Mekem Nyufala Fasin Insaed Long Mared
“Tingting blong yufala i mas kam nyuwan olgeta. Yufala i mas kasem nyufala laef we God i wokem blong yufala, we i stret wetem laef blong hem.”—EFESAS 4:23, 24.
1. ?From wanem yumi no mas ting se mared i wan samting nating nomo?
MARED i wan long ol impoten disisin we wan man i mas mekem long laef blong hem, from samting ya wan man i no mas mekem mared olsem wan samting nating nomo. ?From wanem i olsem? From yu mas holem promes we yu mekem wetem narafala man no woman gogo laef blong yu i finis. I min se yu mas mekem olgeta haf blong laef blong yu i joen wetem laef blong man no woman ya. Yu mas bigman long saed blong fasin luksave blong mekem se bambae yu save holem strong promes we yu mekem. Mo tu i nidim wan strong paoa blong mekem ‘tingting i kam nyuwan olgeta mo blong kasem nyufala laef.’—Efesas 4:23, 24; skelem wetem Jenesis 24:10-58; Matyu 19:5, 6.
2, 3. (a) ?Yumi nidim wanem blong jusum wan fren blong mared wetem long fasin we i waes? (b) ?Wanem sam fasin we mared i joenem wan man mo wan woman long hem?
2 I nogud yu hareap blong mared from we ol strong filing long saed blong bodi oli pulum yu blong mekem olsem. I nidim taem blong gat laef mo fasin blong wan bigfala man. Mo tu sipos taem i pas, yu save kasem ol gudfala ekspiryens mo save we i save stap olsem wan faondesen blong fasin luksave. Ale, bambae yu naf blong jusumgud wan stret fren blong laef wetem hem. Wan proveb blong Spen i talem stret se: “I moa gud blong wokbaot yu wan bitim wan rabis mared.”—Proveb 21:9; Eklesiastis 5:2.
3 Blong gat wan gudfala mared, fastaem i impoten blong jusum wan fren we i stret long yu. From samting ya, wan Kristin i mas yusum mo folem ol advaes blong Baebol long saed ya, ol samting we hem i luk, mo ol filing blong hem long saed blong bodi mo lav oli no mas pulum hem nomo. I gat plante samting moa long mared bitim we tufala bodi i joen wanples. Hem i blong joenem tufala laef i kam wanples, tu famle mo blong joenem ol save we tufala wanwan i lanem finis, mo ating tu kaen kastom mo lanwis. Mared i minim se tufala i mas yusum tang blong tufala blong toktok tugeta; ol toktok blong yumi oli save spolem wan man no oli save leftemap tingting blong hem. Long olgeta samting ya, yumi luksave waes advaes blong Pol long saed ya se “be wan samting nomo, man [we yumi mared wetem hem] i mas wan man blong Masta blong yumi,” hemia, wan man we i gat bilif.—1 Korin 7:39; Jenesis 24:1-4; Proveb 12:18; 16:24.
Fesem Ol Trabol Blong Mared
4. ?From wanem defren tingting mo trabol samtaem i save kamaot long wan mared?
4 Nating se mared i gat wan gudfala faondesen, be i gat ol taem we tingting i no joengud, had laef, mo tingting tumas. Ol samting ya oli kamaot long enikaen man, nating se hem i mared no no gat. Ol trabol long saed blong mane mo long saed blong bodi oli save mekem trabol ya long enikaen fasin joen blong man. Sipos wan long tufala i harem nogud no i kros, samting ya i save mekem trabol i kam insaed long ol nambawan mared. Wan narafala samting se i no gat wan man we i save mekem olgeta toktok blong hem oli stret olgeta, olsem Jemes i talem se: “Plante taem yumi evriwan i mekem i no stret. Man we i no mekem mastik samtaem long tok blong hem, hem i wan man we i stret gud olgeta. Man olsem, bambae i save blokem olgeta rabis samting we i save mekem long laef blong hem. . . . Tang blong yumi i wan smol samting nomo, be hem i save tok flas long plante bigbigfala samting. Yufala i traem tingbaot. Wan smol faea nomo, be i save bonem ol haos long wan bigfala velej we i finisim olgeta.”—Jemes 3:2, 5.
5, 6. (a) ?I nidim wanem taem i gat wan rong toktok no tingting i kamaot long tufala? (b) ?Wanem wok yu save mekem blong fiksimap wan trabol?
5 ?Taem ol trabol oli kamaot long mared, olsem wanem yumi save winim samting ya? ?Olsem wanem yumi save mekem se wan rong toktok no tingting i no statem wan rao nao rao ya i kam antap gogo i spolem fasin fren long mared? Long taem ya nao yumi save mekem paoa we i stap wok long tingting blong yumi i wok. Paoa ya we i pusum yumi i save kam wan paoa we i gud no wan paoa we i nogud, i stap bildimap fasin fren mo tingting long saed blong speret no yumi save gat nogud tingting we i save spolem fasin fren hemia taem ol tingting long saed blong bodi oli bos long yumi. Sipos i blong bildimap, man ya bambae i wok blong fiksimap trabol ya, blong mekem mared blong hem i folem stret rod. Rao long ol toktok mo ol tingting we oli no agri oli no mas finisim wan mared. Tufala i save stretem, mo fasin blong tufala blong kasem save long tingting mo filing blong tufala i save kam antap bakegen taem tufala i folem ol advaes blong Baebol.—Rom 14:19; Efesas 4:23, 26.
6 Ol tok blong Pol oli stretgud long ol samting ya se: “Oraet, yufala i tabu, yufala i man blong God. Hem i laekem yufala tumas, mo hem i jusumaot yufala finis, blong yufala i man blong hem. From samting ya, yufala i mas putum nyufala laef ya blong yufala olsem prapa klos blong yufala. Yufala i mas gat sore long ol man. Yufala i mas mekem i gud long ol man. Tingting blong yufala i mas stap daon. Yufala i mas kwaet man. Mo tingting blong yufala i mas longfala. Yufala i mas stap givgivhan long yufala, mo taem wan long yufala i gat sam poen agens long narawan long yufala, tufala ya i mas fofogivim tufala. Yufala i mas fofogivim yufala, long sem fasin ya we Masta blong yumi i fogivim yufala. Mo wetem ol fasin ya, yufala i mas laekem tumas ol man. From we fasin ya blong laekem tumas ol man, hem i save joenem olgeta samting, blong oli kam wan nomo stret.”—Kolosi 3:12-14.
7. ?Wanem trabol we samfala oli save kasem long mared blong olgeta?
7 Vas ya i isi blong ridim, be wetem trabol blong laef tede, hem i no isi oltaem blong folem. ?Wanem i save kam wan stampa trabol? Samtaem, wan Kristin i save folem tu defren kaen rul be hem i no tingbaot. Long Haos Kingdom, hem i stap long medel blong ol brata, ale hem i gat fasin kaen mo i tingbaot narafala. Be long haos blong hem, long program blong hem wetem waef blong hem evri dei, maet hem i fogetem se hem i wan brata long saed blong speret. Long haos i gat tufala nomo, “hem” mo “woman blong hem.” Mo taem i gat trabol i kamaot maet man ya (no woman ya) i save talem ol samting we oli no stret, we hem i neva save talem insaed long wan Haos Kingdom. ?Wanem i hapen blong mekem samting ya i kamaot? Blong smoltaem ya, ol Kristin fasin blong hem oli lus. Wan man blong God i fogetem finis se hem (man no woman) i stap yet olsem wan Kristin brata no sista long haos. Paoa we i stap wok long tingting i no moa wan gudfala paoa be hem i kam wan nogud paoa.—Jemes 1:22-25.
8. ?Wanem i save kamaot taem paoa we i stap wok long tingting i no moa wok strong?
8 ?Wanem frut i kamaot from? Hasban ya i save stop blong ‘stap wetem waef blong hem long fasin blong man we i gat save, mo blong givim ona long hem from we hem i woman, hem i no strong olsem man.’ (NW) Maet waef i no moa gat respek long hasban blong hem; ‘pis mo kwaet fasin’ blong hem oli lus. Paoa long saed blong tingting i no moa strong long saed blong speret be i kam strong long saed blong bodi. “Oli stap tingbaot ol samting ya long fasin blong man nomo.” Ale, ?yu save mekem wanem blong mekem paoa long saed blong speret i kam strong bakegen long tingting blong yu? Yumi mas leftemap ol gudfala fasin blong yumi long saed blong speret.—1 Pita 3:1-4, 7; Kolosi 2:18.
Mekem Paoa i Kam Moa
9. ?Wanem disisin yumi mas mekem long evridei laef?
9 Paoa we i pusum yumi hemia tingting we i kam antap taem yumi mas mekem sam disisin no blong jusum sam samting. Laef i fulap long ol samting we yumi mas jusum—gudfala samting no rabis samting, yu tingbaot narafala no yu tingbaot yu wan nomo, yu gat gudfala fasin no yu gat rabis fasin. ?Wanem i save givhan long yumi blong mekem ol stret disisin? Paoa ya we i stap wok long tingting, sipos hem i stanap long tingting ya blong mekem wok blong Jeova. Man blong raetem Sam i talem se: “Hae God, plis yu tijim mi long mining blong Loa blong yu, nao bambae mi obei long hem oltaem.”—Ol Sam 119:33; Esikel 18:31; Rom 12:2.
10. ?Olsem wanem yumi save mekem paoa we i stap wok long tingting blong yumi i kam strong moa long gudfala rod?
10 Wan strongfala fasin fren wetem Jeova i save givhan long yumi blong mekem hem i haremgud mo blong yumi save tanem baksaed long rabis fasin, fasin blong no stap tru long waef no hasban blong yumi. God i leftemap tingting blong ol man Isrel blong “mekem wanem samting we i gud mo i stret long ae blong Jeova, God [blong olgeta].” Be tu God i givim advaes se: “Hae God i laekem tumas ol man we oli stap agens long ol rabis fasin.” Namba seven long ol Ten Komanmen i talem se: “Yu no mas stilim woman blong narafala man,” (NW) taswe ol man Isrel oli mas agensem fasin blong slip wetem woman blong narafala man. Loa ya i soemaot strong tingting blong God long saed blong stap tru long mared.—Dutronome 12:28; Ol Sam 97:10; Eksodas 20:14; Levitikas 20:10.
11. ?Olsem wanem yumi save gohed moa blong mekem paoa blong tingting blong yumi i kam strong moa?
11 ?Olsem wanem yumi save mekem paoa we i stap wok long tingting blong yumi i save kam strong moa? Hemia taem yumi gat fasin tangkyu long ol wok mo ol sas samting long saed blong speret. Hemia i min se yumi mas fulumap nid blong yumi blong stadi oltaem long Tok blong God, mo yumi mas haremgud blong stap wanples blong tokbaot ol tingting blong Jeova mo advaes we hem i givim. Ol filing long hat blong yumi oli mas sem mak olsem man ya blong raetem Ol Sam se: “Mi mi stap traehad long olgeta [hat, NW] blong mi, blong mekem wok blong yu. Plis yu halpem mi, blong mi no lego ol tok we yu yu putum. Mi mi stap holem ol tok blong yu long [hat, NW] blong mi, blong bambae mi no save mekem sin agens long yu. Hae God, plis yu tijim mi long mining blong Loa blong yu, nao bambae mi obei long hem oltaem. Yu talemaot mining blong Loa blong yu long mi, blong bambae mi obei long hem, bambae mi holemgud hem long olgeta [hat, NW] blong mi.”—Ol Sam 119:10, 11, 33, 34.
12. ?Wanem tufala fasin we yumi mas folem blong mekem yumi soemaot tingting blong Kraes?
12 Fasin ya blong gat tangkyu long ol stret rul blong Jeova i no stanap nomo long fasin blong stadi long Baebol be tu blong joen oltaem long ol Kristin miting mo blong joen wanples long Kristin minista wok. Tu bigfala wok ya i save mekem paoa we i lidim tingting blong yumi i strong oltaem mekem se oltaem yumi save mekem ol disisin we oli stanap long fasin blong no tingbaot yumi wan nomo mo yumi soemaot se yumi gat sem tingting olsem Kraes.—Rom 15:5; 1 Korin 2:16.
13. (a) ?From wanem prea i impoten samting blong mekem paoa we i stap wok long tingting blong yumi i kam strong moa? (b) ?Wanem eksampel Jisas i soemaot long saed ya?
13 Narafala samting hemia we Pol i tokbaot long leta blong hem long ol man Efesas se: “Wetem ol samting ya, yufala i mas prea, yufala i mas askem long God blong i givhan long yufala. Oltaem nomo yufala i mas stap prea long paoa blong Tabu Speret.” (Efesas 6:18) Ol hasban mo ol waef oli mas prea wanples. Plante taem ol prea ya oli openem hat blong tufala mo oli save mekem se tufala i save gat gudfala toktok we i save fiksimap ol trabol. Long ol taem we yumi kasem traem no trabol, yumi mas lukluk i go long God long prea, askem help blong hem, blong kasem moa paoa long saed blong speret blong mekem wanem we i stret long tingting blong Kraes. Jisas tu we hem i stretgud olgeta, plante taem, hem i bin lukluk i go long Papa blong hem long prea blong askem paoa. Ol prea blong hem oli kamaot long hat mo oli gat paoa. I sem mak tede, long ol taem we yumi stap kasem plante traem, yumi save faenem paoa blong mekem stret disisin taem yumi singaot long Jeova blong givhan long yumi blong faet agensem ol samting we bodi i wantem mo blong no spolem promes we yumi bin mekem taem yumi mared.—Ol Sam 119:101, 102.
Ol Defren Eksampel Long Saed Blong Fasin
14, 15. (a) ?Josef i mekem wanem taem hem i kasem traem? (b) ?Wanem i givhan long Josef blong winim traem?
14 ?Yumi save mekem wanem taem yumi kasem traem? Yumi save luk samting ya long tufala defren rod we Josef mo Deved tufala i folem. Taem waef blong Potifa i traem blong pulum nambawan man ya Josef blong slip wetem hem, we long taem ya Josef i no mared, hem i givim ansa long woman ya se: “I no gat wan man long haos ya we i hae moa long mi. [Hasban blong yu] i putum olgeta samting blong hem long han blong mi. Yu nomo yu stap long han blong hem, from we yu yu waef blong hem. ?Weswe mi mi save mekem rabis samting ya we i sin agens long God?”—Jenesis 39:6-9, NW.
15 ?Wanem i givhan long Josef blong tekem stret rod long taem ya we i isi nomo blong hem i save foldaon? Hem i gat wan strong paoa we i stap wok long tingting blong hem. Hem i stap tingting strong long fasin fren blong hem wetem Jeova. Hem i save se fasin blong slip wanples wetem woman ya i save kam olsem wan bigfala sin agens long hasban blong woman ya, be, impoten moa hemia se i agensem God.—Jenesis 39:12.
16. ?Deved i mekem wanem taem hem i kasem traem?
16 Long defren fasin, ?wanem i hapen long Deved? Hem i wan man we i mared finis, wetem sam waef stret olsem Loa i letem. Long wan aftenun hem i stap long haos blong hem mo i stap lukluk wan woman we i stap swim. Hemia naesfala woman ya Bat-seba, waef blong Uraea. I klia se Deved i mas jusum wanem rod nao bambae hem i folem—bambae hem i gohed blong lukluk taem nogud tingting long saed blong seks i kam antap long hat blong hem no bambae hem i kamaot mo ronwe long traem ya. ?Hem i jusum wanem rod? Hem i tekem woman ya i kam long haos blong hem, mo i slip wetem hem. Samting ya i go moa nogud se, hem i mekem rod blong hasban blong woman ya i ded.—2 Samuel 11:2-4, 12-27.
17. ?Yumi save luksave se Deved i gat wanem trabol long saed blong speret?
17 ?Wanem trabol blong Deved? Biaen long ol tok blong hem we i soemaot fasin sore blong hem long Ol Sam japta 51, yumi save luk sam samting we i soemaot stampa blong trabol ya. Hem i talem se: “God, plis yu mekem [hat, NW] blong mi i klin olgeta. Plis yu mekem tingting blong mi i kam nyuwan bakegen, mo i stap strong long yu oltaem.” I klia se long taem ya we hem i kasem traem, hem i no gat wan tingting we i klin mo i strong long saed blong speret. Ating hem i sakemaot finis fasin blong hem blong ridim Loa blong Jeova, mo samting we i kamaot from se, hem i slak long saed blong speret. No hem i letem haenem no paoa blong hem olsem king blong spolem tingting blong hem, mekem se hem i foldaon long ol fasin we bodi blong hem nomo i wantem. Tru ya, paoa we i stap wok long tingting blong hem long taem ya, hem i stap tingbaot hem wan nomo mo hem i no holem stret tingting. Taswe, biaen hem i luksave ol nid blong hem blong gat ‘wan tingting we i klin olgeta,’ wan we i stap strong long God oltaem.—Ol Sam 51:10; Dutronome 17:18-20.
18. ?Wanem advaes Jisas i givim long saed blong fasin blong slip wetem woman blong narafala man?
18 Sam Kristin mared oli bin brok from we tufala no wan long tufala i kam slak long saed blong speret olsem King Deved. Eksampel blong hem i wan woning long yumi agens long fasin blong lukluk tumas long narafala woman no man, wetem strong filing long saed blong seks, from we biaen fasin blong slip wetem woman no man blong narafala i save kamaot. Jisas i soemaot se hem i kasem save long ol filing blong ol man long saed ya, hem i talem se: “Yufala i harem finis we ol tija oli bin talem bifo se ‘Bambae yu no stilim woman blong narafala man.’ Be mi mi talem long yufala, se ‘Man we i stap luk nogud long wan woman olsem we i wantem go long hem, hem i stilim woman ya finis, long tingting blong hem.’ ” Taem samting ya i hapen, paoa we i stap wok long tingting i stap tingbaot hem wan nomo mo hem i long saed blong bodi nomo, i no long saed blong speret. ?Be, ol Kristin oli mas mekem wanem blong stap longwe long fasin blong slip wetem woman blong narafala man mo blong mekem mared blong olgeta i stap glad mo blong haremgud?—Matyu 5:27, 28.
Mekem Mared i Kam Strong Moa
19. ?Olsem wanem wan mared i save kam strong moa?
19 King Solomon i raetem se: “Sipos i gat man blong spolem man i save winim man we i stap hem wan nomo, be taem i gat tu man tufala tugeta i save stanap agensem hem. Mo trifala rop blong mekem wan rop i no save brok kwiktaem long tu pis.” Yes, tufala long wan gudfala mared i save stanap wanples blong winim trabol bitim wan. Be sipos oli joen wetem God we i olsem trifala rop blong mekem wan rop, bambae mared ya hem i strong gud. ?Olsem wanem God i save stap insaed long mared blong tufala? Hemia taem hasban mo waef tufala i folem ol rul mo advaes blong hem long saed blong mared.—Eklesiastis 4:12.
20. ?Wanem advaes blong Baebol i save givhan long wan hasban?
20 I tru, sipos wan hasban i folem advaes long ol vas we oli kam biaen, bambae mared blong hem i stanap long wan gudfala faondesen blong i save rongud:
“Mo long sem fasin, yufala man we i mared, yufala i mas tingtinggud long ol woman blong yufala, long ol laef blong yutufala long mared. Yufala i mas ona long ol woman blong yufala, from we oli no strong olsem yufala, mo from we promes blong God i stap long yutufala wantaem, se long gladhat blong hem, bambae hem i givim laef long yutufala. Nao long fasin ya bambae i no gat samting we i save blokem ol prea blong yutufala.”—1 Pita 3:7.
“Mo yufala man we i mared, yufala i mas laekem woman blong yufala tumas, olsem we Kraes i laekem jyos ya tumas. Taswe hem i letem laef blong hem, blong sevem jyos ya. Long sem fasin, man i mas laekem woman blong hem, i mas lukaotgud long hem, olsem we i stap lukaotgud long bodi blong hem nomo. Taem man i stap lukaotgud long woman blong hem, i olsem we hem i stap lukaotgud long bodi blong hem nomo.”—Efesas 5:25, 28.
“Man blong hem i girap, mo hem i presem hem. I gat plante gel we oli gat gudhan long wok blong olgeta, be yu, yu winim olgeta evriwan.”—Proveb 31:28, 29.
“?Wan man i save wokbaot antap long ol wud we i gat faea long hem be bambae faea i no bonem leg blong hem? I sem mak long wan man we i slip wetem waef blong fren blong hem, man we i tajem hem i mas kasem panis. Man we i stap slip wetem woman blong narafala man . . . i stap spolem prapa laef blong hem.”—Proveb 6:28, 29, 32.
21. ?Wanem advaes long Baebol i save givhan long wan waef?
21 Sipos wan waef i obei long ol rul blong Baebol we i kam biaen, bambae samting ya i mekem mared blong hem i stap longtaem:
“Long sem fasin, yufala woman we i mared, yufala i mas obei long ol man blong yufala. Nao sipos ol man blong yufala oli no bilif long tok blong God, be bambae fasin nomo blong yufala i save pulum olgeta blong oli bilif. Taem ol man ya blong yufala oli luk we fasin blong yufala i klin gud, mo i blong ona nomo, hemia i naf blong pulum olgeta. Bambae i no moa gat samting se yufala i mas go tok long olgeta.”—1 Pita 3:1-4.
“Man i mas stap mekem ol samting long woman blong hem [long saed blong seks] we i stret long rod blong mared. Mo woman i mas stap mekem olsem long man blong hem tu. . . . Yufala i mas no blokem yufala. Sipos man mo woman blong hem, tufala i agri fastaem, bambae tufala i save livim fasin blong mared blong smoltaem, blong tufala i gat gudfala taem blong prea.”—1 Korin 7:3-5.
22. (a) ?Wanem sam narafala samting we i save gat paoa long mared blong mekem i kamgud moa? (b) ?Wanem tingting blong Jeova long saed blong divos?
22 Mo tu Baebol i soemaot se lav, fasin kaen, fasin sore, longfala tingting, fasin blong kasem save long tingting mo filing blong narawan, fasin blong leftemap tingting blong narawan mo fasin blong talem gudfala toktok from gudfala wok blong narawan hemia sam long ol gudfala fasin we tufala i nidim blong mekem wan gudfala mared. Wan mared we i no gat ol fasin ya i olsem wan tri we i no kasem laet blong san mo wora—hem i no gat plante flaoa. Ale i gud yumi mekem paoa we i stap wok long tingting blong yumi i pusum yumi blong leftemap tingting mo blong givim spel long hasban no waef blong yumi. Tingbaot se Jeova “i no laekem nating fasin blong divos.” Sipos tufala i soemaot Kristin lav, i no mas gat fasin blong slip wetem man no woman blong narafala mo mared i no save brok. ?From wanem? From we “fasin ya we man i stap laekem ol man tumas, bambae i no save finis samtaem.”—Malakae 2:16; 1 Korin 13:4-8; Efesas 5:3-5.
?Yu Ansa Olsem Wanem?
◻ ?Wanem impoten samting we yumi nidim fastaem blong mekem wan hapi mared?
◻ ?Olsem wanem paoa we i stap wok long tingting i save gat paoa long wan mared?
◻ ?Olsem wanem yumi save mekem paoa we i stap wok long tingting blong yumi i kam strong moa?
◻ ?Wanem ol defren fasin Josef mo Deved tufala i mekem taem tufala i kasem traem?
◻ ?Wanem advaes long Baebol we i save givhan long ol hasban mo ol waef blong mekem fasin joen blong tufala long mared i kam strong moa?
[Tok Blong Pija Long Pej 18]
?Samtaem yumi gat tu defren kaen fasin—we yumi soemaot kaen fasin insaed long kongregesen mo yumi gat fasin we i strong tumas long haos?