Olgeta We Oli Gat Tingting Daon Oli Glad
“God i agensem olgeta we oli flas, be i stap givhan long gladhat blong hem, long olgeta we tingting blong olgeta i stap daon.”—1 PITA 5:5.
1, 2. Long Bigfala Toktok blong Jisas long Hil, ?olsem wanem hem i joenem fasin glad wetem tingting daon?
?FASIN glad i joen wetem tingting daon? Long toktok ya we i bigfala olgeta, Jisas Kraes, Pikinini blong God, man we i hae moa long olgeta man, i tokbaot naen rod blong fasin glad. (Matyu 5:1-12) ?Jisas i joenem fasin glad wetem tingting we i stap daon? Yes, hem i mekem, from tingting daon i joen wetem plante long ol fasin glad we hem i tokbaot. Eksampel, wan man i mas gat tingting daon blong luksave se hem i nidim ol samting long saed blong speret. Ol man ya nomo we oli gat tingting daon, oli hanggri mo oli tosta from stret fasin. Mo ol flas man oli no kwaet man mo oli no gat sore, mo oli no man blong mekem pis.
2 Ol man we tingting blong olgeta i stap daon oli glad from we i gud mo i stret blong gat tingting daon. Mo tu, ol man we tingting blong olgeta i stap daon oli glad from i waes blong gat tingting daon; fasin ya i mekem se yumi frengud wetem Jeova God mo ol Kristin brata sista. Antap moa, ol man we tingting blong olgeta i stap daon oli glad from we tingting daon i wan fasin blong soem lav.
3. ?From wanem yumi mas gat tingting daon blong yumi save mekem stret fasin?
3 ?From wanem yumi nidim tingting daon blong gat stret fasin? Wan samting, from yumi evriwan yumi bon wetem sin mo plante taem yumi mekem mastik. Aposol Pol i tokbaot hem wan se: “Mi mi save finis we fasin blong mekem ol gudgudfala samting, hem i no stap long tingting blong mi nating. Mi mi min se i no fasin blong mi we mi man, blong mi mekem ol gudgudfala samting. From we i tru, mi gat tingting blong mi, se mi wantem mekem ol gudgudfala fasin, be mi no naf blong mekem.” (Rom 7:18) Yes, yumi evriwan yumi sinman mo yumi stap longwe long ol gudgudfala fasin blong God. (Rom 3:23) Fasin blong tok tru mo klia bambae i blokem yumi blong no kam flas. I nidim tingting daon blong talemaot wan mastik, mo bambae stret fasin i givhan long yumi blong akseptem se yumi bin mekem wan mastik. From we plante taem yumi no kasem mak we yumi traehad blong kasem, yumi gat gudfala risen blong gat tingting daon.
4. ?Wanem risen we i stap long buk blong 1 Korin 4:7 we i save pusum yumi blong gat tingting daon?
4 Aposol Pol i givim wan narafala risen long yumi from wanem stret fasin i mas mekem yumi gat tingting daon. Hem i talem se: “?Weswe? ?Yufala i hae moa long ol narafala man? ?Yufala i gat sam samting blong yufala we God i no givim long yufala? !No gat! ?Be weswe yufala i stap tok flas from ol samting ya we God i givim long yufala olsem we oli blong yufala fastaem?” (1 Korin 4:7) Samting ya i klia nomo, fasin blong akseptem ona we i leftemap yumi wanwan, fasin flas from ol samting we yumi gat, ol save, no ol wok we yumi mekem, oli no stret fasin ya. Stret fasin i mekem se voes blong hat mo tingting blong yumi i klin long fored blong God, ‘oltaem yumi save mekem i stret nomo’.—Hibrus 13:18.
5. ?Olsem wanem stret fasin i save givhan long yumi tu taem yumi bin mekem wan mastik?
5 Stret fasin i givhan long yumi blong gat tingting daon taem yumi mekem wan mastik. Bambae fasin ya i mekem se yumi rere moa blong agri se yumi mekem wan mastik, bitim we yumi traem blong mekem eskyus from rabis fasin blong yumi no pusumaot mastik ya i go long narafala man. Olsem nao, Adam i talem se i fol blong Iv, be Deved i no talem se i fol blong Batsiba, hem i no talem se, ‘I no stret blong Batsiba i swim long klia ples olsem. Mi no save ronwe long traem ya.’ (Jenesis 3:12; 2 Samuel 11:2-4) Tru ya, yumi save talem se long wan saed, stret fasin i givhan long yumi blong gat tingting daon; mo long narafala saed, tingting daon i givhan long yumi blong gat stret fasin.
Bilif Long Jeova i Givhan Long Yumi Blong Gat Tingting Daon
6, 7. ?Olsem wanem bilif blong yumi long God i save givhan long yumi blong gat tingting daon?
6 Bilif long Jeova bambae i givhan long yumi tu blong gat tingting daon. Fasin blong luksave bigfala paoa blong Man ya we i Wokem olgeta samting, Hae Rula blong Heven mo Wol, bambae i rili blokem yumi blong no gat tingting ya se yumi moa gud bitim narafala. !Profet Aesea i mekem yumi tingbaot gud samting ya! Long Aesea 40:15, 22, yumi ridim se: “!Yu luk! Ol nesen oli olsem wan drop wora long wan baket; mo oli olsem smok blong graon antap long skel . . . I gat wan Man i stap antap long raon blong wol ya, mo hem i luk ol man we oli stap long hem olsem ol lokis nomo.”
7 Bilif long Jeova bambae i givhan long yumi tu taem narafala i mekem i no stret long yumi. I nogud tingting blong yumi i trabol tumas from bisnes ya, be bambae yumi gat tingting daon blong wet long Jeova, olsem man blong raetem Ol Sam i talem long yumi long Ol Sam 37:1-3, 8, 9. Aposol Pol i tokbaot sem poen se: “Sipos wan man i mekem trabol long yufala, bambae yufala i no traem blong mekem trabol long hem bakegen. Yufala i mas livim i stap, blong God bambae i jajem hem, i givim panis long hem. From we Baebol i talem se ‘Hae God i talem se “Fasin ya blong givimbak long man we i mekem i nogud, mi nomo mi gat raet blong mekem. Mo mi bambae mi givimbak long olgeta.”’”— Rom 12:19.
Tingting Daon—Waes Rod
8. ?From wanem tingting daon i mekem yumi fren gud wetem Jeova?
8 I gat plante risen we i soem from wanem i waes blong gat tingting daon. Wan se, olsem yumi luk finis, fasin ya i mekem yumi frengud wetem Man we i Wokem yumi. Tok blong God i talem stret long Proveb 16:5 se: “Eni man we hat blong hem i flas, hem i wan samting we Jeova i no laekem nating.” Mo tu yumi ridim long Proveb 16:18 se: “Fastaem man i flas, biaen bambae hem i foldaon bigwan, mo tingting we i go antap tumas, biaen i mekem man i no wokbaot stret.” Maet kwiktaem no i tekem longtaem lelebet, be bambae ol flas man oli kasem trabol. Bambae i mas olsem from samting we yumi ridim long 1 Pita 5:5 se: “Yufala i mas mekem tingting blong yufala i stap daon. Nao long fasin ya, yufala i save givhan gud long yufala. Baebol i talem se ‘God i agensem olgeta we oli flas, be i stap givhan long gladhat blong hem, long olgeta we tingting blong olgeta i stap daon.’” Bambae yu faenem semfala poen ya long parabol we Jisas i talem long saed blong wan Farisi mo wan man blong tekem mane blong takis we wanwan long tufala i stap prea. Man ya blong tekem mane blong takis nao i stret man long fes blong God.—Luk 18:9-14.
9. ?Olsem wanem tingting daon i save givhan long yumi long taem blong trabol?
9 I waes blong gat tingting daon from tingting daon i mekem i moa isi long yumi blong folem advaes we yumi faenem long Jemes 4:7 se: “Yufala i mas putum yufala i stap daon, aninit long han blong God.” Sipos yumi gat tingting daon, yumi no save gat fasin agens taem Jeova i letem yumi blong harem nogud long wan trabol. Tingting daon i save mekem se yumi harem gud long ol samting we yumi gat mo blong stanap strong. Wan flas man i no harem gud, oltaem hem i wantem moa, mo i gat fasin agens taem hem i kasem trabol. Long defren fasin, wan man we i gat tingting daon i stanap strong taem hem i kasem ol hadtaem mo ol traem, olsem Job i mekem. Job i harem nogud from hem i lusum olgeta samting blong hem mo hem i kasem wan sik we i mekem hem i harem nogud tumas, mo biaen waef blong hem i givim advaes long hem blong folem wan flas rod, se: “!I moa gud yu tok nogud long nem blong God, mo yu ded!” ?Job i ansa olsem wanem? Baebol i talem long yumi se: “Hem i talem long woman blong hem se: ‘Yu yu toktok olsem wan long ol krangke woman we i stap toktok. ?I stret we yumi save akseptem ol gudfala samting long trufala God mo yumi no save akseptem ol nogud samting long hem tu?’ Long ol samting ya, Job i no mekem sin wetem maot blong hem.” (Job 2:9, 10) From Job i gat tingting daon, hem i no gat fasin agens be long waes fasin, hem i akseptem ol samting we Jeova i letem blong oli kam traem hem. Mo biaen, hem i kasem bigfala pei.—Job 42:10-16; Jemes 5:11.
Tingting Daon i Mekem Yumi Fren Gud Wetem Ol Narafala
10. ?Olsem wanem tingting daon i mekem se yumi fren gud moa wetem ol Kristin brata mo sista blong yumi?
10 I waes blong gat tingting daon from fasin ya i mekem yumi fren gud wetem ol Kristin brata sista blong yumi. Aposol Pol i givim gudfala advaes ya long yumi se: “Bambae i no gat long yufala, we wan man i mekem wan samting blong leftemap hem nomo, no blong hem bambae i save tok flas from. Yufala i mas mekem tingting blong yufala i stap daon, mo yufala i mas stap luk ol narafala man olsem we oli gud moa long yufala. Mo yufala evriwan i mas stap luklukaotgud long ol bisnes blong yufala evriwan, i nogud yufala wanwan i stap lukaot long ol bisnes blong yufala nomo.” (Filipae 2:3, 4) Long waes fasin, tingting daon bambae i blokem yumi blong no gat fasin ya blong traem kasem mak blong ol narafala no blong traem winim narafala. Ol tingting olsem oli mekem plante problem long yumi mo ol Kristin brata sista blong yumi.
11. ?From wanem tingting daon i save givhan long yumi blong no mekem mastik?
11 Plante taem bambae tingting daon i givhan long yumi blong no mekem mastik. ?Olsem wanem? From we tingting daon bambae i givhan long yumi blong no trastem yumi bitim mak. Long defren fasin, bambae yumi luksave advaes blong Pol long 1 Korin 10:12 se: “Man we i ting se i stap stanap strong, hem i mas lukaot gud blong bambae i no foldaon bakegen.” Wan flas man i trastem hem wan oltaem, ale i isi blong hem i mekem ol mastik from ol samting raonabaot long hem i gat paoa long hem no ol slak fasin blong hem wan.
12. ?Tingting daon bambae i pusum yumi blong folem wanem rul blong Baebol?
12 Bambae tingting daon i givhan long yumi blong obei long rul ya blong ona long narafala. Long Efesas 5:21, yumi kasem advaes ya se: “Yufala Kristin man mo woman, yufala i mas ona long yufala, from we yufala i stap onagud long Kraes.” ?I tru se, yumi evriwan yumi mas ona long narafala? Yes. Ol pikinini oli mas ona long papa mama blong olgeta, ol waef oli mas ona long ol hasban blong olgeta, mo ol hasban oli mas ona long Kraes. (1 Korin 11:3; Efesas 5:22; 6:1) Ale, long eni Kristin kongregesen, evriwan, ol man blong givhan tu, oli mas soem ona long ol elda. Mo i tru tu se ol elda oli mas ona long slef we i stret mo waes, speseli long saed blong seket elda we hem i wok long nem blong slef ya. Mo bakegen, seket elda i mas ona long distrik elda, mo distrik elda i mas ona long Branj Komiti long kantri we hem i stap wok long hem. ?Olsem wanem long ol memba blong Branj Komiti? Oli ‘mas onagud long wanwan long olgeta’ mo tu long Hed Kampani, we, i stap wok long nem blong ‘slef ya we i stret mo waes’ mo grup ya tu we i olsem ‘slef’ i mas stap aninit long Jisas, King we i tekem jea blong hem finis. (Matyu 24:45-47) Olsem long ol komiti blong ol elda, ol memba blong Hed Kampani oli mas gat respek long tingting blong narafala mo ol samting we oli talem. Eksampel, wan i save ting se hem i gat wan gudfala tingting. Be sipos plante oli no agri long toktok blong hem, hem i mas livim bisnes ya nomo. Tru ya, yumi evriwan yumi nidim tingting daon, from we yumi evriwan yumi mas stap aninit long han blong narafala.
13, 14. (a) ?Long wanem spesel taem bambae tingting daon i givhan long yumi? (b) ?Pita i soem wanem eksampel long saed blong akseptem advaes?
13 Yumi luksave se i waes blong gat tingting daon, speseli from we tingting daon i mekem i moa isi long yumi blong akseptem advaes mo fasin blong stretem. Samtaem evriwan long yumi i nidim fasin stretem, mo i gud we yumi folem advaes we i stap long Proveb 19:20 se: “Lesin long advaes, mo akseptem fasin blong stretem, blong yu save kam waes long fyuja blong yu.” Olsem yumi luk finis, man we i gat tingting daon i no harem nogud tumas taem hem i kasem advaes no fasin stretem. Mo tu, long Hibrus 12:4-11, aposol Pol i givim advaes long yumi long saed blong fasin waes blong gat tingting daon blong akseptem fasin stretem. Long rod ya nomo, bambae yumi save gat hop blong folem waes rod long fyuja mo blong kasem praes ya, laef blong olwe. !Bambae hemia i wan hapi risal!
14 Long saed ya, maet yumi save tingbaot eksampel blong aposol Pita. Aposol Pol i givim strong advaes long hem, olsem yumi ridim long Galesia 2:14 se: “Taem mi luk we olgeta oli no stap wokbaot long stret rod, we i folem ol trutok blong gud nyus ya, mi tok strong long Pita long fes blong olgeta. Mi talem se: ‘Yu yu wan man Isrel, be yu tekem fasin blong ol narafala man finis. Yu yu no moa holem fasin blong man Isrel. ?Weswe yu wantem fosem ol narafala man oli kam tekem fasin ya blong man Isrel?’” ?Aposol Pita i kros? Maet blong smoltaem nomo, no ating hem i no kros nating, yumi luk samting ya from ol tok blong hem biaen we i tokbaot “gudfala brata ya blong yumi Pol” long 2 Pita 3:15, 16.
15. ?Olsem wanem tingting daon mo fasin glad tufala i joen?
15 Mo tu i gat bisnes ya long saed blong haremgud long laef, mo lukaot long ol nid blong yumi wanwan. Yumi no save glad sipos yumi no haremgud long samting we yumi gat, ol wok blong yumi, ol blesing we yumi kasem. Ol Kristin we tingting blong olgeta i stap daon oli gat tingting ya se: “Sipos God i letem samting ya, mi save akseptem,” hemia nao wanem we aposol Pol i talem, olsem yumi ridim long buk blong 1 Korin 10:13 se: “Ol samting ya we oli stap traem yufala, oli sem mak nomo long olgeta samting we oli stap traem olgeta man. Be God i stap holem promes blong hem. Mo hem i no save letem wan samting bambae i traem yufala, we i strong tumas long yufala. Be stret long taem ya we samting olsem i traem yufala, God bambae i mekem rod blong yufala, blong yufala i winim samting ya.” Ale bakegen yumi luk olsem wanem i waes blong gat tingting daon, from we hem i givhan long yumi blong stap glad nating se laef blong yumi i olsem wanem.
Lav Bambae i Givhan Long Yumi Blong Gat Tingting Daon
16, 17. (a) ?Wanem eksampel blong Baebol i soemaot nambawan fasin we i save givhan long yumi blong gat tingting daon? (b) ?Wanem eksampel blong wan man long wol ya tu we i eksplenem poen ya?
16 Antap moa long ol narafala samting, lav we i stanap long fasin blong tingbaot narafala fastaem, a·gaʹpe, bambae i givhan long yumi blong gat tingting daon. ?From wanem Jisas i save stanap strong wetem tingting daon taem hem i kasem ded long pos, olsem Pol i talem long buk blong Filipae? (Filipae 2:5-8) ?From wanem hem i no tingbaot blong traem kam sem mak wetem God? From we, olsem hem wan i talem: “Mi laekem Papa blong mi tumas.” (Jon 14:31) Hemia nao from wanem oltaem hem i leftemap mo i givim ona long Jeova, Papa blong hem long heven. Taswe, long wan narafala taem, hem i talem se Papa blong hem nomo long heven, hem i gud.—Luk 18:18, 19.
17 Blong eksplenem poen ya, yumi save yusum wan samting we i hapen long laef blong wan man Amerika bifo, we i wan man blong raetem ol vas, John Greenleaf Whittier. Man ya i gat wan switat taem hem i yangfala nomo, mo wan taem, taem oli stap long wan speling tes, speling blong gel ya long wan wod i stret, be speling blong boe ya i rong. Gel ya i harem nogud tumas from samting ya. ?From wanem? Man ya blong raetem ol vas i stap tingtingbak, nao i talem se, gel ya i talem se: “Mi sore blong spelem wod ya. Mi no wantem nating blong kam hae moa long yu . . . from we yu luk, mi laekem yu tumas.” Yes, sipos yumi laekem tumas wan man, bambae yumi wantem se man ya i hae moa long yumi, i no daon long yumi, from we lav i kamaot long tingting daon.
18. ?Tingting daon bambae i givhan long yumi blong folem wanem advaes blong Baebol?
18 Hemia wan gudfala lesen blong olgeta Kristin man, antap moa ol brata. ?Taem wan brata i kasem wan jans blong mekem wan spesel wok, bambae yumi glad se brata blong yumi i kasem wok ya be i no yumi, no bambae yumi jelas mo kam kros? Sipos yumi rili laekem brata ya blong yumi, bambae yumi glad se hem i kasem spesel wok ya no ona no jans blong wok. Yes, tingting daon bambae i mekem i isi long yumi blong folem advaes ya se: “Oltaem yufala i mas rere blong ona long yufala.” (Rom 12:10) Narafala translesen i talem se: “Ona long narafala bitim yu wan.” (New International Version) Mo bakegen, aposol Pol i givim advaes long yumi se: “Yufala i mas laeklaekem yufala, nao oltaem yufala i save givgivhan long yufala.” (Galesia 5:13) Yes, sipos yumi gat lav, bambae yumi glad blong givhan long ol brata blong yumi, wok olsem slef nomo blong olgeta, tingbaot ol intres mo ol nid blong olgeta fastaem long intres blong yumi wanwan, hemia i nidim tingting daon blong mekem. Tingting daon bambae i blokem yumi tu blong no leftemap yumi wanwan long ol tok blong yumi mo blong no mekem samting we bambae i pulum narafala blong jelas no kros. Pol i raetem se, man we i gat lav ‘i no save tokflas, mo i no save mekem tingting blong hem i go antap tumas.’ ?From wanem? From we fasin ya we man i tingbaot mo leftemap hem wan nomo i pusum man blong mekem tingting blong hem i go antap mo i flas, be fasin blong tingbaot narafala i stanap long lav.—1 Korin 13:4.
19. ?Wanem ol eksampel ya blong Baebol we i soem se tingting daon i joen wetem lav, olsem fasin flas i joen wetem fasin we man i tingbaot hem wan nomo?
19 Fasin joen we Deved i gat wetem King Sol mo pikinini blong hem Jonatan i wan nambawan eksampel blong soem olsem wanem lav i joen wetem tingting daon mo tu olsem wanem fasin flas i joen wetem fasin we man i tingbaot hem wan nomo. From we Deved i win long plante faet, ol woman Isrel oli singsing se: “Sol i bin kilimdaon ol taosen blong hem, mo Deved i kilimdaon plante plante taosen.” (1 Samuel 18:7) Sol i no gat tingting daon nating, be i fulap gud wetem fasin flas, ale i stat long taem ya hem i holem tingting we i no laekem nating Deved mo i wantem kilim hem i ded. !Samting ya i defren olgeta long tingting blong pikinini blong hem Jonatan! Yumi ridim se Jonatan i laekem Deved olsem prapa bodi blong hem. (1 Samuel 18:1) ?Ale wanem fasin blong Jonatan biaen, taem i kam klia se Jeova i stap blesem Deved mo se hem, i no Jonatan, bambae i tekem ples blong Sol olsem king blong Isrel? ?Jonatan i jelas no i kros? !No gat! From we hem i laekem Deved tumas, hem i save talem tok ya we yumi ridim long 1 Samuel 23:17 se: “Yu no fraet; from we han blong Sol papa blong mi bambae i no save kasem yu, mo yu nomo bambae yu king long ol man Isrel, mo mi bambae mi kam namba tu long yu; mo Sol papa blong mi i save samting ya tu.” Bigfala lav we Jonatan i gat long Deved i mekem se hem i gat tingting daon blong akseptem samting we hem i luksave se God i wantem long saed blong hu nao i mas tekem ples blong papa blong hem olsem king blong ol man Isrel.
20. ?Olsem wanem Jisas i soem se fasin lav i joen gud wetem tingting daon?
20 Samting we i makem moa olsem wanem lav i joen wetem tingting daon, hemia samting we i hapen long laswan naet we Jisas Kraes i stap wetem ol aposol blong hem bifo we hem i ded. Long Jon 13:1, yumi ridim se Jisas, “i stap laekem tumas ol man blong hem, we olgeta oli stap long wol ya, mo hem i stap laekem olgeta olwe, gogo hem i givim laef blong hem from olgeta.” Biaen long ol tok ya, yumi ridim se, Jisas i wasem leg blong ol aposol blong hem, i mekem wok ya olsem wan slef we i daon olgeta. !Wan lesen long tingting daon we i gat bigfala paoa!—Jon 13:1-11.
21. Blong ademap ol poen ya, ?from wanem yumi mas gat tingting daon?
21 Tru ya, i gat plante risen blong gat tingting daon. I gud mo i stret blong gat tingting daon. Hem i rod blong soem bilif. Hem i mekem yumi frengud wetem Jeova God mo ol Kristin brata sista blong yumi. I waes blong gat tingting daon. Antap moa, hem i rod blong soem lav mo i karem trufala glad.
?Yu Yu Ansa Olsem Wanem?
◻ ?Long ol wanem rod stret fasin i givhan blong gat tingting daon?
◻ ?From wanem bilif long Jeova i save givhan long yumi blong gat tingting daon?
◻ ?Wanem i soemaot se i waes blong gat tingting daon?
◻ ?From wanem lav i givhan bigwan long yumi blong gat tingting daon?
[Tok Blong Pija Long Pej 21]
Wetem tingting daon, Job i onagud long Jeova. Hem i no “tok nogud long nem blong God mo i ded”
[Tok Blong Pija Long Pej 23]
Pita i obei wetem tingting daon taem Pol i stretem hem long pablik