Ol Man Blong Talemaot Kingdom Oli Stap Wok Strong Long Olgeta Ples Long Wol
“Bambae yufala i mas go talemaot mi long . . . olgeta ples long wol.”—OL WOK 1:8.
1. ?Wanem mesej ya we Jisas i talem se ol man blong hem bambae oli talemaot long taem blong yumi?
TAEM Jisas i stap tokbaot wok we Jeova i sanem hem i kam long wol blong mekem, hem i talem se: “Mi mas talemaot gud nyus ya . . . se God i stap kam King blong ol man blong hem.” (Luk 4:43) I sem mak, taem Jisas i stap tokbaot wok we ol disaepol blong hem bambae oli mekem long wol, taem hem i kambak wetem paoa blong king, hem i talem se: “Nao bambae ol man oli stap talemaot gud nyus ya se God i king blong olgeta man. Bambae oli talemaot long olgeta ples long wol, blong oli wetnes blong hem long fes blong olgeta man. Nao biaen, bambae Lasdei i save kam.”—Matyu 24:14.
2. (a) ?From wanem i impoten tumas blong talemaot mesej blong Kingdom long olgeta ples? (b) ?Yumi evriwan i mas askem wanem kwestin long yumi wanwan?
2 ?From wanem nyus blong Kingdom blong God i impoten tumas? ?From wanem oli mas talemaot nyus blong Kingdom ya long plante man olsem? From we hemia nao Kingdom blong Mesaea we bambae i leftemap hae rul blong Jeova long heven mo long wol. (1 Korin 15:24-28) Bambae Jeova i yusum Kingdom ya blong mekem jajmen blong hem agens long wol blong Setan i kamtru, mo blong mekem promes blong hem i kamtru blong blesem olgeta famle long wol. (Jenesis 22:17, 18; Daniel 2:44) Tru long wok ya blong wetnes long saed blong Kingdom, Jeova i faenem olgeta we biaen, hem i makemaot olgeta blong rul wetem Pikinini blong hem. Tru long wok blong talemaot Kingdom, wok blong seraotem ol man tu i stap gohed tede. (Matyu 25:31-33) Jeova i wantem se ol man long olgeta kantri long wol, oli savegud long stampa tingting blong hem we bambae hem i mekem i kamtru. Hem i wantem givim jans long olgeta blong jusum laef, olsem ol man blong obei long Kingdom blong hem. (Jon 3:16; Ol Wok 13:47) ?Yu yu stap joen fulwan long wok blong talemaot Kingdom ya?
Oli Stap Wet Long En Blong Rul Blong Ol Hiten Man
3. (a) ?C. T. Russell i tokbaot wanem poen we i stret nomo long wan long ol faswan trep we hem i mekem blong statem ol grup blong mekem Baebol stadi? (b) ?Ol faswan Baebol Studen ya, oli luksave se Kingdom blong God i mas tekem wanem ples long laef blong olgeta?
3 Long 1880, Charles Taze Russell, faswan man we i raetem Wajtaoa magasin, i mekem wan trep i go long not-is blong Yunaeted Stet blong traem stanemap ol nyufala grup blong mekem Baebol stadi. Poen we hem i tokbaot i stret nomo, hemia se, “Ol Samting We Oli Joen Wetem Kingdom Blong God.” Olsem ol faswan Wajtaoa oli soemaot, ol Baebol Studen (nem blong ol Wetnes blong Jeova long taem ya) oli luksave se sipos oli wantem kam i naf blong joen long Kingdom blong God, oli mas putum intres blong Kingdom long fasples, oli mas glad blong yusum laef blong olgeta, save blong olgeta, mo ol sas samting blong olgeta blong mekem wok blong Kingdom ya. Ol narafala samting long laef oli mas stap long seken ples. (Matyu 13:44-46) Responsabiliti blong olgeta i joen wetem wok ya blong talemaot gud nyus blong Kingdom blong God long ol narafala man. (Aesea 61:1, 2) ?Oli mekem wok ya i go kasem wanem mak finis, taem Rul blong ol Hiten man i kasem en blong hem long 1914?
4. ?Bifo long 1914, smol grup blong ol Baebol Studen i seremaot ol buk we oli tokbaot Baebol, go kasem wanem mak?
4 Long ol yia stat long 1870 kasem 1914, namba blong ol Baebol Studen i smol nomo. Long 1914, i gat 5,100 man nomo oli stap wok strong blong prij long pablik ples. !Be oli givim wan bigfala wetnes! Long 1881, tu yia nomo afta we oli prentem faswan Wajtaoa, oli seremaot buk ya Food for Thinking Christians, we i gat 162 pej blong hem. Long sam manis nomo, oli seremaot 1,200,000 kopi blong hem. Sam yia nomo biaen, oli stap givimaot plante milyan traket evri yia long plante lanwis.
5. ?Hu ya ol kolpota, mo oli soemaot wanem tingting?
5 Stat long 1881 tu, samfala oli givim laef blong olgeta blong talemaot gud nyus olsem ol kolpota. Olgeta ya oli mekem rod blong ol man we tede yumi kolem ol paenia (ol man we oli wok fultaem blong talemaot gud nyus). Sam long ol kolpota, we oli wokbaot long leg nomo no oli ron long baskel, kolosap se wanwan long olgeta oli prij long evri ples long kantri we oli stap long hem. Sam narafala oli go kasem ol defren kantri mo olgeta nao oli ol faswan man we oli karem gud nyus i go long ol ples olsem Finlan, Babedos, mo Bema (we naoia oli kolem Mianma). Oli soemaot strong tingting blong mekem wok blong misinari olsem Jisas Kraes mo ol aposol blong hem oli mekem.—Luk 4:43; Rom 15:23-25.
6. (a) ?Brata Russell i mekem trep i go kasem weples blong talemaot trutok blong Baebol? (b) ?Oli mekem wanem bakegen blong talemaot gud nyus long ol narafala kantri bifo long en blong Rul blong ol Hiten Man?
6 Brata Russell tu i go long plante ples blong talemaot trutok. Hem i go long Kanada plante taem; hem i prij long Panama, Jamaika, mo Kuba; hem i mekem twelef trep i go long Yurop; mo hem i mekem wan trep i go raon long wol blong talemaot gud nyus. Mo tu, hem i sanem sam narafala man oli go blong statem mo lidim wok blong talemaot gud nyus long ol nyufala teritori. Hem i sanem Adolf Weber long Yurop long medel blong ol yia bitwin 1890 mo 1900, we hem i prij i stat long Swiselan go kasem Franis, Itali, Jemani, mo Beljiom. Hem i sanem E. J. Coward long ol aelan blong Karibin. Hem i sanem Robert Hollister i go wok long Orien long 1912. Long ples ya, oli mekemrere ol spesel traket long ten lanwis, mo ol man blong ol ples olsem India, Jaena, Japan, mo Koria oli seremaot plante milyan long ol traket ya long ol man blong ol ples we oli stap long hem. Sipos yu stap long taem ya, ?bambae hat blong yu i pusum yu blong traehad blong go talemaot gud nyus long ol man long ples blong yu mo long ol narafala ples tu?
7. (a) ?Olsem wanem oli yusum ol nyuspepa blong mekem wok blong prij i kam strong moa? (b) ?Wanem ya “Sinema blong Ol Samting We God i Wokem,” mo hamas man oli lukluk long wan yia nomo?
7 Taem Rul blong ol Hiten man i kam kolosap long en blong hem, oli yusum ol nyuspepa blong prentem ol tok we oli stanap long Baebol we Brata Russell i givim. Bigfala samting we oli tokbaot, i no long saed blong yia 1914, be long saed blong ol stampa tingting blong God mo se bambae God i mas mekem olgeta samting ya oli kamtru. Oli stap prentem ol tok ya long samting olsem 2,000 defren kaen nyuspepa, long semtaem nomo, mo 15,000,000 man oli stap ridim. Ale, taem yia 1914 i stat, Sosaeti i stat blong soem “Sinema Blong Ol Samting We God i Wokem” (“Photo-Drama of Creation”) long pablik. Long fo haf blong hem we wanwan long olgeta i kavremap tu haoa, hem i talemaot ol trutok blong Baebol stat long taem we God i mekem wol, i go kasem Rul blong Wan Taosen Yia. Long wan yia nomo, ol man long ol ples olsem Not Amerika, Yurop, Ostrelya, mo Nyu Silan, we oli luk drama ya, namba blong olgeta i bitim naen milyan.
8. ?Long 1914, ol Baebol Studen oli karem gud nyus i go long hamas kantri finis?
8 Folem histri we yumi save long saed blong taem ya, long en blong 1914, grup ya we i stap wok strong blong prij, i talemaot gud nyus blong Kingdom blong God long 68 kantri finis.a !Be hemia i stat blong hem nomo!
Strong Blong Talemaot Kingdom We i Stanap Finis
9. Long ol asembli long Seda Poen, ?olsem wanem oli kasem spesel paoa we i pusum olgeta blong talemaot Kingdom?
9 Taem ol Baebol Studen oli hivap wanples long Seda Poen, Ohaio, long 1919, J. F. Rutherford, we i presiden blong Watch Tower Society long taem ya, i talem se: “Wok blong yumi bifo mo naoia i blong talemaot nambawan Kingdom blong Mesaea we i stap kam.” Long namba tu asembli we oli mekem long Seda Poen, long 1922, Brata Rutherford i tokbaot poen ya se, long en blong Rul blong ol Hiten Man, long 1914, ‘King ya we i gat paoa i tekem bigfala paoa mo i statem rul blong hem finis.’ Biaen, hem i askem stret long ol man we oli stap lesin long hem, se: “?Yufala i bilif se King ya we i gat paoa i statem rul blong hem finis? !Sipos yufala i bilif, ale yufala i gobak long ol ples we yufala i stap prij long olgeta, yufala ol pikinini blong God ya we i hae olgeta! . . . Talemaot mesej ya long ol ples farawe. Olgeta man long wol oli mas save se Jeova i God mo Jisas Kraes i King blong ol king mo Masta blong ol masta. Hemia dei we i moa impoten bitim ol narafala dei. !Yufala i luk, King i stap rul finis! King ya i stap yusum yufala blong talemaot hem.”
10, 11. ?Olsem wanem oli yusum ol radyo, ol laod spika we trak i karem, mo ol kad we oli fasem long klos blong olgeta, olsem ol nambawan tul blong talemaot Kingdom trutok long olgeta man?
10 Stat long taem ya we oli mekem ol asembli long Seda Poen kam kasem naoia, i gat bitim 70 yia finis we oli pas—kolosap 80 yia nao, we Jeova i bin soemaot hae rul blong hem, tru long rul blong Pikinini blong hem we i Mesaea. ?Ol Wetnes blong Jeova oli kasem wanem mak finis long wok we Tok blong God i talem long olgeta blong mekem? ?Yu wan yu stap joen olsem wanem long wok ya?
11 Long stat blong ol yia biaen long 1920, oli yusum radyo olsem wan tul blong talemaot mesej blong Kingdom long ol ples longwe. Long ol yia biaen long 1930, ol tok blong ol asembli we oli tokbaot Kingdom olsem hop blong wol, oli kamaot long plante radyo mo telefon raonabaot long wol. Mo tu oli yusum ol laod spika we trak i karem blong talemaot long ol pablik ples ol tok ya we oli rikodem finis. Ale, long 1936, long Glasgo, Skotlan, ol brata blong yumi oli stat blong fasem ol kad long klos blong olgeta taem oli wokbaot long ol ples blong bisnes blong talemaot ol pablik tok. Ol samting ya oli ol nambawan rod blong givim wetnes long plante man long taem ya we namba blong ol Wetnes i smol nomo.
12. Olsem Baebol i soem, ?wanem nambawan rod we wanwan long yumi i save folem blong givim wetnes?
12 Tru ya, Baebol i soemaot klia se wanwan long yumi, olsem ol Kristin, yumi gat responsabiliti blong givim wetnes. Yumi no save letem ol store long nyuspepa no radyo nomo, oli mekem wok ya. Plante taosen Kristin we oli stap tru long God—ol man, woman, mo ol yangfala—oli akseptem responsabiliti ya. Frut we i kamaot se, wok blong prij long ol haos wanwan i kam wan samting we i makemaot ol Wetnes blong Jeova.—Ol Wok 5:42; 20:20.
Kasem Ol Man Long Olgeta Ples Long Wol
13, 14. (a) ?From wanem sam Wetnes oli muf i go long ol narafala taon, mo long ol narafala kantri tu, blong talemaot Kingdom? (b) ?Olsem wanem fasin we samfala oli gat blong tingbaot ol man long ples we oli bon long hem i bin givhan blong serem gud nyus?
13 From we ol Wetnes blong Jeova oli save se oli mas talemaot mesej ya blong Kingdom long ol man long olgeta ples long wol, sam long olgeta oli bin tingting strong long samting we wanwan long olgeta i save mekem blong talemaot gud nyus long ol eria afsaed long prapa ples blong olgeta.
14 Plante man oli lanem trutok afta we oli muvaot long kantri we oli bon long hem. Nating se oli muvaot blong kam rij moa long ol samting long saed blong laef, oli faenem samting we i moa gud, mo samting ya i pusum samfala blong gobak long kantri blong olgeta no long ples we oli bon long hem blong serem trutok wetem ol narafala. Taswe, long stat blong laswan handred yia, wok blong talemaot gud nyus i go kasem Skandinavia, Gris, Itali, ol kantri long Is Yurop, mo plante narafala ples. Naoia tu, long ol yia stat long 1990, mesej blong Kingdom i stap goaot moa long sem fasin.
15. ?Long ol yia biaen long 1920 mo 1930, samfala we oli gat tingting olsem i stap long Aesea 6:8, oli mekem wanem samting?
15 From we samfala oli mekem advaes long Tok blong God i wok long laef blong olgeta, oli givim ful laef blong olgeta blong go prij long ol ples we neva oli stap long olgeta bifo. W. R. Brown (plante taem oli kolem hem se “Baebol Brown”) i wan long ol man ya. Long 1923, blong mekem wok blong talemaot gud nyus i goaot moa, hem i aot long Trinidad, mo i muf i go long Wes Afrika. Long ol yia stat long 1930, Frank mo Gray Smith, Robert Nisbet, mo David Norman, oli stap long medel blong olgeta we oli karem mesej blong Kingdom i go long is-saed blong Afrika kolosap long solwora. Ol narafala oli givhan blong sakem sid long ol teritori long Saot Amerika. Stat long ol yia biaen long 1920, George Young, wan man Kanada, i joen long wok blong prij long Ajentina, Brasil, Bolivia, Jili mo Peru. Juan Muñiz, we i bin wok long Spen, i kam biaen long ol narafala mo i gohed blong prij long Ajentina, Jili, Paragwae, mo Urugwae. Ol man ya oli soemaot tingting we i stap long Aesea 6:8, se: “!Mi ya mi stap! Yu sanem mi.”
16. ?Bifo long ol yia blong faet, wok blong talemaot gud nyus i go kasem weples, antap long ol ples we oli gat plante man long olgeta?
16 Wok blong talemaot gud nyus i stap kasem ol ples tu we oli stap farawe olgeta. Ol sip we ol Wetnes nomo oli boskru blong olgeta, oli stap visitim olgeta pasis blong Nyufaonlan, ol ples long Nowe kolosap long solwora go kasem Aktik, ol aelan blong Pasifik, mo ol haba blong Saot-is Esia.
17. (a) ?Long 1935, ol Wetnes oli kasem hamas kantri finis? (b) ?From wanem wok blong prij i no finis long mak ya?
17 Wan samting blong sapraes, se long yia 1935, ol Wetnes blong Jeova oli stap bisi blong prij long 115 kantri, mo oli kasem 34 narafala kantri, long sam spesel trep blong prij no wetem sam buk we oli sanem tru long postofis. Nating se i olsem, be wok ya i no finis yet. Long 1935 nao, Jeova i mekem se oli kasem save long stampa tingting blong hem blong hivimap “wan bigfala hif blong man” we bambae oli pastru i go long nyufala wol blong hem. (Revelesen 7:9, 10, 14) !I gat plante wok yet blong mekem long saed blong wok blong prij!
18. ?Long saed blong wok blong talemaot Kingdom, Gilead Skul mo Ministeriol Trening Skul i bin mekem wanem wok?
18 Taem Namba Tu Bigfala Faet blong Wol i stap gohed yet long olgeta ples, mo oli putum tabu long ol buk no wok blong ol Wetnes blong Jeova long plante kantri, Wajtaoa Baebol Skul blong Gilead i stat blong trenem olgeta we bambae oli kam olsem ol misinari long fyuja, blong mekem bigfala wok we i stap yet blong talemaot Kingdom long olgeta ples blong wol. Kasem naoia, ol misinari blong Gilead oli stap wok long bitim 200 kantri. Oli no jes putum ol buk nomo ale biaen oli muf i go long narafala ples. No gat. Oli mekem ol Baebol stadi, stanemap ol kongregesen, mo oli trenem ol man blong karem ol tiokratik responsabiliti. I no longtaem i pas, ol elda mo ol man blong givhan we oli kamaot long Ministeriol Trening Skul, oli bin givhan tu blong mekem ol impoten wok ya long sikis bigfala kantri. Oli bin putum wan strongfala faondesen blong mekem wok ya i gohed blong gru.—Lukluk 2 Timote 2:2.
19. ?Go kasem wanem mak, ol man blong Jeova oli ansa long tok we i singaot olgeta blong go prij long ol ples we i gat bigfala nid?
19 ?Sam narafala oli save givhan blong wok long ol teritori we gud nyus i no kasem yet? Yes. Long 1957, long ol asembli raonabaot long wol, ol wanwan man mo ol famle—ol Wetnes blong Jeova we oli strong long saed blong speret—oli kasem advaes blong tingbaot blong muf i go long ol ples we oli gat bigfala nid, blong stap mo gohed long wok blong prij long ol ples ya. Tok blong singaot olgeta i kolosap sem mak long hemia we God i givim long aposol Pol long wan drim, we Pol i luk wan man i stap askem strong long hem se: “Plis yu kamkros long Masedonia, yu givhan long mifala.” (Ol Wok 16:9, 10) Samfala oli aot long ples blong olgeta long ol yia we oli stat long 1950, ol narafala oli aot biaen. Kolosap wan taosen Wetnes, oli muf i go long Aerlan mo Kolombia; i gat plante handred oli muf i go long ol narafala ples. Plante taosen oli muf i go long ol eria we i gat bigfala nid long hem long prapa kantri blong olgeta.—Ol Sam 110:3.
20. (a) ?Stat long 1935, wanem samting i bin kamaot blong fulumap profet tok blong Jisas long Matyu 24:14? (b) ?Long ol yia we oli jes pas, olsem wanem Jeova i bin mekem wok blong prij i spid moa?
20 From we Jeova i stap blesem ol man blong hem, wok blong talemaot Kingdom i stap spid moa bitim bifo. Stat long 1935 kasem naoia, namba blong ol pablisa i bin go antap kolosap eite taem, mo namba blong ol paenia i bin go antap 60 % bitim namba blong ol pablisa we i stap kam antap. Long ol yia biaen long 1930, oli stat blong mekem Baebol stadi wetem ol man long haos blong olgeta. Naoia, namba blong ol Baebol stadi we oli stap mekem evri manis, i bitim fo milyan haf. Stat long 1935, oli bin spenem moa long 15 bilyan haoa long wok blong talemaot Kingdom. Naoia oli stap gohed blong talemaot gud nyus long 231 kantri. Taem sam teritori long Is Yurop mo Afrika, oli kam fri moa blong talemaot gud nyus, ol intenasnal asembli oli kam wan bigfala rod blong talemaot klia mesej blong Kingdom long fes blong olgeta man. Olsem Jeova i bin promes longtaem bifo, long Aesea 60:22, i tru nomo se hem i stap ‘spidimap wok ya long prapa taem blong hem.’ !Yumi gat nambawan jans blong joen long wok ya!
Traem Kasem Evriwan Wetem Gud Nyus
21, 22. ?Wanwan long yumi i save mekem wanem blong gohed strong moa long wok blong prij long ol ples we yumi stap long olgeta?
21 Masta i no talem yet se wok ya i finis. Plante taosen man oli stap kam yet long trufala wosip. From samting ya, yumi save askem kwestin ya se, ?Yumi stap traehad long evri rod blong yusumgud taem we longfala tingting blong Jeova i letem i stap yet blong mekem wok ya?—2 Pita 3:15.
22 I no evriwan i save muf i go long teritori we yumi no prij long hem plante taem. ?Be yu stap yusum fulwan ol jans we yu yu gat? ?Yu yu stap prij long ol man we yu yu wok wetem olgeta, long ol tija mo ol fren long skul? ?Yu bin mekem sam jenis folem ol samting we oli stap jenis long teritori blong yu? Sipos i no gat tumas man oli stap long haos long dei from we oli stap jenisim taem blong wok blong olgeta, ?yu yu stap jenisim program blong yu blong visitim olgeta long sapa? Sipos i gat sam haos we oli no letem ol defren man blong kam insaed, ?yu yu stap yusum telefon no leta blong prij long olgeta? ?Yu yu stap gobak blong visitim olgeta we oli soem intres mo askem olgeta sipos yu save mekem Baebol stadi wetem olgeta long haos blong olgeta? ?Yu stap wok strong long olgeta haf blong wok blong talemaot gud nyus?—Lukluk Ol Wok 20:21; 2 Timote 4:5.
23. ?From we Jeova i stap lukluk olgeta samting we yumi stap mekem long wok blong hem, yumi mas mekem wanem?
23 I gud yumi evriwan, yumi mekem wok ya blong talemaot gud nyus, long fasin we i soemaot klia long Jeova se yumi rili gat fasin tangkyu long bigfala jans blong stap olsem ol Wetnes blong hem long impoten taem ya. !Yumi save gat jans blong luk jajmen we bambae Jeova i mekem long rabis wol ya mo taem we bambae i statem nambawan Rul blong Jisas Kraes long Wan Taosen Yia!
[Futnot]
a Oli kaontem folem fasin we oli yusum blong seraotem wol long ol defren kantri, jes biaen long 1990.
Tingtingbak
◻ ?From wanem wok blong talemaot mesej blong Kingdom i impoten tumas?
◻ ?Kam kasem 1914, wok blong talemaot gud nyus i bigwan olsem wanem?
◻ ?Wok blong prij i stap gohed olsem wanem stat long taem ya we Kingdom i stanap?
◻ ?Ating wanem samting i save mekem se wok blong yumi blong prij i save karem moa frut?
[Bokis blong pija long pej 16, 17]
OL WETNES BLONG JEOVA—Ol Man Blong Talemaot Kingdom Blong God
Long plante handred asembli raonabaot long wol long 1993 kasem 1994, oli talemaot nyufala buk ya Jehovah’s Witnesses—Proclaimers of God’s Kingdom. Hemia i wan buk we i givim plante save long fulwan histri blong ol Wetnes blong Jeova. Hem i gat 752 pej, i gat bitim wan taosen naesfala pija we oli tekem long 96 defren kantri. Long en blong 1993, oli prentem finis long 25 lanwis mo oli stap transletem long sam narafala lanwis bakegen.
?From wanem yumi save talem se buk ya i kamaot long stret taem? Long ol yia we oli jes pas, i bin gat plante milyan man raonabaot long wol we oli kam Wetnes blong Jeova. Olgeta evriwan oli mas savegud long histri blong ogenaesesen we oli stap joen wetem. Antap long samting ya, wok blong olgeta blong prij mo fasin blong mekem wosip i bin go kasem ol nesen mo ol defren grup blong man long olgeta ples long wol, ale plante long ol yangfala mo ol olfala, ol rijman mo ol pua man, olgeta we oli skulgud mo olgeta we oli no skulgud oli stap folem. Frut we i kamaot se, plante man we oli luk ol samting we oli stap hapen, oli askem plante kwestin long saed blong ol Wetnes—long saed blong bilif blong olgeta, be i no hemia nomo, oli askem tu long saed blong stampa blong olgeta, histri blong olgeta, ogenaesesen blong olgeta, mo ol mak we olgeta oli wantem kasem. Sam narafala oli bin raetem store long saed blong olgeta, nating se samtaem ol store ya oli no sapotem ol Wetnes. Be, i no gat man i save moa long histri blong olgeta Wetnes blong Jeova long ol yia we oli jes pas bitim ol Wetnes. Ol man we oli raetem buk ya, oli traehad blong talemaot histri ya long fasin we i stret mo i klia. Mo tu, taem oli mekem olsem, oli raetemdaon store blong ol samting we oli bin hapen kam kasem tede, we oli soemaot haf blong impoten profet tok long Matyu 24:14, long saed blong saen we i pruvum se Kraes i stap. Mo ol man ya nomo we oli joen fulwan long wok ya, oli save talem ol smosmol store we oli mekemap ful store blong wok ya.
Oli seraotem buk ya long seven bigfala haf:
Haf 1: Haf ya i tokbaot stampa histri blong ol Wetnes blong Jeova. Hem i joen wetem sotfala store blong ful histri blong olgeta long taem blong yumi, stat long 1870 kasem 1992.
Haf 2: Long haf ya i stap soemaot long klia fasin olsem wanem bilif blong ol Wetnes blong Jeova, we i mekem se oli defren long ol narafala skul, i kam klia sloslou.
Haf 3: Haf ya i soemaot olsem wanem oli wokem wan plan we ogenaesesen i save wok folem. Hem i tokbaot ol samting we oli pulum intres blong ol man long saed blong ol miting blong olgeta long kongregesen mo ol asembli, mo tu fasin blong olgeta blong bildim ol Haos Kingdom, ol bigbigfala Haos Asembli, mo ol faktri blong prentem ol buk we oli tokbaot Baebol. Hem i tokbaot strong tingting we i pusum ol Wetnes blong Jeova blong talemaot Kingdom blong God mo lav we oli soemaot taem oli stap keagud long narafala long taem blong trabol.
Haf 4: Long haf ya bambae yu faenem ol nambawan store we oli soem olsem wanem wok blong talemaot Kingdom blong God i bin kasem ol bigbigfala kantri raonabaot long wol mo ol aelan we oli stap long ol ples farawe. !Traem tingbaot—long yia 1914, oli stap prij long 43 kantri, be long 1992 oli stap prij long 229 kantri! Ol ekspiryens blong olgeta we oli bin joen long bigfala wok ya we i kam antap long olgeta ples long wol, i mekem yumi haremgud tumas.
Haf 5: Blong mekem olgeta wok ya blong talemaot Kingdom, i nidim plante bigbigfala faktri raonabaot long wol blong prentem Baebol mo tu ol buk we oli tokbaot Baebol long bitim tu handred lanwis. Long haf ya bambae yu kasem plante save long wok ya blong olgeta.
Haf 6: Ol Wetnes oli bin fesem ol traem tu—sam oli kamaot from we oli no stretgud olgeta, sam narafala i kamaot from ol gyaman brata, mo hemia we i bigwan moa i from ol man we oli ronem mo mekem nogud long olgeta. Tok blong God i givim woning se bambae samting ya i hapen. (Luk 17:1; 2 Timote 3:12; 1 Pita 4:12; 2 Pita 2:1, 2) Haf ya i tokbaot klia samting we i bin hapen mo olsem wanem bilif blong ol Wetnes blong Jeova i bin halpem olgeta blong winim ol samting ya.
Haf 7: Blong finisim, buk ya i eksplenemgud from wanem ol Wetnes blong Jeova oli gat strong tingting se God nao i rili stap lidim ogenaesesen we oli stap joen long hem. Mo tu, hem i tokbaot from wanem ogenaesesen mo wanwan long olgeta, oli harem se oli mas stap lukaotgud.
Antap long ol samting ya, insaed long buk ya we oli wokem long fasin we i pulum ae, i gat 50 pej we oli soem ol naesfala pija, mo oli givim save long saed blong hedkwota blong ol Wetnes blong Jeova, mo tu ol wanwan branj ofis blong olgeta raonabaot long wol.
Sipos yu no ridim nambawan buk ya yet, bambae i rili givhan long yu taem yu kasem mo ridim wan kopi blong buk ya we i pulum tingting blong ol man.
Ol Tok Blong Samfala We Oli Ridim Buk Ya Finis
?Olgeta we oli bin ridim buk ya oli talem wanem? Hemia tok blong samfala nomo:
“Mi jes finis blong ridim nambawan buk ya Jehovah’s Witnesses—Proclaimers of God’s Kingdom, mo ol store blong hem oli folem laef blong ol man. Wan ogenaesesen nomo we i stap holem strong tingting mo i gat tingting daon blong leftemap trutok i save raetem store olsem long fasin we i stret, oli no fraet blong talem stret, mo i pulum filing.”
“Ol tok blong buk ya oli olsem buk blong Ol Wok, wetem stret fasin blong toktok mo ol tok we oli tru mo oli klia.”
“!Hemia wan nyufala buk we i pulum intres! . . . Hem i wan nambawan wok blong eksplenemgud histri.”
Afta we wan man i ridim kolosap stret haf blong buk ya, hem i raetem se: “Mi sek, mi sapraes, mo kolosap wora blong ae blong mi i ron. . . . Long ful laef blong mi, i no gat wan buk we i pulum filing blong mi olsem.”
“Oltaem mi glad tumas taem mi tingbaot olsem wanem buk ya bambae i mekem bilif blong ol yangfala mo ol nyuwan we oli stap kam insaed long ogenaesesen tede i kam strong.”
“Oltaem mi gat fasin tangkyu from trutok, be taem mi ridim buk ya, hem i wekemap tingting blong mi, i halpem mi blong luksave moa bitim bifo se tabu speret blong Jeova i stap lidim trutok mo ol samting we oli joen wetem trutok.”
[Tok blong pija long pej 18]
Plante man oli kasem mesej blong Kingdom nating se long taem ya namba blong ol Wetnes i smol nomo