?Olsem Wanem Gospel i Save Mekem i Gud Long Yu?

PLANTE man oli laekem Baebol from ol gudfala tok we oli stap insaed long hem​—⁠sam man we oli no rili bilif se God i stap, olgeta tu oli laekem Baebol. Be samfala nomo oli ridim mo oli folem ol samting we hem i talem. Mo tu, kasem naoia gud nyus ya i bin stap kolosap tu taosen yia finis, plante man oli bilif se man i mas jenisim sam tok long Baebol blong hem i laenap wetem fasin blong laef blong yumi tede. ?Gospel i wan olfala buk blong bifo nomo no yumi no moa save yusum? No gat.

I gat ol man mo woman, ol yangfala mo olfala, we namba blong olgeta i kasem plante milyan, we oli save se Baebol i wan gudfala stampa samting blong givhan. I olsem tok we i stap insaed long ol fastok blong Today’s English Version we i talem se: “Baebol i no wan nambawan buk nomo we oli raetem blong man i laekem hem tumas mo i tinghae long hem nomo. Hem i wan Gud Nyus blong olgeta man long evri ples​—⁠wan mesej blong kasem save long hem mo blong mekem i wok long evri dei laef blong yumi.”

?Gospel i minim wanem long yu? ?Yu yu yusum hem blong lidim yu long evri dei laef blong yu? Tingbaot olsem wanem gud nyus i givhan long samfala man we oli lesin long hem long faswan handred yia mo olsem wanem i givhan long samfala long taem blong yumi tede.

Ol Man We Gospel i Givhan Long Olgeta

Long taem blong Jisas, gud nyus i pulum ol man olsem ol man blong pulum fis mo ol woman we oli wok long haos blong oli lanem trutok long saed blong plan blong God long olgeta man. Gud nyus i jenisim laef blong olgeta fulwan mo plante taem i mekem olgeta oli haremgud bigwan. Wan eksampel, Meri woman Magdala i bin kamgud bakegen afta we ol devel oli kamaot long hem. Sakias i wan bigfala man blong tekem mane blong takis, hem i lego fasin griri blong hem. (Luk 8:2; 19:​1-10) Olgeta we oli blaen mo olgeta we oli gat leprosi, oli kam long Jisas mo man ya nao we i stap talemaot gud nyus i givhan long olgeta. (Luk 17:​11-19; Jon 9:​1-7) I stret blong Jisas i talem se: “Ol blaenman, naoia oli save lukluk. Ol man we leg blong olgeta i nogud, naoia oli save wokbaot gud. Ol man we oli gat leprosi, naoia bodi blong olgeta i klin. Ol man we sora blong olgeta i fas, naoia sora blong olgeta i open. Ol dedman, naoia oli laef bakegen. Mo ol puaman, naoia i gat man i stap talemaot gud nyus long olgeta.”​—⁠Matyu 11:⁠5.

Samting we i moa impoten bitim we oli kamgud long saed blong bodi, hemia se gud nyus i jenisim laef blong olgeta. Olgeta we oli gat gudfala hat oli kasem plante save long gudfala hop long fyuja. Oli putum bilif blong olgeta i stap strong long Kingdom blong God​—⁠samting we i moa gud bitim ol narafala sosol gospel. (Matyu 4:23) Hop blong olgeta i no foldaon taem Jisas i ded. Blong tokbaot samting we i kamaot afta long ded bong Jisas, Ol Wok 5:42 i tokbaot ol disaepol blong hem se: “Mo evri dei, insaed long haos blong God, mo insaed long ol haos blong ol man, oli stap tijim ol man, mo oli stap talemaot gud nyus ya blong Jisas, se hem i Mesaea.” Long faswan handred yia, ol man long plante ples oli kasem help long saed blong speret from we oli lesin long ol tijing olsem.

Kingdom i wan nambawan nyus long taem ya. ?Olsem wanem, mesej blong Kingdom hem i wan gud nyus yet?

?Gud Nyus i Minim Wanem Tede?

Sipos yu stap lukaot pis, wol we i no gat trabol, ale i tru se nyus blong Kingdom i wan gudfala nyus. Mo tu, long wol we i gat plante handred man we oli no kakae gud mo ol man we oli stap sot long kakae, ol rabis sik we oli save kasem evri man wanwan, fasin blong brekem loa we i stap go antap, mo ol trabol blong politik, gud nyus nomo i wan trufala nyus we i save stap longtaem. Hem i wan trufala hop nomo we i save mekem olgeta samting oli kamgud bakegen.

From samting ya Jisas i talemaot samting we bambae i hapen long taem blong yumi, se: “Nao bambae ol man oli stap talemaot [gud nyus blong Kingdom, NW]. Bambae oli talemaot long olgeta ples long wol, blong oli wetnes blong hem long fes blong olgeta man. Nao biaen, bambae Lasdei i save kam.” (Matyu 24:14) Ol tok ya oli kasem bigfala mak blong hem long rod we ol Wetnes blong Jeova oli stap talemaot gud nyus long bitim 200 kantri. Wan buk blong Katolik, Nova Evangelização 2000, i tokbaot ol Wetnes blong Jeova from samting ya, i se: “?Weples yumi faenem ol Wetnes blong Jeova? Afsaed, long ol doa blong ol haos. Blong stap olsem wan Wetnes blong Jeova i min se man i mas man blong Jeova be antap long samting ya hem i mas talemaot hem. From samting ya, yumi faenem olgeta we oli stap wok, oli stap talemaot, givimaot, ol ekspiryens we oli kasem long laef blong olgeta.”

Be i no evriwan we i save kasem gudfala frut from gud nyus. Hem i save givhan nomo long man we i lesin mo i obei long hem. Blong soemaot samting ya, Jisas i givim wan pijatok long wan man we i goaot blong sakem sid. Ol defren kaen graon we sid i foldaon long hem oli soemaot ol defren kaen fasin we man i soemaot taem hem i harem gud nyus. Jisas i talem se: “Taem man i harem tok ya we God i stap kam king blong ol man blong hem, be i no save mining blong hem, Setan i kam tekemaot tok ya we oli planem long tingting blong man ya . . . Be sid ya we i foldaon long gudfala graon, hemia i olsem man we i harem tok ya, mo i save mining blong hem. Ol man olsem oli gat frut blong tok ya long laef blong olgeta, sam i gat olsem handred frut, sam i gat olsem sikiste, mo sam i gat olsem tate.”​—⁠Matyu 13:​18-23.

Olsem long faswan handred yia, plante man tede oli no traehad blong kasem save long gud nyus. Oli no kasem mining blong hem, mo oli lusum samting we i save givhan long olgeta. Samfala oli gat fasin tangkyu long gud nyus mo oli lanem olsem wanem blong mekem laef blong olgeta i laenap wetem wil blong God. Long rod ya oli kasem blesing. ?Yu yu stap long wanem grup blong man?

Paoa Blong Gospel Tede

Ol ekspiryens ya oli soemaot se save long gud nyus i givhan long olgeta we oli “no gat hop mo we God i no stap long laef blong olgeta.” (Efesas 2:12, NW; 4:​22-24) Roberto wan man blong Rio de Janero i nidim help. I stat long taem we hem i yang, laef blong hem i stap go nogud moa, hem i joen long fasin blong yusum drag, nogud fasin long saed blong seks mo long fasin blong stil. Biaen oli putum hem long kalabus. Taem Roberto i stap long kalabus, hem i stadi Baebol wetem wan Wetnes blong Jeova. Hem i gohed gud long saed blong speret mo oli mekem namba blong taem we hem i mas stap long kalabus i godaon bigwan mo afta hem i kamaot long kalabus.

Afta we hem i kamaot, Roberto i mitim wan yangfala gel we bifo hem i traem stilim hem long rod mo hem i holem masket blong mekem gel ya i fraet. Yangfala gel ya tu i stap stadi Baebol wetem ol Wetnes blong Jeova. ?Wanem i hapen? Haf ya i tokbaot leta we i tokbaot samting ya we i bin hapen: “Taem tufala i luksave tufala, fasin blong tufala i tajem hat blong mifala. Mo tufala i krae from strong filing blong save se naoia tufala i olsem brata mo sista. Naoia tufala we bifo wan i man blong stil mo narawan we i kasem trabol from hem, oli stap presem Jeova.”

Wan narafala woman, Isabel i nidim help, ol man oli save hem from hem i save kros kwik. Hem i joen bigwan long wok blong ol rabis speret mo long wok blong nakaemas mo ol devel oli mekem hem i harem nogud. Taem hem i stadi Baebol wetem ol Wetnes blong Jeova, hem i luk se gud nyus i rili givhan long hem. Samtaem biaen, hem i sakemaot ol devel we i stap bos long hem mo i jenisim stampa fasin blong hem​—⁠afta i lanem blong bos fasin blong hem. Naoia hem i wan Kristin we i gat strong bilif, oli savegud hem olsem wan woman we i gat kaen fasin we i stap joen oltaem wetem narafala.

Yes, gud nyus i no blong eksplenem samting nomo. Hem i gat paoa blong jenisim laef. (1 Korin 6:​9-11) Hem i mekem moa long samting ya. Hem i talemaot blesing we bambae i kam long fyuja.

Blesing We i Stap Yet Long Fored Blong Yumi

Stret olsem Tok blong God i talem, yumi stap lukluk i go long wan nambawan fyuja. Bambae prea we Jisas i bin talem se Kingdom blong God i kam mo letem wil blong Hem i kamaot long wol olsem we i kamaot finis long heven, bambae i kamtru. (Matyu 6:​10, NW) Bambae i no longtaem, kruked fasin mo raf fasin oli finis, mo gavman blong God long heven, Kingdom blong hem, bambae i rul antap long olgeta we oli gat gudfala hat mo we oli wantem lesin mo blong obei long gud nyus.​—⁠Daniel 2:⁠44.

Bigfala jenis bambae i kamaot taem olgeta we oli gat strong bilif oli wok blong mekem wol i kam wan paradaes mo olgeta we tingting blong olgeta i stap daon oli save laef foreva long hem. (Ol Sam 37:​11, 29) !I tru tumas, hemia wan gud nyus se fasin blong brekem loa, sik, fasin blong hanggri, fasin blong putum posen long win mo long wora, mo olgeta faet bambae oli finis blong olwe! ?Yu save traem tingbaot naoia se yu wetem famle blong yu i stap laef long nyufala wol long pis mo gudfala laef we i no moa gat sik no ded?​—⁠Revelesen 21:⁠4.

Tru, samfala oli tingbaot gud nyus ya i olsem drim nomo, i no save kamtru. Be oli rong olgeta. Gud nyus ya i stanap long wan faondesen we i strong, mo hem i bin jenisim finis laef blong plante milyan man. Taswe, yu no mas fraet sipos ol narafala oli no bilif.

Tingbaot wan waes man we i pem graon blong mekem bisnis long hem, hem i gat hop blong winim plante samting long wok blong hem. ?Yu save blemem hem from we hem i bin yusum mane blong hem long rod ya? No gat. Plante man oli save talem se man ya i stap wok wetem waes. ?Olsem nao yu wantem stap long saed blong Kingdom mo obei long gud nyus? Taem yu akseptem gud nyus i minim se yu stap long rod blong sef, i no gat wan narafala rod bakegen we i save mekem yu haremgud moa.​—⁠Rom 1:⁠16.

?Olsem wanem yu save obei long gud nyus? Faswan samting, yu mas wantem blong God i tijim yu. Mo afta yu mas mekem samting we yu lanem i wok. Folem stampa tok ya, olsem i stap long olfala buk blong wan profet blong Hibru, se: “?Mo Jeova i askem wanem long yu from? Yu mas wokem stret fasin, yu mas laekem kaen fasin, mo yu mas wokbaot wetem God we tingting blong yu i stap daon.” (Maeka 6:⁠8) I nidim taem mo paoa blong lanem blong wokbaot wetem God. Ol Wetnes blong Jeova, oli glad blong givhan long yu, olsem oli bin givhan long Roberto mo Isabel​—⁠mo olsem oli bin givhan finis long plante milyan man long plante yia.

Taem yumi stap wet long promes blong God we bambae i kamtru, yu mekem ol samting we yu lanem long saed blong Kingdom i wok long laef blong yu, blong gat pis long tingting blong yu mo gat ol gudfala fasin we i save mekem yu kam moa kolosap long God. Samting we yu kasem bambae i stap sef​—⁠i no gat samting long saed blong ekonomi no fasin blong politik we bambae i save spolem hem. Mo antap moa, bambae hem i lidim yu blong kambak long wan nambawan rod. ?Bambae yu yu kambak long wanem? Aposol Jon i raetem se: “Mo wol ya wetem ol samting we ol man blong hem oli wantem, oli stap lus. Be man we i stap mekem ol samting we God i wantem, hem i stap we bambae i no save lus samtaem.”​—⁠1 Jon 2:⁠17.

[Tok Blong Pija Long Pej 7]

Ol sid blong gud nyus oli foldaon long ol defren kaen graon

[Credit Line]

Garo Nalbandian