Ol Rij Samting Oli Save Traem Bilif Blong Yu

OL RIJ samting oli save traem bilif blong wan stret man. Fasin blong wantem kam rij long plante samting i save mekem man i lusum bilif. (1 Timote 6:​9, 10) Be ol rij samting oli save traem bilif long wan narafala rod tu. Taem wan stret man i luk se plante rabis man oli stap gat ol rij samting be hem i stap trabol long laef, samting ya maet i save traem hem blong folem wan rod we i no stret. !Yes, samting ya i pulum sam long ol man blong Jeova blong oli no moa trastem gudfala rod ya blong gat wan laef we i stret!

Samting ya i hapen long Asaf, man ya blong myusek long laen ya blong Livae, long taem blong rul blong Deved king blong Isrel. Asaf i wokem sam long Ol Sam we oli stap yusum long pablik wosip. Mo hem i stap talem ol profet tok tu wetem Heman mo Jedutan, hem i yusum myusek blong presem mo talem tangkyu long Jeova God. (1 Kronikel 25:1; 2 Kronikel 29:30) Nating se Asaf i mekem ol gudfala wok ya, long Ol Sam 73, Asaf i soem se ol rij samting blong ol nogud man i kam olsem wan bigfala traem long bilif blong hem.

Nogud Tingting Blong Asaf

“Tru, God i gud tumas long yumi ol man Isrel, long yumi ya we tingting blong yumi i klin gud. Be mi, kolosap tingting blong mi i no moa stap long hem, bilif blong mi kolosap i lus.” (Ol Sam 73:​1, 2) Long ol tok ya, Asaf i talemaot se Jeova i stap mekem i gud long nesen ya blong Isrel. Antap moa, hem i gud long olgeta ya we ‘tingting blong olgeta i klin gud,’ from we oli wantem tumas blong mekem wosip i go long God nomo mo blong talemaot tabu nem blong hem. Sipos yumi gat tingting ya, bambae yumi presem Jeova long ol gudfala toktok blong yumi long saed blong hem nating sipos yumi jelas from ol rij samting blong ol nogud man no narafala samting we i olsem.​—Ol Sam 145:​1, 2.

Nating se Asaf i luksave gud fasin blong Jeova, kolosap hem i lego long rod blong stret fasin. I olsem we hem i glis long wan graon we i sofsof long taem blong wan longfala resis. ?From wanem bilif blong hem i kam slak olsem? Hem i eksplenem se: “From we taem we mi luk ol man nogud ya we ol samting long laef blong olgeta oli stap gogud nomo, nao oli praod from, mi mi jelas long olgeta. Olgeta ya oli no stap harem nogud long bodi blong olgeta, oli no stap sik, [bel blong olgeta i fatfat, “NW”]. Oli no stap harem nogud olsem ol narafala man, oli no stap kasem ol trabol olsem we ol narafala man oli stap kasem.”​—Ol Sam 73:​3-5.

Ol rij samting long laef blong ol nogud man i mekem Asaf i jelas long olgeta. I luk olsem we oli stap gat pis long laef blong olgeta, nating se oli kasem ol rij samting ya long ol kruked fasin. (Lukluk Ol Sam 37:1.) Nating se oli gat ol nogud fasin, i luk olsem we oli stap sefgud. !Mo, i luk olsem we oli no stap harem i soa tumas long bodi blong olgeta taem oli ded! Samtaem oli ded long pis nomo mo oli no fraet, oli no tingbaot wan nid long saed blong speret. (Matyu 5:3) Defren nao se, sam man blong God oli stap harem i soa long ol strongfala sik mo ded, be God i givhan long olgeta, mo oli gat wan gudfala hop blong laef bakegen long ded.​—Ol Sam 43:​1-3; Jon 5:​28, 29.

Plante nogud man oli no gat trabol wetem bodi blong olgeta we i save blokem olgeta, taswe oli stap haremgud long ol fulap kakae blong olgeta. “Bel blong olgeta i fatfat,” oli gat big bel. Mo tu, olgeta ya “oli no stap harem nogud olsem ol narafala man,” from we oli no olsem plante man, olgeta ya oli no stap traehad long laef blong olgeta blong kasem ol samting we oli nidim long laef. Asaf i talem se olgeta ya “oli no stap sik.” Antap moa olgeta oli stap ronwe long ol traem we ol gudfala man ya bifo oli stap kasem from we oli stap folem ol stret fasin blong Jeova long rabis wol ya blong Setan.​—1 Jon 5:19.

From we ol nogud man oli kasem plante rij samting, Asaf i gohed blong tokbaot olgeta se: “Nao oli stap praod tumas from, nao fasin ya blong praod blong olgeta i olsem bidbid we oli stap hangem long nek blong olgeta, mo fasin blong faet blong olgeta i olsem klos blong olgeta. [Ol ae blong olgeta i raon gud from we oli fatfat, “NW”]. Oltaem ol rabis samting i stap kamaot long tingting blong olgeta, oltaem maen blong olgeta i fulap long ol rabis plan. Oli stap laf long ol narafala man mo oli stap tokbaot ol samting nogud. Oli praod tumas, mo oli stap mekem plan blong mekem ol narafala man oli stap aninit long han blong olgeta. Oli stap tok nogud long God ya we i stap long heven, mo oli stap mekem flas blong olgeta se oli bos long ol man long wol.”​—Ol Sam 73:​6-9.

Ol nogud man oli flas tumas “nao fasin ya blong praod blong olgeta i olsem bidbid we oli stap hangem long nek blong olgeta,” mo oli gat tumas fasin blong faet mekem se i “olsem klos blong olgeta.” Oli wantem folem prapa tingting blong olgeta, taswe oli stap daonem ol narafala man. Ol ae blong ol nogud man ya oli no soem se oli slak from we oli no kakae gud be oli “raon gud from we oli fatfat,” oli solap from we oli stap kakae tumas. (Proveb 23:20) From we oli stap win long ol rabis plan blong olgeta, taswe “oltaem maen blong olgeta i fulap long ol rabis plan.” Oli stap tokbaot kruked fasin blong olgeta long fasin flas, “blong mekem ol narafala man oli stap aninit long han blong olgeta.” !Yes, ‘oli stap tok nogud long heven, mo oli stap mekem flas blong olgeta long wol’! Oli no gat respek long eni man we i stap long heven no long wol, oli stap tok nogud long God mo gyaman long ol man.

I klia se, i no Asaf nomo we ol samting ya we hem i stap luk oli traem hem. Hem i talem se: “Nao ol man blong God tu oli stap folem olgeta, mo oli bilif tumas long olgeta samting ya we ol man ya oli stap talem. Ol man nogud ya oli talem se ‘God ya we i Antap Tumas bambae i no save. !Hem bambae i no save faenemaot ya!’ ” (Ol Sam 73:​10, 11) Vas ya long Hibru i save minim se from we i luk olsem ol nogud man oli stap haremgud, nao sam long ol man blong God oli tekem wan rong tingting mo oli kam olsem ol man ya blong brekem loa, oli stap talem se: ‘God i no save wanem i stap hapen mo bambae hem i no agensem fasin blong brekem loa.’ Mo tu, taem oli luk ol nogud man oli stap mekem ol rabis fasin we i olsem se oli no save kasem panis from, samting ya i olsem we oli dring wan posen we i konkon, biaen i pusum ol stret man blong oli askem se: ‘?Olsem wanem God i save letem ol samting olsem i stap? ?Hem i stap luk samting we i stap hapen no no gat?’

Taem Asaf i skelem laef blong hem wetem ol nogud man, hem i talem se: “Hemia nao fasin blong olgeta. Olgeta oli gat plante samting mo oltaem oli stap tekem plante samting moa. . . . !Yu luk! Mi mi stap holem tingting blong mi i klin, mi no stap mekem sin, be blong nating nomo. Oltaem yu yu stap mekem mi mi harem nogud, i stat long moning, gogo i kasem long sapa. Evri moning, yu yu stap panisim mi.” (Ol Sam 73:​12-14) Asaf i harem se i blong nating nomo blong hem i stap folem wan laef we i klin. Ol nogud man ya oli kam rij, i olsem we “oli stap tekem plante samting moa” long kruked fasin. I olsem we oli stap ronwe long panis blong ol nogud samting we oli stap mekem, be Asaf i kasem trabol “stat long moning gogo kasem long sapa”​—stat taem hem i wekap long moning gogo hem i slip long naet. Hem i harem olsem we Jeova i stap stretem hem evri moning. From we i luk olsem se samting ya i no stret, taswe hem i traem bilif blong Asaf.

Jenisim Tingting

Biaen taem Asaf i luksave se tingting blong hem i no stret, hem i talem se: “Be sipos mi mi stap tok olsem, hemia i min se mi mi no man blong yu. Mi traem tingting long ol samting ya be i had tumas long mi, kam kasem we mi go insaed long haos blong yu, nao mi luksave ol samting we bambae i kasem ol man nogud. Bambae yu yu putum olgeta long ol ples we i glis, bambae yu mekem olgeta oli foldaon, oli kam nogud olgeta. Bambae yu spolem olgeta kwiktaem nomo, bambae oli godaon long ples we i nogud olgeta. Masta bambae oli olsem drim, we long moning i lus. Taem yu yu girap, olgeta ya bambae oli lus wantaem nomo.”​—Ol Sam 73:​15-20.

I gud we Asaf i no talemaot wan komplen, from we sipos hem i talemaot se, i blong nating nomo blong mekem wok blong Jeova, samting ya i save daonem tingting blong olgeta ya we oli stap wosip tugeta olsem famle blong hem no samting ya i save daonem bilif blong olgeta. !I gud moa blong stap kwaet mo mekem olsem Asaf i mekem! Blong luksave from wanem i luk olsem we ol nogud man oli stap ronwe long panis taem oli stap mekem ol rabis fasin be ol stret man oli stap harem nogud, hem i go long haos blong God. Long ples ya nao long medel blong ol man we oli wosip long Jeova, Asaf i save stap kwaet mo tingting dip, nao tingting blong hem i jenis. Taswe tede, sipos yumi no kasem save long ol samting we yumi luk, i gud tu blong yumi lukaot ansa blong ol kwestin ya blong yumi long fasin joen wetem ol man blong God be yumi no mas stap yumi wan.​—Proveb 18:1.

Asaf i luksave nao se God i putum ol man nogud long “ples we i glis.” From we laef blong olgeta i stap long ol samting we oli gat, oli stap long denja, bambae oli foldaon kwiktaem. Mo biaen, bambae oli ded taem oli kam olfala, mo ol rij samting blong olgeta bambae oli no save mekem laef blong olgeta i kam longfala moa. (Ol Sam 49:​6-12) Ol rij samting blong olgeta bambae i lus kwiktaem olsem wan drim we i lus kwiktaem. Mo tu bambae oli save kasem panis we i stret long olgeta, bifo we oli kam olfala taem oli kasem frut blong rabis fasin we oli planem fastaem. (Galesia 6:7) From we oli tanem baksaed long Hemia we i save givhan long olgeta, nao oli stap we i no gat help, oli no gat hop. Taem Jeova i agensem olgeta, bambae hem i agensem “drim” blong olgeta​—flas mo haenem blong olgeta.

Lukaotgud Long Tingting Blong Yu

From we Asaf i no tingtinggud long samting we hem i luk, nao hem i talemaot se: “Taem we oli spolem tingting blong mi, mo oli mekem mi mi harem nogud tumas, mi mi krangke, mi olsem anamol nomo, i strong blong mi save tingting blong yu. Be oltaem mi mi stap kolosap long yu, mo yu stap holem mi long han blong mi. Yu yu stap lidim mi long ol toktok blong yu, mo biaen, bambae yu ona long mi, yu tekem mi mi go stap wetem yu.”​—Ol Sam 73:​21-24.

Tingting we i stap long ol rij samting blong ol nogud man mo trabol blong ol stret man i save spolem hat blong wan man no i mekem hem i kros. Dip insaed​—long ol kidni blong hem—​trabol blong Asaf long saed blong laef ya i givim bigfala soa long hem. Long lukluk blong Jeova, hem i olsem wan krangke anamol we i stap tingting long saed blong ol filing blong bodi nomo. Be, Asaf ‘i stap kolosap long God oltaem, mo God i stap holem hem long han blong hem.’ Sipos yumi mekem sin long tingting blong yumi be nao yumi lukaot advaes blong Jeova olsem Asaf i mekem, bambae God i holem han blong yumi, blong i sapotem yumi mo lidim yumi. (Lukluk Jeremaea 10:23.) Yumi save kasem wan gudfala fyuja sipos yumi mekem ol advaes blong hem oli wok long laef blong yumi. Maet samtaem yumi save harem nogud from sem, be Jeova bambae i jenisim i givim ‘ona long yumi,’ no i leftemap yumi.

Asaf i luksave nid blong hem i dipen long Jeova, nao i gohed i se: “God, long heven, yu nomo yu blong mi. ?Wanem moa bambae mi save wantem? ?Mo from we yu yu blong mi, wanem samting moa bambae mi save wantem long graon ya? Tingting blong mi mo bodi blong mi i save kam slak, be yu yu paoa blong mi, yu nomo nao we mi mi wantem, oltaem long laef blong mi. God, ol man we oli lego yu, mi mi savegud se bambae oli lus. Yu bambae yu spolem olgeta ya we oli no moa holem promes we oli mekem wetem yu. Hae God, yu yu Masta blong mi. Taem we mi mi kam, mi stap kolosap long yu, hemia i gud tumas long mi. Yu yu sefples blong mi, yu yu stap blokem mi, mo oltaem bambae mi mi stap talemaot olgeta samting we yu yu mekem.”​—Ol Sam 73:​25-28.

Olsem Asaf, yumi no gat narafala man blong yumi go long hem blong stap sefgud mo haremgud, be Jeova nomo. (2 Korin 1:​3, 4) Taswe i nogud yumi stap wantem tumas ol rij samting blong ol narafala man, i gud yumi mekem wok blong God mo hivimap ol sas samting long heven. (Matyu 6:​19, 20) Yumi mas wantem moa blong mekem Jeova i glad long yumi. Nating se tingting mo bodi blong yumi i save kam slak, hem bambae i givim paoa long yumi mo bambae hem i mekem hat blong yumi i stap gud blong yumi no save lusum hop mo strong tingting long medel blong ol trabol ya. Fasin fren wetem Jeova i wan sas samting we yumi save kasem. Sipos yumi lego long hem bambae bigfala trabol i save kasem yumi wetem ol narafala man we oli bin lego hem finis. Be, olsem Asaf, i gud yumi kam kolosap long God mo putum ol wari blong yumi long hem. (1 Pita 5:​6, 7) Samting ya i leftemap yumi long saed blong speret mo i pusum yumi blong talemaot ol gudfala wok blong Jeova long ol narafala man.

Stap Holemstrong Long Jeova

Asaf i harem nogud from we hem i luk ol nogud man oli stap haremgud long laef long Isrel, hemia kantri blong hem. Long medel blong ol trufala man blong Jeova, i gat “ol man nogud” we oli stap tok flas, oli praod, oli gat raf fasin, oli stap laf jikim narafala, oli man blong stil, mo oli stap talem se God i no save faenemaot ol samting we oli stap mekem. (Ol Sam 73:​1-11) !Wan woning ya! Blong mekem Jeova i glad long yumi, yumi mas blokem yumi wan blong yumi no gat fasin olsem, fasin flas, raf fasin, laf jikim narafala, mo gyaman fasin. Olsem Asaf, i gud ol man blong Jeova oli ‘kam long haos blong God’ taem oli hivap wanples oltaem wetem ol trufala man we oli stap wosip long Hem. Yes, i gud olgeta we oli laekem Jeova oli ‘stap kolosap long God,’ oli dipen long hem blong hem i givhan long olgeta taem oli kasem ol trabol, i nomata wanem ol narafala man oli stap talem no oli mekem.​—Ol Sam 73:​12-28; 3 Jon 1-10.

I tru ya, ol rij samting blong ol nogud man oli save traem bilif blong yumi, olsem we i mekem long Asaf. Be, yumi save winim traem ya sipos yumi stap laef wetem tingting blong mekem wok blong Jeova. Bambae yumi kasem pei long wok ya, from we ‘God i stap mekem i stret nomo. Mo hem i no save fogetem ol wok ya we yumi stap mekem. Hem bambae i tingbaot we yumi laekem hem tumas.’ (Hibrus 6:10) Ol traem blong yumi bambae “oli smol nomo, mo oli no save stap longtaem” taem yumi skelem wetem pei we bambae yumi kasem. (2 Korin 4:17) Yes ol 70 yia no 80 yia we yumi stap harem nogud long laef oli olsem win nating we i lus long maot blong yumi, taem yumi skelem wetem hapi laef blong olwe we Jeova i promes blong givim long ol trufala man blong hem.​—Ol Sam 90:​9, 10.

Neva yumi mas letem tingting ya se ol nogud man oli haremgud long ol rij samting be yumi stap harem nogud from we yumi mekem fasin we i stret, i blokem yumi blong yumi no soem bilif ya we hem i wan frut blong tabu speret blong God. (Galesia 5:​22, 23; 1 Pita 3:​13, 14) Setan bambae i glad sipos yumi mekem olsem ol nogud man ya, we plante taem oli stap kasem ol rij samting from we oli stap brekem ol loa blong God. Be defren, yumi ona long nem blong Jeova taem yumi blokem ol traem we oli pulum yumi blong lego ol stret rul blong God. (Sefanaea 2:3) I nogud tingting blong yumi i trabol from we ol nogud man oli stap kasem plante samting, olgeta ya oli stap kasem ol rij samting long saed blong bodi nomo. ?Mo yu ting se samting ya i impoten? No gat, hem i no kolosap nating long ol rij samting long saed blong speret we olgeta ya we oli stap soemaot bilif long Hae Masta Jeova oli stap kasem.