Fasin Sore Blong Jeova i Sevem Yumi Long Tingting We i Trabol
“God, oltaem yu yu laekem man tumas, plis yu sore long mi. Yu yu gat bigfala sore long man, plis yu ravemaot ol sin blong mi.”—OL SAM 51:1.
1, 2. ?Bigfala sin i save gat wanem paoa long ol man blong Jeova?
SIPOS man i brekem loa blong Jeova, hem i no save ronwe long panis blong hem. !Yumi haremsave samting ya sipos yumi mekem sam bigfala sin long God! Maet yumi stap mekem wok blong Jeova long plante yia finis, be fasin ya blong brekem loa blong hem i save mekem yumi wari tumas no tingting blong yumi i foldaon bigwan. Yumi save harem se Jeova i lego yumi mo maet yumi harem se yumi no stret nating blong mekem wok blong hem. Maet sin blong yumi i luk olsem wan bigfala dak klaod we i blokem laet blong God we i soem se hem i glad long yumi.
2 Long wan taem King Deved blong Isrel bifo i harem olsem. ?Olsem wanem filing ya i stat?
Mastik i Save Lidim Man Blong Mekem Bigfala Sin
3, 4. ?Wanem i hapen long King Deved taem we hem i gat plante samting?
3 Deved i laekem God be hem i folem rong rod we i pulum hem blong mekem bigfala sin. (Lukluk Galesia 6:1.) Samting ya i save kamaot long eni man from we ol man oli no stretgud olgeta, antap moa sipos man olsem i gat paoa long ol narafala man. Olsem Deved i wan king we i gat plante samting, hem i glad long haenem mo paoa blong hem. ?Hu i naf blong agensem tok blong hem? Ol man blong wok oli rere blong obei mo mekem wok blong hem, mo ol man oli wantem mekem samting we hem i askem olgeta blong mekem. Nating se i olsem, Deved i sin taem hem i tekem plante waef mo taem hem i kaontem ol man.—Dutronome 17:14-20; 1 Kronikel 21:1.
4 Long taem ya we hem i gat plante rij samting, Deved i mekem bigfala sin agens long God mo man. !Hem i mekem wan sin, biaen i mekem narafala sin olsem ol tred we Setan i wokem blong stap somap olgeta antap long narafala! Taem ol man Isrel oli stap faet agens long ol man Amon, Deved i stap antap long haos blong hem mo i stap lukluk Bat-seba, naesfala woman blong Uraea, i stap swim. From we Uraea i stap long faet, king i mekem se oli tekem Bat-seba i kam long haos blong hem mo hem i slip wetem hem. !Tingbaot biaen taem hem i faenemaot se Bat-seba i gat bel, hem i sek! Deved i askem Uraea blong kambak, hem i stap ting se Uraea bambae i slip wetem Bat-seba long naet mo bambae Uraea i ting se pikinini ya i blong hem. Nating we Deved i mekem se Uraea i kam fuldrong, be Uraea i no wantem go slip wetem woman blong hem. Naoia Deved i harem nogud from plan blong hem i no wok, nao hem i sanem ol tok haed i go long komanda Joab blong putum Uraea long fas laen blong faet, ples we i isi blong hem i ded. Uraea i ded long faet, woman blong hem i holem ol dei blong krae olsem we oli stap mekem, mo Deved i mared wetem hem bifo we ol man oli save se hem i gat bel.—2 Samuel 11:1-27.
5. ?Wanem samting i kamaot biaen we Deved i mekem sin wetem Bat-seba, mo ol sin blong hem oli mekem wanem long hem?
5 God i yusum profet Netan blong talemaot sin blong Deved mo hem i talem se: “Bambae mi mi mekem trabol i kamaot long famle blong yu.” Olsemia nao, pikinini we Bat-seba i karem, hem i ded. (2 Samuel 12:1-23) Amnon, fasbon pikinini boe blong Deved i fosem sista blong hem Tama mo brata blong Tama i kilim ded Amnon from. (2 Samuel 13:1-33) Absolom, pikinini boe blong king i traem blong tekemaot rul blong papa blong hem mo hem i daonem papa blong hem, Deved, taem hem i slip wetem ol waef blong Deved. (2 Samuel 15:1 kasem 16:22) Faet long kantri blong hem i finis taem Absolom i ded mo Deved i harem nogud tumas from. (2 Samuel 18:1-33) Be, ol sin blong Deved oli pulum hem blong gat tingting daon mo blong luksave se hem i mas stap kolosap long God blong hem we i gat fasin sore. Sipos yumi mekem sin, i gud yumi gat tingting daon blong tanem tingting blong yumi mo kam kolosap long Jeova.—Lukluk Jemes 4:8.
6. ?From wanem Deved i gat bigfala fol from ol sin blong hem?
6 Deved i sin from we hem i wan man blong rul long Isrel we i savegud Loa blong Jeova. (Dutronome 17:18-20) Deved i no wan Fero blong Ijip no wan king blong Babilon we i no save Loa blong Jeova, mekem se maet i stap gohed nomo blong mekem ol samting we God i no glad long olgeta. No gat. (Lukluk Efesas 2:12; 4:18.) Deved i luksave se fasin blong stilim woman blong narafala man mo fasin blong kilim man i ded oli bigfala sin from we hem i wan memba blong wan nesen we i blong Jeova. (Eksodas 20:13, 14) Ol Kristin tu oli save loa blong God. Be olsem Deved, sam long olgeta oli brekem loa ya from sin we oli bon wetem, slak fasin blong man, mo from ol traem we oli no blokem. Sipos samting ya i hapen long wan long yumi, i nogud yumi stap harem nogud nomo nao hem i save spolem tingting blong yumi long saed blong speret mo i kavremap yumi wetem tingting we i trabol.
Talemaot Sin i Mekem Tingting i Spel
7, 8. (a) ?Wanem samting i hapen long Deved taem hem i traem blong haedem sin blong hem? (b) ?From wanem man i mas talemaot sin blong hem mo i mas lego sin ya blong hem?
7 Sipos yumi harem se tingting blong yumi i stikim yumi from we yumi brekem ol bigfala loa blong God, maet yumi harem se i had tumas blong talemaot sin blong yumi, mo i had tumas tu blong talemaot long Jeova. ?Wanem i save hapen long ol taem ya? Long Ol Sam 32, Deved i talem se: “Hae God, taem mi mi no talemaot ol sin blong mi long yu, mi slak we mi slak, from we evri dei nomo, mi stap krae kasem tudak. Long dei mo long naet, yu stap panisim mi. Paoa blong mi i lus olgeta, olsem wora we bigsan i bonem, nao i drae olgeta.” (Vas 3 mo 4) Taem Deved i traem blong haedem sin blong hem mo holemtaet tingting we i stap stikim hem, samting ya i mekem hem i harem nogud. Tingting we i trabol i daonem bigwan paoa blong hem olsem wan tri we i lusum wora long bigsan. Yes, maet hem i harem nogud long tingting mo long bodi blong hem. Yes, hem i lusum glad blong hem. Sipos yumi harem olsem, ?yumi mas mekem wanem?
8 Fasin blong talemaot sin long God i save mekem se God i fogivim yumi mo tingting blong yumi i spel. Deved i singsing olsem, se: “Ale, mi talem se ‘Bambae mi talemaot sin blong mi long Hae God.’ Nao mi talemaot ol sin blong mi long yu, mi no moa haedem ol samting nogud we mi mi mekem. Nao yu yu fogivim mi from olgeta sin blong mi.” (Ol Sam 32:5) ?Tingting blong yu i trabol from sam sin we yu stap haedem? ?Yu ting se i gud blong talemaot sin blong yu long God mo lego sin ya blong mekem se God i save sore long yu? ?Yu ting se i gud blong singaot ol elda long kongregesen mo askem olgeta blong givhan long yu long saed blong speret? (Proveb 28:13; Jemes 5:13-20) Bambae oli luksave fasin ya we yu tanem tingting blong yu, mo biaen Kristin fasin glad blong yu i kam bakegen. Deved i talem se, “Man we Hae God i fogivim hem from ol sin blong hem, mo we i tekemaot ol samting nogud ya blong hem, hem i save harem gud. Man we Hae God i no moa jajem hem from ol samting nogud blong hem, mo we i no moa gyaman long laef blong hem, hem i save harem gud.”—Ol Sam 32:1, 2.
9. ?Wetaem Deved i wokem Ol Sam 51, mo from wanem?
9 Deved mo Bat-seba tufala i mas talemaot nogud fasin blong tufala long Jeova God. Tufala i save ded from ol sin ya blong tufala, be hemia nomo God i gat sore long tufala. Hem i sore olsem long Deved from promes ya blong Kingdom. (2 Samuel 7:11-16) Fasin ya we Deved i tanem tingting blong hem from ol sin we hem i mekem wetem Bat-seba, yumi save luk long Ol Sam 51. King ya we i tanem tingting blong hem long sin blong hem, i wokem Sam ya afta we profet Netan i pulum tingting blong hem long bigfala sin we i agensem loa blong God. I nidim strong tingting blong Netan i talemaot sin blong Deved, sem mak, ol Kristin elda oli mas gat strong tingting blong mekem samting olsem tede. King i no talem se Netan i gyaman mo givim oda blong oli kilim ded Netan, defren nao hem i gat tingting daon mo i talemaot sin blong hem. (2 Samuel 12:1-14) Ol Sam 51 i soemaot ol samting we hem i talem long God long saed blong nogud fasin ya mo hem i wan prea we yumi save tingting dip long hem, impoten moa sipos yumi bin mekem sin mo yumi wantem Jeova i sore long yumi.
Yumi Mas Talemaot Long Fes Blong God
10. ?Olsem wanem Deved i save kam strong bakegen long saed blong speret?
10 Deved i no traem blong talem eskyus from sin blong hem, be hem i askem se: “God, oltaem yu yu laekem man tumas, plis yu sore long mi, yu yu gat bigfala sore long man, plis yu ravemaot ol sin blong mi.” (Ol Sam 51:1) Deved i bin brekem Loa blong God, taem hem i mekem sin. Be i gat hop blong hem i kamgud bakegen long saed blong speret, sipos God i sore long hem from kaengud fasin blong Hem, no from trufala lav blong Hem. Fasin sore blong God we hem i stap soemaot bifo i mekem se king ya we i tanem tingting blong hem i gat bilif se Hemia we i Wokem hem bambae i ravemaot ol sin blong hem.
11. ?Ol sakrifaes we oli mekem long Dei Blong Stretem Ol Sin oli soemaot wanem, mo tede i nidim wanem samting blong sevem yumi?
11 Ol sakrifaes long Dei Blong Stretem Ol Sin oli sado nomo long ol trufala samting, olsemia nao Jeova i stap soem se hem i gat wan rod blong tekemaot sin blong ol man we oli tanem tingting blong olgeta. Naoia yumi save se fasin ya we hem i stap sore mo fogivim ol man i go long yumi. Hem i stanap long bilif blong yumi long ransom sakrifaes blong Jisas Kraes. !Sipos Deved i stap tingbaot sakrifaes ya we i sado nomo nao hem i save trastem kaengud fasin mo fasin sore blong Jeova, tede ol man blong Jeova oli save soemaot moa bilif long ransom we God i givim blong sevem olgeta!—Rom 5:8; Hibrus 10:1.
12. ?Wanem mining blong mekem sin, mo olsem wanem long tingting blong Deved long sin blong hem?
12 Taem Deved i toktok wetem God, hem i gohed i se: “Yu wasemaot ol samting nogud long laef blong mi, yu tekemaot olgeta samting nogud yu mekem mi mi klin. Mi mi luksave ol rabis fasin blong mi, oltaem mi mi savegud ol sin blong mi.” (Ol Sam 51:2, 3) Taem man i sin, hem i mestem ol mak blong Jeova. Deved i mekem olsem. Be, hem i no olsem wan man blong kilim man i ded no i man blong stilim woman blong narafala man, no gat, ol man olsem oli no stap tingbaot sin blong olgeta, oli harem nogud from panis blong olgeta nomo no oli harem nogud from we oli save kasem sik. Deved we i laekem Jeova, i no laekem nating ol rabis fasin. (Ol Sam 97:10) Hem i harem nogud from sin blong hem mo hem i wantem God i klinimgud hem. Deved i luksave ol sin blong hem mo hem i sore tumas se hem i save letem nogud tingting blong hem i pulum hem blong mekem sin. Oltaem hem i tingbaot sin blong hem, from man we i fraetgud long God, voes blong hat blong hem i no save stap kwaet gogo kasem we man ya i tanem tingting blong hem, mo man ya i talemaot sin blong hem, mo Jeova i fogivim hem.
13. ?From wanem Deved i save talem se hem i sin agens long God hem wan?
13 Deved i luksave se hem i mas talemaot sin blong hem long Jeova, hem i se: “Sin ya we mi mekem i agens long yu nomo, mi mi mekem ol samting ya we i nogud tumas long fes blong yu. From samting ya, i stret we yu yu stap jajem mi, i stret nomo we yu yu stap tok long mi.” (Ol Sam 51:4) Deved i brekem loa blong God, hem i no tinghae long wok blong king, mo “hem i no gat respek long Jeova,” hem i sakem doti long nem blong Jeova. (2 Samuel 12:14; Eksodas 20:13, 14, 17) Ol nogud fasin blong Deved oli agensem ol man Isrel mo ol memba blong famle blong hem tu, sem mak olsem tede taem wan man we i baptaes finis i mekem bigfala sin, hem i save mekem tingting we i trabol long Kristin kongregesen mo long ol fren. Nating se king ya we i tanem tingting blong hem finis, i save se hem i mekem sin agens long man we i stap kolosap long hem olsem Uraea, hem i luksave se i moa nogud we hem i mekem sin agens long Jeova. (Lukluk Jenesis 39:7-9.) Deved i luksave se jajmen blong Jeova bambae i stret. (Rom 3:4) Ol Kristin we oli mekem sin oli mas gat sem tingting ya.
Ol Samting We Oli Mekem Man i Foldaon Long Sin
14. ?Wanem samting Deved i talem long saed blong slak fasin blong hem?
14 Deved i no traem blong mekem ol eskyus, hem i talem se: “Mi mi man nogud, i stat long taem we mi mi bon. Fasin blong mi i nogud, i stat long taem we mi stap yet long bel blong mama blong mi.” (Ol Sam 51:5) Deved i bon wetem sin, mo mama blong hem i harem i soa from sin we hem i bon wetem. (Jenesis 3:16; Rom 5:12) Ol tok blong Deved oli no min se fasin blong hasban mo waef i slip tugeta, gat bel, karem pikinini oli sin, no gat, from we God i mekem se man i save mared mo i save karem pikinini; mo tu Deved i no stap tokbaot samkaen sin we mama blong hem i mekem. Hem i bon long sin from we ol papa mama blong hem oli sinman olsem ol narafala man we oli no stretgud olgeta.—Job 14:4.
15. ?Nating se God i save tingbaot ol slak fasin blong yumi, wanem samting yumi no mas mekem?
15 Sipos yumi mekem sin, yumi save prea long God mo talem eni samting we oli mekem se yumi sin. Be i nogud blong yusum kaengud fasin blong God olsem wan eskyus blong yumi mekem rabis fasin, no yumi yusum sin we yumi bon wetem olsem wan rod blong ronwe long panis blong sin we yumi mekem. (Jud 3, 4) Deved i akseptem fol blong sin blong hem from hem i holem nogud tingting mo i letem traem ya i pulum hem. I gud yumi stap prea blong yumi no foldaon long ol samting blong traem man mo yumi mas mekem sam samting we i laenap wetem prea olsem.—Matyu 6:13.
Askem God Blong Klinim Yumi
16. ?Wanem fasin God i glad long hem, mo samting ya i mas pulum yumi blong mekem wanem?
16 Maet ol man oli luk olsem we oli gudfala man we oli holemstrong wosip long God, be God i stap lukluk samting we i stap long hat blong olgeta. Deved i talem se: “Be yu yu wantem man we tingting blong hem i stret gud olgeta. Plis yu fulumap tingting blong mi long waes blong yu.” (Ol Sam 51:6) Deved i sin from we hem i gyaman mo hem i mekem ol nogud plan blong kilim ded Uraea mo hem i traem blong haedem se Bat-seba i no gat bel. Nating se i olsem, hem i save se God i laekem ol samting we i tru mo oli tabu. Samting ya i pusum yumi blong traehad blong mekem ol fasin blong yumi oli kamgud moa, from we Jeova i save panisim yumi sipos yumi stap mekem ol nogud plan long tingting blong yumi. (Proveb 3:32) Deved i luksave tu se sipos God i ‘fulumap tingting blong hem long waes’ olsem king we i bin tanem tingting blong hem finis, hem i save folem ol stret mak blong God long olgeta laef blong hem.
17. ?Wanem mining blong prea blong kam klin wetem hisop?
17 From man blong raetem Sam i luksave se hem i nidim help blong God blong hem i save winim ol slak fasin blong hem, hem i gohed i talem se: “Plis yu tekemaot sin blong mi, nao bambae mi mi klin. Plis yu wasem mi [long hisop, NW], nao bambae mi mi waet i winim waet klaod.” (Ol Sam 51:7) Hisop i wan long olgeta gras (maet hem i majoram, no Origanum maru) we oli stap yusum blong mekem lafet blong klinim ol man we bifo oli kasem sik ya leprosi. (Levitikas 14:2-7) Taswe i stret we Deved i prea se hem i kam klin long ol sin blong hem wetem tri ya hisop. Tingting blong kam klin i mekem se hem i askem blong Jeova i wasem hem i kam klin fulwan, i waet bitim klaod we i no gat doti long hem. (Aesea 1:18) Sipos sam long yumi oli harem nogud naoia from voes blong hat mo tingting blong olgeta i stikim olgeta from ol rabis fasin we oli mekem, i gud yumi gat bilif se sipos yumi tanem tingting blong yumi mo yumi askem God blong fogivim yumi, hem i save mekem yumi kam klin long ransom sakrifaes blong Jisas.
Askem Blong Kam Strong Bakegen
18. ?Deved i harem olsem wanem bifo we hem i tanem tingting mo talemaot sin blong hem, mo olsem wanem save ya blong hem i givhan long yumi tede?
18 Wan Kristin we samtaem i harem nogud from voes blong hat mo tingting blong hem i stikim hem, hem i save kasem save long ol tok ya blong Deved se: “Olgeta we oli glad oli stap singsing, mo olgeta we oli hapi oli stap laf. Plis yu mekem we mi harem noes blong olgeta. Nating we yu yu mekem ol bun blong mi oli slak finis; be plis yu mekem mi mi harem gud bakegen, mi glad.” (Ol Sam 51:8) Bifo we Deved i tanem tingting blong hem mo i talemaot ol sin blong hem, voes blong hat blong hem i mekem se hem i harem nogud tumas. Hem i no haremgud long ol singsing mo hem i no hapi taem ol man blong singsing oli sing mo taem ol man we oli gat gudhan long myusek oli plei. Deved i harem nogud tumas from God i no moa glad long hem, mekem se hem i harem olsem we ol bun blong hem oli soa tumas. Hem i wantem God i fogivim hem, hem i wantem kam strong bakegen long saed blong speret, mo hem i wantem glad bakegen olsem bifo. Tede man we i tanem tingting blong hem long rabis fasin blong hem, hem tu i nidim we Jeova i fogivim hem blong hem i kasem glad bakegen olsem we hem i bin gat bifo hem i spolem fasin fren blong hem wetem God. Man we ‘Tabu Speret i mekem hem i harem gud’ taem hem i tanem tingting blong hem, i soemaot se Jeova i fogivim hem mo hem i laekem hem. (1 Tesalonaeka 1:6) !Samting ya i mekem yumi haremgud!
19. ?Deved bambae i harem olsem wanem sipos God i waepemaot olgeta sin blong hem?
19 Deved i gohed i prea se: “Plis yu satem ae blong yu blong yu no moa luk ol sin blong mi, mo yu ravemaot olgeta samting nogud blong mi.” (Ol Sam 51:9) Jeova i no glad long sin. Taswe, Deved i askem hem blong hem i satem ae blong hem long ol sin blong hem. King i askem tu blong God i waepemaot ol sin blong hem, tekemaot olgeta rabis fasin blong hem. !Sipos Jeova i save mekem olsem, bambae samting ya i leftemap tingting blong Deved, bambae hem i tekemaot baden blong voes blong hat we i stap mekem trabol long hem, mo naoia God i save letem king ya we i tanem tingting blong hem finis i save se God blong hem we i laekem hem tumas i bin fogivim hem.
?Olsem Wanem Sipos Yu Mekem Sin?
20. ?Ol Kristin we oli mekem bigfala sin oli mas mekem wanem?
20 Ol Sam 51 i soemaot se ol man blong Jeova we oli mekem bigfala sin be afta oli tanem tingting blong olgeta oli save askem God blong i sore long olgeta mo waepemaot sin blong olgeta. Sipos yu yu wan Kristin we yu mekem sin olsem, i gud yu askem Papa blong yumi long heven wetem tingting daon blong hem i fogivim yu. Luksave se yu nidim help blong God blong yu save stanap fored blong hem mo hem i glad long yu. Mo askem blong hem i givim bakegen long yu glad we yu bin kasem bifo. Ol Kristin we oli tanem tingting blong olgeta finis oli save prea long Jeova olsemia, from we ‘bambae hem i save fogivim olgeta.’ (Aesea 55:7; Ol Sam 103:10-14) Yes, yumi mas askem ol elda long kongregesen blong oli save givim ol samting long saed blong speret we yumi nidim.—Jemes 5:13-15.
21. ?Nekis stadi bambae i tokbaot wanem?
21 Fasin sore blong Jeova i rili sevem ol man blong hem long tingting we i trabol. Be i gud yumi lukluk long ol narafala tok we i kamaot long hat blong Deved taem hem i tanem tingting blong hem finis, long Ol Sam 51. Nekis stadi blong yumi bambae i soemaot se Jeova i no stap ting nating long man we i harem nogud long hat blong hem.
?Olsem Wanem Yu Ansa?
◻ ?Bigfala sin i save gat wanem paoa long ol man blong Jeova?
◻ ?Deved i harem olsem wanem taem hem i wantem haedem sin blong hem?
◻ ?From wanem Deved i talem se hem i sin agens long God?
◻ ?Nating se God i save tingbaot ol slak fasin blong man sipos hem i sin, wanem samting yumi no mas mekem?
◻ ?Wan Kristin i mas mekem wanem sipos hem i mekem bigfala sin?