Ol Nambawan Asembli Oli Leftemap Tijing Blong God

TEDE, fasin blong kasemsave i kam antap bigwan long wol. Long televisin mo radyo, long ol buk no tru long ol kompyuta, i gat fulap save we kolosap i no gat en blong hem long olgeta stret poen we man i save tingbaot. Be ol man oli stap kam sik mo ded yet. Fasin blong brekem loa, hanggri, mo fasin pua i kamaot long olgeta ples blong wol, mo fasin blong tingting i foldaon i kam antap bitim oltaem bifo. Olgeta save we oli rere long hem i no save stretem ol samting ya. ?From wanem? From we ol man oli tanem baksaed long waes blong God.

!Taswe i stret, se “Tijing Blong God” i stampa tok we oli jusum blong ol asembli blong ol Wetnes blong Jeova we i jes pas nomo! Program ya i pulum tingting blong olgeta we oli stap long asembli ya se tijing ya we i stap long Tok blong God, Baebol nomo, i tru, i save givhan tru, i save sevem laef blong man.

Faswan asembli i stat long Tasde, Jun 3, long Yuniondel, Nyu Yok, Yunaeted Stet. Afta long taem ya, program ya i kamaot long ol defren bigfala taon long wan kantri i go long narafala kantri, gogo i finis long ol bigfala aelan blong Afrika mo Saot Amerika.

Aftenun Blong Faswan Dei

Wanwan long ol dei ya i gat wan stampa tok blong soemaot klia wan haf blong tijing blong God. Eksampel, program blong faswan dei i stanap long stampa tok ya “Save Tijing Ya Blong God.” (Jon 7:17) Mining blong tingting ya i stap kamaot klia taem dei ya i stap gohed.

Afta long singsing mo prea, jeaman blong asembli ya i openem program wetem tok ya we taetel blong hem se “Tijing Blong God i Karem Yumi i Kam Wanples.” Hem i soemaot se ol man blong Jeova oli joen wanples taem oli lanem ol rod blong Hem mo wokbaot long ol rod blong Hem. (Maeka 4:1-5) Tijing blong God i mekem fasin joengud blong olgeta i kam bigwan moa. Oli leftemap tingting blong ol man we oli stap long asembli ya blong haremgud long fasin ya blong olgeta blong joen wan ples.—Ol Sam 133:1-3.

Smol taem biaen long aftenun, oli tokbaot evri miting blong kongregesen long wan tok we i gat ol defren haf long hem we taetel blong hem se “Ol Miting We Oli Tijim Yumi Long Ol Rod Blong Jeova.” Fas man we i givim tok i pulum ol man we oli stap long asembli blong tingbaot se taem yumi mit wan ples, yumi ona long Jeova mo taswe yumi kasem blesing blong Hem. Man we i givim tok ya biaen i talemaot klia we i gat nid blong ansa long ol miting. Taem yumi mekem olsem, yumi presem Jeova long fored blong ol man, yumi soemaot bilif blong yumi, mo mekem bilif blong ol narafala i strong moa. Man we i givim namba tri tok i soemaot we yumi nidim blong mekem wanem we yumi lanem long ol miting i wok long laef blong yumi. Yumi mas ‘mekem wanem we tok blong God i talem, be i no blong harem nomo.’—Jemes 1:22.

Biaen i gat wan nambawan tok long saed blong ol singsing blong presem Jeova. Singsing we i kamaot long hat i wan impoten haf blong wosip blong yumi. Biaen long tok ya, i gat bigfala tok blong asembli, “Tijing Blong God i Stap Win.” !Hem ya i wan nambawan stampa tok ya! Man we i mekem tok ya i talem se, “Jeova i Stampa blong nambawan tijing we eni man i save kasem.” Biaen long wan sot toktok long saed blong merikel blong bren blong man, hem i talem se: “Yumi mas yusum paoa blong tingting blong yumi blong kasem tijing blong God. Hem ya nomo i karem ol frut blong trufala waes.” !Yes i tru!

Namba Tu Moning

“Gohed Blong Flasemgud Tijing Blong God, Man Blong Sevem Yumi,” hem ya stampa tok blong namba tu dei blong asembli ya. (Taetas 2:10) Stampa tingting ya i kamaot klia long tok ya “Tijing blong God Agensem Tijing Blong Ol Devel.” Yes, ol devel oli gat tijing blong olgeta. (1 Timote 4:1) Olsem blong man we i givim tok i eksplenem, tijing blong God i winim “waes” blong Setan taem i soemaot klia ol gyaman tijing mo ol trik blong Devel Setan. From samting ya, samwe long 4,500,000 Kristin we hat blong olgeta i stret oli no moa stap slef long tudak blong Setan.—Jon 8:32.

Be, yumi mas lukaotgud blong gohed blong agensem Setan. Hem ya strongfala poen blong tok ya “?Yu Stap Faet Agens Long Speret Blong Wol?” Speret blong wol ya i save givim ded. I leftemap ol rabis fasin, fasin blong agensem bigfala paoa we i stap rul, mo rong tingting ya blong wantem tumas ol flas samting long saed blong bodi. Wan Kristin i mas luklukgud long hem wan oltaem. ?Hem i stap gohed blong leftemap ol samting we i gud long saed blong ol samting we i stap lukluk long hem, lesin long hem, no ol samting we i ridim? Man we i givim tok, i leftemap tingting blong ol man we oli stap i se: “Mifala i glad long yufala ol brata, ol sista mo ol yangfala, from hadwok ya we yufala i stap traehad blong mekem long saed ya.”—1 Jon 2:15-17.

I gat wan samting we i mekem se i hadwok blong agensem speret blong wol ya. ?Wanem samting ya? Yumi evriwan i no stretgud olgeta. I tru, Jisas i ded from ol sin blong yumi, be yumi mas faet yet blong no foldaon long sin. Oli tokbaot poen ya long tok ya “Faet Agens Long Sin Long Bodi.” Long medel blong ol narafala samting, man we i givim tok ya i talem se yumi save winim faet blong yumi wetem sin sipos yumi putum ol nyufala fasin long laef blong yumi mo blokem eni samting we i pulum yumi blong sin.

“Mekem Tijing We i Tru i Laenap Wetem Laef Blong Yu” hem i nekiswan stampa tok. Sam oli wari tumas long helt blong olgeta long saed blong bodi. Be, blong talem stret, helt long saed blong speret i moa impoten bigwan. Man ya we i givim tok ya i talem strong se yumi nidim blong tinghevi long ol responsabiliti blong yumi long saed blong speret, mo hem i mekem wan spesel tok blong leftemap tingting blong ol Kristin woman. Hem i talem se: “Mifala i glad bigwan long yufala ol olfala sista mo ol yangfala sista we oli skelemgud ol hadwok blong olgeta long minista wok blong olgeta mo ol responsabiliti we i blong olgeta nomo.” Yes, yumi evriwan i talem tangkyu long Jeova from trufala tijing we i seraotem yumi long wol.

Program blong moning ya i finis wetem tok ya se “Tijing Blong God i Save Mekem Yumi Save Plan Blong Laef.” Man we i givim tok ya i talem se: “Samtaem long laef blong olgeta kolosap evriwan i wantem save, ‘?Wanem i mining blong laef?’” Wetem ol strong poen, hem i pruvum se Baebol nomo i givim stret ansa long kwestin ya. Afta, man we i givim tok ya i soemaot se ol nambawan promes blong God i givim wan gudfala risen blong stap laef. Ating, plante long ol man we oli stap oli tingting, ‘Hem ya nao i stret long wanem we ol man long teritori blong mi oli nidim blong harem.’ Hed kampani i bin agri long tingting ya. Wan nyufala buklet, stampa tok blong hem What Is the Purpose of Life? i kamaot long en blong tok ya. !Evriwan oli glad tumas long hem! Oli gat taem blong lukluk tru long nyufala buklet ya long smol spel we oli gat long medel dei.

Namba Tu Aftenun

Faswan tok blong aftenun ya i karem stampa tok ya blong leftemap tingting se “Putum Ol Wari Blong Yu Long Jeova.” Plante samting i mekem wari; be, Tok blong God i talem se yumi mas putum olgeta wari blong yumi i go long hem. (1 Pita 5:6, 7) I tru, sam problem i gohed, mo long saed ya man we i givim tok, i talem se: ‘Yufala i mas gat longfala tingting. Wet long Jeova. Bilif strong se i nambawan oltaem blong folem Baebol. Sipos yumi gohed blong mekem hat blong yumi i stap strong long Jeova, bambae yumi haremgud long “pis blong God” we i moa gud bitim olgeta tingting blong yumi.’—Filipae 4:6, 7, NW.

Long ol fo tok we oli kam biaen oli soemaot se tijing blong God i joen long famle laef. Faswan, “Mekem We Mared Blong Yu i Save Stap Longtaem,” i talem bakegen long olgeta we oli stap long asembli blong tingbaot se long ae blong Jeova mared i no blong finisim enitaem, olsem we plante man long wol oli tingbaot. Be, blong mekem wan gudfala mared, yumi mas folem advaes blong Jeova. Hem i mekem yumi. Olsem ya nao, tok we i kamaot long hem i gat ol nambawan advaes blong mared i bitim ol narafala advaes.

Tok ya “Wok Strong Blong Sevem Famle Blong Yu” i tokbaot se i hadwok tumas blong lukaotgud long wan famle long wan hadtaem olsem naoia. (2 Timote 3:1) Ol papa mama oli tijim ol pikinini blong olgeta blong stap klin long saed blong bodi, gat gudfala fasin, olsem wanem blong wok, mo olsem wanem blong serem samting mo soem kaen fasin long ol narafala man. I moa impoten se, oli mas tijim ol pikinini blong olgeta blong givim olgeta i go long Jeova blong mekem wok blong hem.—Proveb 22:6.

Long tok ya we i kam biaen, “Papa Mama, Pikinini Blong Yu i Nidim We Yu Spenem Moa Taem Wetem Olgeta,” man we i givim tok i wekemap tingting blong ol man we oli stap long asembli ya se i gat nid blong talem ol toktok blong leftemap tingting blong ol pikinini, be long semtaem oli no mas satem ae blong olgeta long ol slak fasin blong olgeta. Antap moa ol papa mama oli mas stap wekapgud blong luksave ol fasin we oli save lidim pikinini blong gyaman, fasin blong wantem plante tumas samting long saed blong bodi, no tingbaot olgeta nomo.

Speseli ol yangfala we oli stap long asembli ya oli lesin gud long tok ya “Yangfala—?Tijing Blong Hu Bambae Yu Obei Long Hem?” Ol samting oli hadwok long ol yangfala Kristin tede. I isi blong folem wol, be hem ya i lidim yumi i go long ded. Nating se wan yangfala i nidim strong tingting taem hem i jusum blong stap fasgud long tijing blong God, samting ya bambae i karem bigfala blesing naoia mo laef we i no save finis we bambae i kam.​—1 Timote 4:8.

Namba tu dei ya i finis wetem wan drama we i tajem hat blong ol man “Ol Yangfala We Oli Tingbaot Man We i Wokem Olgeta Naoia.” Long stat blong tok ya, man we i lidim i singaotem ol yangfala long ogenaesesen blong God se “wan tiokratik ami we oli stap holemstrong long wok blong Jeova God mo King blong hem we hem i putumap long heven, Jisas Kraes.” Hem i bin ademap: “!I tru tumas ol yangfala blong yumi oli stap mekem gudfala samting!” Drama ya i soemaotgud se sipos wan papa mama i trenem gud wan pikinini, pikinini ya bambae i stanap strong taem hem i gruap mo mekem wosip long Jeova hem wan nomo.

Moning Blong Namba Tri Dei

Stampa tok blong namba tri dei hem ya “Gohed Blong Tijim Ol Man Blong Olgeta Ples Long Wol.” (Matyu 28:19, 20) Ol man we oli stap long asembli ya oli wet blong kasem advaes we oli nidim long wok blong prij, mo i tru, oli kasem. Wan tok we i gat ol defren haf blong hem we stampa tok blong hem se “Yumi Glad Blong Finisim Wok Blong Prij Mo Tijim Ol Man” i givim paoa long olgeta blong gat strong tingting blong gohed long wok blong talemaot gud nyus. Faswan tok i tokbaot ol faswan storeyan we yumi mekem wetem ol man; namba tu tok, mekem ol visit bakegen; mo namba tri tok, mekem ol Baebol stadi. Oli bin askem ol misinari long olgeta ples blong gobak long ol ples blong olgeta mo go long asembli wetem ol famle mo ol fren blong olgeta. Long sam ples, ol misinari oli joen long haf blong program ya. I gud tumas blong kasem sam save long frut long wok blong olgeta long ol ples we oli stap wok long hem. Nekis tok se, “Kasem Evriwan Wetem Gud Nyus” i tokbaot paoa we fasin blong holem jans blong prij i gat.

Moning ya i finis wetem tok blong baptaes, we oltaem i impoten tumas long ol bigfala asembli blong ol Wetnes blong Jeova. Long ol wanwan asembli, bigfala grup blong ol nyuwan we oli givim laef blong olgeta long Jeova oli stanap fored long bigfala grup we i stap wanples mo wetem strong tingting oli ansa se Yes long tufala kwestin we oli askem long olgeta. Afta, oli go baptaes blong soem long klia ples. !Hemia wan strong pruf blong bigfala wok blong tijing blong God!

Aftenun Blong Namba Tri Dei

Program blong aftenun i stat wetem wan dip toktok long saed blong Baebol. Ol Wetnes blong Jeova oli savegud ol tok blong Matyu japta 24 mo Luk japta 21. ?I gat samfala we oli bin ting se i no gat wan nyufala samting blong tokbaot long ol japta ya blong Baebol? !Be oli rong olgeta! Ol tok ya “?Bambae Wanem Saen i Soemaot We Yu Yu Stap Finis?” mo “Talem Long Mifala, ?Wetaem Ol Samting Ya Bambae Oli Kamtru?” i bin lidim ol man we i kam long asembli long wan tok we i pulum tingting, long sam haf blong tufala japta ya mo i givim sam save we i klia moa blong eksplenem sam vas. I bin gat plante storeyan afta long program ya taem ol man we oli kam long asembli ya oli skelem ol not blong olgeta blong luk sipos oli kasemsave long ol poen ya. I tru, bambae oli ansa long plante kwestin taem save ya i kamaot long Wajtaoa.

Tingting long saed blong Baebol stadi i gohed long tok ya “Ol Kwestin Blong Yu Long Baebol Oli Kasem Ansa Blong Olgeta.” Afta program ya i bin pulum tingting i go long wan narafala poen. Yia 1993 i makem 50 yia blong Wajtaoa Baebol Skul blong Gilead. Tok ya “Fefte Yia Blong Misinari Trening Long Gilead Mo Ol Wok Blong Hem” i soemaot long ol man we oli stap long asembli, wanem skul ya i bin mekem long ol yia ya. Sipos i gat sam long ol misinari we i stap long taem blong tok ya se “Frut Long Wok Blong Prij Long Olgeta Ples Long Wol,” oli askem olgeta blong serem sam ekspiryens blong olgeta long ol man we oli stap long asembli ya. !Ol ripot blong ol misinari ya i wekemap tingting blong ol man we oli stap lesin!

Tok we i kam biaen, “Blong Wanem Ol Wetnes Blong Jeova Oli Stap Lukaotgud,” i narafala lesen blong histri. I soemaot se ol Kristin oli bin lukaotgud long faswan handred yia K.T. kam kasem naoia. Tok ya i lidim olgeta i go long narafala sapraes. Long stat blong tok we i kam biaen, “Ol Man Blong Talemaot Kingdom Oli Wok Strong Long Olgeta Ples Long Wol,” man we i givim tok ya i leftemap wan bigfala buk (sipos i gat long lanwis blong ol manples) mo i talem se: “Mifala i glad blong talemaot long ples ya tede, wan nyufala buk we i kamaot, taetel blong hem se Jehovah’s Witnesses—Proclaimers of God’s Kingdom.” Insaed long buk ya i gat ol smosmol ripot blong histri blong ol Wetnes blong Jeova tede. I talem wan store we i wekemap tingting, long saed blong fasin blong stanap strong longtaem, strong tingting we i no save kam slak, mo gudfala frut blong hadwok, i givim strong pruf se speret blong Jeova i stap wok strong long ol man blong hem.

Namba Fo Moning

I laswan dei blong asembli ya finis. Stampa tok blong dei ya, “Yumi Wanwan i Save Haremgud Long Tijing Blong God,” i promes blong givim wan nambawan dei we program ya bambae i kasem bigfala mak blong hem. (Aesea 48:17) Long moning ya ol man we oli kam long asembli oli harem wan tok we i gat tri bigfala haf long hem. Taetel blong hem se “Jeremaea i Givim Woning Mesej We i Kam Long God​—Blong Bifo Mo Naoia,” ol defren haf blong tok ya i eksplenem ol vas wanwan long Jeremaea japta 23, 24, mo 25. !Hem i wan strong mesej insaed long ol japta ya! Ol man Isrel we oli no holemstrong bilif long taem blong Jeremaea oli mas fraet taem hem i talemaot klia, ol woning we i kamaot long God. Ful wol i fraet moa taem ol woning ya oli stap kamtru. ?Ol samting i defren tede? No gat. Ol Wetnes blong Jeova oli no fraet blong talemaot mesej blong jajmen blong God. Bambae, olgeta fasin blong naoia i mas fesem jajmen blong Jeova. I minim se bambae i spolem fulwan wol blong Setan.

Sande moning i finis wetem namba tu drama, “Yu No Mastik No Gyaman Long God.” Long wan klia rod, i soemaot olsem wanem tijing blong God i save lukaotgud long yumi blong ol rabis video mo myusek oli no gat paoa long yumi mo blong blokem fasin blong mekem trabol i kamaot long medel blong ol Kristin. Long en blong drama ya, jeaman i talem bakegen toktok ya blong wan man we i plei long drama, blong pulum tingting blong ol man we oli lesin, i se: “Wol ya i save gat paoa long yumi tu. Sipos yumi no traehad blong agensem long fasin haed, wol ya i save spolem tingting blong yumi. Fasin blong holemstrong bilif no no gat, bambae i dipen long wanem sid we yumi bin planem.” !Hem i tru tumas!

Laswan Aftenun

Asembli ya i stap kam kolosap long en kwiktaem, taem man we i givim tok i go long platfom blong givim pablik tok, we taetel blong hem se “Tijing We i Save Halpem Yumi Long Taem Ya We Laef i Had Tumas.” Long wan rod we i klia mo i isi blong kasemsave, hem i talemaot ol stampa problem we i tajem yumi tede mo i poenemaot sam rod we tijing blong God i save halpem yumi blong yumi save mekem laef blong yumi i kam moa gud. Hem i talem se sipos yumi stap folem tijing blong Baebol naoia, bambae yumi save folem blong olwe tu long nyufala wol blong Jeova.

Afta long wan tok we i stanap long Wajtaoa stadi blong wik ya, i taem nao blong laswan tok. Man we i givim tok ya i tokbaot kwiktaem ol bigfala poen blong program blong fo dei ya mo i talem bakegen long ol man we oli stap long asembli ya blong tingbaot ol nyu buk ya. Hem i talem tu se namba tu video kaset long grup ya The Bible​—A Book of Fact and Prophecy bambae i kamaot i no longtaem. I tru, video kaset ya, we taetel blong hem se The Bible​—Mankind’s Oldest Modern Book, naoia i kamaot finis long Engglis. Hem i ridim ol ripot we oli tajem hat, long saed blong ol ples we oli stap kasem bigfala trabol, olsem Bosnia mo Hersegovina. Long en blong hem, man we i givim tok ya i ridim tok blong Eklesiastis 12:13: “Oraet, taem mi harem finis olgeta toktok, mi mi tok olsem, se: ‘Yu mas fraetgud long trufala God mo yu mas folem ol loa blong hem. From we hemia nao olgeta wok we man i mas mekem.’”

!Hem i wan nambawan tok blong tingbaot bakegen! Yumi stap wet blong dei ya we olgeta man bambae oli presem Bigfala Man Blong Tijim Yumi, Jeova, mo obei long tok blong hem, tijing blong God.

[Tok blong pija long pej 24, 25]

Asembli ya “Tijing Blong God” long Mosko mo Kiev i karem bigfala glad

[Tok blong pija long pej 26, 27]

1. Taem oli tekem baptaes, plante oli soemaot we oli givim laef blong olgeta i go long God

2. Wan man we i gat 100 yia we i stap long asembli i glad tumas blong kasem wan nyu buk

3, 4. Ol man oli glad tumas long ol drama ya we oli wekemap tingting blong olgeta

5. Oli askem kwestin long ol misinari long ol asembli, nao ol misinari oli soemaot gudfala frut blong tijing blong God