Wokbaot Wetem Waes Fasin Long Wol Ya
“Long ol fasin ya we yufala i stap mekem long fes blong ol man we oli no bilif long Kraes, yufala i mas waes gud.”—KOLOSI 4:5.
1. ?Ol faswan Kristin oli mas faet agens long wanem samting, mo wanem advaes Pol i givim long kongregesen long Kolosi?
OL FASWAN Kristin we oli stap long ol taon blong Rom oli mas gohed blong faet agensem fasin blong wosip long aedol, man i lukaot rabis samting blong haremgud long hem, mo ol hiten bilif mo kastom. Olgeta we oli stap long Kolosi, wan taon long Wes saed blong Esia Maena, oli mas faet agensem fasin blong wosip long woman god mo fasin blong wok wetem ol rabis speret we ol man Frijia oli stap mekem, hiten tijing blong ol man Gris we oli gat waes, mo skul blong grup blong ol man Jyu we oli stap long medel blong olgeta. Aposol Pol i givim advaes long Kristin kongregesen se ‘oli mas waes gud’ long fasin ya we oli stap mekem long fes blong “ol man we oli no bilif long Kraes.”—Kolosi 4:5.
2. ?From wanem ol Wetnes blong Jeova tede oli mas wokbaot wetem fasin waes long fes blong ol man we oli no stap long trutok?
2 Tede, Ol Wetnes blong Jeova oli fesem ol sem fasin ya we oli no stret, mo ating plante moa. From samting ya, olgeta tu, oli mas soemaot fasin waes long medel blong olgeta we oli stap afsaed long trufala Kristin kongregesen. Plante man long saed blong skul mo politik, i sem mak long ol nyus, oli agensem ol Wetnes blong Jeova. Sam long ol man blong agens, nating se oli soemaot klia no, plante taem, long fasin haed, oli traem blong sakem doti long gudnem blong ol Wetnes blong Jeova mo pulum ol narafala man blong oli agensem ol wetnes. Olsem ol faswan Kristin we ol man oli talem se skul blong olgeta i “krangke” mo i bitim mak long plante samting, mo tu hem i denja, plante taem tede, ol man oli tok agens long ol Wetnes blong Jeova mo oli gat plante rong tingting long saed blong olgeta.—Ol Wok 24:14; 1 Pita 4:4.
Winim Nogud Toktok
3, 4. (a) ?From wanem ol man blong wol bambae oli neva laekem ol trufala Kristin, be yumi mas traem blong mekem wanem? (b) ?Wan woman blong raetem nyuspepa i raetem wanem long saed blong ol Wetnes blong Jeova we hem i stap wetem olgeta long wan rabis kalabus blong Nasi?
3 Ol trufala Kristin oli no gat tingting se bambae ol man blong wol ya, we, aposol Jon i talem se, i “stap long paoa blong Setan,” i mas laekem olgeta. (1 Jon 5:19) Nating se i olsem, Baebol i leftemap tingting blong ol Kristin blong traehad blong pulum ol man oli kam long Jeova mo klin wosip blong hem. Yumi mekem samting ya taem yumi prij mo tu taem yumi soemaot gudfala fasin. Aposol Pita i raetem se: “Ale, yufala i mas mekem fasin blong yufala i stret gud long fes blong olgeta, blong bambae oli luk ol gudfala wok blong yufala. Nao long Lasdei, taem God bambae i kam blong jajem olgeta, bambae oli save leftemap nem blong God from ol gudfala wok ya blong yufala.”—1 Pita 2:12.
4 Forgive—But Do Not Forget, buk blong Sylvia Salvesen we hem i wan woman blong raetem buk, hem i tokbaot ol woman we oli wetnes we oli bin stap wetem hem insaed long wan rabis kalabus blong Nasi, se: “Tufala ya, Käthe mo Margarethe, mo plante narafala Wetnes blong Jeova, oli givhan long mi bigwan, i no long bilif blong olgeta nomo be long fasin blong wok blong olgeta. Oli givim ol faswan klin kaliko we mifala i kasem blong kavremap ol soa blong mifala . . . Blong talem long wan sot toktok, mifala i luk se mifala i stap long medel blong ol man we oli mekem i gud long mifala, mo ol wok blong olgeta oli soemaot gudfala filing we oli gat.” !Hemia wan nambawan toktok we ‘wan woman we i no bilif long Kraes’ i talem!
5, 6. (a) ?Kraes i stap mekem wanem wok naoia, mo yumi no mas fogetem wanem samting? (b) ?Yumi mas gat wanem tingting long olgeta man blong wol, mo from wanem?
5 Yumi save mekem plante samting blong blokem nogud toktok blong ol man taem yumi folem fasin waes long ol samting we yumi stap mekem long fes blong olgeta we oli no stap long trutok. Yes, yumi stap laef long taem ya we Jisas Kraes, King blong yumi we i stap rul, i stap seraotem ol man blong olgeta nesen, “olsem man blong lukaot long sipsip i save seraot ol sipsip blong hem long ol nani blong hem.” (Matyu 25:32) Be yumi no mas foget se Kraes nao i Jaj; hem nomo i save jusum se hu ya “ol sipsip” mo hu ya “ol nani.”—Jon 5:22.
6 Samting ya i mas gat paoa long tingting blong yumi long saed blong ol man we oli no haf blong ogenaesesen blong Jeova. Maet yumi save tingbaot olgeta olsem ol man blong wol, be oli haf blong olgeta man long wol we ‘God i laekem tumas. . . nao i givim stret Pikinini blong hem, wan nomo we hem i gat, blong olgeta man we oli bilif long hem bambae oli no save lus, oli gat laef we i no save finis.’ (Jon 3:16) I moa gud blong tingbaot olgeta man se bambae oli kam sipsip bitim we yumi traem jajem olgeta se oli ol nani. Samfala we bifo oli strong blong agensem trutok naoia oli ol Wetnes we oli givim laef blong olgeta long Jeova. Mo plante long olgeta ya, fasin kaen i pulum olgeta fastaem, bifo we oli lesin long wan man we i prij. Eksampel, lukluk pija long pej 18.
Strong Long Wok Blong Olgeta Be Oli No Fosem Ol Man
7. ?Wanem tok blong agens we pop i talem, be yumi save askem wanem kwestin?
7 Pop John Paul 2 i toktok agens long ol narafala skul, mo antap moa ol Wetnes blong Jeova, taem hem i talem se: “Fasin blong samfala we oli strong blong lukaot ol man mo pulum olgeta blong joen wetem olgeta gogo kolosap oli fosem olgeta, mo oli go long ol haos wanwan, no stopem ol man we oli stap pas long ol kona blong rod, i no wan trufala fasin blong ol aposol mo ol misinari.” Maet yumi save askem se, ?Sipos wok blong yumi “i no wan trufala fasin blong ol aposol mo ol misinari,” yumi save faenem hu man we i stap wok strong long wok blong talemaot gud nyus? Katolik i no mekem nating mo, i sem mak long ol Protestan no ol memba blong ol Otodoks jyos.
8. ?Olsem wanem yumi save mekem wok blong yumi blong prij long olgeta haos wanwan, mo yumi wantem kasem wanem frut?
8 Nating se i olsem, blong blokem eni toktok we oli stap mekem se yumi strong tumas long wok blong yumi blong prij, oltaem yumi mas gat fasin kaen, respek, mo gudfala fasin taem yumi go visitim olgeta man. Disaepol Jemes i raetem se: “Sipos i gat sam long yufala we oli waes, oli man blong save, i gud oli soemaot samting ya. Laef blong olgeta i mas stret, tingting blong olgeta i mas stap daon, mo fasin blong olgeta i mas waes.” (Jemes 3:13) Aposol Pol i givim woning long yumi blong no mas kam ol “man blong rao.” (Taetas 3:2) Eksampel, i moa gud we yumi soemaot intres long tingting blong man no woman we yumi stap prij long hem bitim we yumi talem stret se yumi stap agensem bilif blong hem. Nao talemaot gud nyus long man ya olsem we i stap insaed long Baebol. Taem yumi gat fasin we yumi wantem talem gudfala samting long ol man mo yumi soemaot respek long ol man we oli gat ol narafala bilif, bambae yumi givhan long olgeta blong gat wan gudfala tingting blong lesin, mo ating bambae oli luksave impoten mesej ya blong Baebol. Frut we i save kamaot se bambae samfala oli save kam we oli “leftemap nem blong God.”—1 Pita 2:12.
9. ?Olsem wanem yumi save folem advaes we Pol i givim (a) long Kolosi 4:5? (b) long Kolosi 4:6?
9 Aposol Pol i givim advaes se: “Long ol fasin ya we yufala i stap mekem long fes blong ol man we oli no bilif long Kraes, yufala i mas waes gud. Mo yufala i mas yusumgud ol jans we bambae yufala i gat, blong yufala i tok long olgeta.” (Kolosi 4:5) Blong eksplenem mining blong las haf blong vas ya, J. B. Lightfoot i raetem se: “Yu no mas mestem wan jans, blong talem mo mekem samting we i save mekem wok blong God i go moa.” (Mifala nomo i putum narafala raeting) Yes, yumi mas rere blong talem sam stret toktok mo mekem sam samting taem yumi gat jans blong mekem. Fasin waes olsem i joen wetem fasin blong jusum wan stret taem long dei blong mekem ol visit. ?Sipos ol man oli no agri long mesej blong yumi, hemia i from we ol man oli no gat fasin tangkyu long hem, no from we yumi kam long wan taem we i no stret? Pol i raetem tu se: “Yufala i mas tok gud wetem olgeta, long ol tok ya nomo we olgeta oli harem i gud. Mo yufala i mas save rod blong givim ansa long evri man, we i stret gud long olgeta evriwan.” (Kolosi 4:6) Samting ya i nidim fasin blong tingtinggud long ol tok blong yumi bifo we yumi talem mo trufala lav long ol man we oli stap raonabaot long yumi. Oltaem i gud yumi talemaot mesej blong Kingdom wetem ol tok we i save mekem olgeta oli harem i gud.
Respek Mo “Rere Oltaem Blong Mekem Ol Gudfala Wok”
10. (a) ?Wanem advaes aposol Pol i givim long ol Kristin we oli stap long Krit? (b) ?Olsem wanem ol Wetnes blong Jeova ol bin soem eksampel blong folem advaes blong Pol?
10 Yumi no save agensem ol rul blong Baebol. Be tu, yumi no mas rao from ol kwestin we oli no agensem ol rul we Kristin i mas obei long olgeta. Aposol Pol i raetem se: “Yu mas stap talemgud long ol man blong yu blong oli ona long ol hae man mo gavman blong olgeta. Oli mas obei long olgeta, mo oli mas stap rere oltaem blong mekem ol gudfala wok. Bambae oli no tok nogud long nem blong narafala man, mo oli no man blong rao. Oli mas man we oli save frengud long ol man, mo oltaem oli mas stap mekem i gud long ol man.” (Taetas 3:1, 2) Man ya blong raetem Baebol, E. F. Scott i raet blong tokbaot vas ya i se: “Ol Kristin oli obei long gavman, be i no hemia nomo, oli mas stap rere oltaem blong mekem ol gudfala wok. Samting ya . . . i min se, sipos wan taem i kam we i gat nid blong givhan, ol Kristin oli mas soemaot fastaem se oli intres blong givhan. Oltaem i gat ol samting i kamaot olsem wan ples we i bon olgeta long faea, sik, ol defren kaen trabol, long taem olsem ol gudfala man ples oli wantem givhan long ol man we i stap raonabaot long olgeta.” Long olgeta ples long wol i bin gat plante bigbigfala trabol we i bin kamaot mo ol Wetnes blong Jeova oli bin stap insaed long medel blong ol man we oli go fastaem blong givhan. Oli givhan i no long ol brata blong olgeta nomo be tu long olgeta we oli no stap long trutok.
11, 12. (a) ?Wanem fasin blong ol Kristin long fes blong ol haeman? (b) ?Fasin blong ona long ol haeman i joen wetem wanem long taem blong bildim ol Haos Kingdom?
11 Long sem vas ya we Pol i raetem i go long Taetas, i tokbaot fasin blong ona long ol haeman tu. Ol yangfala Kristin we oli stanap fored long jaj from oli no wantem joen long faet oli mas gat strong tingting blong wokbaot wetem fasin waes long fes blong olgeta we oli no stap long trutok. Oli save leftemap no spolem gudnem blong ol man blong Jeova from fasin blong putum klos, fasin blong olgeta, mo fasin blong toktok blong olgeta long ol haeman olsem. Oli mas ‘stretem ol kaon blong olgeta . . . Long man we i stret blong oli obei long hem, oli mas obei long hem,’ mo oli save soemaot bigfala respek taem oli ansa long olgeta.—Rom 13:1-7; 1 Pita 2:17; 3:15.
12 Tok ya “ol haeman” i go tu long ol man we gavman i putumap olgeta long taon no velej blong yumi. Naoia we ol brata oli stap bildim plante plante Haos Kingdom, i mas gat fasin blong wok wetem ol haeman long ples blong yumi. Plante taem, ol man ya oli tok nogud long ol elda. Be ripot i soemaot se long ol ples we ol memba blong kongregesen oli gat gudfala fasin joen wetem ol haeman mo oli wok wetem plan blong taon we ol haeman ya oli givim, samting ya i blokem fasin blong ol man ya blong tok nogud. Plante taem oli givim wan gudfala wetnes long ol man we fastaem oli save smol nomo no oli no save nating long ol Wetnes blong Jeova mo mesej blong olgeta.
‘Yufala i Mas Traehad Blong Gat Pis Wetem Olgeta Man’
13, 14. ?Wanem advaes Pol i givim long ol Kristin long Rom, mo olsem wanem yumi save folem long fasin fren we yumi gat wetem ol man we oli no stap long trutok?
13 Pol i givim ol advaes ya long ol Kristin we oli stap laef long medel blong ol hiten man long Rom: “Sipos i gat man we i mekem i no stret long yufala, bambae yufala i no mekem i no stret long hem bakegen. Oltaem yufala i mas traem blong mekem ol fasin we olgeta man oli luk se i stret nomo. Oltaem, long saed blong yufala, yufala i mas traehad tumas blong yufala i gat pis wetem olgeta man. Sipos wan man i mekem trabol long yufala, bambae yufala i no traem blong mekem trabol long hem bakegen. Yufala i mas livim i stap, blong God bambae i jajem hem, i givim panis long hem. From we Baebol i talem se ‘Hae God i talem se “Fasin ya blong givimbak long man we i mekem i nogud, mi nomo mi gat raet blong mekem. Mo mi bambae mi givimbak long olgeta.” ’ Mo bakegen, Baebol i talem se ‘Sipos wan enemi blong yu i hanggri, yu mas givim kakae long hem. Sipos hem i tosta, yu mas givim wora long hem. Long fasin ya, bambae yu mekem hem i sem tumas.’ Bambae yufala i no letem ol fasin nogud oli winim yufala. Yufala i mas holemstrong ol stret fasin blong yufala, blong winim ol fasin nogud.”—Rom 12:17-21.
14 I tru, taem yumi joen no wok wetem ol man we oli no stap long trutok, samtaem yumi olsem ol trufala kristin yumi faenem sam man we oli agensem yumi. Long vas antap, Pol i soemaot se rod blong wan waes man i blong traehad blong gat fasin kaen blong winim fasin agens. Olsem ol pis wud we i gat faea long hem, fasin kaen i save mekem fasin kros i godaon mo i save mekem man blong agens i kaen moa long ol man blong Jeova, maet i save mekem se hem i intres long gud nyus. Taem samting ya i hapen, gudfala fasin i winim rabis fasin.
15. ?Wetaem i impoten moa long ol Kristin blong wokbaot wetem fasin waes long fes blong ol man we oli no stap long trutok?
15 Wokbaot wetem fasin waes long fes blong olgeta we oli no stap long trutok i moa impoten long ol famle we hasban no waef i no akseptem trutok yet. Fasin blong folem ol rul blong Baebol i mekem se ol hasban, ol waef, ol papa, ol mama oli kam moa gud, mo i mekem se ol pikinini oli obei oltaem mo strong moa blong stadi long skul. Man we i no bilif i save luk paoa blong ol rul blong Baebol long hemia we i bilif. Taswe, ‘sipos wan long tufala i no bilif long tok blong God, be bambae fasin nomo blong ol memba blong famle we oli givim finis laef blong olgeta long Jeova i save pulum hem blong bilif.’—1 Pita 3:1, 2.
‘Yumi Mas Mekem i Gud Long Olgeta Man’
16, 17. (a) ?Wanem fasin blong sakrifaes we God i glad tumas long hem? (b) ?From wanem “yumi mas mekem i gud long” ol brata blong yumi mo tu long ol man we oli no stap long trutok?
16 Nambawan wok we yumi save mekem long man we i stap kolosap long yumi i blong karem mesej blong laef i kam long hem mo tijim hem long saed blong fasin fren we yumi gat wetem Jeova tru long Jisas Kraes. (Rom 5:8-11) From samting ya aposol Pol i talem long yumi se: “Yumi mas stap joen long Jisas ya, nao oltaem yumi mas stap leftemap nem blong God. Fasin ya i olsem we oltaem yumi stap kilim anamol blong givim i go long hem. From we evri taem yumi talemaot nem blong Jisas long fes blong ol man, i olsem we yumi givim presen i go long God.” (Hibrus 13:15) Pol i gohed se: “Mo yufala i mas stap mekem ol gudfala fasin, mo yufala i mas stap givgivhan long yufala. From we ol fasin ya tu oli olsem we yufala i stap kilim anamol blong givim i go long God, we hem i glad tumas long olgeta.” (Hibrus 13:16) Wetem wok blong yumi blong prij long olgeta man, yumi no mas fogetem blong “mekem ol gudfala fasin.” Samting ya i mekem ol sakrifaes blong yumi oli fulwan we God i glad tumas long olgeta.
17 Oltaem yumi wantem mekem i gud long ol brata blong yumi long saed blong speret, we maet oli gat nid long saed blong filing, long saed blong speret, mo long saed blong bodi. Pol i soemaot samting ya taem hem i raetem se: “From samting ya, oltaem, sipos yumi gat jans, yumi mas mekem i gud long olgeta man. Antap moa, yumi mas mekem olsem long olgeta ya we oli bilif long Kraes, nao oli brata blong yumi.” (Galesia 6:10; Jemes 2:15, 16) Be, yumi no mas fogetem ol tok ya se, “yumi mas mekem i gud long olgeta man.” Fasin kaen we yumi soemaot long wan memba blong famle, wan man we i stap kolosap long yumi, no wan man we i wok wetem yumi i gat paoa blong brekemdaon nogud toktok we man i mekem agens long yumi mo i save openem hat blong man ya blong lesin long trutok.
18. (a) ?Yumi mas stap longwe long ol wanem denja? (b) ?Olsem wanem yumi save yusum ol gudfala Kristin fasin blong sapotem wok blong yumi blong prij?
18 Blong mekem samting ya, yumi no save stap wanples oltaem wetem ol man we oli no stap long trutok. Ol fren olsem oli denja tumas. (1 Korin 15:33) Mo yumi no wantem fren wetem ol fasin blong wol. (Jemes 4:4) Be gudfala Kristin fasin blong yumi i save givhan long wok blong yumi blong prij. Long sam kantri i hadwok moa naoia blong toktok long man long haos blong olgeta. Sam ren haos oli blokem raon wetem sam samting mekem se yumi no save toktok wetem ol man we oli stap insaed. Long ol rij kantri oli tekem ol jans blong prij long telefon. Long plante kantri oli save prij long rod. Be, long olgeta kantri, fasin blong mekem i gud long narafala man, gudfala fasin, kaen fasin mo fasin blong givhan long ol narafala man i stopem nogud toktok mo i givim wan gudfala wetnes.
Stopem Ol Nogud Tok Blong Ol Man Blong Agens
19. (a) ?From we yumi no wantem mekem ol man nomo oli haremgud, yumi mas save se bambae yumi kasem wanem? (b) ?Olsem wanem yumi save traehad blong folem eksampel blong Daniel mo ol advaes blong Pita?
19 Ol Wetnes blong Jeova oli no man blong mekem ol man oli glad long olgeta nomo no oli fraet long ol man. (Proveb 29:25; Efesas 6:6) Nating se oli stap traehad blong soemaot nambawan eksampel blong pem takis mo oli ol man ples we oli gat gudfala fasin, oli save se ol man blong agens bambae oli tok nogud long olgeta mo talem ol gyaman toktok long saed blong olgeta. (1 Pita 3:16) Oli save samting ya, taswe oli traem blong folem eksampel blong Daniel, we ol enemi blong hem oli talem se: “Bambae yumi no save faenem wan poen agens long Daniel ya. Ating bambae yumi save faenem, be long loa blong God blong hem nomo.” (Daniel 6:5) Neva bambae yumi agensem ol rul blong Baebol blong mekem ol man oli glad. Be tu, yumi no lukaot fasin ya we man i mekem i nogud long yumi from bilif blong yumi. Yumi traehad blong gat pis wetem olgeta man mo blong folem advaes blong aposol Pita se: “From we hemia wan samting we God i wantem, se long ol stret fasin blong yufala bambae yufala i blokem ol krangke tok blong ol man we oli no gat save.”—1 Pita 2:15.
20. (a) ?Yumi save long wanem samting, mo Jisas i talem wanem blong leftemap tingting blong yumi? (b) ?Olsem wanem yumi save gohed blong wokbaot wetem fasin waes long fes long ol man we oli no stap long trutok?
20 Yumi save se fasin blong yumi blong no joen long wol i laenap fulwan wetem Baebol. Histri blong ol Kristin long faswan handred yia i sapotem samting ya. Tok blong Jisas i leftemap tingting blong yumi se: “Bambae ol samting blong wol ya oli save mekem yufala i harem nogud tumas long bodi blong yufala. Be yufala i no fraet. Mi mi winim ol samting blong wol ya finis.” (Jon 16:33) Yumi no fraet. “?Sipos yufala i stap traehad blong mekem ol gudfala fasin, hu man bambae i save spolem yufala? I no gat. Be sipos samtaem ol man oli mekem yufala i stap harem nogud long bodi blong yufala from we yufala i stap mekem ol stret fasin nomo, be long tingting blong yufala yufala i save harem gud. Bambae yufala i no fraet long ol man, yufala i no tingting tumas long olgeta. Yufala i mas mekem Kraes i Masta blong yufala, yufala i mas putumap hem i nambawan long tingting blong yufala. Mo oltaem yufala i mas stap rere blong givim ansa long ol man. Sipos man i askem long yufala from wanem yufala i putum tingting blong yufala i stap long Kraes, bambae yufala i mas rere blong talemaot be long kwaet fasin, we i gat ona long hem.” (1 Pita 3:13-16a) Taem yumi folem rod ya, bambae yumi gohed blong wokbaot wetem fasin waes long fes blong ol man we oli no stap long trutok.
Tingtingbak
◻ ?From wanem ol Wetnes blong Jeova oli mas wokbaot wetem fasin waes long fes blong ol man we oli no stap long trutok?
◻ ?From wanem ol trufala Kristin oli no gat tingting se bambae ol man blong wol oli laekem olgeta, be oli mas traem blong mekem wanem?
◻ ?Yumi mas gat wanem tingting long ol man blong wol, mo from wanem?
◻ ?Olsem wanem “yumi mas mekem i gud” i no long ol brata blong yumi nomo be tu long ol man we oli no stap long trutok?
◻ ?Olsem wanem wokbaot wetem fasin waes long fes blong ol man we oli no stap long trutok i givhan long yumi long wok blong prij?
[Tok Blong Pija Long Pej 18]
Long lefsaed: Ol trufala Kristin long Franis oli stap givhan long ol man we oli stap kolosap long olgeta afta long wan bigfala wora we i ron
[Tok Blong Pija Long Pej 20]
Kaen fasin blong ol Kristin i gat paoa blong stopem nogud toktok
[Tok Blong Pija Long Pej 23]
Ol Kristin oli mas “stap rere oltaem blong mekem ol gudfala wok”