Mekem Fasin Ya We Kraes i Stap i Klia

“Taem Pikinini blong man bambae i kamtru wetem olgeta paoa blong hem, . . . bambae hem i seraot ol man, olsem we man blong lukaot long sipsip i save seraot ol sipsip long ol nani.”​—MATYU 25:​31, 32, “NW”.

1. ?Olsem wanem ol lida blong Krisendom oli eksplenem mining blong tok ya long Matyu 24:3?

TRI dei bifo we Jisas i ded, fo long ol disaepol blong hem oli kam kolosap long hem mo oli askem strong long hem se: “Plis yu talemaot long mifala. ?Bambae ol samting ya oli kamtru wetaem? ?Mo wanem saen we bambae i soemaot we bambae yu yu kambak bakegen [Grik, pa·rou·siʹa] mo wol ya i finis?” Long plante handred yia finis ol haeman mo ol man blong raetem ol buk blong Krisendom oli bin talemaot mining blong ol tok ya we oli tokbaot Jisas long Matyu 24:​3 (King James Version) blong minim se hem i save kambak bakegen wetem bodi we olgeta man oli save luk hem. Taswe, ol haeman mo ol man blong raetem ol buk blong Krisendom oli bin ting se fasin blong Kraes blong kambak wetem wan bigfala fasin mo ol man oli save luk wan bigfala samting. Oli tingbaot samting ya olsem namba tu taem we Kraes i kam. ?Be bilif blong olgeta i stret?

2, 3. (a) ?Olsem wanem Volyum 2 blong Studies in the Scriptures i soemaot we tufala wod ya “i stap kam” mo “i stap finis” i defren? (b) ?Wanem samting ol man blong Jeova oli kasem save long hem long saed blong mining blong pa·rou·siʹa blong Kraes?

² Long 1889, ol tabu man blong Jeova, olsem ol man blong karem laet long ol yia biaen long 1800, oli bin kasem sam save we i stretem tingting blong olgeta long bisnes ya long saed blong Kraes i kambak bakegen. Long Volyum 2 blong buk ya Studies in the Scriptures, pej 158 kasem 161, Charles T. Russell, faswan presiden blong ‘Watch Tower Bible and Tract’ Sosaeti, i raetem se: “Parousia . . . i minim i stap, mo i neva mas tanem tok ya, i stap kam, olsem insaed long Engglis Baebol . . . ‘Emphatic Diaglott,’ wan gudfala translesen blong Nyutesteman, i mekem parousia i kam stret, i stap finis . . . , i no se i stap kam, olsem i stap long rod blong hem, be i stap, olsem afta we hem i kam [Jisas] i se, ‘Olsem we long taem blong Noa,. . . oraet, long taem we mi, mi Pikinini blong Man bambae mi stap [parousia], bambae i olsem.’ Makemgud, se Jisas i no skelem taem we Noa i stap kam wetem taem we Masta blong yumi i stap kam . . . Hem i skelem taem we Noa i stap finis long medel blong olgeta man ‘bifo long bigfala wora,’ wetem taem ya we Kraes i stap finis long wol, long namba tu taem we hem i kam, ‘bifo long faea’​—hemia bigfala trabol long Dei blong Masta [Jeova] we bambae i finisim taem we yumi stap long hem.”​—Matyu 24:​37.

³ Ale ol man blong Jeova long ol yia biaen long 1800 oli kasem stret save se pa·rou·siʹa blong Kraes bambae i kamaot long wan fasin we ol man oli no save luk wetem prapa ae blong olgeta. Mo tu oli bin kasem save se Rul blong ol Hiten Man bambae i kasem en blong hem long koltaem long 1914. Biaen taem ol man blong Jeova oli stap kasem moa save long saed blong speret, oli kasem save se Jisas i bin sidaon long jea blong king long heven olsem King blong Kingdom long sem yia ya, 1914.​—Proveb 4:​18, Daniel 7:​13, 14; Luk 21:​24; Revelesen 11:​15.

“Masta Blong Yumi i Stap Finis”

4. ?I tokbaot wanem, taem i talem se “Jisas Kraes Masta blong yumi [i stap, NW]”?

⁴ Ale, long taem blong yumi, ?i minim wanem taem Baebol i talem se “Jisas Kraes, Masta blong yumi [i stap finis, NW]”? (1 Tesalonaeka 5:​23) Wan haeman i talem se tok ya “i stap finis,” pa·rou·siʹa, “i kam wan spesel tok blong wan visit blong wan haeman, [antap moa] ol king mo ol gavman we oli stap visitim wan ples.” Ale tok ya i stret long Masta Jisas Kraes we hem i tekem jea olsem King, i stat long 1914 mo biaen, kasem naoia afta we hem i kam King finis long heven. Hem i stap long wan fasin we yumi no save luk wetem prapa ae blong yumi ‘blong stap long medel blong ol enemi’ (NW) blong hem, hem i strong long rul blong hem olsem King blong fulumap profet tok ya. (Ol Sam 110:​2) Long ol 79 yia we oli pas finis, ol man long wol oli bin luksave ol samting we oli stap kamaot from paoa blong Kraes we i rul olsem King we yumi no save luk wetem prapa ae blong yumi.

5. ?Wanem ol samting we bambae oli kamaot long taem we Jisas i stap [pa·rou·siʹa] we bambae yumi tokbaot long trifala haf blong magasin ya?

⁵ Insaed long trifala haf ya, bambae yumi stadi long ol bigfala samting we oli pruvum se Kingdom blong Kraes i bin stanap long taem blong yumi. Faswan, bambae yumi luk sam profet tok blong Baebol we oli talemaot ol samting we oli kamaot finis no ol samting we oli stap kamaot naoia. Namba tu, bambae yumi tokbaot bigfala wok we slef we i stret mo waes i stap mekem, we Jisas i stap yusum long taem we hem i stap finis olsem King. (Matyu 24:​45-47) Namba tri haf bambae i talemaot long yumi bigfala samting we bambae i kamaot long en, long taem blong “bigfala trabol.” Hemia nao taem we bambae Jisas i kam olsem Man we Jeova bambae i yusum blong spolem ol rabis man mo blong sevem ol stret man. (Matyu 24:​21, 29-31) Aposol Pol i tokbaot taem ya blong spolem ol rabis man olsem taem “blong God i givim spel long yufala, we naoia yufala i stap harem nogud, mo long mifala tu. Hem bambae i mekem olsem long taem ya we Jisas, Masta blong yumi, bambae i aot long heven, i kamtru long yumi, wetem ol strostrong enjel blong hem, wetem faea we i laet finis. Hem bambae i kam blong givim panis long olgeta we oli no save ona long God, mo long olgeta we oli no save obei long gud nyus blong Jisas, Masta blong yumi.”​—2 Tesalonaeka 1:​7, 8.

Saen

6. ?Wanem bigfala saen we Matyu 24 mo 25 i tokbaot?

⁶ Wan taosen naen handred yia bifo, ol man blong Jisas we oli man blong karem laet oli askem wan saen long hem, no wan pruf, blong save taem we bambae hem i stap long paoa blong Kingdom. Ansa blong hem i stap long buk blong Matyu japta 24 mo 25, we i gat plante saen, ol samting ya naoia oli kamaot evriwan finis mo oli stap gohed blong kamaot long olgeta ples long wol. Taem we olgeta saen ya oli kamtru oli makem wan taem blong harem nogud mo taem blong bigfala traem. Jisas i givim woning se: “Yufala i mas lukaot gud blong bambae i no gat man i gyaman long yufala. From we bambae i gat plante man we oli save tekem nem blong mi, nao bambae oli kam talem se ‘Mi mi Mesaea ya.’ Mo bambae oli save gyaman long plante man olsem. Mo bambae yufala i save harem we ol man oli stap mekem faet, mo yufala i save harem ol tok olbaot se bambae ol man oli mekem faet, be yufala i mas lukaot gud, blong yufala i no fraet. Ol samting ya bambae oli mas kamtru fastaem, be hemia i no Lasdei yet ya.”​—Matyu 24:​4-6.

7. ?Wanem ol haf blong saen we yumi luk se i kasem mak blong hem long ol yia biaen long 1914?

⁷ Mo tu long profet tok blong Jisas, hem i talem se bambae ol faet we oli bitim ol faet blong bifo oli save gohed nomo. Blong fulumap profet tok ya, tu long ol faet ya oli bin kam olsem ol bigfala faet blong wol, wan i stat long 1914 kasem 1918 mo narawan i stat long 1939 kasem 1945. Mo tu, hem i talem se bambae ol man oli gat hadtaem blong kasem kakae mo olbaot long wol bambae graon i seksek. Plante taem ol man oli save ronem ol trufala Kristin. Profet tok ya i tru tumas, ol Wetnes blong Jeova, ol man blong karem laet tede, oli bin harem nogud long trabol we ol man oli mekem long olgeta long ol eite yia we i pas finis, taem oli stap talemaot gud nyus blong Kingdom “long olgeta ples long wol, blong oli wetnes long hem long fes blong olgeta man.” (Matyu 24:​7-14) Wanwan long ol Yearbook of Jehovah’s Witnesses i givim moa pruf we i soemaot se ol saen ya oli stap kamaot naoia.

8, 9. (a) ?Fasin blong Jisas blong stap rul olsem King i joen wetem wanem tu? (b) ?Profet tok blong Jisas long saed blong gyaman Mesaea i soemaot wanem long saed blong ples mo fasin blong hem blong stap?

⁸ From we Jisas i king long olgeta ples long wol, trufala wosip i stap kam bigwan moa long olgeta kantri. Taem blong hem blong stap olsem King (pa·rou·siʹa) i wan taem blong jekemap wol. (1 Pita 2:​12) ?Be i gat wan bigfala taon, no wan ples, we Jisas i save stap long hem? Jisas i givim ansa long kwestin ya taem hem i talem se taem bambae ol man oli stap wet long taem we hem i stap, bambae i gat plante man oli save tekem nem blong Kraes blong gyaman long plante man. Hem i givim woning se: “Nao, from samting ya, sipos ol man oli talem long yufala se ‘Yufala i luk. Mesaea ya i stap longwe long drae ples,’ bambae yufala i no go long ples ya. Mo sipos oli talem se ‘Yufala i luk. Hem i stap insaed long haos,’ bambae yufala i no bilif long olgeta. Taem laetning i laet, hem i saen, i finisim skae olgeta, i stat long saed long is, i finis long saed long wes. Mo taem mi, mi Pikinini blong Man bambae mi [stap, pa·rou·siʹa, “NW”], bambae i olsem.”​—Matyu 24:​24, 26, 27.

⁹ Jisas, “Pikinini blong Man,” we i save moa bitim ol narafala man long wol, hem i save weples bambae hem i stap long taem we hem i kamtru. Hem i no save stap long ples ya no longwe no long wan spesel ples long wol. Hem i no save kamaot long samples we i no gat samting long hem, “long drae ples,” blong olgeta we oli lukaot Mesaea oli save toktok wetem hem long wan ples we ol haeman blong gavman oli no save luk olgeta, wan ples we hem i bos long ol man blong hem we oli stap lan, oli stap rere blong mekem wan bigfala samting long saed blong politik mo blong putumap hem olsem Mesaea we i rulum wol. No gat. Mo tu, hem i no save haedem hem wan “insaed long haos,” we hem i jusumaot smol man nomo blong save weples hem i stap, hemia se, long ples we ol man oli no luk mo oli no save faenem, hem i save tingting mo mekem wan plan we i haed wetem tingting blong sakemdaon ol gavman blong wol mo blong putumap hem wan olsem Mesaea. !No gat!

10. ?Olsem wanem ol laetning long saed blong trutok blong Baebol i saen long olgeta ples long wol?

¹⁰ Long defren fasin, long taem we Jisas i stap olsem King, i no gat wan samting long saed blong hem we i save haed long taem ya. Olsem Jisas i talem, laetning blong trutok long saed blong Baebol i gohed blong laet long olgeta ples long wol i stat long is i go kasem olgeta ples blong wes. Tru ya, olsem ol man blong karem laet tede, ol Wetnes blong Jeova oli kam olsem “wan laet long olgeta nesen, we rod blong sef blong [Jeova] i save go long olgeta man long evri ples long wol.”​—Aesea 49:​6.

Wok Blong Ol Enjel

11. (a) ?Long wanem rod Jisas i yusum ol hif blong enjel blong mekem laet blong Kingdom i saenaot? (b) ?Wetaem mo long wanem grup olgeta we oli olsem ol gudfala wit oli bin hivap?

¹¹ Ol narafala vas we i joen wetem fasin blong Jisas blong stap i tokbaot hem olsem we hem i joen wetem, no ‘sanem ol enjel,’ ol bigfala grup blong enjel. (Matyu 16:​27; 24:​31) Long pija tok long saed blong wit mo rabis gras, Jisas i talem se “garen ya hemia wol ya” mo se “taem blong tekem kakae blong wit, hemia en blong wol ya. Mo ol man blong wok ya we oli go blong katem wit, hemia ol enjel ya.” Be, samting ya i no min se, taem hem i stap long paoa blong Kingdom mo bigfala laet we i saenaot raonabaot long hem, hem i yusum ol enjel nomo blong mekem wok olsem man blong karem tok long wol ya. I stat long 1919, Jisas i yusum ol enjel blong seraotem ol tabu man long wol ya we oli olsem gudfala wit, we ol samting long Faswan Bigfala Faet Blong Wol i bin mekem oli go wanwan, mo olgeta ya oli rere blong mekem moa wok long nem blong King. (Matyu 13:​38-43) Biaen long 1920 ol narafala taosen man oli stanap long saed blong Kingdom blong God we i stanap finis mo tabu speret blong God i makemaot olgeta. Ol tabu man ya oli joen fulwan long haf blong smol grup blong fastaem. Oli joen wanples, oli mekemap slef ya we i stret mo waes long taem blong yumi.

12. ?Wanem fasin blong klinim we ol enjel oli bin joen long hem, mo wanem frut i kamaot long wol ya?

¹² Wan narafala eksampel long wok we ol enjel oli joen long hem blong mekem taem Jisas i stap biaen long 1914, i stap long Revelesen 12:​7-9: “Maekel [Jisas Kraes] wetem ol enjel blong hem oli stap faetem bigfala algita ya. Bigfala algita ya wetem ol enjel blong hem oli traem faetem olgeta, be oli lus, nao oli no moa gat ples blong olgeta long heven. Bigfala algita ya, hem i snek ya blong bifo we nem blong hem Setan no man we i agensem man. Hem i gyaman long olgeta man long wol finis, i lidim olgeta oli go krangke. Nao olgeta long heven oli sakemaot hem wetem olgeta enjel blong hem oli aot long heven, oli kamdaon long wol.” Taswe, naoia heven antap i klin finis, i letem wol nomo i stap yet blong Kingdom bambae i save klinim fulwan blong mekem nem blong Jeova i tabu. Long yia ya 1993, woning blong God i stap gohed blong kamaot se: “Sore tumas long yu, graon . . . from we Setan i kamdaon finis long yufala, mo hem i kros tumas, from we i save, i gat smoltaem nomo blong hem i stap yet.”​—Revelesen 12:​12.

Laef Bakegen Blong Go Long Heven

13, 14. (a) ?Ol tok blong Baebol oli soemaot wanem we i gohedgud stat long 1918 i kam kasem tede? (b) ?Wanem samting Pol mo Jon tufala i soemaot long saed blong smol grup blong ol tabu man tede?

¹³ Wan narafala samting blong sapraes we i bin kamaot stat long taem we Kraes i stap, hemia stat blong laef bakegen blong olgeta blong go long heven. Aposol Pol i soemaot se ol tabu Kristin we oli stap long beregraon blong olgeta oli save laef bakegen long ded fastaem blong stap wetem Jisas Kraes long ples blong ol speret man. I gat pruf i bin kamaot long ol yia we i pas blong soem se samting ya i bin kamaot i stat long 1918. Pol i raetem se: “Long Kraes oli save laef bakegen long ded. Be olgeta bambae oli kasem laef ya wanwan, long stret fasin blong kasem. Faswan blong kasem, hemia Kraes ya we i olsem fas kakae we i rere long garen. Nao biaen, long taem ya we Kraes bambae i [stap, pa·rou·siʹa, “NW”] ol man blong hem bambae oli kasem.” (1 Korin 15:​22, 23) 1 Tesalonaeka 4:​15-17 i tokbaot fasin blong ol tabu Kristin blong laef bakegen long taem we Kraes i stap finis i se: “Tok ya we mifala i stap talem, hem i tok blong Masta blong yumi. Hem i talem se yumi ya we bambae yumi stap laef yet, gogo kasem dei ya we hem bambae i [stap, pa·rou·siʹa, “NW”], bambae yumi no save go fastaem long olgeta ya we oli ded finis . . . Olgeta ya we oli stap bilif long Kraes gogo oli ded, olgeta ya bambae oli laef bakegen fastaem. Ale, biaen, yumi ya we bambae yumi stap laef yet go kasem dei ya, God bambae i tekem yumi i go antap wetem olgeta ya. Bambae yumi go long klaod blong mitim Masta blong yumi long ples ya antap.” I gat 144,000 man we oli blong Kraes olsem ol tabu man we bambae oli kasem nambawan presen ya.​—Revelesen 14:​1.

¹⁴ Olsem aposol Pol i soemaot, smol grup blong ol tabu Kristin we oli stap laef tede oli no save go insaed long Kingdom fastaem long ol tabu Kristin we oli ded long taem bifo from bilif blong olgeta mo ol disaepol. Aposol Jon tu i tokbaot ol tabu kristin we oli stap ded long taem blong yumi olsemia: “I stat naoia, ol man we taem oli ded oli man blong Masta blong yu, bambae oli save harem gud. Nao tabu speret i talem se ‘!Yes i tru ya! Bambae oli save kasem spel long olgeta hadwok blong olgeta, from we bambae oli tekem frut blong wok blong ol i go wetem olgeta.’ ” Hemia, stret long taem we oli laef bakegen long ded. (Revelesen 14:​13) Mo Pol i talem se: “Be yufala i lesin. Hemia tok haed blong hem. I no evriwan long yumi we bambae oli ded. Be taem bigfala bubu ya blong Lasdei i krae, wantaem nomo God bambae i jenisim bodi blong yumi evriwan. From we taem bubu ya bambae i krae, God bambae i mekem ol ded man oli laef bakegen long ded we bambae oli no moa save ded samtaem. Nao bambae hem i jenisim bodi blong yumi ya tu we yumi stap laef yet.” (1 Korin 15:​51, 52) !Hemia i wan bigfala merikel ya!

15, 16. (a) ?Jisas i givim wanem pijatok long Luk 19:​11-15, mo from wanem risen? (b) ?Olsem wanem profet tok ya i bin kamtru?

¹⁵ Wantaem taem Jisas i stap prij long wan grup blong ol man blong hem long saed blong Kingdom blong God, hem i yusum wan pijatok blong givhan long olgeta blong stretem ol rong tingting blong olgeta. Vas ya i talem se: “Olgeta oli stap tingbaot se naoia nomo, nyufala wol ya we God i king long hem bambae i kamtru. Taswe hem i tok, nao i talem se ‘I gat wan haeman we i wantem go long wan narafala kantri longwe, blong kasem paoa blong kam king, blong bambae i kambak, i king. Nao hem i singaot ten man blong wok blong hem oli kam long hem, nao i givim gol mane long evriwan we i olsem faef handred dola wan man. Nao i talem long olgeta, i se “Yufala i yusum mane ya blong wokem bisnes, mo blong winim mane, gogo bambae mi mi kambak bakegen.” . . . Be olgeta longwe oli givim paoa long hem blong i kam king. Nao taem hem i kambak, hem i singaot ol man blong wok ya blong hem blong oli kam long hem, blong i harem we oli winim hamas long ol mane ya blong hem we oli stap yusum.’ ”​—Luk 19:​11-15.

¹⁶ Jisas nao i “haeman” ya we i go long heven, “wan narafala kantri longwe” we long ples ya bambae hem i tekem wan Kingdom. Hem i tekem Kingdom ya long 1914. I no longtaem biaen, Kraes we i olsem King i jekemap wok blong ol man we oli talem se oli folem hem blong luk wanem nao oli bin mekem blong lukaot long intres blong Kingdom we hem i bin givim long olgeta. Masta ya i jusumaot wan smol grup blong ol man nomo nao hem i talem ol gudfala tok ya long olgeta se: “Ei, wan gudfala wok ya. Yu yu wan gudfala man. From we yu yu mekem i stret gud long smol bisnes ya nomo we mi putum long han blong yu, bambae mi mi putumap yu blong yu gavman long ten bigfala taon.” (Luk 19:​17) Taem ya we Kraes i stap finis i joen wetem fasin blong gohed strong long wok blong talemaot gud nyus blong Kingdom, fasin blong talemaot jajmen blong God long ol rabis man, mo blong lukaotgud long wok ya wetem olgeta samting ya i insaed long wok mo haenem we masta i putum long han blong “gudfala man” blong wok blong hem.

Wok Blong Prij Raonabaot Long Wol

17. ?Wanem glad i makem pa·rou·siʹa?

¹⁷ ?Wanem narafala samting we i mas kamaot long taem we hem i stap finis (pa·rou·siʹa)? Hem i wan glad taem long wok blong prij mo blong givhan long ol nyuwan blong rere blong pastru long bigfala trabol we i stap kam. Olgeta ya oli blong “bigfala hif blong man,” we i givhan long smol grup blong ol tabu man, oli kam “olsem wan leta we man i raetem finis.” (Revelesen 7:​9; 2 Korin 3:​1-3) Pol i tokbaot glad we i save kamaot long taem blong tekem kakae long garen taem hem i talem se: “Tingting blong mifala i stap strong, se taem Jisas, Masta blong yumi bambae i [stap, pa·rou·siʹa, “NW”], bambae hem i glad long mifala. ?Be tingting blong mifala i stap strong oltaem from wanem? From yufala ya nao. Long dei ya, bambae yufala i save mekem mifala i haremgud. Bambae yufala i olsem praes blong flasem mifala. Bambae mifala i save tok flas from yufala.”​—1 Tesalonaeka 2:​19.

Stap Klin Mo No Mas Gat Poen

18. (a) ?Wanem prea blong Pol we i go stret long pa·rou·siʹa? (b) ?Wanem tingting yumi evriwan i mas soemaot long taem ya, mo long wanem defren kaen rod?

¹⁸ Mo tu Pol i prea blong olgeta we oli stap laef naoia long taem we Kraes i stap finis oli kam tabu mo klin, se: “Hemia prea blong mi, we God ya we i stampa blong pis blong yumi, hem bambae i mekem yufala i stret gud, yufala i tabu. Hem bambae i holemgud yufala, we tingting blong yufala, mo laef blong yufala, mo bodi blong yufala, evri samting bambae oli stap gud nomo, i no gat man i gat poen long yufala, gogo bambae Jisas Kraes, Masta blong yumi i [stap, pa·rou·siʹa, “NW”].” (1 Tesalonaeka 5:​23) Yes, tede, nating se yumi ol tabu man no yumi blong bigfala hif blong ol narafala sipsip, strong tingting blong joengud i joenem yumi evriwan i kam wanples mekem se yumi save gohed blong stap klin mo yumi no gat poen long spesel taem ya. Mo tu, yumi mas gat longfala tingting. Jemes i raetem se: “Ol brata mo sista. Yufala i mas mekem tingting blong yufala i longfala, blong wet gogo Masta blong yumi bambae i [stap, pa·rou·siʹa, “NW”]. . . . Mo yufala i mas mekem tingting blong yufala i strong tu, from we bambae dei ya i kamtru i no longtaem.”​—Jemes 5:​7, 8.

19. ?Wanem woning Pita i givim long saed blong pa·rou·siʹa, mo yumi mas lesin long hem olsem wanem?

¹⁹ Mo tu aposol Pita i gat wan samting blong talem long yumi we yumi stap laef naoia. Hem i givim woning long yumi agens long ol man we oli save laf long yumi, we i gat plante long olgeta ples long wol. Pita i talem se: “Hemia wan samting we yufala i mas save, se long taem blong Lasdei, bambae sam man oli save kamtru, we fasin blong olgeta blong wantem ol samting nogud, hem i bos long olgeta. Olgeta ya bambae oli laf long yufala, oli askem se ‘?Olsem wanem nao? ?Hem i promes finis blong kam [pa·rou·siʹa], be hem i stap wea? Ol olfala blong yumi, ol man oli berem olgeta finis, be i no gat wan samting i jenis, i stat bifo olgeta, taem we God i mekem wol ya fastaem, i kam kasem tede. Evri samting oli stap olsem nomo.’ ” (2 Pita 3:​3, 4) Nating se plante man oli laf long yumi long taem we Kraes i stap, be ol man blong Jeova oli gohed blong saen olsem laet long wol ya, blong sevem plante man.

Tingtingbak

◻ ?Olsem wanem ol man blong Jeova sloslou oli kasem stret save long saed blong pa·rou·siʹa?

◻ ?Olsem wanem Matyu 24:​4-8 i bin kamtru?

◻ ?Olsem wanem ol enjel oli stap wok wetem Kraes we i sidaon long jea blong King?

◻ ?Wanem nambawan merikel i kamaot we i joen wetem pa·rou·siʹa?

◻ ?Wanem glad yumi kasem naoia, mo hu i joen long hem?