‘Yusum Olting We Yufala i Kasem Long Ol Rod Olbaot Blong Mekem Fren’
“Yufala i mas yusum olting blong yufala, we yufala i kasem long ol rod olbaot, blong mekem i gud long ol man, blong oli fren long yufala . . . Man we i stap mekem i stretgud long smol samting nomo, hem i save mekem i stretgud long bigfala samting tu.”—LUK 16:9, 10.
1. ?Olsem wanem Moses mo ol man Isrel oli presem Jeova afta we oli kamaot long Ijip?
!WAN merikel i mekem se ol man Isrel oli fri—hemia wan bigfala samting blong mekem bilif i kam strong! Jeova, we i gat Olgeta Paoa, hem nomo i mekem ol man Isrel oli kam fri long Ijip. Yumi no sapraes se Moses mo ol man Isrel oli singsing se: “Hae God ya, hem i strong blong blokem mi, mo hem nao i sevem mi. Hem i God blong mi mo mi bambae mi presem hem oltaem.”—Eksodas 15:1, 2; Dutronome 29:2.
2. ?Ol man blong Jeova oli tekem wanem wetem olgeta taem oli lego Ijip?
2 !Nyufala fasin fri blong ol man Isrel i defren olgeta long laef we oli bin stap long hem long Ijip! Naoia oli save wosip long Jeova we i no gat wan samting i blokem olgeta. Mo taem oli lego Ijip, oli no aot nomo we oli no karem wan samting. Moses i talem se: ‘Ol man Isrel . . . oli go askem long ol man Ijip blong oli givim ol samting ya long olgeta we oli wokem long selva no long gol, wetem ol klos blong olgeta. Mo Hae God i bin mekem ol man Ijip oli tinghevi long olgeta, nao oli bin givim ol samting ya long olgeta olsem we oli askem. Nao long fasin ya, olgeta oli karem ol gudgudfala samting blong ol man Ijip oli go.’ (Eksodas 12:35, 36) ?Be olsem wanem oli yusum ol rij samting ya we oli tekem long Ijip? ?Oli yusum blong ‘leftemap nem blong Jeova i go antap’? ?Yumi lanem wanem long eksampel blong olgeta?—Lukluk 1 Korin 10:11.
“Presen Blong Jeova”
3. ?Fasin blong ol man Isrel blong yusum gol long gyaman wosip i pusum Jeova blong mekem wanem?
3 Long 40 dei we Moses i stap antap long Hil Sinae blong God i givim ol oda long hem we hem i mas talem long ol man Isrel, ol man we oli stap wet long stampa blong hil oli stat blong rebol. Oli tekemaot ol earing blong olgeta we oli wokem long gol, mo oli givim oda long Eron blong mekem wan pija blong oli wosip long hem. Eron i wokem wan olta blong olgeta tu, mo long nekis dei, long eli moning, oli mekem sakrifaes long olta ya. ?Nao, oli yusum gol blong olgeta long fasin we i mekem Man We i Sevem olgeta i glad? !No gat! Jeova i talem long Moses se: “I nogud yu traem blokem mi. Naoia mi kros finis. Mi mas spolem olgeta.” Moses i askem strong long hem blong no mekem olsem, samting ya nomo i mekem se Jeova i no spolem nesen ya, be Hem i sanem wan sik i kam kilim i ded ol man ya we oli gat fasin rebol we oli fosem Eron blong mekem pija ya.—Eksodas 32:1-6, 10-14, 30-35.
4. ?Wanem ya “presen blong Jeova,” mo hu i givim?
4 Biaen, ol man Isrel oli gat jans blong yusum ol rij samting blong olgeta long fasin we i mekem Jeova i glad. Oli mekem “wan presen long Jeova.”a Gol, selva, bras, tred we i blu, kaliko we i blu no i red no i pepol, skin blong man sipsip, skin blong sikao, mo wod ya akaea, oli sam long ol samting we oli givim blong wokem mo flasem haos tapolen. Store ya i pulum tingting blong yumi i go long fasin blong ol man ya we oli givim presen. ‘I gud evriwan we hat blong hem i glad blong givim sam samting i karem samting ya olsem presen blong Jeova.’ (Eksodas 35:5-9) Ol man Isrel oli givim plante presen. Taswe, haos tapolen i wan haos we i “naes mo i nambawan tumas,” olsem tok we wan man blong hae save i talem.
Givim Presen From Tempel
5, 6. ?Long saed blong tempel, olsem wanem Deved i yusum ol rij samting blong hem, mo ol narafala oli mekem wanem?
5 Nating se King Solomon blong Isrel i lidim wok ya blong bildim wan strong haos blong wosip long Jeova, Deved, papa blong hem i bin mekemrere plante samting blong wokem haos ya. Deved i hivimap plante gol, selva, bras, aean, wud, mo ol naesfala ston. Deved i talem long ol man blong hem se: “From we mi mi haremgud tumas long haos blong God blong mi, mi gat yet wan spesel samting blong mi, gol mo selva; bambae mi givim long haos blong God blong mi antap mo i bitim olgeta samting we mi mekemrere finis from tabu haos ya: tri taosen talen blong gol . . . mo seven taosen talen blong selva we oli bonem finis blong mekem i klingud, blong putum long wol blong haos.” Deved i leftemap tingting blong ol narafala, blong olgeta tu oli givim wetem gladhat. I gat plante samting bakegen oli givim: moa gol, selva, bras, aean, mo ol naesfala ston. “Wetem wan fulhat,” ol man oli “givim presen long Jeova.”—1 Kronikel 22:5; 29:1-9.
6 Taem ol man Isrel oli givim ol presen ya, oli soemaot bigfala fasin tangkyu long wosip blong Jeova. Deved i prea wetem tingting daon se: “?Mi mi olsem wanem mo ol man blong mi oli olsem wanem, blong mifala i gat paoa blong givim presen olsem hemia?” ?From wanem? “From we evri samting oli kamaot long yu, mo mifala i givim long yu samting we i kamaot long prapa han blong yu. . . . Long saed blong mi, long stret fasin blong hat blong mi, mi glad blong givim olgeta samting ya.”—1 Kronikel 29:14, 17.
7. ?Yumi kasem wanem woning long samting we i hapen long taem blong Emos?
7 Be, ol laen blong Isrel oli no putum wosip blong Jeova long fasples long maen mo hat blong olgeta. Long yia 900 B.K.T., laen blong Isrel we i seraot i tanem baksaed finis long ol samting long saed blong speret. Jeova i yusum Emos blong talem long ten laen blong kingdom blong Isrel long not se: “!Sore tumas long olgeta we oli haremgud long Saeon mo long olgeta we oli stap trastem hil blong Sameria!” Hem i talem se oli olsem ol man we oli stap “ledaon long ol bed we oli wokem long tut blong anamol . . . oli stap rol olbaot long bed blong olgeta, . . . oli stap kakae ol man sipsip long medel blong ol sipsip mo ol yangfala man buluk long medel blong ol pikinini buluk we oli fatfatgud; . . . oli stap dring long ol besin waen.” Be ol rij samting blong olgeta i no save protektem olgeta. God i givim woning se: “Bambae oli go long kalabus wetem ol faswan man we oli go kalabus, mo bigfala lafet blong olgeta we oli stap slip, bambae i mas finis.” Long 740 B.K.T., ol man Isrel oli harem nogud long han blong ol man Asiria. (Emos 6:1, 4, 6, 7) Mo long sem fasin, kingdom blong Juda long saot tu i foldaon long trap ya blong ronem ol rij samting.—Jeremaea 5:26-29.
Stret Fasin Blong Yusum Mane Long Kristin Taem
8. ?Wanem gudfala eksampel we Josef mo Meri, tufala i soem long fasin blong yusum mane?
8 Samting we i defren se plante yia biaen, ol man blong God oli pua, be samting ya i no blokem olgeta blong soemaot strong tingting long saed blong trufala wosip. Tingbaot Meri mo Josef. Blong obei long oda blong Sisa Ogastas, tufala i mekem trep i go long prapa taon blong famle blong tufala, Betlehem. (Luk 2:4, 5) Long ples ya nao Jisas i bon. Fote dei biaen, Josef mo Meri, tufala i visitim tempel long Jerusalem we i kolosap nomo, blong givim sakrifaes, olsem loa i talem, we i blong mekem woman i klin long fes blong God. Tu smosmol pijin we Meri i givim, i soem se tufala i pua. Be Meri mo Josef, tufala i no talem se, from we tufala i pua, tufala i no save mekem sakrifaes. No gat. Wetem fasin obei, tufala i yusumgud smol mane we tufala i gat.—Levitikas 12:8; Luk 2:22-24.
9-11. (a) ?Ol tok blong Jisas long Matyu 22:21 i talem wanem rod we yumi save folem blong yusum mane blong yumi? (b) ?From wanem smol presen mane we wan wido i givim i no blong nating nomo?
9 Biaen, ol Farisi mo sam man blong Herod, oli traem blong trikim Jisas, oli talem se: “Yu talem long mifala. ?Yu yu ting olsem wanem? ?I stret long Loa blong yumi blong yumi pem takis long Sisa, hed gavman ya blong ol man Rom, no i no stret olsem?” Ansa blong Jisas i soem se hem i gat fasin luksave. Jisas i tekem mane we oli givim long hem, mo Jisas i askem se: “?Fes ya i fes blong hu? ?Mo nem ya i nem blong hu?” Oli ansa se: “Fes blong Sisa ya, mo nem blong hem tu.” Wetem waes fasin, Jisas i talem se: “Samting we i blong Sisa, yufala i givimbak long Sisa. Samting we i blong God, yufala i givimbak long God.” (Matyu 22:17-21) Jisas i save se gavman we i wokem mane ya i wantem se ol man oli mas pem takis. Be long taem ya, hem i halpem ol man blong hem mo ol enemi blong hem tu, blong oli luksave se wan trufala Kristin i mas traehad tu blong givimbak long God ol “samting we i blong God.” Samting ya i joen wetem fasin blong yusumgud ol rij samting we man i gat.
10 Wan samting we Jisas i luk long tempel i soemaot samting ya. Hem i jes tok agens long ol griri tija blong Loa we oli stap ‘stilim olting blong ol wido.’ Luk i talem se: “Nao Jisas i lukluk i go, i luk ol rijman oli stap sakem kleksin blong olgeta, long ples blong sakem kleksin, insaed long haos blong God. Nao hem i luk wan wido i kam we hem i pua, nao hem i sakem tu smol mane we i olsem ten sen nomo. Nao Jisas i talem se: ‘Tru mi talem long yufala, kleksin we wido ya i sakem i moa long ol mane we olgeta narafala man ya oli sakem. From we ol narafala man ya, taem oli sakem kleksin blong olgeta, oli stap sakem haf mane ya nomo blong olgeta we i stap nating. Be woman ya we i pua, hem i sakem olgeta mane blong hem, we i blong pem kakae blong hem.’” (Luk 20:46, 47; 21:1-4) Sam long ol man ya, oli talem se ol naesfala ston we oli sas oli flasem tempel. Jisas i talem long olgeta se: “Yufala i stap luk ol samting ya, be i gat taem i stap kam we bambae ol man oli brekemdaon olgeta ston blong haos ya. Bambae i no gat wan ston i save stap long ples blong hem, bambae oli brekemdaon olgeta evriwan.” (Luk 21:5, 6) ?Smol presen ya we wido ya i givim, i blong nating nomo? No gat. Hem i sapotem plan we Jeova i bin putumap long taem ya.
11 Jisas i talem long ol trufala man blong hem se: “I no gat man blong wok we i save wok blong tu masta wantaem. Sipos man i mekem olsem, bambae hem i save agens long wan masta blong hem be i stap laekem tumas narafala masta blong hem. No bambae hem i save ona long wan masta blong hem, be i stap lukluknogud long narafala masta blong hem. Yufala i no save mekem we yufala i man blong wok blong God, nao long semtaem nomo, yufala i man blong wok blong mane.” (Luk 16:13) ?Taswe, olsem wanem yumi save soem stret tingting long saed blong fasin blong yusum mane blong yumi?
Ol Gudfala Bosman
12-14. (a) ?Ol Kristin oli ol bosman blong wanem rij samting? (b) ?Long wanem nambawan rod ol man blong Jeova tede oli mekemgud wok blong olgeta olsem bosman? (c) ?Mane we i sapotem wok blong God tede i kam weples?
12 Taem yumi givim laef blong yumi long Jeova, i olsem we yumi talem se evri samting we yumi gat, ol gudfala samting blong yumi, oli blong Jeova. ?Sipos i olsem, olsem wanem yumi mas yusum ol samting we yumi gat? Brata C. T. Russell, faswan presiden blong Watch Tower Society, i stap tokbaot ol Kristin wok long kongregesen, ale hem i raetem se: “Yumi mas skelem yumi wanwan se Masta i makemaot yumi olsem bosman blong prapa taem, paoa, mane, mo ol samting olsem, we yumi gat, mo wanwan long yumi i mas traehad blong yusum ol gudfala samting ya long beswan rod, blong givim ona long Masta.”—The New Creation, pej 345.
13 Fas Korin 4:2 i talem se: ‘Bosman i mas lukaotgud blong mekem ol samting we masta blong hem i talem long hem.’ Ol Wetnes blong Jeova, we oli olsem wan intenasnal ogenaesesen, oli traehad blong folem tok ya, oli spenem plante taem olsem we oli naf blong mekem long Kristin minista wok, oli traehad blong mekem fasin blong olgeta blong tij i kam moagud. Antap long samting ya, ol grup blong ol volontia we ‘Regional Building Committee’ i lidim, oli glad blong givim taem, paoa, mo save blong olgeta blong mekem ol nambawan haos miting blong wosip. Jeova i glad tumas long olgeta samting ya.
14 ?Mane blong sapotem bigfala wok ya blong tijim ol man mo wok blong bildim ol haos i kam weples? I kam long olgeta we oli givim wetem gladhat, sem mak olsem long taem we oli bildim haos tapolen. ?Wanwan long yumi i stap givim presen mane? ?Fasin we yumi stap yusum mane blong yumi long hem i soem se wok blong Jeova i impoten tumas long yumi? Long saed blong mane, i gud yumi kam ol gudfala bosman.
Wan Eksampel Long Fasin Blong Givim Wetem Gladhat
15, 16. (a) ?Olsem wanem ol Kristin long taem blong Pol oli soem gladhat blong givim? (b) ?Yumi mas tingbaot poen ya we yumi stap stadi long hem olsem wanem?
15 Aposol Pol i raet blong tokbaot fasin blong givim wetem gladhat blong ol Kristin long Masedonia mo Akaea. (Rom 15:26) Nating se oli pua, oli rere blong mekem kleksin blong givhan long ol brata blong olgeta. Long sem fasin, Pol i leftemap tingting blong ol Kristin long Korin blong givim wetem gladhat, blong yusum ol samting blong olgeta we i antap long samting we oli nidim blong givhan long ol narafala we oli trabol. I no gat wan man i save talem se Pol i fosem olgeta blong givim. Pol i raetem se: “Man we i planem smol nomo long garen blong hem, hem bambae i kasem smol kakae nomo. Be man we i planem plante, hem bambae i kasem plante kakae. Nao evri man oli mas givim sam samting, olsem we evri man wanwan oli jusumaot. I nogud man i givim samting long sore nomo, no from we hem i harem olsem we olgeta oli fosem hem. From we God i laekem tumas man we i save givim long gladhat blong hem.”—2 Korin 8:1-3, 14; 9:5-7, 13.
16 Ol presen mane we ol brata blong yumi mo olgeta we oli intres oli givim wetem gladhat blong sapotem wok blong Kingdom raonabaot long wol tede i pruvum olsem wanem oli tinghae long jans ya we oli gat blong givim. Be olsem Pol i talem bakegen long ol Kristin long Korin, i gud yumi stadi long samting ya bakegen blong mekem se yumi no fogetem.
17. ?Pol i leftemap tingting blong yumi blong folem wanem plan long fasin blong givim presen, mo yumi save folem fasin ya tede?
17 Pol i talem long ol brata sista blong folem wan plan long fasin blong olgeta blong givim presen. Hem i talem se: “Evri wik, long Sande, yufala evriwan i mas putumgud sam mane blong yufala i stap blong ol Kristin man ya, stret long mak blong ol mane we yufala i kasem.” (1 Korin 16:1, 2) Hemia i olsem wan eksampel long yumi mo ol pikinini blong yumi long fasin blong givim presen mane, nating sipos yumi mekem samting ya tru long kongregesen no yumi givim stret long branj ofis blong Watch Tower Society we i stap kolosap long yumi. Wan man mo woman blong hem we tufala i stap wok olsem misinari long wan taon long Is Afrika, tufala i askem olgeta we oli intres, blong oli kam joen wetem tufala long wan Baebol stadi. Taem faswan miting i finis, tufala misinari ya i putum sam mane insaed blong wan bokis we oli raetem long hem se “Presen Mane Blong Wok Blong Prij.” Sam narafala we oli kam, olgeta tu oli putum mane. Biaen, taem ol nyuwan ya oli kam inaf blong mekem wan Kristin kongregesen, seket elda i visitim olgeta mo i presem olgeta from fasin ya blong givim presen mane oltaem.—Ol Sam 50:10, 14, 23.
18. ?Olsem wanem yumi save givhan long ol brata sista blong yumi we oli kasem trabol?
18 Yumi gat jans tu blong yusum mane blong yumi blong givhan long olgeta we oli kasem trabol long ol disasta we man i no mekem mo olgeta we oli stap long ol ples we faet i kamaot oltaem long hem. !Yumi glad tumas blong ridim store long saed blong ol saplae we oli sanem i go long Is Yurop taem problem long saed blong mane mo politik i kasem kwiktaem haf ya blong wol! Ol presen long saed blong olting mo mane we ol brata sista oli givim, i soemaot gladhat blong olgeta blong givim mo fasin joen blong olgeta long ol Kristin we oli kasem trabol.b—2 Korin 8:13, 14.
19. ?Wanem ol gudfala samting we yumi save mekem blong halpem olgeta we oli stap mekem fultaem Kristin minista wok?
19 Yumi tinghae long wok blong ol brata sista blong yumi we oli joen long fultaem Kristin wok olsem ol paenia, ol elda we oli visitim ol kongregesen, ol misinari, mo olgeta we oli stap wok long Betel, ?i tru? Folem ol samting we yumi gat, maet yumi save givim sam help stret long olgeta long saed blong bodi. Eksampel, taem seket elda i visitim kongregesen blong yu, maet yu save givim ples blong slip long hem, kakae, no givhan blong pem rod blong hem. Papa blong yumi long heven, we i wantem se ol man oli lukaotgud long ol man blong wok blong hem, i no save fogetem ol fasin blong yumi blong givim wetem gladhat. (Ol Sam 37:25) Sam yia bifo, wan brata we i naf blong givim smol kakae nomo, i singaot wan elda blong goraon mo waef blong hem blong tufala i kam long haos blong hem. Taem tufala i aot long haos blong hem blong go long wok blong prij long aftenun, brata ya i givim wan envlop long tufala. Insaed i gat wan bang jek (we i stret long 100 vatu) wetem not ya we hem i raetem, se: “!Blong wan kap ti no wan lita bensin!” !Nating se i smol samting nomo, be hem i soemaot nambawan fasin tangkyu long rod ya!
20. ?Wanem jans mo responsabiliti we yumi no mas sakem?
20 !Long saed blong speret, Jeova i stap blesemgud ol man blong hem! Yumi haremgud long ol lafet long saed blong speret long ol asembli blong yumi, long ples ya, yumi kasem ol nyufala buk, ol nambawan tijing, mo ol gudfala advaes we i wok. Wetem hat we i fulap long fasin tangkyu from ol blesing we yumi kasem long saed blong speret, yumi no fogetem wok mo responsabiliti blong yumi blong givim presen mane blong mekem intres blong Kingdom blong God i goaot moa long ol ples raonabaot long wol.
‘Yusum Olting We Yufala i Kasem Long Ol Rod Olbaot Blong Mekem Fren’
21, 22. ?I no longtaem, wanem bambae i hapen long ol ‘rij samting we yumi kasem long ol rod olbaot,’ mo samting ya i minim se yumi mas mekem wanem stret naoia?
21 Tru ya, i gat plante rod we yumi save folem blong soem se wosip blong Jeova i stap long fasples long laef blong yumi, mo wan impoten rod blong mekem samting ya, hemia taem yumi folem advaes blong Jisas se: “Yufala i mas yusum olting blong yufala, we yufala i kasem long ol rod olbaot, blong mekem i gud long ol man, blong oli fren long yufala. Nao taem olting ya oli finis, be bambae yufala i gat ol fren blong yufala we oli save tekem yufala i go insaed long haos ya we i no save lus samtaem.”—Luk 16:9.
22 Makemgud se Jisas i stap tokbaot ol rij samting we oli kasem long ol rod olbaot, we ol rij samting ya oli save finis. Yes, i gat taem i stap kam we bambae mane blong naoia i no moa givhan nating long yumi. Esikel i talem long profet tok se: “Bambae oli sakem selva blong olgeta i go long rod, mo gol blong olgeta bambae i kam olsem wan samting we i nogud. Selva mo gol blong olgeta bambae i no save sevem olgeta long dei blong kros blong Jeova.” (Esikel 7:19) Kasem taem we samting ya bambae i hapen, yumi mas soem fasin waes mo fasin luksave blong yusumgud ol samting we yumi gat long saed blong bodi. Olsem nao, yumi no save luklukbak wetem sore from we yumi no bin folem woning ya blong Jisas se: “?Sipos yufala i no save mekem i stret long ol samting ya blong mekem yufala i rijman long wol, we yufala i kasem long ol rod olbaot, hu bambae i save letem yufala i lukaot long ol samting ya we oli blong mekem yufala i rijman tru? . . . Yufala i no save mekem we yufala i man blong wok blong God, nao long semtaem nomo, yufala i man blong wok blong mane.”—Luk 16:11-13.
23. ?Wanem samting we yumi mas yusum long waes fasin, mo bambae yumi kasem wanem pei from?
23 Naoia, i gud yumi evriwan yumi folem ol tok ya long trufala fasin, blong putum wosip blong Jeova long fasples long laef blong yumi mo blong yusumgud mane blong yumi long waes fasin. Long rod ya, yumi save holemtaet fasin fren blong yumi wetem Jeova mo Jisas, we tufala i promes se taem mane i finis, bambae tufala i tekem yumi i go insaed long “haos ya we i no save lus samtaem,” wetem hop blong laef we i no save finis long Kingdom blong heven no long wan paradaes wol.—Luk 16:9.
[Ol futnot]
a Hibru tok we oli tanem i kam “presen” i kam long wan veb we stret mining blong hem se “i mas stap hae; i mas mekem i stap antap; leftemap.”
b Lukluk Jehovah’s Witnesses—Proclaimers of God’s Kingdom, we Watchtower Bible and Tract Society of New York, Inc. i prentem long 1993, pej 307 kasem 315.
?Yu Yu Save Tingbaot?
◻ ?Ol man Isrel oli mekem wanem taem Jeova i askem olgeta blong givim presen blong bildim haos tapolen?
◻ ?From wanem presen mane blong wido i no blong nating nomo?
◻ ?Ol Kristin oli gat wanem responsabiliti long saed blong fasin blong yusum mane blong olgeta?
◻ ?Olsem wanem yumi save blokem fasin ya we yumi harem nogud long rod we yumi bin yusum mane blong yumi long hem?
[Tok blong pija long pej 15]
Nating se presen mane blong wido i smol, be i no blong nating nomo
[Tok blong pija long pej 16, 17]
Presen mane blong yumi i sapotem wok blong Kingdom raonabaot long wol