Lukaotgud Long Ol Sipsip Blong God Wetem Lav
“Yufala i mas lukaotgud long ol man we God i givim long yufala, olsem we man blong lukaot long sipsip i stap lukaotgud long ol sipsip blong hem.”—1 PITA 5:2.
1, 2. ?Wanem fasin nao i bigfala fasin blong Jeova, mo olsem wanem hem i soemaot fasin ya?
FULWAN Tabu Baebol i soemaot klia se lav i bigfala fasin blong God. Fas Jon 4:8 i talem se: ‘God i lav.’ From we God i mekem plante samting blong soemaot lav blong hem long ol man, 1 Pita 5:7 i talem se hem “i stap tingbaot yufala.” Baebol i talem se, fasin ya we Jeova i stap keagud long ol man blong hem, i olsem fasin ya we wan man blong lukaot long sipsip we hem i gat lav, i stap keagud long ol sipsip blong hem: ‘!Yu luk! Hae Masta Jeova bambae i lukaot long sipsip blong hem. Wetem han blong hem, bambae hem i hivimap ol smol sipsip blong hem, mo bambae hem i holem olgeta kolosap long hem. Bambae hem i lukaotgud long olgeta we oli gat pikinini we oli stap titi.’ (Aesea 40:10, 11) !Samting ya i mekem Deved i haremgud tumas, nao i talem se: “Hae God i stap lukaot long mi olsem we mi mi sipsip blong hem, mi mi no save sot long wan samting”!—Ol Sam 23:1.
2 I stret nomo we Baebol i talem se ol man we God i glad long olgeta, oli olsem sipsip, from we ol sipsip oli gat pis, oli lesin, mo oli obei long man we i stap lukaotgud long olgeta. Olsem Man blong Lukaot long Sipsip we i gat lav, Jeova i keagud tumas long ol man blong hem we oli olsem sipsip. Hem i soemaot samting ya taem hem i stap givim ol samting we oli nidim long saed blong bodi mo long saed blong speret, mo taem hem i stap lidim olgeta tru long ol ‘lasdei’ blong rabis wol ya we laef i strong tumas, blong go insaed long nyufala wol blong hem we stret fasin nomo i stap long hem.—2 Timote 3:1-5, 13; Matyu 6:31-34; 10:28-31; 2 Pita 3:13.
3. ?Man blong raetem Ol Sam i talem se fasin blong Jeova blong keagud long ol sipsip blong hem i olsem wanem?
3 Makemgud fasin blong Jeova blong keagud long ol sipsip blong hem wetem lav: “Hae God i stap lukluk long ol stret man, i stap lesin blong harem krae blong olgeta. . . . Taem ol stret man oli krae i go long Hae God, hem i harem olgeta, i tekemaot olgeta long olgeta trabol blong olgeta. Hae God i stap kolosap long ol man we tingting blong olgeta i kam nogud, i stap sevem ol man we tingting blong olgeta i foldaon olgeta. Man we i stret i save harem nogud long plante trabol, be Hae God i save tekemaot hem long olgeta trabol ya.” (Ol Sam 34:15-19) !Bigfala Man blong Lukaot Sipsip long Heven mo Wol i mekem se ol man blong hem we oli olsem sipsip oli haremgud tumas!
Eksampel Blong Gudfala Man Ya Blong Lukaot Long Sipsip
4. ?Wanem wok blong Jisas blong lukaot long ol sipsip blong God?
4 Pikinini blong God, Jisas, i bin lanemgud wok ya long Papa blong hem, from we Baebol i kolem Jisas se “gudfala man ya blong lukaot long sipsip.” (Jon 10:11-16) Revelesen japta 7 i makemgud impoten wok we hem i mekem long ol sipsip blong God. Long vas 9, Baebol i kolem ol man blong wok blong God long taem blong yumi se, ‘wan bigfala hif blong man we oli kamaot long olgeta kala mo long olgeta laen, mo long olgeta kantri, mo long olgeta lanwis.’ Biaen, vas 17 i talem se: “Smol Sipsip [Jisas] . . . bambae i lukaot long olgeta, olsem we man blong lukaot long sipsip i stap lukaot long ol sipsip blong hem. Hem bambae i lidim olgeta oli go dring long ol springwora ya we i save givim laef. Mo God bambae i ravemaot wora blong ae blong olgeta.” Jisas i lidim ol sipsip blong God oli go long wora blong trutok we i soemaot rod blong laef we i no save finis. (Jon 17:3) Makemgud we Baebol i kolem Jisas se “Smol Sipsip,” blong soem ol prapa fasin blong hem olsem sipsip, hem i bigfala eksampel long fasin blong obeigud long God.
5. ?Wanem filing blong Jisas long saed blong ol man?
5 Taem Jisas i kam long wol, mo i stap wetem ol man, hem i luk ol samting we i mekem olgeta oli harem nogud tumas. ?Hem i gat wanem filing long ol man we oli kasem ol trabol? “Hem i sore tumas long olgeta, from we olgeta oli trabol tumas, oli no moa gat paoa, oli olsem ol sipsip we oli no gat man blong lukaot long olgeta.” (Matyu 9:36) Ol prapa sipsip we oli no gat man blong lukaot long olgeta, oli harem nogud bigwan from ol anamol we oli wantem kakae olgeta, mo samting ya i sem mak long ol sipsip we man blong lukaot long olgeta i no keagud long olgeta. Be Jisas i keagud tumas long ol man, from we hem i talem se: “Yufala evriwan we yufala i stap hadwok tumas, yufala i stap karem ol hevi samting, yufala i kam long mi. Bambae mi mi givim spel long yufala. Yufala i mas putum yok blong mi long solda blong yufala, blong yufala i mekem wok blong mi. Mo yufala i mas lan long mi, from we mi mi wan kwaet man, tingting blong mi i stap daon. Nao bambae yufala i faenem we tingting blong yufala i gat spel. From we yok ya we bambae mi putum long yufala, wok blong hem i isi. Mo ol samting we mi givim long yufala blong yufala i karem, oli no hevi.”—Matyu 11:28-30.
6. ?Olsem wanem Jisas i tingbaot olgeta we narafala i spolem olgeta?
6 Wan profet tok blong Baebol i bin talem se bambae Jisas i mekem ol samting long ol man wetem fasin lav: “Jeova i makemaot mi finis . . . blong kavremapgud ol soa blong olgeta we oli sore tumas long hat blong olgeta, mo . . . blong leftemap tingting blong olgeta we oli krae.” (Aesea 61:1, 2; Luk 4:17-21) Jisas i neva lukluk daon long olgeta we oli pua mo oli trabol. Defren olgeta, hem i mekem profet tok blong Aesea 42:3 i kamtru, se: “Bambae hem i no brekem waelken we i bendaon finis; mo long saed blong laet we kolosap i ded, bambae hem i no kilim.” (Lukluk Matyu 12:17-21.) Olgeta we oli trabol tumas oli olsem ol waelken we oli bendaon finis, olsem laet we kolosap i ded from i no moa gat karsin. Jisas i luksave trabol blong olgeta, ale hem i soem fasin sore long olgeta mo i mekem se oli gat paoa mo hop, i mekem oli kamgud bakegen long saed blong speret mo long saed blong bodi.—Matyu 4:23.
7. ?Jisas i pulum ol man we oli kam long hem blong oli givim ona long hu?
7 Bigfala hif blong ol man we oli olsem sipsip, oli kam long Jisas. Fasin blong hem blong tij i gud tumas, mekem se ol soldia we oli kam blong holem hem oli talem se: “I no gat man samtaem we i stap tok olsem man ya.” (Jon 7:46) !Tingbaot, ol lida blong skul we oli gat tu fes, oli komplen se: “Naoia, olgeta man evriwan oli biaen long hem”! (Jon 12:19) Be Jisas i no wantem blong ol man oli givim ona mo leftemap hem wan. Hem i pulum ol man blong givim ona long Papa blong hem. Hem i tijim olgeta blong mekem wok blong Jeova from lav we oli gat long ol nambawan fasin blong hem, se: ‘Yufala i mas laekem Hae God ya we i God blong yufala long olgeta hat blong yufala, mo long olgeta laef blong yufala, mo long olgeta paoa blong yufala mo long olgeta maen blong yufala.’—Luk 10:27, 28.
8. ?Olsem wanem fasin obei blong ol man blong God i defren long fasin obei we ol narafala oli givim long ol rula blong wol?
8 Jeova i glad tumas we ol man blong hem we oli olsem sipsip, oli sapotem hae rul blong hem long heven mo long wol from lav we oli gat long hem. Oli wantem blong mekem wok blong hem from we oli kasem save long ol fasin blong hem we oli pulum man blong laekem hem. !I defren olgeta long ol lida blong wol ya we ol man blong olgeta oli stap obei long olgeta nomo from fasin fraet, oli obei be oli no glad blong mekem, no oli obei blong kasem wan samting blong olgeta from! Tok ya we wan man i bin talem long saed blong wan pop blong Roman Katolik Jyos, se: “Plante man oli ona long hem, olgeta man oli fraet long hem, be i no gat wan nating we i laekem hem,” neva yumi save talem se Jeova mo Jisas, tufala i olsem.—Vicars of Christ—The Dark Side of the Papacy, we Peter De Rosa i raetem.
Ol Man Blong Lukaot Long Sipsip Long Isrel We Oli Spolem Ol Man
9, 10. Tokbaot ol lida blong ol man Isrel bifo mo long faswan handred yia.
9 I defren olgeta long Jisas, ol lida blong skul blong ol man Isrel long taem blong hem, oli no gat lav nating long ol sipsip. Oli olsem ol faswan rula blong Isrel we Jeova i bin tokbaot olgeta se: “!Sore tumas long ol man blong lukaot sipsip long Isrel, we oli kam olsem man blong fidim olgeta bakegen! ?I no ol sipsip nao we ol man ya blong lukaot long sipsip oli mas fidim? . . . Olgeta we oli sik, yufala i no bin mekem oli kam strong, mo olgeta we oli harem nogud, yufala i no bin mekem oli kamgud bakegen, mo olgeta we oli harem i soa, yufala i no bin blokem soa blong olgeta, mo olgeta we oli go wanwan, yufala i no bin tekem olgeta oli kambak, mo olgeta we oli lus, yufala i no bin traem blong faenem olgeta, be wetem fasin we i strong tumas, yufala i mekem olgeta oli stap daon long yufala, wetem fasin we i mekem oli harem nogud tu.”—Esikel 34:2-4.
10 Olsem ol politik man blong lukaot sipsip, ol lida blong skul blong ol man Jyu long faswan handred yia oli no gat sore nating long ol man. (Luk 11:47-52) Blong eksplenem samting ya, Jisas i tokbaot wan man Jyu we sam man blong stil oli holem hem, oli kilim hem, nao oli ronwe long hem we i stap hafded long saed blong rod. Ale i gat wan pris blong Isrel i stap folem rod i kam, be taem hem i luk man Jyu ya, hem i pas long narasaed rod. Wan Livaet i mekem sem mak. Biaen, wan man we i no wan man Isrel, wan man Sameria, we ol man Isrel oli stap lukluk daon long olgeta, i kam mo i sore long man ya we oli kilim hem. Hem i wasem ol sobodi blong hem, i fasemgud olgeta, i putum man ya long wan dongki, i tekem hem i go long wan hotel, mo i lukaot long hem. Hem i pem man blong hotel ya mo i talem long hem se, sipos hem i yusum sam mane blong hem antap, taem we hem i kambak bakegen, bambae hem i pembak mane blong man ya blong hotel.—Luk 10:30-37.
11, 12. (a) ?Olsem wanem rabis fasin blong ol lida blong skul i kam bigwan tumas long taem blong Jisas? (b) ?Biaen ol man Rom oli mekem wanem long ol lida blong skul?
11 Fasin blong ol lida blong skul long taem blong Jisas i nogud tumas, mekem se taem Jisas i mekem Lasros i laef bakegen long ded, ol jif pris mo ol Farisi oli mekem miting wetem Kaonsel Sanhedrin mo oli talem se: “?Bambae yumi mekem olsem wanem? From we man ya [Jisas] i stap mekem plante saen ya. Sipos yumi letem hem i stap gohed long fasin ya, bambae olgeta man oli save bilif long hem. Nao bambae ol man Rom oli save kam spolem haos blong God blong yumi, wetem ol man blong kantri blong yumi.” (Jon 11:47, 48) Oli no tingbaot gudfala samting we Jisas i mekem long man we i ded. Oli tingbaot haenem blong olgeta. “Nao long dei ya, olgeta oli agri se oli mas kilim Jisas i ded.”—Jon 11:53.
12 Blong mekem rabis fasin blong olgeta i moa nogud, biaen “ol jif pris oli agri se oli mas kilim Lasros tu i ded, from we plante man Isrel, taem oli luk hem, oli no moa biaen long ol lida blong olgeta, oli bilif long Jisas.” (Jon 12:10, 11) Oli no win long fasin blong olgeta blong tingbaot olgeta nomo, taem oli traehad blong protektem haenem blong olgeta, from we Jisas i bin talem se: “God i gowe long yufala finis, ples blong yufala i emti nomo.” (Matyu 23:38) Blong fulumap ol tok ya, biaen, taem ol man ya oli laef yet, ol man Rom oli kam mo oli tekemaot ‘ples mo kantri blong olgeta’ mo laef blong olgeta tu.
Ol Man Blong Lukaot Sipsip We Oli Gat Lav Long Kristin Kongregesen
13. ?Hu ya man we Jeova i promes blong sanem i kam blong lukaot long ol sipsip blong hem?
13 Jeova i putumap Jisas, Gudfala Man ya blong Lukaot long Sipsip blong lukaot long ol sipsip blong Hem, blong tekem ples blong ol man ya blong lukaot long sipsip we oli spolem ol man mo oli tingbaot olgeta nomo. Hem i promes tu se bambae hem i putumap sam narafala man blong lukaot long sipsip we bambae oli wok aninit long Jisas mo oli gat lav, se: “Bambae mi putumap sam man blong lukaot long sipsip we bambae oli lukaot long olgeta; mo bambae oli no moa save fraet.” (Jeremaea 23:4) Olsem nao, long ol faswan Kristin kongregesen mo tede tu, oli stap ‘putumap ol elda long evri ples.’ (Taetas 1:5) Ol man ya we oli olfala long saed blong speret, we oli kasem ol mak we Baebol i putumap, oli mas ‘lukaotgud long ol man blong God, olsem we man blong lukaot long sipsip i stap lukaotgud long ol sipsip blong hem.’—1 Pita 5:2; 1 Timote 3:1-7; Taetas 1:7-9.
14, 15. (a) ?Wanem fasin ya we ol disaepol blong Jisas oli faenem se i had blong wokem? (b) ?Wanem samting Jisas i mekem blong soem long olgeta se ol elda oli mas ol man blong wok we oli gat tingting daon?
14 Taem ol elda oli stap lukaot long ol sipsip, “antap long ol narafala samting,” oli mas “laekem tumas” ol sipsip ya. (1 Pita 4:8) Be ol disaepol blong Jisas, from we oli wari tumas long saed blong paoa mo haenem, oli mas lanem samting ya. Taswe taem mama blong tufala disaepol i talem long Jisas se: “Plis, mi wantem blong yu putum wan tok se taem we bambae yu yu king, tufala pikinini ya blong mi i save sidaon, wan long raetsaed blong yu mo wan long lefsaed blong yu,” ol narafala disaepol oli kros. Jisas i talem long olgeta se: “Yufala i save finis we ol haeman blong ol hiten man oli stap ronem ol man blong olgeta, mo ol jif blong olgeta oli stap mekem ol narafala man oli stap aninit long olgeta. Be fasin blong yufala bambae i no olsem. Sipos wan long yufala i wantem kam we i haeman blong yufala, hem i mas kam olsem man blong wok blong yufala. Mo sipos wan man i wantem kam lida blong yufala, hem i mas kam olsem slef nomo blong yufala.”—Matyu 20:20-28.
15 Long wan narafala taem, afta we ol disaepol oli “rao from wan kwestin blong olgeta se, ‘?Hu man long yumi we i hae moa?’” Jisas i talem long olgeta se: “Man we i wantem kam hae moa long ol narafala man, hem i mas tekem las ples, daon long ol man. Hem i mas kam olsem man blong wok blong olgeta.” (Mak 9:34, 35) Tingting daon mo fasin blong wantem mekem wok blong narafala, i mas kam olsem haf blong prapa fasin blong olgeta. !Be i had long ol disaepol blong lego ol tingting ya, from we jes long naet ya we Jisas i ded long hem, long laswan kakae blong hem long sapa, “wan rao” i kamaot long medel blong olgeta from kwestin ya se, ‘?Hu man long olgeta we i hae moa?’! Samting ya i kamaot nating se Jisas i soem finis long olgeta olsem wanem wan elda i mas mekem wok blong ol sipsip; hem i mekem tingting blong hem wan i stap daon mo i wasem leg blong olgeta. Hem i talem se: “From we mi, mi Masta mo Tija blong yufala, mi wasem leg blong yufala, yufala tu i mas waswasem leg blong yufala. Mi mi putum wan eksampel blong yufala, blong bambae yufala i save mekem sem fasin ya nomo we mi mi mekem long yufala.”—Luk 22:24; Jon 13:14, 15.
16. ?Long 1899, Watch Tower i tokbaot wanem fasin blong ol elda we i moa impoten?
16 Oltaem ol Wetnes blong Jeova oli bin lanem se ol elda oli mas gat fasin olsem. Kolosap 100 yia bifo, Watch Tower blong Epril 1, 1899, i makem ol tok blong Pol long 1 Korin 13:1-8 mo biaen i talem se: “Aposol ya i soemaot klia se save mo gudfala fasin blong toktok oli no faswan impoten samting, be lav we i fulap long hat mo we man i soemaot tru long ful laef blong hem, mo i stap lidim mo i stap pulum hem, hemia nao impoten samting—trufala pruf we i soem se hem i frengud wetem God. . . . Faswan fasin we man i mas gat blong hem i naf blong kam wan man blong wok blong jyos, mo blong stap wok long saed blong ol tabu samting, faswan samting olgeta, hemia speret blong lav.” Wajtaoa ya i makem se olgeta we oli no gat tingting daon blong wok wetem lav, “oli ol tija we oli denja, mo oli save mekem moa trabol bitim we oli mekem ol man oli haremgud.”—1 Korin 8:1.
17. ?Olsem wanem Baebol i leftemap ol fasin we ol elda oli mas gat?
17 Olsem nao, ol elda oli no mas “kam olsem bigfala masta” long ol sipsip. (1 Pita 5:3) Be oli mas soemaot eksampel long fasin blong ‘kaen long ol narafala, mo oli mas gat gudfala fasin sore.’ (Efesas 4:32) Pol i makemgud se: “Yufala i mas putum nyufala laef ya blong yufala olsem prapa klos blong yufala. Yufala i mas gat sore long ol man. Yufala i mas mekem i gud long ol man. Tingting blong yufala i mas stap daon. Yufala i mas kwaet man. Mo tingting blong yufala i mas longfala. . . . Mo wetem ol fasin ya, yufala i mas laekem tumas ol man. From we fasin ya blong laekem tumas ol man, hem i save joenem olgeta samting, blong oli kam wan nomo stret.”—Kolosi 3:12-14.
18. (a) ?Pol i soem wanem nambawan eksampel long fasin we hem i mekem long ol sipsip? (b) ?From wanem ol elda oli no mas ting nating long ol nid blong ol sipsip?
18 Pol i lanem blong mekem samting ya, hem i talem se: “Taem mifala i stap wetem yufala, mifala i stap mekem i isi long yufala, olsem wan mama we i stap lukaot long ol pikinini blong hem. Mifala i no tingbaot blong talemaot gud nyus ya nomo long yufala. Mifala i rere tu blong lego long laef blong mifala, from we mifala i laekem yufala tumas, mifala i wantem tumas blong givhan long yufala.” (1 Tesalonaeka 2:7, 8) Mo bakegen, hem i talem samting we i kolosap sem mak, se: “Yufala i mas mekem tingting blong ol man ya we oli fraet, i strong bakegen. Yufala i mas givhan long olgeta we oli no gat paoa. Mo long olgeta man, yufala i mas mekem tingting blong yufala i longfala, blong yufala i no kros kwik.” (1 Tesalonaeka 5:14) Nating se wanem trabol we ol sipsip oli karem i kam long olgeta, ol elda oli mas tingbaot Proveb 21:13, se: “Man we i no wantem harem krae blong wan man we i daon moa, hem wan bambae i singaot be bambae i no save kasem ansa.”
19. ?From wanem ol elda we oli gat lav oli wan blesing, mo ol sipsip oli mekem wanem taem oli glad long lav ya?
19 Ol elda we oli lukaot long ol sipsip wetem lav oli wan blesing long ol sipsip. Aesea 32:2 i talem se: “Mo bambae olgeta wanwan oli olsem wan ples blong haed long hem taem i gat bigfala win, mo olsem wan sefples taem bigfala ren i foldaon. Bambae oli olsem ol wora we i ron long drae ples, mo olsem sado blong bigfala ston long ples we i hot tumas.” Yumi glad blong save se ol naesfala tok ya we i mekem yumi i haremgud, oli stret long plante long ol elda blong yumi. Oli lanem finis blong folem rul ya: “Yufala i mas laeklaekem yufala olsem we yufala i wan brata nomo from we yufala i joen long Kraes, mo oltaem yufala i mas rere blong ona long yufala.” (Rom 12:10) Taem ol elda oli soem lav mo tingting daon ya, ol sipsip oli glad, nao oli ‘onagud long olgeta wetem lav, from ol had wok blong olgeta.’—1 Tesalonaeka 5:12, 13.
Respektem Fasin Fri Blong Jus
20. ?From wanem ol elda oli mas respektem fasin fri blong jus?
20 Jeova i wokem ol man we oli fri blong mekem prapa disisen blong olgeta wanwan. Ol elda oli mas givim advaes mo oli mas stretem narafala tu, be oli no mas mekem disisen long laef mo bilif blong narafala. Pol i talem se: “Mifala i no wantem mekem i strong long yufala, blong makem wanem tok i stret blong yufala i bilif long hem mo wanem i no stret, no gat. Bilif blong yufala i stanap finis. Mifala i wantem wok wetem yufala, blong mekem yufala i haremgud moa.” (2 Korin 1:24) Yes, “evri man i gat basket blong hem blong karem.” (Galesia 6:5) Jeova i givim plante fasin fri long yumi go kasem mak we ol loa mo rul blong hem oli putum. Taswe taem narafala i mekem wan samting we i no brekem loa blong Baebol, ol elda oli no mas putumap ol rul. Mo oli mas blokem eni fasin blong talem prapa tingting blong olgeta olsem wan tijing, mo oli mas no letem flas tingting i lidim olgeta sipos wan man i no agri long prapa tingting blong olgeta.—2 Korin 3:17; 1 Pita 2:16.
21. ?Ol elda oli save lanem wanem long fasin we Pol i mekem long Faelimon?
21 Taem Pol i stap long kalabus long Rom, makemgud olsem wanem hem i tingbaot Faelimon, wan Kristin masta blong wan slef long Kolosi long Esia Maena. Slef blong Faelimon we nem blong hem Onesimas i ronwe i go long Rom, i kam wan Kristin, mo i stap givhan long Pol. Pol i raet long Faelimon se: “Sipos hem i stap long ples ya wetem mi, blong tekem ples blong yu blong givhan long mi taem mi stap long kalabus ya from gud nyus blong Jisas Kraes, bambae mi haremgud. Be mi no wantem fosem yu blong yu mekem i gud long mi olsem. Mi mi wantem we sipos yu mekem olsem, be bambae yu mekem from we yu nao yu haremgud blong mekem. From samting ya, mi bambae mi no mekem wan samting long bisnes ya, sipos yu tu yu no agri long hem.” (Faelimon 13, 14) Pol i sanem Onesimas i gobak, mo i askem Faelimon blong mekem long hem olsem we hem i wan Kristin brata. Pol i save se ol sipsip oli no blong hem; oli blong God. Hem i no masta blong ol sipsip be hem i man blong wok blong olgeta. Pol i no mekem disisen blong Faelimon; hem i respektem fasin fri blong hem blong jus.
22. (a) ?Ol elda oli mas kasem save se haenem blong olgeta i minim wanem? (b) ?Jeova i stap bildimap wanem kaen ogenaesesen?
22 Taem ogenaesesen blong God i stap gru, oli stap putumap plante moa elda. Ol elda ya, mo olgeta ya tu we oli elda longtaem finis i kam, oli mas kasem save se haenem blong olgeta i minim se oli mas mekem wok blong narafala wetem tingting we i stap daon. Long rod ya, taem God i stap lidim ogenaesesen blong hem blong kasem nyufala wol, ogenaesesen ya bambae i gohed blong gru olsem hem i wantem—bambae i folemgud plan be bambae i no save lego lav mo fasin sore jes blong mekem ol samting wetem wan gudfala plan. Olsem nao, bambae ogenaesesen blong hem i gohed blong pulum ol man we oli olsem sipsip oli kam long hem, from we oli luk pruf se ‘long olgeta samting we God i mekem, hem i mekem se oli wokgud tugeta blong mekem i gud long olgeta man we oli laekem hem tumas.’ Samting ya i mas kamaot long wan ogenaesesen we lav i stampa blong hem, from we ‘lav bambae i no save finis samtaem.’—Rom 8:28; 1 Korin 13:8.
?Bambae Yu Yu Ansa Olsem Wanem?
◻ ?Baebol i talem se fasin blong Jeova blong keagud long ol man blong hem i olsemwanem?
◻ ?Jisas i mekem wanem wok blong keagud long ol sipsip blong God?
◻ ?Wanem nambawan fasin we ol eldaoli mas gat?
◻ ?From wanem ol elda oli mas tingbaot fasin fri blong ol sipsip blong mekem prapa disisen blong olgeta?
[Tok blong pija long pej 16]
Jisas, “gudfala man ya blong lukaot long sipsip,” i soem fasin sore
[Tok blong pija long pej 17]
Ol lida blong skul we oli gat kruked fasin oli plan blong kilim Jisas i ded