?Olsem Wanem Kakae Blong Masta i Gat Mining Long Yu?

JISAS KRAES i stanemap Kakae Blong Masta long laswan naet ya long laef blong hem olsem man. Hemia long Tasde naet, Maj 31, mo Jisas i ded long Fraede aftenun, Epril 1. Ol dei long kalenda blong ol man Jyu i stat taem tudak i kam go kasem nekis tudak long nekis dei, from samting ya kakae ya mo ded blong Jisas tufala i hapen long sem dei, hemia Naesan 14, yia 33 K.T.

?From wanem Jisas i stanemap kakae ya? ?Wanem mining blong bred mo waen we hem i yusum? ?Hu i save kakae long hem? ?Hamas taem oli save mekem lafet ya blong tingbaot hem? ?Mo olsem wanem hem i save gat mining long yu?

?From Wanem Hem i Stanemap?

Long saed blong kakae ya blong Masta, Jisas i talem long ol aposol blong hem se: “Yufala i mas stap mekem samting ya blong tingbaot mi bakegen.” Long wan narafala Baebol, hem i se: “Mekem samting ya olsem wan samting blong stap tingbaot mi bakegen.” (1 Korin 11:​24; The New English Bible) Yes, samtaem Kakae Blong Masta oli stap talem olsem Memoriol blong ded blong Kraes.

Jisas i ded olsem wan man we i holemstrong long God blong leftemap hae rul blong Jeova mo blong pruvum Setan se i man blong gyaman from Setan i talem se ol gudfala man oli stap mekem wok blong God blong kasem sam samting blong olgeta nomo. (Job 2:​1-5) Ded blong hem i mekem hat blong God i glad.​—Proveb 27:11.

From we Jisas i ded olsem wan man we i stretgud olgeta, hem i ‘givim laef blong hem blong pem rod blong plante man oli gofri.’ (Matyu 20:28) Taem faswan man i sin agens long God, hem i lusum laef ya we i stretgud olgeta mo ol gudfala fyuja blong hem. Be “God i laekem tumas ol man long wol, nao hem i givim mi, mi stret Pikinini blong hem, mi wan nomo we hem i gat, blong olgeta man we oli bilif long mi bambae oli no save lus, oli gat laef we i no save finis.” (Jon 3:16) Yes, “pei we ol man bambae oli kasem, from we oli stap mekem sin, hemia we bambae oli ded from. Be presen we God i stap givim i go nomo long ol man, hemia laef ya we i no save finis, from we oli joen long Jisas Kraes, Masta blong yumi.”​—Rom 6:23.

“Kasem Long Masta”

Ol tok blong aposol Pol oli givim klia tingting long saed blong lafet ya blong tingbaot ded blong Kraes. Hem i se: “Tok ya mi mi kasem long Masta blong yumi, nao mi talemaot long yufala finis. Mi talem se long naet ya we biaen wan man i letem Jisas, Masta blong yumi i go long han blong ol enemi blong hem, Jisas i tekem bred. Nao hem i prea blong talem tangkyu long God from. Nao hem i brekem bred ya, i talem se ‘Hemia bodi blong mi, we bambae mi letem from yufala. Yufala i mas stap mekem samting ya blong tingbaot mi bakegen.’ Mo long sem fasin, taem olgeta oli kakae finis, hem i tekem kap, nao i talem se ‘Kap ya i olsem nyufala promes blong God, we blad blong mi bambae i ron blong mekem i stanap. Evri taem yufala i dring long hem, yufala i mas mekem olsem blong tingbaot mi bakegen.’ From samting ya, taem we yufala i kakae bred ya, mo yufala i dring long kap ya, be oltaem yufala i stap soemaot ded blong Masta ya blong yumi, gogo bambae hem i kambak bakegen.”​—1 Korin 11:​23-26.

From we Pol i no stap wetem Jisas mo ol 11 aposol long Naesan 14, yia 33 K.T., i klia se save ya hem i “kasem long Masta” tru long tabu speret. Jisas i stanemap Memoriol ‘long naet ya we biaen wan man [Judas] i letem [hem] i go long han blong ol enemi [ol man blong skul blong ol man Jyu we oli agensem Jisas],’ nao oli pulum ol man Rom blong nilim Kraes long pos. Olgeta we oli gat raet blong tekem bred mo waen we oli gat mining oli save mekem olsem blong tingbaot hem bakegen.

?Mekem Hamas Taem?

?Wanem mining blong tok blong Pol se: “Taem we yufala i kakae bred ya, mo yufala i dring long kap ya, be oltaem yufala i stap soemaot ded blong Masta ya blong yumi, gogo bambae hem i kambak bakegen”? Ol Kristin we tabu speret i makemaot olgeta bambae oli dring long waen ya mo kakae bred long Memoriol “evri taem” gogo kasem taem we oli ded, biaen bambae oli laef bakegen blong go long heven. Long fes blong God mo long fes blong ol man long wol, bambae oli stap talemaot bilif blong olgeta long sakrifaes blong Jisas we Jeova i mekemrere finis. ?Gogo kasem wetaem? Pol i talem se “gogo bambae hem i kambak bakegen,” i klia se hem i min se olgeta we oli stap kakae mo dring long bred mo waen bambae oli gohed blong mekem olsem go kasem Jisas i kambak bakegen blong tekem olgeta ya we tabu speret i makemaot olgeta oli go long heven taem oli laef bakegen long ded long taem ya we “Masta i stap” finis. (1 Tesalonaeka 4:​14-17, NW) Samting ya i laenap wetem ol tok blong Kraes long ol 11 aposol blong hem, we oli stap tru long hem: “Mo from we mi go blong mekem ples i rere blong yufala, bambae mi save kambak blong tekem yufala i kam stap wetem mi, blong bambae yufala i save stap long ples ya we mi bambae mi stap long hem.”​—Jon 14:3.

?Yumi mas holem dei blong tingbaot ded blong Kraes long evri dei no long evri wik? Jisas i stanemap Kakae Blong Masta mo oli kilim hem long taem blong Pasova, we i makem dei ya we ol man Isrel oli kam fri long kalabus long Ijip. Yes Baebol i talem se “Kraes, we hem i olsem smol sipsip blong yumi blong Pasova,” from we hem i Smol Sipsip ya we oli mekem sakrifaes long hem blong sevem ol Kristin. (1 Korin 5:7) Lafet blong Pasova oli stap mekem wan taem nomo long wan yia, hemia long Naesan 14. (Eksodas 12:​6, 14; Levitikas 23:5) Samting ya i soem se yumi mas tingbaot ded blong Jisas olsem Pasova​—wan taem long wan yia, i no evri dei no long evri wik. No gat.

Long plante handred yia bifo finis plante Kristin oli stap tingbaot ded blong Jisas wan taem nomo long wan yia. From we oli stap mekem olsem long Naesan 14, ol man oli kolem olgeta se ‘Quartodecimans’ i minim se “fourteenthers” (ol man blong holem namba fotin.) Man ya blong histri J. L. von Mosheim i tokbaot olgeta se: “Ol Kristin long Esia Maena oli stap mekem tabu lafet ya, blong tingbaot Kakae Blong Masta, mo ded blong Jisas Kraes, long sem taem ya we ol man Jyu oli stap kakae smol sipsip blong olgeta long Pasova, hemia long naet long namba fotin dei blong fas manis [Naesan]. . . . Oli stap tingbaot eksampel blong Kraes olsem wan loa we oli mas folem.”

Mining Blong Bred Mo Waen

Pol i talem se Jisas i “tekem bred. Nao hem i prea blong talem tangkyu long God from. Nao hem i brekem bred ya.” Bred ya we i strong olsem biskit we oli wokem long flaoa mo wora nomo, mo i no gat yis long hem, blong kakae oli mas brekem blong serem. Long Baebol, yis i minim sin no rabis fasin. Taem Pol i talem long ol Kristin long Korin blong putumaot wan man we i stap mekem rabis fasin long kongregesen, hem i se: “Yufala i save finis se smol is nomo be i save mekem olgeta bred i solap. Yufala i mas finis long ol sin, olsem we yufala i sakemaot ol olfala is, nao bambae yufala i olsem flaoa ya blong mekem bred blong Pasova, we i no gat is long hem. From we i tru, yufala i olsem bred ya blong Pasova, we i no gat is long hem, from we Kraes, we hem i olsem smol sipsip blong yumi blong Pasova, ol man oli kilim hem finis, nao yumi sef. From samting ya, i gud yumi joen blong mekem lafet ya. Be sipos yumi gat olfala is ya i stap yet long yumi, we hemia i olsem ol sin mo ol fasin we oli no stret, bambae yumi no save joen long lafet ya. Blong mekem lafet ya, yumi mas folem ol fasin we oli klin gud, mo oli tru, nao bambae yumi olsem bred we i no gat is long hem.” (1 Korin 5:​6-8) Olsem wan smol yis i save mekem bred i solap, sem mak nao kongregesen i save kam doti long ae blong God sipos oli no putumaot wan man we i stap gohed blong mekem rabis fasin long kongregesen. Oli mas putumaot “is” long medel blong olgeta, olsem ol man Isrel oli no save gat yis long haos blong olgeta long taem blong mekem Lafet Blong Ol Kek we i kamaot biaen long Pasova.

Jisas i tokbaot bred blong Memoriol we i no gat yis long hem, i se: “Hemia bodi blong mi, we bambae mi letem from yufala.” (1 Korin 11:24) Bred ya i pija blong bodi blong Jisas we i stretgud olgeta, olsem Pol i raetem se: “From ol samting ya, bifo ya, taem we i stret blong Kraes i kam long wol, hem i talem long God, i se ‘Yu yu no wantem we ol man oli stap kilim anamol, mo we oli stap tekem presen i kam blong givim long yu. Be yu yu mekem wan bodi i stap rere blong mi. Yu no save harem gud from we ol man oli stap bonem anamol long olta blong mekem wosip, mo from we oli stap kilim anamol blong tekemaot ol sin blong olgeta. Nao mi mi talem se “God, mi mi kam blong mekem ol samting we yu yu wantem, stret olsem ol tok ya we i tokbaot mi, we oli raetem finis long buk blong Loa.” ’ . . . Ol samting ya we God i wantem, we tok ya i talem, hemia we Jisas Kraes i ded, hem nomo i givim bodi blong hem wan taem nomo, i no save mekem bakegen. Nao from we hem i mekem olsem, God i mekem yumi klin long ol sin blong yumi, yumi tabu.” (Hibrus 10:​5-10) Bodi blong Jisas we i stretgud olgeta i no gat sin nating long hem mo hem i olsem wan ransom sakrifaes blong sevem ol man.​—Hibrus 7:26.

Afta we Jisas i prea long kap blong red waen we i no gat wan narafala samting i meksap wetem, hem i se: “Kap ya i olsem nyufala promes blong God, we blad blong mi bambae i ron blong mekem i stanap.” (1 Korin 11:25) Narafala Baebol i tanem tok ya se: “Kap ya i minim nyufala kontrak we i stanap long blad blong mi.” (Moffatt) Olsem blad blong ol buluk mo ol nani we oli yusum blong mekem sakrifaes i mekem promes blong Loa bitwin God mo nesen blong Isrel i stanap, sem mak blad blong Jisas we i ron taem hem i ded i mekem nyufala promes i stanap. From we vas ya i tokbaot promes ya, samting ya i givhan long yumi blong makem ol man we oli stret blong dring waen mo kakae bred long Memoriol.

?Hu i Mas Kakae Bred Mo Dring Waen?

Ol man blong Jisas we tabu speret i makemaot olgeta we oli stap long nyufala promes, oli gat raet blong kakae bred mo dring waen blong Memoriol. Promes ya i stanap bitwin God mo ol man Isrel long saed blong speret. (Jeremaea 31:​31-34; Galesia 6:16) Be nyufala promes ya bambae i givim blesing long olgeta man we oli obei long God, mo yu tu yu save stap long medel blong olgeta ya blong kasem ol blesing olsem.

Ol man we oli kakae bred mo dring waen blong Memoriol oli mas stap tu long promes blong Kingdom we Jisas i mekem. Taem Jisas i stanemap kakae ya, hem i talem long ol aposol blong hem we oli stap tru long hem, i se: “Olsem we Papa blong mi i putumap mi blong bambae mi king, mi tu mi putumap yufala blong bambae yufala i save sidaon wetem mi blong kakae mo dring wetem mi long taem ya we mi bambae mi king.” (Luk 22:29) Promes blong Kingdom we God i mekem wetem King Deved i stap poen i go long taem ya we Jisas bambae i kam, hem nao bambae i rul blong olwe long Kingdom blong heven. Ol 144,000 man Isrel long saed blong speret, we bambae oli joen blong rul wetem Kraes, oli stanap long Hil ya Saeon long heven wetem Smol Sipsip ya, Jisas Kraes. Taem oli laef bakegen long ded, bambae oli go rul wetem Kraes olsem ol king mo pris. (2 Samuel 7:​11-16; Revelesen 7:4; 14:​1-4; 20:6) Olgeta ya nomo we oli stap long nyufala promes mo oli stap long promes wetem Jisas oli gat raet blong kakae bred mo dring waen blong Kakae ya Blong Masta.

Speret blong God i joen wetem tingting blong olgeta we tabu speret i makemaot olgeta blong wetnes se olgeta oli pikinini blong Hem mo oli joen wetem Kraes blong kasem ol gudfala samting we oli blong Kraes. Pol i raetem se: “Speret ya blong God i kam joen long tingting blong yumi, blong talemaot we yumi pikinini blong God. Nao from we yumi pikinini blong hem, bambae yumi save kasem ol gudgudfala samting we God i putum olgeta oli tabu, se bambae oli blong ol man blong hem. Mo bambae yumi save joen long Kraes blong kasem haf long ol gudgudfala samting we God i putum olgeta oli tabu, se bambae oli blong Kraes. Mo from we yumi joen long Kraes blong harem nogud olsem we hem i harem nogud, be bambae yumi save joen long hem bakegen, blong kasem gudfala laef blong hem long heven.” (Rom 8:​16, 17) Tabu speret blong God, no paoa blong hem, i wokem wan tingting long olgeta ya we tabu speret i makemaot olgeta, mekem se oli sua se bambae oli go laef long heven. Oli luk laef long heven we Baebol i stap tokbaot i laenapgud wetem olgeta mo oli rere blong givim olgeta samting wetem laef ya blong olgeta long wol olsem sakrifaes. Nating se laef long Paradaes long wol ya bambae i wan nambawan samting, oli no gat hop long samting ya. (Luk 23:43) Hop blong olgeta blong laef long heven we i sua mo i no save jenis mo we i no stanap long gyaman tingting blong ol skul, hem i givim raet long olgeta blong kakae bred mo dring waen blong Memoriol.

Jeova bambae i no glad sipos wan man i talem se hem i blong kam king mo pris long heven be God i no makemaot hem. (Rom 9:16; Revelesen 22:5) God i kilim ded Kora from we hem i flas, nao hem i wantem tekem wok we ol pris nomo oli gat raet blong mekem. (Eksodas 28:1; Namba 16:​4-11, 31-35) Taswe, ?olsem wanem sipos strong tingting no ol tingting blong skul blong wan man bifo i mekem se man ya i kakae bred mo waen blong Memoriol, be hem i no stret long hem? Nao i gud hem i stop blong kakae bred mo dring waen mo prea wetem tingting daon blong God i fogivim hem from.​—Ol Sam 19:13.

Olsem Wanem i Gat Paoa Long Yu

I no nid blong wan man i kakae bred mo dring waen long Memoriol blong hem i save kasem blesing from ransom sakrifaes blong Jisas mo kasem laef we i no save finis long wol. Eksampel, Baebol i no soemaot se ol man blong bilif olsem Ebraham, Sara, Aesak, Rebeka, Boas, Rut, mo Deved bambae oli kakae bred no dring waen blong Memoriol. Be olgeta ya mo ol narafala we oli wantem kasem laef we i no save finis long wol ya bambae oli mas bilif long God mo Kraes mo long ol samting we Jeova i stap givim tru long ransom sakrifaes blong Jisas. (Jon 3:36; 14:1) Lafet blong tingbaot ded blong Kraes we oli stap holem wan taem long wan yia i olsem wan samting blong mekem man i tingtingbak long bigfala sakrifaes ya.

Impoten samting long sakrifaes blong Jisas i stap long tok we aposol Jon i talem, i se: “Ol pikinini blong mi. Mi mi stap raetem ol tok ya i go long yufala blong blokem yufala, blong yufala i no mekem sin. Be sipos wan long yumi i mekem sin, i gat Jisas Kraes i stap, we fasin blong hem i stret gud, mo hem i man blong stanap long saed blong yumi blong tok from yumi long Papa blong yumi. Kraes ya, hem i man we i ded blong mekem rod blong God i tekemaot ol sin blong yumi. Mo i no blong yumi nomo, i blong olgeta man long wol.” (1 Jon 2:​1, 2) Ol Kristin we tabu speret i makemaot olgeta oli save talem se Jisas “i ded blong mekem rod blong God i tekemaot ol sin blong [olgeta].” Be, hem i wan sakrifaes tu blong kavremap sin blong olgeta man long wol, blong mekem se ol man we oli gat fasin obei oli save kasem laef we i no save finis long Paradaes long wol we naoia i kolosap nomo.

Taem yu stap long taem ya blong tingbaot ded blong Kraes, bambae yu yu kasem blesing long wan Baebol tok. Bambae yu tingbaot ol bigfala samting we Jeova God mo Jisas Kraes tufala i mekem finis long yumi. Bambae yu kasem ol gudfala samting long saed blong speret sipos yu stap joen wetem olgeta we oli stap tinghae long God mo Kraes mo long ransom sakrifaes blong Jisas. Taem ya maet bambae hem i mekem yu yu tingting strong moa blong kam man we yu save kasem kaengud fasin blong God, we i save lidim yu blong kasem laef we i no save finis. Mifala i askem yu blong stap wetem ol Wetnes blong Jeova afta we san i godaon finis long Epril 6, 1993, blong tingbaot ded blong Jisas Kraes from we Kakae Blong Masta i save gat bigfala mining long yu.