Fasin We Ol Man Oli Safa—?Bambae i Finis Samtaem?
LONG Sarayevo, i nogud tumas blong luk trabol we i kamaot afta we wan bom i bosta long wan maket ples we i fulapgud long ol man; long Rwanda, fasin blong kilim fulap man i ded olsem nating nomo mo blong katemaot sam haf blong bodi blong man; long Somalia, ol pikinini we oli hanggri, oli stap faet from kakae; long Los Enjeles, ol famle we oli harem nogud tumas oli stap traem blong faenemaot hamas samting oli lusum long wan etkwek; long Banglades, ol man we oli no save mekem wan samting blong blokem bigfala wora we i spolem ples blong olgeta. Evri dei, long televisin, mo long ol magasin mo nyuspepa, yumi luk ol pija blong ol man we oli stap safa olsem.
Samting we i mekem yumi sore se, fasin we ol man oli safa i mekem se sam man oli no moa bilif long God. Wan grup blong ol man Jyu long Yunaeted Stet i prentem wan tok we i talem se: “Stat bifo i kam, fasin nogud i bigfala samting we i spolem bilif.” Ol man we oli raetem tok ya oli tokbaot ol man we oli ded long ol rabis kalabus blong Nasi olsem Aoswits, mo ol man we oli ded from ol bom oli bosta, olsem hemia long Hirosima. Ol sem man ya oli talem se: “Tingting blong ol man blong skul i trabol mo i fasfas from kwestin ya se, ?olsem wanem wan God we i stap mekem i stret long ol man mo i gat bigfala paoa i save letem ol samting olsem blong spolem laef blong plante man we oli no mekem i rong?”
Sore tumas, ol ripot blong ol trabol we i no gat en blong olgeta, i save spolem filing blong ol man. Plante man we ol fren mo famle blong olgeta oli no safa, oli no harem nogud tumas taem ol narafala oli safa.
Be, fasin ya we yumi naf blong sore, nating se long olgeta we oli fren mo famle blong yumi nomo, i mas soem wan samting long yumi long saed blong Man we i Wokem yumi. Baebol i talem se God i wokem man, “i olsem pija blong hem,” mo ‘blong tekem fasin blong hem.’ (Jenesis 1:26, 27) Samting ya i no minim se lukluk blong ol man i olsem lukluk blong God. No gat, Jisas i eksplenem se “God, hem i Speret,” mo ‘wan speret man i no gat mit mo bun blong hem.’ (Jon 4:24; Luk 24:39) Fasin ya we God i wokem man blong tekem fasin blong hem, i minim se ol man oli naf blong soemaot ol gudgudfala fasin blong God. Olsem nao, from we ol man oli sore long olgeta we oli safa, yumi save talem se Jeova God, Hemia we i Wokem olgeta man, i gat sore mo i harem nogud tumas taem i luk ol man we hem i wokem oli stap safa.—Jekem Luk 11:13.
Wan rod blong God blong soem fasin sore blong hem, hemia taem hem i givim wan buk long olgeta man, we i eksplenem stampa blong ol samting we oli mekem man i safa. Hem i eksplenem samting ya long Tok blong hem, Baebol. Baebol i soemaot klia se God i wokem man blong i haremgud long laef, i no blong safa. (Jenesis 2:7-9) Baebol i soem tu se tufala faswan man, tufala nomo i pulum trabol i kam long tufala taem tufala i sakemaot stret rul blong God.—Dutronome 32:4, 5; Rom 5:12.
Nating se tufala i mekem olsem, God i gat sore yet long ol man we oli safa. Samting ya i klia nomo long promes blong hem blong finisim fasin we ol man oli safa. “!Yu luk! Naoia God i mekem ples blong hem wetem ol man. Hem bambae i stap oltaem wetem olgeta, nao olgeta bambae oli man blong hem. God bambae i kampani wetem olgeta, mo hem bambae i God blong olgeta. Hem bambae i ravemaot wora blong ae blong olgeta. Nao bambae i no moa gat man i ded mo man we i krae from ded. Bambae i no moa gat man i krae, mo man i harem nogud long bodi blong hem. Ol samting ya blong bifo oli lus olgeta.”—Revelesen 21:3, 4; lukluk tu Aesea 25:8; 65:17-25; Rom 8:19-21.
Nambawan promes ya i pruvum se God i tingbaot tumas ol man we oli safa mo bambae hem i finisim fasin ya. ?Be wanem stret nao i bin mekem se ol man oli stat blong safa tumas, mo from wanem God i letem fasin ya i gohed kam kasem taem blong yumi?
[Foto Credit Line blong pija long pej 2]
Cover and page 32: Alexandra Boulat/Sipa Press
[Foto Credit Line blong pija long pej 3]
Kevin Frayer/Sipa Press