Ol Bigfala Wok Long Taem We Kraes i Stap
“Mi mi king, nao bambae mi talem long olgeta long raet saed blong mi, se ‘Yufala i kam. Papa blong mi i mekem i gud tumas long yufala finis. Taem hem i no mekem wol ya yet we yumi stap long hem, be hem i makemaot ol ples blong yufala long nyufala wol we naoia bambae i kam, we hem i king long hem. Yufala i kam tekem ples ya blong yufala.’ ”—MATYU 25:34.
1. ?Long wanem rod pa·rou·siʹa blong Kraes i olsem “taem blong Noa”?
!KRAES i stap—ol man oli wet long taem blong samting ya i kamtru! Taem ya we i olsem “taem blong Noa” we Jisas i tokbaot se i laenap wetem “fasin ya blong wol i kasem en blong hem,” (NW) i kamtru long 1914. (Matyu 24:3, 37) ?Be fasin blong Kraes blong stap, no pa·rou·siʹa, i minim wanem long smol grup blong ol tabu Kristin “slef ya we i stret mo waes”? (Matyu 24:45, NW) !Yes i minim se oli save kam moa strong olsem ol man blong karem laet! !Bambae ol samting blong sapraes oli save kamaot! Kolosap bigfala wok blong hivimap ol man i stat.
2. ?Wanem fasin blong klinim i bin kamaot we i fulumap profet tok blong Malakae 3:1-5?
2 Be, fastaem, ol tabu Kristin ya oli mas klin. Olsem Malakae 3:1-5 i bin talem, Jeova God “wetem man ya blong karem tok blong kontrak” blong hem, Jisas Kraes, i bin kam blong jekemap haos prea long saed blong speret long spring taem blong 1918. Jajmen i mas stat wetem “ol famle blong hem [God].” (1 Pita 4:17) Malakae 3:3 i talem se: “Hem [Jeova] i mas klinim ol pikinini blong Livae, yes, hem i mas klinim olgeta olsem we man i klinimaot gol mo selva.” Hemia wan taem blong jekemap mo blong klinim.
3. ?From wanem i impoten blong gat fasin blong klinim long saed blong speret?
3 Taem oli pastru long jajmen ya, we i finis long 1918, smol grup ya blong ol tabu man oli kam klin long ol fasin blong wol mo ol doti fasin blong ol skul. ?From wanem Jeova i klinim olgeta? From samting ya i joen wetem haos prea blong hem long saed blong speret. Haos prea ya we i olsem fasin blong stap wosip long Jeova i stanap long sakrifaes blong Jisas Kraes. Jeova i wantem se haos prea blong hem i mas stap long wan fasin we i klin blong mekem se taem bigfala namba blong ol man blong wosip long Jeova we oli gat hop blong laef long wol ya bambae oli kam long hem, oli save faenem ples we i gat respek long hae rul blong hem, ples we oli save holem nem blong God i tabu, mo oli save obei long ol stret loa blong hem. Taswe, oli save talem tangkyu long Jeova mo joen long wok ya blong mekem ol man oli kasem save long bigfala plan blong hem.
Oli Kasem Moa Wok
4, 5. (a) ?Olsem wanem kwestin blong Jisas i traem ol wanwan memba blong slef ya tede? (b) ?Long ol wanem rod oli tokbaot “slef ya we i stret mo waes” mo “olgeta samting blong hem” we yumi mas kasem save long hem? (c) ?Wanem oda Jisas i givim long slef ya?
4 Long 1919 slef ya we i klin finis i lukluk i go long fyuja blong mekem wok ya i go moa bitim bifo. Long 1914, Jisas Kraes, Masta blong olgeta i bin kasem paoa blong Kingdom blong heven. Taem hem i kambak long haos blong hem blong jekem “olgeta samting” blong hem we hem i bin putum long han blong slef blong hem, hem i tekem paoa blong King finis, we hem i no bin tekem yet taem hem i stap long wol. ?Hem i faenem wanem? ?Slef ya i stap bisi blong lukaotgud long ol wok blong Masta? Olsem Matyu 24:45-47 i soemaot, Jisas i askem wan kwestin we i traem ol wanwan tabu disaepol blong faenemaot prapa bilif blong olgeta long Mesaea blong Jeova, se: “?Hu i rili slef ya we i stret mo waes we masta blong hem i putum hem i bos long ol man blong hem blong givim kakae long olgeta long stret taem blong hem? Slef ya i save harem gud sipos masta blong hem, taem hem i kamtru, i faenem we hem i stap mekem olsem. !Tru, mi talem long yufala! Bambae masta i putumap hem blong i lukaot long olgeta samting blong hem” (NW).
5 Tru tumas, tok blong Jisas long saed blong gudfala slef ya i no stret long wan man nomo. No gat, be hem i tokbaot fulwan kongregesen blong ol tabu Kristin blong Kraes, olsem wan grup. ‘Olgeta samting,’ hemia ol wanwan tabu man blong Kraes. Jisas i save se bambae hem i pemaot ol tabu man ya long blad blong hem nomo, ale i stret nomo blong singaot olgeta olsem wan grup se slef blong hem. Fas Korin 7:23 i tokbaot olgeta i se: “God i pemaot YUFALA [olsem wan grup] finis long bigfala praes. From samting ya, yufala i mas no kam olsem slef blong ol fasin blong man.” Jisas i givim oda long slef blong hem blong mekem laet blong olgeta i saen blong pulum mo blong mekem ol narafala oli kam disaepol mo gohed blong givim kakae long saed blong speret long olgeta man blong wok blong hem long stret taem blong hem.
6. ?Olsem wanem slef ya i kasem pei taem Jisas i jekemap wok blong hem?
6 Stat long taem we Kraes i stap, kam kasem 1918, slef ya, i bin lukaot blong givimaot kakae long ol man nating se plante man oli no laekem wok blong olgeta, ol man oli ronem olgeta, mo tu i gat sam taem we ol samting oli fasfas lelebet. Hemia nao samting we Masta ya i faenemaot taem hem i statem wok blong hem blong jekemap. Masta Jisas i glad, mo long 1919 hem i talem se gudfala slef ya we hem i agri long hem i save haremgud. ?Wanem nambawan pei we slef ya i kasem from we hem i stap mekem ol samting we Masta blong hem i talem long hem blong mekem? !Hem i kasem wok we i hae moa! Yes, hem i kasem ol bigfala wok blong mekem moa long wok blong Masta blong hem. From we Masta ya i kam wan King long heven, olgeta samting blong hem long wol ya oli kam moa naes.
7, 8. (a) ?Wanem ya ‘olgeta samting’ blong Masta? (b) ?Wanem samting slef ya i mas mekem blong lukaotgud long olgeta samting ya?
7 ?Ale, wanem ya “olgeta samting blong hem”? Hemia olgeta samting long saed blong speret long wol ya we oli bin kam ol samting blong Kraes we i joen wetem haenem blong hem olsem King blong heven. Oda blong mekem disaepol blong Kraes i bigfala haf blong samting ya, wetem bigfala jans blong mekem wok long olgeta nesen long wol long nem blong Kingdom blong God we i stanap finis.
8 Wok olsem blong lukaotgud long ol samting blong Masta i soemaot se slef ya i givim moa taem mo i lukaotgud blong mekem olgeta wok blong Kingdom mo, yes, oli bildim plante moa nyufala woksap blong givhan long wok ya. Naoia ples blong wok blong hem i bigwan moa—olgeta ples long wol we man i stap long hem.
Hivimap Ol Sipsip
9. ?Wanem frut blong ol bigfala wok blong slef ya?
9 Ale, wetem fasin obei, slef ya blong Kraes we i stret mo waes i mekem ol wok blong hem i go moa. ?Wanem frut i kamaot from? Oli hivimap ol laswan haf blong ol tabu man long ol 144,000. Biaen vison blong Jon we i stap long Revelesen 7:9-17 i kamaot, i gohed bigwan. Stat long 1935 kasem naoia slef ya i luk se vison ya i kamtru bigwan. Long olgeta ples long wol, “wan bigfala hif” blong plante milyan man oli kam long haos prea blong Jeova long saed blong speret olsem ol man blong wosip long hem. Wan enjel blong Jeova i talem long Jon se i no gat man i save kaontem olgeta ya. Samting ya i minim se i no gat wan stret namba blong ol man we slef ya bambae i karem oli kam long haos prea blong Jeova long saed blong speret. Long ol taem we i stap, wok blong hivimap olgeta bambae i gohed.
10. ?Wanem nambawan wok we slef ya i stap mekem tede?
10 Gudfala slef ya i gat wan bigfala wok blong lukaot long ol “narafala sipsip” we namba blong olgeta i stap go antap, oli save se Masta Jisas i laekem tumas ol man ya we oli olsem sipsip we oli kamaot long olgeta nesen. Oli blong hem nomo. (Jon 10:16; Ol Wok 20:28; 1 Pita 5:2-4) Ale from lav blong slef ya long Masta mo ol sipsip, hem i glad blong lukaot long ol nid long saed blong speret blong bigfala hif ya blong man.
11-13. ?Wanem stret toktok we presiden blong ‘Watch Tower Society’ blong naoia i mekem long saed blong wok blong slef ya?
11 Yes, bigfala haf long wok blong slef ya blong karem laet i blong hivimap ol man ya blong kasem laef long wol aninit long Kingdom blong God. Bifo long ded blong presiden blong ‘Watch Tower Society,’ F. W. Franz long Desemba 1992, hem i tokbaot wok blong slef ya we i stap gohed naoia bitim bifo se:
12 “Oltaem bakegen mo bakegen Jisas Kraes i bin yusum ogenaesesen ya long wan nambawan fasin, folem samting we mi luk long 99 yia long laef blong mi. I no wan man we i stap lidim ogenaesesen ya, be hem i Masta Jisas Kraes. From wok blong hem i bin go longwe mo i bin kam bigfala mo i nambawan tumas bitim we yumi save tingbaot. Tede yumi gat wan ogenaesesen we i kam bigwan long olgeta ples long wol. Hem i stap wok long Not mo long Saot blong wol, long Is mo long Wes. Wan man nomo i save mekem wok ya i kam bigfala olsem—Pikinini blong God, we i hed blong slef ya we i stret mo waes. Slef ya i bin mekem ol wok blong hem oli fulwan, mo from samting ya nao yumi bin luk namba blong ol man i kam antap bigwan.
13 “Bisnes ya i no stanap from wan man. Yumi gat wan ogenaesesen we God i lidim, mo hem i folem ol rul blong God, long wan fasin we God i lidim. I no gat wan man, i no man ya we i stanemap ‘Watch Tower Bible and Tract’ Sosaeti, i save talem se hem nao i mekem mo lukaot long ol wok we i karem ol bigfala frut long olgeta ples long wol. Hem i wan samting blong sapraes.” ?Olgeta long bigfala kampani oli agri wetem ful hat blong olgeta long ol laswan tok ya blong Brata Franz? Yes, i tru tumas, oli glad tumas long bigfala wok blong gudfala slef ya.
Ol Man We Oli Stap Aninit Long Kingdom
14, 15. (a) ?Wanem mining blong parabol blong Jisas long saed blong mane (Matyu 25:14-30)? (b) ?I stret nomo, wanem samting i kamaot biaen long parabol ya long Matyu japta 25?
14 Long Matyu japta 25, pijatok blong Jisas long saed blong sipsip mo ol nani i soemaot bigfala wok ya blong hivimap ol man blong stap aninit long Kingdom blong God long wol ya. Long parabol bifo long pijatok ya, long saed blong mane, Jisas i soemaot se ol tabu disaepol we oli gat hop blong rul wetem hem long Kingdom blong hem long heven oli mas wok blong mekem olgeta samting blong hem long wol ya oli kam plante moa. Taswe i stret nomo, long parabol we i kam biaen, Jisas i eksplenem samting we olgeta we oli wantem kam aninit long Kingdom blong hem long heven oli mas mekem.
15 Makemgud tok blong hem long Matyu 25:31-33, se: “Long taem ya we mi, mi Pikinini blong Man, bambae mi kamtru wetem olgeta enjel, bambae mi mi King, mi gat olgeta paoa blong mi. Nao olgeta man blong wol bambae oli kam stanap long fes blong mi, mo mi bambae mi seraot olgeta, olsem we man blong lukaot sipsip i save seraot ol sipsip blong hem long ol nani blong hem. Bambae mi putum ol sipsip oli stap long raet saed blong mi, mo ol nani oli stap long lef saed blong mi.”
16. ?Olsem wanem ol nesen oli hivap blong seraotem olgeta man?
16 Jisas i kamtru wetem olgeta paoa blong hem long 1914. Nao hem i statem wok blong hem, wetem olgeta enjel blong hem, oli faetem mo sakemaot ol enjel we oli enemi blong hem long heven. Narafala samting we i kamaot long parabol ya i givhan long yumi blong luksave se fasin blong Jisas blong sidaon long bigfala jea blong hem i pija blong wok blong hem blong jajem ol man long taem we hem i stap. Olgeta man long wol bambae oli kam stanap long fes blong hem, i minim se Jisas i mekem ol wok blong hem oli kamaot long ol man long olgeta nesen olsem we oli sipsip blong hem, olsem wan pijatok nomo. Insaed long kampani ya i gat ol sipsip mo ol nani oli joen wanples. Maet i save tekem haf dei nomo blong seraotem ol prapa sipsip mo nani we oli hivap, be i tekem longtaem lelebet blong seraotem ol man raonabaot long wol we oli fri blong jusum samting we i stret no i no stret. Hemia from we fasin blong seraot i stanap long disisin blong wanwan man.
17. ?From wanem wok we i stap gohed long wol ya tede i wan impoten bisnes long olgeta man?
17 Long parabol ya, King blong lukaot long sipsip i putum ol man we oli olsem sipsip long raet saed blong hem mo ol man we oli olsem nani long lef saed blong hem. Raet saed i olsem wan gudfala jajmen we i kamaot—laef we i no save finis. Lef saed i pija blong wan nogud jajmen—lus blong olwe. Lukluk blong King long bisnes ya bambae i mekem ol bigfala samting oli kamaot biaen.
18. ?From wanem wan man i no save yusum eskyus se hem i no save luk King ya?
18 Wan man i no save yusum eskyus se hem i no save luk Pikinini blong man wetem prapa ae blong hem long taem we hem i stap, no pa·rou·siʹa. Plante moa man we oli olsem sipsip tede oli stap joen wetem slef ya blong talemaot gud nyus blong Kingdom blong God raonabaot long wol, oli stap mekem laet blong olgeta i saen. Tru tumas, wok blong olgeta blong prij i bin kasem olgeta ples long wol.—Matyu 24:14.
19. ?Wanem fasin blong ol sipsip we i klia long parabol blong ol sipsip mo ol nani?
19 ?From wanem King blong lukaot long sipsip i givim presen ya, fyuja we i gat blesing long olgeta we oli olsem sipsip? From oli sapotem wok blong talemaot Kingdom wetem ful hat blong olgeta mo kaengud fasin we oli soemaot long ol tabu brata blong Jisas, we Jisas i luk olsem se oli stap mekem long hem wan. From samting ya, Pikinini blong man we i King i save talem long olgeta se: “Yufala i kam. Papa blong mi i mekem i gud tumas long yufala finis. Taem hem i no mekem wol ya yet we yumi stap long hem, be hem i makemaot ples blong yufala long nyufala wol we naoia bambae i kam, we hem i King long hem. Yufala i kam tekem ples ya blong yufala.”—Matyu 25:34; 28:19, 20.
Givhan Long King
20, 21. ?Wanem pruf i soemaot se ol sipsip oli stap stanap long saed blong Kingdom?
20 Makemgud se taem King ya i singaotem ol sipsip blong stap long wol ya aninit long rul blong Kingdom blong God, oli sapraes tumas. Oli askem hem se: ‘?Masta, wetaem mifala i mekem ol samting ya long yu?’ Hem i ansa i se: “Tru mi talem long yufala, Taem yufala i mekem olsem long wan brata blong mi, we i daon moa long ol narafala brata blong mi, be hemia i olsem we yufala i mekem long mi nomo.” (Matyu 25:40) Taem Jisas i kamtru long Meri Magdalin long taem we hem i laef bakegen long ded, hem i tokbaot ol brata blong hem long saed blong speret taem hem i talem long woman ya i se: “Be yu go luk ol brata blong mi.” (Jon 20:17) Long taem we Jisas i stap we yumi no save luk wetem prapa ae blong yumi, i gat wan smol grup nomo blong 144,000 brata blong hem long saed blong speret we oli stap yet long wol ya.
21 From we yumi no save luk Jisas we i stap long heven wetem prapa ae blong yumi, ol man we oli olsem sipsip oli no mekem ol nambawan samting ya stret nomo long hem. Oli luk hem long bigfala jea blong hem wetem bilif blong olgeta nomo. Jisas i haremgud long ol traehad we oli mekem blong givhan long ol brata blong hem long saed blong speret, we bambae oli joen wetem hem long heven. Samting we oli mekem long ol brata blong Jisas, Jisas i luk olsem oli stap mekem long hem wan. Ol man we oli olsem sipsip oli lukaotgud blong mekem i gud long ol brata blong Kraes from oli luksave se oli brata blong Kraes. Oli luksave se ol brata blong Jisas long saed blong speret oli ol ambasada blong Kingdom blong Jeova, mo oli wantem soemaot strongfala pruf se oli stap stanap wetem olgeta long saed blong Kingdom ya.
22. ?Olsem wanem ol sipsip oli kasem pei? (Skelem wetem Revelesen 7:14-17.)
22 !Bifo finis Jeova i luk se ol man ya we oli olsem sipsip oli mas kamaot long taem ya we Pikinini blong hem i stap, mo hem i gat wan nambawan pei we i stap rere long olgeta! Bambae bigfala hif blong man oli kasem ol blesing blong pis long wol ya long glad taem blong Wan Taosen Yia Rul long han blong King blong Jeova, Jisas Kraes.
23. ?Long wanem rod ol sipsip oli save se oli stap givhan long ol brata blong King?
23 Taem yumi tingbaot ol profet tok blong Baebol we oli tokbaot taem we Kraes i stap, wetem parabol blong hem long saed blong ol sipsip mo ol nani, ?yumi luksave wanem? Samting ya: Hem i wan samting we yumi save mo yumi wantem mekem i gud long wan long ol brata blong Kraes long saed blong speret, samting ya nao i mekem wan man i kam olsem wan sipsip we i stret man long fes blong God mo King blong hem. Ol man we oli olsem sipsip oli save samting we oli stap mekem, nating se oli no luk King ya we i stap rul wetem prapa ae blong olgeta. Oli wok blong givhan long ol brata blong King ya i no long saed blong bodi nomo be long saed blong speret tu. ?Long wanem rod? Taem oli givhan long olgeta long wok blong talemaot gud nyus blong Kingdom blong God mo blong mekem ol Baebol stadi blong mekem ol man oli kam disaepol blong Kraes. Taswe, tede i gat bitim fo milyan man we oli stap karem laet oli ol man blong talemaot Kingdom blong God.
Plante Moa Wok
24. ?Wanem nambawan wok we i mekem se ol memba blong slef ya oli kam ol man we oli glad bitim ol narafala man long wol tede?
24 I gud yumi luk wanwan long ol nambawan wok blong gudfala slef ya. Fastaem, Masta i bin putumap slef ya blong i lukaot long ol samting blong hem—wok blong Kingdom blong hem long wol ya—mo olgeta samting ya i stap kam plante moa. Namba tu, grup ya i no givim kakae nomo long ol tabu man be oli stap givim kakae long saed blong speret long wan bigfala grup blong man tu, hemia ol narafala sipsip we oli stap kam plante moa. Namba tri, grup we i olsem slef ya i lidim wok blong seremaot laet blong Kingdom. Namba fo, wok blong hem we i bigwan olgeta i blong hivimap ol narafala sipsip, tekem olgeta i kam long haos prea blong Jeova long saed blong speret. Namba faef, grup we i olsem slef ya, mo ol man we oli olsem sipsip we oli stap sapotem wok blong slef ya wetem ful hat blong olgeta, oli stap mekem moa long ol wok blong mekem ol branj raonabaot long wol oli kam bigfala moa, i sem mak long hedkwota long Amerika. Nambawan fasin blong wok olsem i mekem se long wol tede slef ya i glad moa bitim ol narafala man, mo oli mekem plante milyan narafala man oli glad tu. !Olgeta evriwan oli talem tangkyu long Jeova God mo long Jisas Kraes, we tufala i bin lidim ol bigfala wok blong gudfala slef ya!
25. ?Olsem wanem ol sipsip oli save gohed blong sapotem grup ya we i olsem slef ya, wetem wanem hop long tingting blong olgeta?
25 Naoia slef ya i stap wok strong moa long ol wok we God i givim long hem blong mekem. !Taem we i stap bifo “bigfala trabol” i faerap i kolosap finis nao! (Matyu 24:21) !Hem i impoten tumas se olgeta ya we oli sipsip blong God oli stap long raet saed blong King blong hem blong lukaot long sipsip! Ale, naoia, i gud se evriwan oli gohed strong blong sapotem slef ya we i stret mo waes. Long rod ya nomo se wan dei, i no longtaem ol man we oli olsem sipsip bambae oli save harem ol hapi tok ya se: “Yufala i kam. Papa blong mi i mekem i gud tumas long yufala finis. Taem hem i no mekem wol ya yet we yumi stap long hem, be hem i makemaot ples blong yufala long nyufala wol we naoia bambae i kam, we hem i King long hem. Yufala i kam tekem ples ya blong yufala.”
?Yu Ansa Olsem Wanem?
◻ ?Wanem faswan jajmen we i kamaot taem Jisas i sidaon long jea blong hem olsem King?
◻ ?Olsem wanem Matyu 24:45-47 i kamtru long taem blong yumi?
◻ ?Long saed blong ol wok we oli stap kam bigwan moa, wanem wok we i mekem slef ya mo bigfala hif blong man oli glad moa?
◻ ?Olsem wanem Matyu 25:34-40 i kamtru long taem we Kraes i stap no pa·rou·siʹa?
[Tok Blong Pija Long Pej 16]
Masta ya i putum olgeta samting blong hem long han blong gudfala slef ya
[Tok Blong Pija Long Pej 18]
Jisas i sidaon finis long bigfala jea blong hem blong jajem olgeta man