“Mi Stap Holem Yet Fasin Blong Bilif”
OLSEM OL FREN BLONG BRUNELLA INCONDITI OLI TALEM
“SAREDE ya i wan slak dei mo mi harem se mi stap mi wan nomo. Mi stap mi wan long rum, mi harem se mi no gat hop nating. Mi harem olsem se mi stap wokbaot long wan longfala rum. Evri samting i stap gohed gud, nao wantaem nomo, wan man i satem doa long fes blong mi, mo i no gat wan rod blong goaot, nating se mi traehad tumas.”
Hat blong Brunella Inconditi we i gat 15 yia blong hem, i hevi from tingting blong hem i foldaon bigwan. Dei ya we i moa impoten long ol narafala dei long yangfala laef blong hem i stap pas. Bifo, long sem yia ya, taem lav blong hem long Jeova mo Baebol i stap kam bigwan, ale samting ya i pusum hem blong givim laef blong hem long Jeova. Long Julae 1990, hem i gat plan blong tekem baptaes long “Klin Lanwis” Distrik Asembli blong ol Wetnes blong Jeova long Montriol, Kanada. Be defren nao, Brunella i stap fesem wan traem long bilif blong hem we bambae i gohed long ful laef blong hem.
Tu dei nomo bifo we Brunella i gat plan blong baptaes long wora blong soemaot se hem i givim laef blong hem long Jeova finis, hem i faenemaot se hem i kasem sik ya lukimia. Ol dokta long hospital blong ol pikinini long ples blong hem oli wantem blong givim meresin long hem kwiktaem, taswe Brunella i stap slip long hospital.
Prapa Tok Blong Hem i Tajem Hat Blong Ol Dokta
Brunella i save se blad i wan tabu samting long tingting blong Jeova God. (Levitikas 17:11) Papa mama blong hem, Edmondo mo Nicoletta, tufala i bin talem long olgeta long hospital se oli no mas givim blad transfyusen long gel blong tufala. Papa blong hem i tingtingbak, nao i talem se: “Brunella i wantem se ol dokta oli harem disisen ya long prapa tok blong hem tu, nating se hem i wan pikinini nomo. Hem i talem klia long olgeta se hem i no wantem enikaen meresin we i agensem loa blong Baebol blong ‘no kakae blad.’ ”—Ol Wok 15:20.
Long Julae 10, 1990, tri dokta mo wan woman we i wok blong givhan long ol man we oli kasem trabol, oli mekem miting wetem papa mama blong Brunella mo tu elda blong kongregesen blong ol Wetnes blong Jeova long ples blong olgeta. Ol tes oli pruvum se Brunella i kasem strong sik ya limfoblastik lukimia. Ol dokta oli eksplenem plan blong olgeta blong traem winim strong sik ya. Long kaen fasin oli eksplenem se i hadwok blong winim. Wan elda blong kongregesen i tingting long taem ya, i se: “Fasin mo strong tingting blong Brunella blong obei long God i tajem hat blong ol dokta mo woman we i stap wok blong givhan long ol man we oli kasem trabol. Oli sapraes long lav we papa mama blong hem tufala i gat long hem, mo sapot we ol fren blong hem long Kristin kongregesen oli givim long hem. Mo tu oli glad long fasin blong mifala blong luksave mo respektem posisen blong olgeta.”
Ol dokta oli gat tingting blong no givim blad transfyusen. Bambae oli givim plante strong meresin long Brunella, be bambae i no strong olsem evritaem. Samting ya bambae i mekem se meresin ya i no spolem tumas sel long blad blong hem. Nicoletta i eksplenem se: “Ol dokta oli tingbaot ol nid blong Brunella long saed blong bodi, filing mo speret. Taem mifala i askem long olgeta blong toktok wetem wan spesel dokta we i gat ekspiryens long fasin blong traem winim lukimia long ol pikinini, we i no yusum blad transfyusen, oli agri.” Brunella mo olgeta we oli wok long hospital oli laeklaekem olgeta tumas.
Ol Mak We Hem i Wantem Kasem Long Saed Blong Speret
Nating se faswan meresin i mekem sam gud risal oli kamaot, hemia stat nomo blong hadtaem we Brunella i mas fesem. Long Novemba 1990, oli blokem sik blong hem, ale hem i hareap blong tekem baptaes. Brunella i tokbaot ol manis bifo, i se: “I no isi nating. Yu mas gat plante paoa, mo yu mas tingting long gud saed blong evri samting. . . . Bilif blong mi i kasem traem, be mi stanap strong, mo mi holem plan blong mi yet blong mekem wok blong fultaem paenia [wok blong prij fultaem] olsem wok blong laef blong mi.”
Long stat blong 1991, sik blong Brunella i kam antap bakegen. Kolosap hem i ded taem oli givim strong meresin long hem bakegen, be evriwan oli sapraes mo oli glad tumas taem hem i kamgud bakegen. Long Ogis, hem i strong inaf long bodi blong yusum wan ful manis long wok blong prij olsem wan haftaem paenia. Sik blong hem i kam strong bakegen, ale long Novemba 1991 hem i kasem kansa long plante haf blong bodi blong hem. Wan narafala tim blong dokta long wan narafala hospital oli stat blong yusum wankaen paoa blong lektrik long hem blong traem blokem sik ya.
Nating se hem i kasem hadtaem, Brunella i holemstrong bilif blong hem mo i putum sam mak long saed blong speret we hem i wantem kasem. Taem oli talem long hem fastaem se hem i gat lukimia, oli talem se maet hem i laef sikis manis nomo. Naoia, kolosap wan yia haf biaen, Brunella i stap mekem plan blong fyuja blong hem yet. Wan elda blong kongregesen i talem se: “Hem i no slou blong stat blong kasem ol mak we hem i putum. Bilif blong Brunella long promes blong God blong mekem Paradaes, i givim paoa long hem tru long olgeta trabol blong hem. Hem i kam bigman long Kristin fasin nating se hem i no gat plante yia. Fasin mo tingting blong hem i givim paoa long kongregesen mo i tajem hat blong olgeta we oli save hem, wetem ol man we oli wok long hospital tu.” Mama blong hem i tingtingbak, i se: “Hem i neva komplen. Taem wan man i askem long hem olsem wanem long hem, hem i ansa, ‘I gud’ no, ‘Gud smol, ?mo olsem wanem long yu?’ ”
Fyuja We i Sefgud
Brunella i mekem plan blong go long “Ol Man Blong Karem Laet” Distrik Asembli blong ol Wetnes blong Jeova long Julae 1992. Be long taem blong asembli ya, Brunella i stap slip long hospital, mo hem i stap lusum paoa kwiktaem. Nating se i olsem, hem i go long asembli ya long wiljea, from hem i wantem tumas blong luk drama ya Mekem Samting We i Stret long Ae blong Jeova.
Hem i kam stap long haos wetem famle blong hem long ol las dei blong laef blong hem. Nicoletta i talem se: “Go kasem en, hem i stap wari long ol narafala bitim hem wan. Hem i stap talem long olgeta blong stadi Baebol, hem i se, ‘Bambae yumi stap tugeta long Paradaes.’ ”
Brunella i ded long Julae 27, 1992, hem i holemstrong hop blong hem blong laef bakegen long Paradaes long wol. Hem i stat nomo blong kasem ol mak blong hem, be hem i mekem plan blong gohed long rod blong hem we hem i givim laef blong hem long Jeova, afta we hem i laef bakegen. Sam dei nomo bifo we hem i ded, Brunella i raetem leta ya we i stap biaen, we oli ridim long sevis blong berem hem.
“Ol Fren Blong Mi:
“Tangkyu blong kam. Samting ya i gat bigfala mining long famle blong mi.
“Long olgeta we oli kolosap long mi—yumi bin gotru long plante samting. Yumi bin gat plante nogud taem, be i gat sam taem we yumi bin laf tu. Hem i wan faet we i longfala mo i had, be mi no harem se mi lus long faet ya. Olsem Baebol i talem, ‘Mi mi faet strong finis long gudfala faet ya we yumi stap faet long hem. Mi mi kamtru finis long en blong resis ya, mo mi stap holem yet fasin blong bilif.’—2 Timote 4:7.
“Mi mi bin lanem plante samting, mo mi gruap plante, mo ol fren blong mi mo olgeta we oli stap raonabaot long mi oli luk ol jenis ya. Mi wantem talem tangkyu long olgeta ya we oli bin sapotem mi.
“Yufala we yufala i bilif long nyufala wol mo long Jeova, yufala i save se bambae ol dedman oli laef bakegen, olsem Jon 5:28, 29 i talem. Taswe yufala i mas stap gohed strong long trutok, mo bambae yumi save luk yumi bakegen.
“Mi wantem talem tangkyu long olgeta we oli save wanem we mi bin gotru long hem. Mi wantem putum han blong mi raon long wanwan long yufala blong wan longfala taem mo givim kis long yufala. Mi laekem yufala evriwan tumas.”
Brunella i no letem yangfala yia no sik blong hem i blokem hem blong no givim laef blong hem long God. Eksampel blong hem long saed blong bilif mo strong tingting blong gohed, i save leftemap tingting blong ol yangfala mo ol olfala tu blong sakem eni samting we maet i stap blokem olgeta blong no resis strong long resis blong kasem laef.—Hibrus 12:1.