?Yu Yu Stap Agensem Speret Blong Wol?
“Speret ya we yumi kasem finis, hem i no wan speret we i kamaot long wol. Hemia speret blong God ya.”—1 KORIN 2:12.
1, 2. ?Long Bopal, India, wanem bigfala trabol i kamaot from posen gas, be wanem “gas” bakegen we i moa posen we olgeta man raon long wol oli stap pulum?
LONG wan kolkol naet long Desemba 1984, long Bopal, India, wan samting i kamaot we i nogud we i nogud. Long taon ya, i gat wan faktri blong kemikol, mo long naet ya blong Desemba, wan long ol tank blong gas i brok. Wantaem nomo, plante, plante tan blong posen gas i stat blong go antap long skae. Win i karem gas ya we i save givim ded, i go insaed long ol haos, mo i karem i go long ol famle we oli stap slip. Namba blong ol man we oli ded i kasem plante taosen, mo plante narafala, oli handikap. Kam kasem taem ya, i no gat wan akseden long wan faktri we i nogud olsem hemia.
2 Ol man oli sore tumas taem oli harem store blong Bopal. Be nating se gas we i kamaot long ples ya i posen tumas, namba blong ol man we gas ya i kilim i ded, i daon olgeta long namba blong ol man raon long wol we oli ded long saed blong speret, from wan “gas” we olgeta man oli stap pulum evridei. Baebol i kolem gas ya se, “speret we i kamaot long wol.” Hemia nao paoa ya we i save givim ded, we aposol Pol i soem se i defren olgeta long speret we i kamaot long God, taem hem i talem se: “Nao Speret ya we yumi kasem finis, hem i no wan speret we i kamaot long wol. Hemia speret blong God ya, we God i sanem i kam long yumi blong yumi save olgeta samting we hem i givim long yumi.”—1 Korin 2:12.
3. ?Wanem ya “speret we i kamaot long wol”?
3 ?“Speret we i kamaot long wol” i rili minim wanem? Olsem The New Thayer’s Greek English Lexicon of the New Testament i soem, bigfala mining blong tok ya “speret” (Grik, pneuʹma), hemia “stampa fasin no paoa we i fulap mo i rulum laef blong eni man.” Wan man i save gat wan gudfala speret no wan nogud speret, no stampa fasin. (Ol Sam 51:10; 2 Timote 4:22) Wan grup blong man tu i save gat wan speret, no wan stampa fasin we i rulum olgeta. Aposol Pol i raet long fren ya blong hem Faelimon se: “Hemia prea blong mi, we Jisas Kraes, Masta blong yumi, hem bambae i stap givhan long yufala long tingting blong yufala, long gladhat blong hem.” (Faelimon 25) Long sem fasin—be long wan mak we i bigwan moa—i gat wan stampa fasin we i stap rulum ful wol, mo hem i “speret we i kamaot long wol” we Pol i tokbaot. Olsem Word Studies in the New Testament blong Vincent i soem, “tok ya i minim stampa fasin nogud ya we i stap biaen long ol fasin blong wol ya we oli no save kamgud bakegen.” Hemia tingting blong wantem mekem sin we i fulap long tingting blong ol man blong wol ya mo i gat bigfala paoa long ol samting we ol man oli stap mekem.
4. ?Hu i stampa blong speret blong wol, mo speret ya i stap mekem wanem long olgeta man?
4 Speret ya we i kamaot long wol i posen tumas. ?From wanem? From we hem i kamaot long “masta blong wol ya,” Setan. Tru ya, Baebol i kolem hem se ‘jif ya blong paoa blong win, hemia speret ya we i stap mekem wok naoia long ol man we oli no obei long God.’ (Jon 12:31; Efesas 2:2, NW) I no isi nating blong ronwe long ‘win’ ya, no ‘speret ya we i stap mekem wok naoia long ol man we oli no obei long God.’ Win ya i stap long evri ples long ol grup blong man. Sipos yumi pulum win ya, yumi stat blong folem ol tingting mo ol plan blong hem. Speret blong wol i stap leftemap fasin ya we ‘man i mekem ol samting we tingting blong hem nomo i wantem,’ hemia, ol fasin ya we oli kamaot from tingting nomo blong man we i no stretgud olgeta. Hem i lidim man i go long ded, from we “sipos yufala i stap mekem ol fasin ya we tingting blong yufala i wantem, bambae yufala i mas ded from.”—Rom 8:13.
Stap Longwe Long Speret Blong Wol Ya
5. ?Wan Wetnes i waes blong mekem wanem long taem blong trabol long Bopal?
5 Long taem blong trabol ya long Bopal, rabis smel blong posen gas mo noes blong ol wesil we oli krae, i wekemap wan Wetnes blong Jeova long slip blong hem. Hem i no wet, hem i wekemap famle blong hem mo i mekem se oli hareap i go long rod. Oli stop smoltaem blong save se win i stap blou i go long wanem saed, nao hem i traehad blong gotru long ol hif man, mo i lidim famle blong hem i go long top blong wan hil afsaed long taon. Long ples ya, oli save fulumap waet leva blong olgeta wetem fres win, win we i klin we i stap blou i kam long wan lugun we i stap kolosap.
6. ?Weples yumi save go long hem blong ronwe long speret blong wol?
6 ?I gat wan haeples we yumi save go long hem blong haed long ‘win’ blong wol ya, win ya we i gat posen long hem? Yes, Baebol i talem se i gat wan. Blong tokbaot taem blong yumi, profet Aesea i raetem se: “I mas hapen long laswan haf blong ol dei, se bigfala hil blong haos blong Jeova bambae i stanap strong antap long ol bigfala hil, mo tru, bambae hem i kam hae moa, i bitim ol hil, mo ol nesen oli mas kam wanples long hem, we oli fulap. Mo tru ya, plante pipol bambae oli go, mo oli talem se: ‘Yufala i kam, blong yumi go antap long bigfala hil blong Jeova, long haos blong God blong Jekob. Mo hem bambae i tijim yumi long ol fasin blong hem, mo bambae yumi wokbaot long ol rod blong hem.’ From we bambae loa i kamaot long Saeon, mo tok blong Jeova i kamaot long Jerusalem.” (Aesea 2:2, 3) Haeples ya blong klin wosip, “bigfala hil blong haos blong Jeova,” we i hae moa, hem i ples ya nomo long wol ya we i no gat speret blong wol ya, speret ya we i posen tumas, we i kilim man i ded from i blokem hem blong no pulum gudfala win. Long ples ya nao, speret blong Jeova i stap wok long medel blong ol Kristin we oli stap tru long hem.
7. ?Olsem wanem plante man oli bin kamaot long paoa blong speret blong wol?
7 Plante man we bifo oli tekem speret we i kamaot long wol ya long laef blong olgeta, naoia oli haremgud sem mak long ekspiryens blong Wetnes ya long Bopal. Afta we aposol Pol i tokbaot “ol man ya we oli no save obei long God,” ol man we oli pulum win, no speret we i kamaot long wol ya, hem i talem se: “Bifo, mifala man Isrel tu i bin mekem ol samting we tingting blong mifala i wantem. Mifala i bin folem tingting nomo blong mifala, blong mekem ol samting we mifala i stap haremgud long hem. From samting ya, mifala i olsem ol narafala man nomo, bambae God i mas jajem mifala tu se mifala i panis. Fasin blong yumi evriwan i sem mak nomo. Be God, hem i sore tumas long yumi. Mo hem i stap laekem yumi tumas. Nao taem yumi stap olsem we yumi ded, from we yumi bin brekem ol loa, hem i joenem yumi long Kraes, i mekem yumi olsem we yumi laef bakegen wetem hem.” (Efesas 2:3-5) Olgeta we oli no pulum gudfala win long saed blong speret, be oli stap pulum win blong wol ya we i gat posen long hem, oli ded long saed blong speret. Be, yumi talem tangkyu tumas long Jeova, we tede, plante milyan man oli stap ronwe i go long haeples long saed blong speret mo oli no stap ded olsem.
Ol Wok Blong Soemaot “Speret We i Kamaot Long Wol”
8, 9. (a) ?Wanem i soem se, oltaem yumi mas lukaotgud long speret blong wol? (b) ?Olsem wanem speret blong Setan i save spolem yumi?
8 Win blong Setan we i givim ded i stap blou yet raon long yumi. Yumi mas lukaotgud mo yumi neva mas glis blong kamdaon long bigfala hil ya we yumi stap long hem, blong gobak long ol fasin blong wol, nao maet yumi save ded long saed blong speret, from yumi no moa pulum gudfala win. Samting ya i min se yumi mas stap wekapgud oltaem. (Luk 21:36; 1 Korin 16:13) Eksampel, tingbaot samting ya. Ol Kristin oli savegud ol rul blong Jeova long saed blong ol fasin we oli gud mo ol fasin we oli nogud, mo neva bambae oli agri se i oraet blong mekem ol doti fasin olsem fasin blong slip wetem woman blong narafala man, fasin blong slip olbaot, mo fasin we man i slip wetem man mo woman i slip wetem woman. Nating se i olsem, evri yia, i gat samwe long 40,000 man we kongregesen i putumaot olgeta long ogenaesesen blong Jeova. ?From wanem? Plante long olgeta, hem i from we oli mekem ol doti fasin ya. ?Olsem wanem samting ya i save hapen?
9 From we yumi evriwan i no stretgud olgeta. Bodi we i gat sin long hem i save mekem yumi foldaon mo oltaem yumi mas faet agens long ol tingting we oli no stret, we oli kamaot long hat blong yumi. (Eklesiastis 7:20; Jeremaea 17:9) Be, speret blong wol i stap leftemap ol tingting ya we oli no stret. Plante man long wol ya oli tingbaot ol rabis fasin blong seks olsem we oli oraet nomo, mo tingting ya se i oraet blong mekem eni samting, hem i wan tingting blong wol blong Setan. Sipos yumi lesin long ol tingting olsem, i tru, bambae yumi stat blong tingting olsem ol man blong wol. Smoltaem biaen, ol doti tingting ya bambae oli save mekem se yumi wantem tumas ol samting we oli no stret, mo oli save pulum yumi blong mekem bigfala sin. (Jemes 1:14, 15) Bambae yumi aot long bigfala hil blong klin wosip blong Jeova, yumi kamdaon long wol blong Setan we i gat posen long hem. Long olgeta man we oli glad blong stap long ples ya, i no gat wan nating we i save kasem laef we i no save finis.—Efesas 5:3-5, 7.
10. ?Wanem wan wok blong win blong Setan, mo from wanem ol Kristin oli mas stap longwe long hem?
10 Yumi save luk speret blong wol long ol samting we oli stap hapen raonabaot long yumi. Eksampel, plante man oli no tinghevi mo oli no gat respek long wan samting nating long laef, tingting blong olgeta i blong jikim mo daonem man nomo. Tingting blong olgeta i kam nogud from ol man blong politik we oli gat kruked fasin no krangke fasin, mo from ol lida blong skul we oli gat rabis fasin blong seks mo fasin griri, mekem se oli no gat respek no ona nating taem oli tokbaot ol impoten samting. Ol Kristin oli blokem fasin ya. Samtaem yumi save laf mo tok plei long gudfala fasin, be yumi mas lukaotgud blong no karem fasin blong jikim mo fasin blong no soem respek i kam insaed long kongregesen. Toktok blong wan Kristin i mas soem se hem i fraetgud long Jeova mo hat blong hem i klin. (Jemes 3:10, 11; lukluk Proveb 6:14.) Nating se yumi yangfala no yumi olfala, oltaem yumi mas ‘toktok gud wetem olgeta man, long ol tok ya nomo we oli harem i gud. Mo yumi mas save rod blong givim ansa long evri man, we i stretgud long olgeta evriwan.’—Kolosi 4:6.
11. (a) ?Wanem namba tu wok blong speret blong wol? (b) ?From wanem ol Kristin oli defren long ol man we oli gat fasin ya?
11 Wan nara bigfala tingting we i soem speret blong wol ya, hemia fasin blong no laekem nating ol narafala. Fasin blong no laekem nating ol narafala mo ol rao we oli kamaot from fasin blong agensem man blong defren kala, grup, kantri, mo tu ol defren samting long laef blong wanwan man, oli mekem se ol man long wol oli seraot. !Ol samting oli moa gud long ples we tabu speret blong God i stap wok long hem! Aposol Pol i raetem se: “Sipos i gat man we i mekem i no stret long yufala, bambae yufala i no mekem i no stret long hem bakegen. Oltaem yufala i mas traem blong mekem ol fasin we olgeta man oli luk we i stret nomo. Oltaem, long saed blong yufala, yufala i mas traehad tumas blong yufala i gat pis wetem olgeta man. Sipos wan man i mekem trabol long yufala, bambae yufala i no traem blong mekem trabol long hem bakegen. Yufala i mas livim i stap, blong God bambae i jajem hem, i givim panis long hem. From we Baebol i talem se ‘Hae God i talem se “Fasin ya blong givimbak long man we i mekem i nogud, mi nomo mi gat raet blong mekem. Mo mi bambae mi givimbak long olgeta.”’ Be, ‘sipos wan enemi blong yu i hanggri, yu mas givim kakae long hem. Sipos hem i tosta, yu mas givim wora long hem. Long fasin ya, bambae yu mekem hem i sem tumas.’ Bambae yufala i no letem ol fasin nogud oli winim yufala. Yufala i mas holemstrong ol stret fasin blong yufala, blong winim ol fasin nogud.”—Rom 12:17-21.
12. ?From wanem ol Kristin oli mas stap longwe long fasin blong wantem plante tumas samting long saed blong laef?
12 Mo tu, speret blong wol ya i pulum ol man blong wantem plante tumas samting long saed blong laef. Plante man oli harem se oli mas kasem ol laswan tul we oli wok wetem lektrik, ol nyufala stael, mo ol nyufala stael blong trak, ol samting we wol blong bisnes i pulum olgeta blong pem. Hemia ol samting we ‘ae i wantem tumas blong luk.’ (1 Jon 2:16) Plante man oli ting se oli stap gohedgud long laef sipos oli bildim wan bigfala haos no putum plante mane long bang. Ol Kristin, we oli stap pulum win we i klin, win ya long saed blong speret, antap long bigfala hil blong klin wosip blong Jeova, oli blokem tingting ya. Oli save se fasin blong wantem tumas blong kasem plante samting, i save spolem olgeta. (1 Timote 6:9, 10) Jisas i mekem ol disaepol blong hem oli tingbaot se: “Maet man i gat plante samting blong hem, be stampa blong prapa laef blong man i no stanap long ol samting ya.”—Luk 12:15.
13. ?Wanem sam narafala wok blong speret blong wol?
13 I gat ol narafala wok blong rabis ‘win’ blong wol ya. Wan, hemia tingting blong rebel. (2 Timote 3:1-3) ?Yu bin makemgud se plante man oli no moa wokgud wetem man we i lukaot long olgeta? ?Yu bin luk long ples blong wok blong yu we plante man oli wok nomo sipos wan man i stap wajem olgeta? ?Yu save hamas man we oli bin brekem loa—maet oli mekem trik long ol takis we oli mas pem no oli stil long ples blong wok? Sipos yu stap skul yet, ?samtaem yu no traem bes blong yu from we ol fren blong yu long skul oli stap daonem olgeta we oli wok gud? Olgeta samting ya oli ol wok blong speret blong wol we ol Kristin oli mas blokem.
Olsem Wanem Blong Blokem Speret Blong Wol Ya
14. ?Long ol wanem rod ol Kristin oli defren long olgeta we oli no Kristin?
14 ?Oraet, olsem wanem yumi save blokem speret blong wol, nating se yumi stap laef long wol? Yumi mas tingbaot se, nomata weples yumi stap long wol ya long saed blong bodi, be long saed blong speret, yumi no man blong wol. (Jon 17:15, 16) Ol mak we yumi wantem kasem, oli no ol mak we wol ya i wantem kasem. Yumi gat defren tingting long ol samting ya. Yumi ol man we yumi tingting long saed blong speret, long toktok mo tingting blong yumi, ‘yumi no save yusum ol tok we yumi lanem long waes blong man, no gat. Yumi stap yusum ol tok we tabu speret ya i stap tijim yumi long hem. Nao yumi stap talemaot ol trutok blong hem long ol tok we hem i givim.’—1 Korin 2:13.
15. ?Olsem wanem yumi save blokem speret blong wol?
15 ?Bambae wan man i mekem wanem sipos hem i faenem se hem i stap long wan ples we i gat posen gas long win? Hem i save putum samting blong blokem fes blong hem, we i joen long wan mesin we i givim klin win, no maet hem i aot long ples ya. Rod blong no pulum win blong Setan i laenap wetem tufala fasin ya. Kasem mak we yumi save mekem, yumi traem blong aot long eni samting we i save mekem se speret blong wol i spolem tingting blong yumi. Olsem nao, yumi no joen wetem ol fren we oli no stret, mo yumi no joen nating long eni pleplei olsem lukluk televisin no sinema, mo ridim ol buk we oli leftemap raf fasin, fasin nogud blong seks, fasin blong wok wetem rabis speret, fasin rebel, no ol narafala wok we tingting blong man nomo i wantem. (Galesia 5:19-21) Be, from we yumi stap long wol, yumi no save ronwe fulwan long ol samting ya. Ale yumi stap soem fasin waes sipos yumi joenem yumi long wan samting we i givim gudfala win long saed blong speret. I olsem we yumi stap fulumap waet leva blong yumi long saed blong speret, taem yumi go oltaem long miting, mekem stadi wanwan, Kristin wok mo fasin joen wetem ol narafala Kristin, mo prea. Long rod ya, sipos enikaen win blong Setan i stap kam insaed sloslou long waet leva blong yumi long saed blong speret, tabu speret blong God bambae i givim paoa long yumi blong sakemaot win ya.—Ol Sam 17:1-3; Proveb 9:9; 13:20; 19:20; 22:17.
16. ?Yumi save mekem wanem blong pruvum se yumi gat tabu speret blong God?
16 Tabu speret blong God i mekem se wan Kristin i kam wan man we i defren long ol man we oli haf blong wol ya. (Rom 12:1, 2) Pol i talem se: “[Tabu speret] i stap mekem olgeta oli laekem tumas ol man, mo oli gat glad mo pis long tingting blong olgeta. Tingting blong olgeta i longfala, mo oli gat sore long man. Fasin blong olgeta i gud nomo, mo i no save jenis. Olgeta oli kwaet man, mo oli save blokem ol samting we olgeta nomo oli wantem. I no gat loa blong blokem yufala long ol samting ya.” (Galesia 5:22, 23) Tabu speret blong God i mekem se save blong wan Kristin long ol samting i go dip moa. Pol i talem se: “Ol samting ya we God i stap tingbaot, be speret blong God nomo i save.” (1 Korin 2:11) Olgeta “samting ya we God i stap tingbaot,” hemia ol samting olsem trutok long saed blong ransom sakrifaes, Kingdom blong God we Jisas Kraes i rulum, hop blong laef we i no save finis, mo en blong rabis wol ya we i kolosap nomo. Wetem help blong tabu speret blong God, ol Kristin oli kasem save mo oli akseptem ol tijing ya olsem trutok, mo samting ya i mekem se oli gat wan tingting long laef we i defren olgeta long tingting blong ol man blong wol. Naoia, oli haremgud tumas blong faenem glad blong olgeta long wok blong Jeova, wetem hop blong mekem wok blong hem blong olwe long fyuja.
17. ?Hu i soem nambawan eksampel blong blokem speret blong wol, mo olsem wanem?
17 Jisas i wan nambawan eksampel long olgeta we oli stap agensem speret blong wol ya. Smoltaem afta we Jisas i baptaes, Setan i traem hem tri taem, blong traem pulum hem blong no mekem wok blong Jeova. (Matyu 4:1-11) Laswan traem i joen wetem samting ya se Jisas i save rulum ful wol sipos hem i mekem wan samting nomo blong wosip long Setan. Maet Jisas i save tingting se: ‘Yes, bambae mi mekem wan samting blong wosip, mo biaen, taem mi kasem paoa blong rulum wol finis, bambae mi tanem tingting blong mi mo gobak blong wosip long Jeova. Taem mi rulum wol, bambae mi stap long wan gudfala wok blong givhan plante long ol man, bitim wok blong mi naoia olsem wan kapenta nomo we i kamaot long Nasaret.’ Jisas i no tingting olsem. Hem i glad blong wet gogo kasem taem we bambae Jeova i putumap hem blong rulum wol. (Ol Sam 2:8) Long taem ya, mo long ol narafala taem long laef blong hem, hem i blokem paoa blong win blong Setan we i gat posen long hem. Olsem nao, hem i winim wol ya we i doti long saed blong speret.—Jon 16:33.
18. ?Olsem wanem fasin blong yumi blong blokem speret blong wol i givim ona long God?
18 Aposol Pita i talem se yumi mas folemgud ol trak blong leg blong Jisas. (1 Pita 2:21) Yumi no gat wan narafala eksampel we i bitim hemia. Long ol lasdei ya, speret blong wol we i gat paoa long ol man, i mekem se oli stap go dip moa insaed long ol rabis fasin. !Wan nambawan samting se, long medel blong wan wol olsem, haeples blong wosip blong Jeova i stap stanap we i saengud mo i klin! (Maeka 4:1, 2) !Tru ya, yumi save luk paoa blong tabu speret blong God, taem yumi luk plante milyan man we oli stap kam kwiktaem long ples blong wosip blong God, oli stap blokem speret blong wol ya we i kasem evri ples, mo oli stap ona mo presem Jeova! (1 Pita 2:11, 12) I gud sipos yumi evriwan yumi gat strong tingting blong stap long haeples ya gogo kasem taem we King ya we Jeova i makemaot bambae i finisim rabis wol ya, mo i sakem Setan wetem ol rabis enjel blong hem oli go long hol ya we i godaon we i godaon. (Revelesen 19:19 kasem 20:3) Long taem ya, bambae speret blong wol ya i no moa stap. !Bambae taem ya i nambawan stret!
?Yu Save Eksplenem?
◻ ?Wanem ya speret we i kamaot long wol?
◻ ?Speret we i kamaot long wol i save mekem wanem long ol man wanwan?
◻ ?Wanem sam wok blong speret we i kamaot long wol, mo olsem wanem yumi save stap longwe long hem?
◻ ?Olsem wanem yumi save soem se yumi gat speret blong God?
◻ ?Ol man we oli blokem speret we i kamaot long wol oli kasem wanem blesing?
[Tok blong pija long pej 16, 17]
Speret blong wol i kam long Setan
Blong stap longwe long speret blong wol, ronwe i go long haeples blong wosip blong Jeova