Fasin We Ol Man Oli Safa—?From Wanem God i Letem i Stap?

LONG stat blong histri blong man, i no gat man i krae from we i sore, no i harem nogud. I no gat fasin ya we man i safa. God i mekem man fastaem we i stretgud olgeta. “God i luk olgeta samting we hem i wokem finis, mo olgeta wok blong hem i gud tumas.”​—⁠Jenesis 1:⁠31, NW.

Be samfala man oli talem se, ‘Store blong Adam mo Iv long garen blong Iden i wan kastom store nomo.’ Sore tumas, plante lida blong Krisendom oli talem olsem. Be, long nambawan fasin, Jisas Kraes hem wan i pruvum se ol samting we oli hapen long Iden oli trufala histri. (Matyu 19:​4-6) Antap long samting ya, wan rod nomo blong faenemaot from wanem God i letem ol man blong oli safa, i blong stadi long ol samting ya we oli hapen long stat blong histri blong man.

God i givim wan gudfala wok long faswan man, Adam, hemia blong lukaot long garen blong Iden. Mo tu, God i talem long hem blong mekem garen blong Iden, garen blong mekem man i haremgud, i kavremap ful wol. (Jenesis 1:28; 2:15) Blong halpem Adam blong mekem bigfala wok ya, God i givim wan waef long hem, Iv, blong tufala i mared, mo i talem long tufala se tufala i mas gat plante pikinini, fulumap wol, mo wokem ful wol i kam wan paradaes. Be tufala i nidim wan samting bakegen blong mekem sua se stampa tingting ya blong God long saed blong wol mo ol man i save kamtru fulwan. From we God i wokem man i olsem pija blong hem, man i gat fasin fri blong jus; taswe, neva samting we man i wantem i mas agensem wil blong God. Sipos i agensem wil blong God, bambae ol samting long wol oli no save rongud, mo bambae stampa tingting blong God blong fulumap wol wetem famle blong ol man we oli gat pis, i no save kamtru.

Fasin blong stap aninit long rul blong God i no save kamaot olsem nomo. Fasin ya i soemaot samting we man i jusum blong mekem from lav blong hem. Eksampel, yumi ridim se taem Jisas Kraes i fesem wan strong traem, hem i prea se: “Papa, sipos yu save letem, plis yu tekemaot kap ya, blong bambae mi mi no dring long hem. Be yu no mekem olsem we mi mi wantem, yu mekem olsem we yu nomo yu wantem.”​—⁠Luk 22:⁠42.

I sem mak, Adam mo Iv, tufala nao i mas pruvum sipos tufala i wantem stap aninit long rul blong God, no no gat. From samting ya, Jeova God i mekem wan samting blong traem tufala long fasin we i no strong nating. Long garen, i gat wan tri we oli kolem tri we “frut blong hem i save mekem man i save ol fasin we i gud mo ol fasin we i nogud.” Hemia i pija blong raet we God i gat blong talem wanem fasin i stret mo wanem fasin i no stret. Wetem ol tok we oli klia nomo, God i blokem tufala blong tufala i no kakae frut blong spesel tri ya. Sipos Adam mo Iv, tufala i no obei, bambae tufala i ded from.​—⁠Jenesis 2:​9, 16, 17.

Stat Blong Fasin Ya We Ol Man Oli Safa

Wan dei, wan speret pikinini blong God i kam flas long tingting blong hem nao i tok agensem fasin blong God blong rulum man. Hem i yusum wan snek blong toktok, i askem Iv se: “?Olsem wanem long frut blong ol tri long ples ya? ?I tru we God i blokem olgeta se i tabu, yutufala i no save kakae, no i no tru olsem?” (Jenesis 3:⁠1) Olsem nao, hem i mekem tingting blong Iv i hafhaf, se fasin blong God blong rulum tufala i stret, no i no stret.a Iv i givim stret ansa, we hem i bin kasem long hasban blong hem. Be biaen, speret man ya i tok agens long God mo i gyaman long saed blong ol nogud frut we tufala i save kasem sipos tufala i no obei long God, hem i se: “No, hemia i no tru ya. Yutufala i no save ded from. Hem i talem olsem from we i save se sipos yutufala i kakae frut ya, bambae yutufala i kam waes. Nao bambae yutufala i olsem hem, we i save ol fasin we i gud mo ol fasin we i nogud.”​—⁠Jenesis 3:​4, 5.

Sore tumas, Setan i trikim Iv blong ting se fasin blong no obei long God, i no save mekem ol man oli safa, be bambae i mekem we oli kasem wan laef we i moa gud. Taem we hem i stap lukluk moa i go long frut ya, lukluk blong frut ya i stap pulum hem moa, ale hem i stat blong tekem blong kakae. Biaen, Iv i pulum Adam blong kakae frut ya tu. Sore tumas, Adam i jusum blong mekem woman blong hem i glad bitim we hem i wantem mekem God i glad.​—⁠Jenesis 3:6; 1 Timote 2:​13, 14.

Taem speret man ya i statem fasin rebel ya, hem wan i mekem se hem i kam wan man blong agensem God. Olsem nao, Baebol i kolem hem Setan, wan nem we i kamaot long Hibru lanwis we i minim se “man blong agensem man.” Hem i mekem gyaman toktok tu agensem God, hem wan i mekem hem i kam man blong spolem nem blong narafala man. Taswe, Baebol i kolem hem tu se Devel, wan nem we i kamaot long Grik lanwis we i minim ‘man blong spolem nem blong narafala man.’​—⁠Revelesen 12:⁠9.

Olsem nao, fasin ya we ol man oli safa i stat. Tri long ol man we God i wokem, oli yusum presen ya, fasin fri blong olgeta blong jusum, long rod we i no stret, oli jusum wan fasin blong laef we oli tingbaot olgeta nomo, oli agensem Man we i wokem olgeta. Nao, i gat wan kwestin i kamaot se, ?Olsem wanem bambae God i stretem fasin rebol ya long wan rod we i stret, we bambae ol narafala man we hem i wokem, wetem ol enjel long heven we oli fasgud long God mo ol fyuja pikinini blong Adam mo Iv, oli save trastem Hem?

God i Ansa Long Waes Fasin

Maet samfala oli talem se, i moa gud sipos God i bin kilim i ded Setan, Adam, mo Iv stret afta we trifala i mekem fasin rebol. Be fasin ya i no save stretem ol kwestin we Setan i stanemap. Hem i bin stanemap kwestin long saed blong fasin blong God blong rulum man, hem i talem se ol man oli save gat wan laef we i moa gud, sipos oli lego long rul blong God. Mo tu, taem hem i winim tufala faswan man, i mekem tufala i agensem rul blong God, samting ya i stanemap sam narafala kwestin. From we Adam mo Iv, tufala i mekem sin, ?samting ya i minim se i gat wan samting i rong long fasin blong God blong wokem man? ?Bambae i gat sam man long wol we oli save holemstrong long God oltaem? ?Mo olsem wanem long ol enjel pikinini blong God we oli stap lukluk fasin rebol we Setan i mekem? ?Bambae oli sapotem stret fasin blong God blong rulum ol man? I klia nomo, i nidim taem blong ansarem ol kwestin ya. Hemia nao risen from wanem God i letem Setan blong i stap kasem taem blong yumi.

Long saed blong Adam mo Iv, long dei ya we tufala i no obei long God, God i talem se tufala i mas ded. Olsem nao, fasin ya we man i ded i stat. Ol pikinini blong Adam mo Iv, we oli bon afta we tufala i sin finis, oli kasem sin mo ded long faswan papa mama blong olgeta we tufala i no moa stretgud olgeta.​—⁠Rom 5:⁠14.

Faswan man mo woman, tufala i faswan we Setan i pulum i kam long saed blong hem. Hem i yusum taem we God i letem long hem, blong traem pulum olgeta pikinini blong Adam oli kam aninit long paoa blong hem. Hem i gyaman long plante enjel tu, i pulum olgeta oli kam joen long fasin blong hem blong rebol. Be, bighaf blong ol enjel pikinini blong God oli holemstrong long fasin blong sapotem stret fasin blong Jeova blong rul.​—⁠Jenesis 6:​1, 2; Jud 6; Revelesen 12:​3, 9.

Rao ya i stap bitwin rul blong God mo rul blong Setan, mo long taem blong Job, kwestin ya i kamaot klia. Olsem ol man ya Ebel, Inok, Noa, Ebraham, Aesak, Jekob, mo Josef, we oli fraetgud long God, oli mekem bifo, Job we i fasgud long God i pruvum long ol fasin blong hem se hem i jusum stret rul blong God, bitim fasin independen blong Setan. Job i kam olsem bigfala poen we God mo Setan tufala i toktok from long heven long fored blong ol enjel we oli fasgud long God. Blong sapotem stret rul blong Hem, God i talem long Setan se: “?Yu yu mekem we hat blong yu i tingtinggud long man blong wok blong mi, Job? I no gat wan narafala man long wol we i olsem hem. Hem i no gat rong long hem mo hem i stret nomo. Hem i fraet gud long God mo hem i tanem baksaed long ol rabis fasin.”​—⁠Job 1:​6-8.

From we Setan i wantem win, hem i talem se Job i stap mekem wok blong God from ol samting nomo we hem i stap kasem, from we God i stap givim plante gudgudfala samting long saed blong laef long Job. Ale Setan i talem strong se: “Be naoia, i gud yu no moa mekem olsem. Plis, yu pusum han blong yu, yu tajem ol samting we hem i gat, nao yu luk sipos hem bambae i no tok nogud long nem blong yu, stret long fes blong yu.” (Job 1:11) Setan i go moa, hem i talem se hem i save pulum olgeta man we God i wokem blong oli lego bilif blong olgeta, oli kam long hem. Hem i talem se: “Olgeta samting we man i gat bambae hem i givim blong sevem sol blong hem.” (Job 2:⁠4) Setan i talem gyaman tok ya agens long Job, be tu agens long olgeta man blong mekem tru wosip long God long heven mo long wol. Setan i talem se bambae oli lego fasin fren blong olgeta wetem Jeova sipos laef blong olgeta i stap long denja.

Jeova God i trastem fulwan fasin blong Job blong fasgud long hem. Hem i pruvum samting ya, taem hem i letem blong Setan i mekem Job i safa long ol trabol we ol man oli stap kasem. Taem Job i fasgud long God, hem i soem se hem wan i no gat fol, mo samting we i moa impoten se, hem i leftemap stret fasin blong Jeova blong rul. Samting ya i pruvum se Devel Setan i man blong gyaman.​—⁠Job 2:10; 42:⁠7.

Be, Jisas Kraes i nambawan eksampel long fasin blong fasgud long God taem hem i kasem traem. God i putum laef blong enjel Pikinini ya blong Hem long heven long bel blong wan vegin. From samting ya, Jisas i no bon wetem sin, hem i stret olgeta. Hem i gruap we hem i stretgud olgeta, stret olsem faswan man bifo we hem i mekem sin. Setan i mekem Jisas olsem wan spesel mak blong sutum, i mekem plante traem mo hadtaem long Jisas, mo laswan samting, i mekem Jisas i ded long wan fasin we i nogud tumas. Be Setan i no save spolem fasin blong Jisas blong holemstrong long God. Long fasin we i fulwan, Jisas i sapotem stret fasin blong Papa blong hem blong rul. Hem i pruvum tu se man ya Adam we i stretgud olgeta i no gat eskyus nating long fasin blong hem blong joen wetem Setan blong rebol. Adam i save fasgud long God, from traem we hem i kasem i smol nomo.

?I Pruvum Wanem Samting Bakegen?

Kolosap 6,000 yia nao we ol man oli stap safa, stat long taem we Adam mo Iv, tufala i rebol. Long ol yia ya, God i letem ol man blong gat plante defren gavman. Ol nogud trabol we oli mekem ol man oli safa oli pruvum se man i no naf blong rulum hem wan. Tru ya, naoia, fasin we i no gat loa nating i stanap, i kam antap bigwan tumas long plante ples long wol. Fasin blong independen long God, olsem Setan i leftemap, i mekem bigfala trabol.

Jeova i no nidim blong pruvum wan samting long hem wan. Hem i save se fasin blong hem blong rul i stret mo i blong mekem ol man we hem i wokem oli haremgud. Be, blong ansa long olgeta kwestin we Setan i stanemap taem hem i rebol, Hem i givim jans long ol man we hem i wokem blong soem se oli jusum stret rul blong hem.

Ol blesing we man i save kasem from we hem i laekem God mo from fasin blong hem blong fasgud long God, oli gud tumas, mekem se fasin blong harem nogud blong smoltaem long han blong Devel Setan, i olsem nating nomo. Samting we i hapen long Job i soemaot samting ya. Jeova God i mekem Job i kamgud bakegen long sik ya we Setan i mekem long hem. Antap long samting ya, God “i blesem Job biaen bitim long stat.” Job i laef 140 yia bakegen, ale, “i ded, we hem i olfala mo i haremgud long ol yia blong laef blong hem.”​—⁠Job 42:​10-17.

Jemes, wan Kristin man blong raetem Baebol i pulum tingting blong yumi i go long samting ya, hem i talem se: “Yufala i harem tok finis blong fasin blong Job, we hem i mekem tingting blong hem i longfala. Mo yufala i save finis ol samting we Hae God i mekem long hem biaen. Hae God i kaen tumas, mo hem i gat sore long man.”​—⁠Jemes 5:​11, futnot.

Naoia kolosap taem blong Setan mo wol blong hem i finis. I no longtaem, bambae God i tekemaot olgeta fasin we oli mekem man i safa we oli kamaot from fasin rebol blong Setan. Mo ol dedman bambae oli laef bakegen. (Jon 11:25) Ale, olgeta man we oli bin fasgud long God, olsem Job, bambae oli gat jans blong kasem laef we i no save finis long wan paradaes wol. Ol blesing ya we bambae God i givim long ol man blong wok blong hem, bambae oli leftemap nem blong hem foreva olsem stret Hae Rula we i rili “kaen tumas, mo hem i gat sore long man.”

[Futnot]

[Bokis blong pija long pej 8]

RAF FASIN BLONG OL GOD BLONG OL MAN

PLANTE taem, oli tokbaot ol god blong bifo se oli gat fasin blong wantem mekem blad i ron mo oli wantem mekem nogud long saed blong seks. Blong mekem ol god ya oli haremgud, sam papa mama oli bonem pikinini blong olgeta long faea taem oli laef nomo. (Dutronome 12:31) Wan narafala samting we i bitim mak, ol hiten man we oli gat hae save oli tijim se God i no save soem ol filing olsem fasin kros no fasin sore.

Ol tingting blong ol man ya we oli gat save long ol waes blong wol, we i kamaot long ol rabis speret, oli gat paoa long ol man we oli talem se oli man blong God, ol man Jyu. Philo, wan man Jyu we i gat hae save, we i laef semtaem wetem Jisas, i talem se God i “no gat wan filing nating.”

Ol hae save blong ol man Gris i gat paoa tu long ol Farisi long skul blong ol man Jyu we fasin blong olgeta i strong tumas. Oli tekem ol tijing blong Plato se, God i mekem man wetem wan sol we i no save ded we i stap kalabus long bodi blong ol man. Antap long samting ya, Josephus, wan man blong raetem histri long faswan handred yia i talem se, ol Farisi oli bilif se sol blong ol man nogud bambae “oli harem nogud long wan panis blong olwe.” Be Baebol i no givim wan pruf nating long wan tingting olsem.​—⁠Jenesis 2:7; 3:19; Eklesiastis 9:5; Esikel 18:⁠4.

?Olsem wanem long ol man blong Jisas? ?Oli letem ol hae save blong ol hiten man i pulum olgeta? From we aposol Pol i luksave denja ya, hem i givim woning long ol Kristin brata sista se: ‘Yufala i mas lukaotgud, blong bambae i no gat ol man oli kam fasem yufala long ol rabis tok ya we i folem waes blong man. Ol tok ya i blong gyaman nomo, i stap kamaot long ol rabis speret we oli stap olbaot long wol ya fastaem, i no kamaot long Kraes.’​—⁠Kolosi 2:8; lukluk tu long 1 Timote 6:⁠20.

Sore tumas, long ol yia 100 mo 200, sam elda we oli talem se oli Kristin, oli no obei long woning ya mo oli tijim se God i no gat filing. The Encyclopedia of Religion i talem se: “Olgeta man oli kasem save long ol fasin blong God, folem tingting blong ol man Jyu mo waes we ol man oli tijim long taem ya . . . Tingting ya se Papa God i gat ol filing olsem fasin sore, . . . ol man oli no bin akseptem kam kasem samwe long en blong ol yia 1900.”

Olsem nao, Krisendom i tekem gyaman tijing ya se i gat wan god we i gat raf fasin mo i stap panisim ol man blong mekem sin taem hem i mekem oli harem nogud blong olwe. Long defren fasin, Jeova God i talem stret long Tok blong hem, Baebol, se “pei we ol man bambae oli kasem, from we oli stap mekem sin, hemia we bambae oli ded from,” i no hemia se bambae oli harem nogud blong olwe.​—⁠Rom 6:⁠23.

[Credit Lines]

Above: Acropolis Museum, Greece

Courtesy of The British Museum

[Tok blong pija long pej 7]

!Stampa tingting blong God blong jenisim wol i kam wan paradaes olsem long Iden, i mas kamtru!