Bigfala Man We i Wokem Yumi Mo Ol Wok Blong Hem

!BIGFALA WOK YA! Ol bigfala vale blong Arisona no long Hauai, ol bigfala wotafol blong Ikuaku no Niagara, bigfala klif blong Nowe no Nyu Selan​—!ol samting ya oli pulum ol man blong oli tingbaot olgeta! ?Be ol samting ya oli kamaot olsemia nomo? !No gat, oli no kamaot olsemia nomo! Hemia ol narakaen wok blong wan Bigfala Man blong Wokem ol samting, hem i wan gudfala Papa long heven we waes King Solomon i raet blong tokbaot hem, se: “Evri samting i naes taem hem i kamaot long stret taem blong hem. Ol taem we oli longfala tumas, olgeta tu hem i putum olgeta i stap long hat blong olgeta, blong ol man bambae oli neva save faenemaot olgeta wok we trufala God i mekem, i stat long stat blong hem, i go kasem en blong hem.” (Eklesiastis 3:11) Tru ya, ol man oli no naf blong faenemaot olgeta gudfala wok we Man ya we i Wokem yumi, i fulumap skae mo wol ya long hem.

!Yumi gat wan Bigfala Man blong Wokem ol samting! Mo yumi glad we God ya we i gat olgeta paoa “i yusum Pikinini blong hem blong tok long yumi. Pikinini ya, hem i wok blong God fastaem, taem God i mekem olgeta samting we i stap long wol. Mo God i jusumaot hem finis, blong bambae, taem wol ya i finis, be olgeta samting ya blong wol oli blong hem nomo.” (Hibrus 1:2) Pikinini ya, Jisas Kraes, i gat fasin tangkyu long ol gudfala samting we Papa blong hem i wokem. Oltaem hem i tokbaot bakegen ol wok ya blong soemaot plan blong Papa blong hem mo blong leftemap tingting blong ol man we oli stap lesin long hem. (Matyu 6:​28-30; Jon 4:​35, 36) Plante man oli “bilif long God” nao oli haremsave se ol bigfala samting we oli stap raonabaot long yumi “God i mekem olgeta long tok blong hem.” (Hibrus 11:3) Evri dei laef blong yumi i mas soemaot bilif ya.​—Jemes 2:​14, 26.

Tru ya ol wok blong God blong yumi oli bigwan tumas. Oli soemaot gud waes, paoa, stret fasin, mo lav blong hem. Eksampel, hem i mekem wol i lei lelebet mo i stap goraon long san blong mekem se narafala samting we bambae hem i wokem long fyuja, olsem man, i save glad long ol defdefren taem blong yia. God i talem se: “Long wol ya, i gat taem blong planem garen, mo i gat taem blong tekemaot kakae long hem. I gat taem blong kolkol, mo i gat taem blong hot. I gat taem blong lif i foldaon, mo i gat taem blong lif i gru bakegen. I gat taem blong dei, mo i gat taem blong naet. Mo ol samting ya, bambae oli no save lus, gogo kasem en blong wol.” (Jenesis 8:22) Bakegen, God i wokem plante gudgudfala samting oli stap long wol blong yumi. Olsem, hem i mekem plante wora, biaen wora ya i kam wan impoten samting long laef mo i sapotem olgeta laef samting we oli stap wokbaot long graon.

Long ol sikis ‘dei blong wokem ol samting,’ ol dei ya wanwan oli tekem sam taosen yia, nao “Speret blong God” i gohed blong stap mekem wol i rere blong man i stap long hem. Laet we i mekem yumi save lukluk ol samting, win we yumi save pulum, graon we yumi save stap laef long hem, mo ol tri we oli stap, dei mo naet, ol fis, ol pijin, ol anamol​—Bigfala Man blong Wokem yumi, i wokem ol samting ya long oda blong oli givhan mo blong mekem ol man oli haremgud. (Jenesis 1:​2-25) Tru ya, yumi save joen wetem man blong raetem Ol Sam long tok blong hem, se: “[Jeova, NW], yu yu mekem plante samting tumas, mo olgeta evriwan oli stap soemaot we fasin blong yu blong wokem olgeta i waes tumas. Wol ya i fulap long ol samting ya we yu yu mekem.”​—Ol Sam 104:24.

Nambawan Wok Blong God

Taem namba sikis “dei” i stap kam kolosap blong i finis, God i wokem man mo biaen hem i wokem woman blong givhan long man. !Hemia wan nambawan wok we God i wokem long wol, hem i nambawan moa bitim ol narafala faswan wok we hem i wokem finis long wol! Sam 115:16 i talem long yumi se: “Heven i ples blong Hae God nomo, be hem i givim wol ya long man.” From samting ya, Jeova i wokem yumi ol man blong yumi save glad long ol wok blong hem mo yusum ol samting we hem i bin wokem finis long wol. Yumi mas glad from ol ae we yumi gat​—hem i gudwan moa bitim wan spesel kamera​—!hem i save tekem ol gudfala kala raonabaot long yumi! Yumi gat sora​—we i gudwan moa bitim ol samting we man i wokem blong mekem saon​—i blong givhan long yumi blong yumi glad long storeyan, lesin long myusek, mo ol naesfala singsing blong ol pijin. Yumi gat wan samting blong givhan blong mekem toktok i kamaot, olsem tang blong yumi. Tang i save testem ol samting mo i joen wetem samting we i givhan long yumi blong smelem samting, mo tu blong haremgud long plante defren kaen tes blong kakae. !Mo yumi laekem filing we man we i tajem yumi blong soem lav! Tru ya yumi save talem tangkyu long Man we i Wokem yumi, olsem man blong raetem Ol Sam i talem i se: “Yu yu hae tumas, i stret blong man i bodaon long yu i ona long yu, mo mi mi presem yu from. Olgeta samting we yu yu mekem oli narafala mo oli nambawan tu. Mi mi save we mi savegud samting ya.”​—Ol Sam 139:14.

Kaengud Fasin Blong Man We i Wokem Yumi

Man blong raetem Sam i talem se: “Yumi talem tangkyu long Hae God, from we hem i gud tumas. . . . Hem nomo i stap mekem ol bigbigfala merikel. Oltaem bambae hem i laekem yumi, gogo i no save finis.” (Ol Sam 136:​1-4) Naoia kaengud fasin ya i pusum hem blong mekem ol gudfala samting we oli bigwan moa bitim ol wok blong hem we yumi jes tokbaot. Yes, nating se hem i stap spel, hem i no moa wokem ol samting we yumi save luk long wol, hem i stap gohed i wokem ol samting long saed blong speret. Hem i mekem olsem blong ansa long wan strong kwestin we i agensem hem. ?Olsem wanem hem i mekem?

Faswan man mo woman oli stap long wan gudfala paradaes, Iden. Be, Setan, wan enjel we i kam enemi, i leftemap hem wan olsem wan god mo i lidim tufala faswan man mo woman blong tufala i agensem Jeova. From samting ya, God i panisim tufala blong tufala i ded, mo frut blong samting ya se ol pikinini blong tufala, hemia olgeta man long wol, oli sinman finis taem oli bon mo oli save ded. (Sam 51:5) Store blong Baebol long saed blong Job i soemaot se Setan i agensem God, hem i stap talem se ol man oli no save holemstrong long God sipos oli kasem traem. Be Job i pruvum se Setan i wan man blong gyaman stret, olsem plante narafala man blong holemstrong long God long taem blong Baebol mo kam kasem long taem blong yumi oli stap mekem. (Job 1:​7-12; 2:​2-5, 9, 10; 27:5) Jisas, we i stretgud olgeta, hem i soemaot fasin blong holemstrong longtaem.​—1 Pita 2:​21-23.

Taswe, Jisas i save talem se, “Setan ya we i masta blong wol ya, hem i stap kam. Hem i no gat paoa long mi.” (Jon 14:30) Be, kam kasem tede “olgeta man blong wol oli stap long paoa blong Setan.” (1 Jon 5:19) Taem Setan i rao from hae rul blong Jeova, God i letem 6,000 yia i pas blong Setan i soem sipos fasin blong hem wan blong rulum ol man i save win. !Be sore tumas, hem i no win, olsem ol nogud samting we oli stap kamaot long wol ya oli pruvum! Be God blong yumi Jeova, bambae i finisim ol nogud man long wol ya, mo bambae hem i mekem stret rul blong hem i rulum wol ya. !Bambae hem i gudfala taem blong givhan long ol man we oli wantem tumas pis, mo rul we i gat stret fasin!​—Ol Sam 37:​9-11; 83:​17, 18.

!Be, i no hemia nomo! Bambae kaengud fasin blong God i go moa olsem ol tok blong Jisas long Jon 3:​16, hem i se: “God i laekem tumas ol man long wol, nao hem i givim mi, mi stret Pikinini blong hem, mi wan nomo we hem i gat, blong olgeta man we oli bilif long mi bambae oli no save lus, oli gat laef we i no save finis.” Fasin ya blong givim bakegen laef we i no save finis long ol man long wol ya i min se God bambae i wokem ol nyufala samting. ?Wanem samting ya? ?Olsem wanem oli save givhan long ol man we oli stap harem nogud? Nekis haf bambae i talemaot.