?Yu Save Laef Kasem Hamas Yia?

PLANTE long yumi bambae oli agri se i gat ol problem long laef. Be yumi glad yet blong stap laef. Yumi no glad sipos yumi stap laef long ol yia we yumi pikinini nomo, no sipos laef blong yumi i no longfala. Nating se yumi wantem olsem, yumi no save ronwe long ded. ?I tru?

?I gat rod blong mekem se ded i no kasem yumi kwiktaem? ?Laef blong yumi i save kam longfala moa?

?Laef i Save Kam Longfala Moa?

Long 1990 wan nyus ripot i talemaot se laef blong man i save kam longfala moa kasem “handred mo ten yia.” I tru hemia wan tok we i lelebet olsem ol tok blong Moses, man blong raetem Ol Sam long Baebol, i se: “Yia blong mifala i save kasem sevente nomo, no sipos bodi blong mifala i stap strong oltaem, mifala i save kasem eite, be oltaem mifala i kasem trabol, mifala i stap harem nogud nomo. Laef blong mifala i save finis kwiktaem nomo, nao mifala i lus olgeta.” (Ol Sam 90:​10, King James Version) Taswe Baebol i givim 70 no 80 yia olsem medel namba blong ol yia we man i save laef long hem. ?Be, tede wan man i save tingting blong kasem hamas yia long laef blong hem?

Wan ripot we WHO (World Health Organization) i givim long 1992 i soem se medel namba blong laef blong ol man long ful wol i save kasem 65 yia nomo. Long saed blong WHO, “oli ting se namba ya bambae i gru olsem fo manis evri yia long ol nekis faef yia we oli kam, samting ya i kamaot from namba blong ol pikinini we oli stap ded i go daon.” Time magasin i talem se, nating sipos wan merikel long saed blong meresin i blokem ol man blong oli no ded bifo oli kasem 50, be long Amerika, “medel namba blong yia we man i save kasem bambae i gru long 3 1/2 yia nomo.”

?From Wanem Laef i Sot Tumas Olsem?

Dokta Jan Vijg blong “Netherlands’ Institute of Experimental Gerontology” i talem strong se, olsem sam kaen sik oli save kamaot from we wan samting i rong long plan blong ol sel long bodi blong man, sem mak fasin blong kam olfala i kamaot from ol samting long bodi we man i kasem long blad blong papa mama. Sam man blong stadi oli talem se yumi save laef long plante yia moa sipos oli save jenisim “plante smosmol samting long blad (genes)” taem yumi stap kam olfala moa. Sam narafala oli talem se tingting olsem i “isi nomo blong talem, be i strong tumas blong mekem.”

Nating se i olsem wanem, ol sayentis oli talemaot se “i luk olsem se i gat wan kaen mak we laef blong man i no save bitim i stap finis long ol sel we oli stap long bodi blong man,” olsem ripot ya blong Time magasin i talem. Ol man we oli bilif se “God i wokem yumi mo plan i stap finis long bodi blong yumi blong gohed blong stap laef,” oli luksave tu se “i gat wan samting i stap hapen blong spolem.” I tru, taem yumi kasem 65, 70, no 80 yia no sam moa yia, “kwiktaem laef blong yumi i finis” yumi ded, olsem Baebol i talem.

Be, Kristin aposol Pol long faswan handred yia K.T. i gat strong tingting blong talem se: “Mo laswan blong ol enemi ya we God bambae i winim olgeta, hemia samting ya ded.” (1 Korin 15:26) ?Olsem wanem ded i save finis? ?Be sipos i tru, olsem wanem yu save winim nogud tingting taem wan fren no famle i ded tede?