Ripot Long Wok Blong Kingdom

Gat Respek Long Laef Se Hem i Tabu

BAEBOL i soemaot se blad i nambawan tumas long ae blong God mo Baebol i blokem fasin blong yusum blad long fasin we i no stret. (Levitikas 17:14; Ol Wok 15:​19, 20, 28, 29) From ol loa ya blong Baebol, ol Wetnes blong Jeova oli no akseptem blad transfyusen.

Blong givhan long ol dokta mo ol man we oli wok long ol hospital blong kasem save long bilif blong ol Wetnes blong Jeova long bisnes ya mo blong luksave se ol Wetnes bambae oli akseptem ol narafala fasin blong fiksimap sik, Watch Tower Society i bin putumap ‘Hospital Liaison Committees’ (HLC)a long ol defren kantri. Ol memba blong ol komiti ya oli visitim ol hospital blong toktok wetem ol man we i lukaot long hospital. I no longtaem, long 12 taon long Polan, oli bin mekem bitim 200 miting, we i gat bitim 500 dokta oli joen long ol miting ya, bighaf blong olgeta, oli ol hed blong ol klinik no ol man we oli lukaot long ol rum blong ol hospital. Store ya i kamaot long wan taem blong visit olsem:

“Nambawan samting i kamaot long miting long ‘Cardio-Surgical Clinic’ long Sabse. Stat long 1986, tim we i stap wok long klinik ya oli bin katem ol brata blong yumi from sik blong olgeta we oli no yusum blad. Kam kasem naoia, oli bin yusum sem fasin ya blong katem 40 long olgeta. Klinik ya i rere blong tekem ol sikman long olgeta ples long Polan mo blong ol narafala ples tu. Afta long wan toktok blong 50 menet, wan man we i hed blong wan rum long hospital i talemaot ol memba blong HLC long wan grup blong ol sikman mo i talem se: ‘Ol man ya oli ol Wetnes blong Jeova. Oli wokgud wetem klinik blong yumi, mo oli givhan long yumi. Oli no givhan nomo long ol man we oli gat sem bilif wetem olgeta be ol narafala sik man tu oli haremgud from help blong olgeta. Tangkyu tumas long ol Wetnes blong Jeova, mifala i save se mifala i save katem plante man from bigfala sik blong hat blong olgeta we mifala i no yusum blad.

“‘Eksampel, mifala i katem woman ya from sik blong hem [i poen i go long sik woman ya] we mifala i no yusum blad, mo bambae hem i kamaot long hospital long Mande. Mi wantem talem se naoia mifala i no yusum tumas blad olsem bifo from fasin ya i denja tumas. Hem i joen wetem AIDS, hepataetas, mo wan sik we i tekem longtaem blong finisim.

“‘Mi wan Katolik, be oltaem long haos blong mifala, mifala i akseptem tingting blong ol narafala man. Wan dei mi wetem ol pikinini blong mi, mifala i wokbaot i go long Slaski Stad. Bifo finis, oli no moa yusum stad ya, be mifala i luk se hem i jenis bitim bifo. Mi askem wan long ol wokman long ples ya se olsem wanem stad ya i jenis. Hem i talem se ol man we oli lukaot long ples ya oli no moa gat hop blong fiksimap stad ya, be ol Wetnes blong Jeova oli rentem, mo oli mekem i kam gud bakegen.

“‘Taswe ol Wetnes blong Jeova oli ol man we yumi save lanem plante samting long olgeta. Mi ting se long rum ya yumi mas akseptem tingting blong ol narafala.’ Ale, hem i poen i go long wan Wetnes we bambae oli katem hem from sik blong hem long sam dei we i kam, mo i talem se: ‘Woman ya i wan long ol Wetnes blong Jeova, mo bambae mifala i katem hem from sik blong hem we mifala i no yusum blad.’”

Ol Wetnes blong Jeova oli no traem blong fosem ol narafala man blong folem bilif blong olgeta, be oli folem eksampel blong ol aposol mo oli ‘mas obei long God, oli no save obei long man nomo.’ (Ol Wok 5:29) Hemia i joen tu wetem fasin blong gat respek long blad. Oli gat fasin tangkyu taem ol narafala oli gat respek long bilif blong olgeta long bisnes ya.

[Futnot]