Ol Wetnes Blong Jeova Long Olgeta Ples Long Wol—Bahamas
NESEN blong Bahamas—grup blong 3,000 aelan wetem ol smosmol aelan—i slip olsem ol bidbid we oli wokem long korel, i krosem 900 kilomita blong solwora we i gat blu grin kala long medel blong Florida mo Kuba. Long medel blong ol 267,000 man blong hem i gat wan grup blong ol man blong talemaot Kingdom, we grup ya i stap gru. Singsing blong olgeta blong presem God i mekem yumi tingbaot tok long Aesea 42:10-12: “Yufala we i stap godaon long solwora mo long samting we i stap fulumap solwora, yufala ol aelan mo yufala we i stap long ol aelan ya, singsing long wan nyufala singsing i go long Jeova, presem hem long wan saed long wol go kasem narasaed long wol. . . Antap long ol hil letem ol man oli singaot bigwan. Letem olgeta oli presem Jeova from paoa blong hem, mo long ol aelan letem olgeta oli presem hem.”
Nyufala Bilif i Kasem Traem
Long Julae 1992, wan man we i wan fultaem paenia (i talemaot gud nyus blong Kingdom fultaem) i givimaot buk ya we i halpem ol man blong stadi Baebol Yu Yu Save Laef Foreva Long Paradaes Long Wol long wan man we i mekem bisnes wetem hem. Afta we man ya i ridim buk ya, hem i talem long hem wan se, ‘Skul ya i wan samting we mi mas luklukgud long hem.’ Long tu Sande we oli kam biaen, hem i go long miting long tu defren Haos Kingdom blong ol Wetnes blong Jeova. Biaen, oli statem wan Baebol stadi wetem hem. Be, afta sikis wik nomo long ol Baebol stadi blong hem, wan trabol i kamaot we i traem nyufala bilif blong hem—ol lafet blong betde.
Ol famle blong bisnesman ya oli joen fulwan long ol lafet olsem, be lav we hem i gat long Tok blong Jeova i pusum hem blong gohed wetem Baebol stadi blong hem. Taem hem i kasem moa save long saed blong trutok blong Baebol, hem i kasem save tu long ol lafet blong betde mo ol holide blong wol mo tingting blong Jeova long olgeta.
Taem waef blong hem i wokem rod blong oli mekem lafet long ‘Dei blong Papa,’ man ya i talem wetem gudfala fasin, se bambae hem i no joen long hem. Be waef blong hem i harem nogud, i ting se, hasban blong hem i no moa laekem hem, mo se hem i stap putum skul blong hem fastaem long waef blong hem mo famle blong hem. Wetem kaen fasin hasban i eksplenem se naoia we hem i stap mekem wanem we i lanem long Baebol i wok, samting ya i stap givhan long hem blong kam wan gudfala hasban mo papa. Sloslou, waef blong hem i laekem moa fasin blong hasban blong hem blong laekem trutok blong Baebol mo waef i agri blong stadi Baebol. Naoia hasban i mekem Baebol stadi wetem famle blong hem. !Mo hem i kasem bigfala glad long distrik asembli blong las yia long saed long “Tijing Blong God”! Waef mo gel blong hem oli stap mo oli luk hem i tekem baptaes.
Ol Man We Oli Kam Laef Long Ples Ya Oli Harem Nyufala Singsing Ya
Plante taosen man Haiti we oli kam laef long Bahamas, oli stap joen sloslou long fasin blong laef blong ol man Bahamas. Olgeta tu oli nidim blong harem nyufala singsing blong trutok blong Kingdom. Ol Wetnes long Bahamas oli glad we tu man wetem woman blong tufala, we oli haf Haiti haf Amerika, oli kam long Bahamas. Oli givhan long ol nyu grup blong ol man Haiti long ol aelan blong Bigfala Bahamas mo Abako blong oli kam strong.
Blong halpem moa ol man Haiti we oli intres long mesej blong Kingdom, faswan distrik asembli we oli mekem long Bahamas long lanwis Kreol, i stap long Julae 31 kasem Ogis 1, 1993. Namba blong ol man we oli kam long asembli ya i kasem 214, wetem tri nyuwan we oli givim laef blong olgeta long Jeova nao oli tekem baptaes. Plante man Haiti we oli lanem trutok long Bahamas oli gobak finis long aelan blong olgeta no oli go long narafala ples bakegen blong joenem voes blong olgeta long ol lokol Wetnes long singsing blong presem Jeova.
[Bokis blong pija long pej 8]
LUKLUK LONG OL NAMBA BLONG KANTRI YA
1993 Sevis Yiaa
BIGFALA NAMBA BLONG OLGETA WE OLI STAP PRIJ: 1,294
SKELEM: 1 Wetnes blong 197
NAMBA BLONG OL MAN WE OLI KAM LONG MEMORIOL: 3,794
MEDEL NAMBA BLONG OL PAENIA: 186
MEDEL NAMBA BLONG OL BAEBOL STADI: 1,715
NAMBA BLONG OL MAN WE OLI TEKEM BAPTAES: 79
NAMBA BLONG OL KONGREGESEN: 22
BRANJ OFIS: NASAU
[Futnot]
a Blong kasem moa save long hem, lukluk long 1994 Calendar of Jehovah’s Witnesses.
[Tok blong pija long pej 9]
Faswan Haos Kingdom, wetem branj ofis mo misinari hom
[Tok blong pija long pej 9]
Ol Wetnes oli wok strong blong talemaot gud nyus
[Tok blong pija long pej 9]
Milton G. Henschel mo Nathan H. Knorr wetem ol misinari long Nasausamwe 45 yia bifo
[Tok blong pija long pej 9]
Nyufala branj ofis, we oli dediketem long Febuwari 8, 1992