Ripot Long Wok Blong Kingdom
Tok Blong God i Gat Paoa
“TOK blong God i laef i stap mo paoa blong hem i stap wok.” (Hibrus 4:12, NW) Plante taem bakegen, ol tok ya oli tru nomo long ol man we oli lesin long ol trutok blong Baebol, afta we gyaman skul i bin gyaman long olgeta. Olsem ekspiryens blong Dominikan Ripablik biaen i soem, paoa blong Baebol i save jenisim laef blong ol man mo givim hop.
Ol Wetnes blong Jeova oli visitim wan woman we i strong long Katolik, we i no longtaem i pas, tu smol pikinini blong hem oli ded. Evri dei, hem i stap sore tumas mo i stap krae from trabol we hem i kasem. Ol Wetnes oli soem long hem samting we Baebol i talem long Jon 5:28, 29 long saed blong hop blong laef bakegen long ded. Afta we hem i toktok moa wetem ol Wetnes, hem i haremgud long hop blong laef bakegen, be tu hem i luksave se ol lida blong hem long Katolik Skul oli stap gyaman long hem.
Kwiktaem nomo, woman ya i risaen long Katolik Jyos, mo hem i agri blong stadi Baebol wetem ol Wetnes blong Jeova. Be hasban blong hem i no agri long tingting blong hem. From we hasban ya tu i strong long Katolik, hem i mekem plan wetem ol fren blong hem we ol man oli savegud olgeta olsem ol man blong politik mo skul, blong oli visitim waef blong hem blong traem blokem disisen blong hem mo blong tekem hem i kambak long Katolik. Biaen, hem i talem long woman blong hem se bambae tufala i divos, mo i talemaot long ol famle blong hem mo ol memba blong jyos se bambae tufala i divos.
Be plan blong hem i no wok. Long defren fasin, waef blong hem i gohed strong moa long Baebol stadi blong hem. From we hem i gru long saed blong speret mo i wokem ol gudfala Kristin fasin, hasban blong hem i mekem disisen blong stap wetem hem, i no moa lukaot rod blong divos. Wan dei, hem i agri blong stadi long ol buk we oli tokbaot Baebol, we waef blong hem i stap stadi long olgeta—be wan samting nomo. Hem i wantem yusum prapa Katolik Baebol blong hem.
Hem i sapraes tumas, ol buk blong ol Wetnes blong Jeova oli halpem hem blong lanem ol nyufala samting stret long prapa Baebol blong hem. Hem i luksave se waef blong hem i jusum stret rod, mo smoltaem biaen hem i rere blong folem eksampel blong hem. Tru ya, hem i luksave se hem i nidim blong jenisim prapa laef blong hem. Wan traem we i had long hem, hemia blong stopem fasin blong smok sigaret. Afta we hem i ridim Wekap! magasin blong Julae 8, 1989, (long Engglis mo Franis; Namba 2, 1990, long Bislama), taetel we i stap long fored blong hem se “Oli Salem Ded—Ten Rod Blong Stopem Smok,” hem i gat strong tingting blong stopem fasin ya we Baebol i no agri long hem nating. Naoia hem i no moa karem sigaret long poket blong hem, olsem we hem i stap mekem oltaem, be hem i stat blong karem Wekap! magasin ya wetem hem. Long ol taem we hem i harem se hem i wantem smok, hem i ridim ol haf we oli tokbaot fasin blong smok. !Long rod ya, hem i winim! Afta we hem i ridim ol haf blong magasin ya plante taem, hem i kam naf blong stopem fasin blong smok.
Tede, hasban mo waef ya, tufala i stap mekem wok blong Jeova, olsem ol Kristin minista we oli baptaes finis. Taem ol samting long laef blong tufala i no fasfas tumas, hasban i wok olsem wan fultaem Kristin minista, i givim plante taem blong hem blong talemaot gud nyus blong Kingdom blong God, mo hem i wok olsem wan man blong givhan long kongregesen blong ol Wetnes blong Jeova long ples ya. Hem mo waef blong hem, tufala i stap lukluk i go long taem ya we bambae ol dedman oli laef bakegen, taem we bambae tufala i save mekem welkam long tufala pikinini blong tufala bakegen, blong laef long wan nyufala wol. !Yes, Tok blong God, Baebol, hem i laef i stap mo paoa blong hem i stap wok!