem God. (Efesas 1:​8-10) Bambae hem i yusum olgeta olsem ‘laen blong Ebraham,’ hem i promes finis long hem se from laen blong hem “olgeta nesen long wol bambae oli blesem olgeta nomo.” (Galesia 3:29; Jenesis 22:18) Samting ya bambae i min se ol man we oli obei bambae oli save kasem laef long paradaes long wol, hemia i defren olgeta long laef blong yumi tede we yumi stap harem nogud tumas long hem mo yumi stap laef blong smoltaem nomo.​—Ol Sam 37:​11, 29; Revelesen 21:​1-4.

?Bambae Hu i Haremgud Long Ol Blesing Ya?

Sam long olgeta we oli save haremgud long olgeta samting we God i stap mekem blong blesem olgeta man, hemia ol dedman we bambae oli laef bakegen we oli bin soemaot bilif long ransom sakrifaes blong Jisas. (Jon 5:​28, 29; Ol Wok 24:15) Bighaf blong olgeta ya i no gat man we i bin tijim olgeta long God mo Kraes, taswe oli no save rod blong soemaot bilif blong olgeta long Jisas. Ol narafala man we bambae oli laef bakegen, hemia ol man we oli gat ol strong bilif olsem Jon Baptaes, we hem i ded bifo we Jisas i ded blong openem rod blong kasem laef long heven. (Matyu 11:11) Antap long samting ya, ‘wan bigfala hif blong man we oli kamaot long olgeta kantri oli wasem klos blong olgeta finis blong mekem oli waet long blad blong Smol Sipsip,’ Jisas Kraes. Oli joen fulwan long wok blong talemaot gud nyus blong Kingdom we naoia ol “brata” blong Jisas we oli bon bakegen finis oli stap lidim. Bambae oli save pastru long bigfala faet blong God long Amageden. Mo bambae oli laef long wan wol we i klingud. (Revelesen 7:​9-14; 16:​14-16; Matyu 24:14; 25:​31-46) Taswe, long plan blong God, bambae plante milyan man oli save sef, be oli no bon bakegen blong rul wetem Kraes long heven.​—1 Jon 2:​1, 2.

?Olsem wanem, bambae yu yu laef long medel blong ol man ya we bambae oli laef long paradaes long wol? Yu save kasem sipos yu soemaot bilif blong yu long sakrifaes blong Jisas Kraes mo sipos yu joengud wetem trufala Kristin kongregesen. Kristin kongregesen ya i no agri nating long ol krangke samting we i kamaot from waes blong man, be hem i strong mo i “holem trutok i stap gud.” (1 Timote 3:15; skelem wetem Jon 4:24; 8:​31, 32.) Ale yu save lukluk i go fored long nambawan fyuja taem ol pikinini blong God we oli bon bakegen oli stap rul long heven mo ol pikinini blong God long wol ya bambae oli stretgud olgeta mo bambae oli laef long wan gudfala paradaes. Ale yu save holem ol jans blong yu blong laef long nyufala wol ya we bambae yu kasem ol blesing blong olwe.​—Rom 8:​19-21; 2 Pita 3:13.

[Tok Blong Pija Long Pej 6]

Adam i no save nating blong go laef long heven no blong go harem nogud blong olwe long helfaea