Jeova i Save Mekem Yu Yu Gat Paoa
“Hem i stap givim paoa long man we i taed; mo long man we i no gat paoa hem i givim bigfala paoa long olgeta.”—AESEA 40:29.
1, 2. ?Wanem sam pruf we oli soemaot paoa blong Jeova?
JEOVA i wan God we i gat “olgeta paoa.” Yumi save luk pruf blong “paoa blong God we i no save finis mo fasin blong hem” long ol samting we hem i wokem. Olgeta we oli no wantem luksave pruf blong ol samting we hem i wokem, oli no gat eskyus.—Ol Sam 147:5; Rom 1:19, 20.
2 Taem ol sayentis oli stadi dip long heven mo wol, oli kasem save moa long paoa blong Jeova, wetem ol galaksi we oli plante tumas, mo oli bigbigfala. Long wan naet we i klia, yu lukluk antap long skae mo luk sipos yu tu, yu gat sem filing olsem man blong raetem Ol Sam, we i talem se: “Taem mi mi luk skae we yu yu mekem, wetem mun mo ol sta we yu yu putum oli stap long prapa ples blong olgeta, mi luk man se hem i nating nomo. I no stret blong yu yu tingbaot hem. I no stret nating blong yu yu lukaotgud long hem.” (Ol Sam 8:3, 4) !Jeova i rili lukaotgud long yumi! Hem i givim wan naesfala ples long wol, long faswan man mo woman. Graon ya i gat paoa—blong mekem ol kakae oli gru, gudfala kakae, kakae we oli no spolem. Man mo ol anamol oli kasem paoa from ol samting ya we oli soemaot paoa blong God.—Jenesis 1:12; 4:12; 1 Samuel 28:22.
3. ?Antap long olgeta samting we oli stap long heven mo wol, wanem narafala samting tu, we i soemaot paoa blong God?
3 Ol samting long skae oli nambawan, ol tri mo ol anamol oli naes tumas. Be antap moa, oli soemaot paoa blong God long yumi. Aposol Pol i raetem se: “Yumi no save luk ol fasin ya blong hem stret long ae blong yumi. Hem i God we i blong stap oltaem, mo paoa blong hem i no save finis. Be i stat long taem ya we God i mekem wol ya fastaem, i kam kasem naoia, hem i bin mekem ol fasin blong hem oli klia, blong yumi luk. Yumi save faenemaot long ol samting blong wol ya, we hem i bin mekem.” (Rom 1:20) Be i gat wan narafala pruf blong paoa blong hem we yumi mas tingbaot mo glad long hem. ‘?Maet yu wantem save wanem moa we i soemaot paoa blong God bitim heven mo wol?’ Ansa blong hem i Jisas Kraes. From samting ya, tabu speret i pusum aposol Pol blong talem se Kraes i “paoa blong God mo hem i waes blong God tu.” (1 Korin 1:24) ‘?From wanem i olsem?’ maet yu askem se, ‘?Mo wanem paoa samting ya i save gat long laef blong mi naoia?’
Paoa Tru Long Pikinini Blong Hem
4. ?Olsem wanem paoa blong God i joen wetem Pikinini blong hem?
4 God i soemaot paoa blong hem fastaem taem hem i wokem stret Pikinini blong hem, i mekem hem long pija blong hem. Speret Pikinini ya i wok blong Jeova olsem wan “nambawan man blong wok” taem i stap yusum paoa blong God we i bigwan blong wokem ol narafala samting. (Proveb 8:22, 30) Pol i raet i go long ol Kristin brata blong hem long Kolosi se: “From we tru long hem, God i wokem olgeta narafala samting long heven mo long wol, olgeta samting we yumi save luk mo olgeta samting we yumi no save luk . . . Olgeta narafala samting, God i wokem olgeta tru long hem, mo oli blong hem tu.”—Kolosi 1:15, 16, NW.
5-7. (a) ?Long taem bifo, olsem wanem ol man oli joen long fasin ya blong soemaot paoa blong God? (b) ?Long wanem risen yumi bilif se paoa blong God i stap wok long ol Kristin tede?
5 Yumi haf blong ‘ol samting we God i wokem long wol ya.’ ?Nao, God i save givim paoa blong hem long yumi? Yes, long ol taem ya we God i stap wok wetem ol man we oli no stret gud olgeta, samtaem Jeova i givim moa paoa long ol man blong hem blong oli save mekem ol plan blong hem oli kamtru. Moses i save, se ol man oli save laef 70 no 80 yia nomo from we oli no stretgud olgeta. (Ol Sam 90:10) ?Olsem wanem long Moses? Hem i laef kasem 120 yia, be “ae blong hem i oraet, mo hem i gat paoa yet.” (Dutronome 34:7) Hemia i no min se God i save mekem wanwan long ol man blong hem oli laef longtaem no mekem oli stap strong; be i pruvum se Jeova i save givim paoa long ol man.
6 Wan narafala samting we i soemaot fasin ya blong God blong givim paoa long ol man mo ol woman, i fasin ya we hem i mekem long waef blong Ebraham. “Sera i stap bilif long God, taswe hem i olfala finis, be i gat pikinini. Hem i gat, from we i stap bilif long God ya we i mekem promes long hem, se God bambae i mekem promes blong hem i kamtru.” No, tingbaot olsem wanem Jeova i givim paoa long ol jaj blong Isrel: ‘Gideon, Barak, Samson, Jepta, Deved, Samuel mo long profet. . . . oli no gat paoa, be God i givim paoa long olgeta.’—Hibrus 11:11, 32-34.
7 Paoa olsem i save wok long yumi tu. Maet naoia yumi no tingbaot blong gat wan pikinini tru long wan merikel, no yumi no save soemaot bigfala paoa olsem Samson. Olsem Pol i talem, long ol man Kolosi, yumi save gat bigfala paoa. Yes, Pol i raet i go long ol man, ol woman, mo ol pikinini, olsem we yumi faenem long ol kongregesen tede, mo hem i talem se “God i mekem yufala i strong long bigfala paoa blong heven.”—Kolosi 1:11.
8, 9. ?Long faswan handred yia, olsem wanem God i soemaot paoa blong hem long sam man olsem yumi?
8 Long minista wok blong Jisas long wol, Jeova i mekem i klia, se paoa blong hem i stap wok long Pikinini blong hem. Eksampel, wan taem i gat plante man we oli kam long Jisas long Kapaneam, “Paoa blong Jeova i stap long Jisas, blong mekem ol sikman oli gud bakegen.”—Luk 5:17.
9 Afta we hem i laef bakegen, Jisas i talem long ol man blong hem se bambae oli ‘kasem paoa taem tabu speret i kam long olgeta.’ (Ol Wok 1:8) !Samting ya i tru tumas! Wan man blong histri i talem samting we i kamaot, sam dei afta long Pentekos long 33 K.T.: “Tok blong ol Aposol i gat paoa, mo oli stap talemaot we Jisas, Masta blong yumi, hem i laef bakegen long ded.” (Ol Wok 4:33) Pol i wan we i kasem paoa blong mekem wok we God i givim long hem. Afta we hem i jenis i kam wan Kristin mo i save lukluk bakegen, tok blong Pol i “stap kam strong moa, mo hem i soemaot i klia tumas we Jisas, hem i Mesaea. Nao ol man Isrel we oli stap long Damaskas, oli no save givim ansa long hem.”—Ol Wok 9:22.
10. ?Olsem wanem paoa blong God i givhan long Pol?
10 I tru Pol i nidim moa paoa, taem yumi tingbaot ol samting long saed blong speret mo strong tingting we hem i gat blong wokbaot plante taosen kilomita long trifala misinari trep blong hem. Hem tu i kasem olgeta kaen hadtaem, hem i stap tu taem long kalabus mo kolosap i lusum laef blong hem, be hem i stanap strong. ?Hem i mekem olsem wanem? Hem i ansa se: “Masta blong yumi, hem i stap wetem mi, mo hem i givim paoa long mi blong mi talemaot olgeta tok blong hem long fes blong ol hiten man, blong oli harem.”—2 Timote 4:6-8, 17; 2 Korin 11:23-27.
11. Long saed blong paoa blong God, ?Pol i tokbaot wanem hop blong ol man blong (Hem) God long Kolosi?
11 I no wan sapraes, taem Pol i raet i go long ol brata blong hem long Kolosi we oli “stap joen long Kraes,” hem i talem long olgeta se ‘mifala i wantem blong (Jeova) i mekem yufala i strong long bigfala paoa blong heven. Nao bambae yufala i strong blong karem olgeta trabol, we tingting blong yufala i longfala, i no save foldaon, mo oltaem yufala i save harem gud.’ (Kolosi 1:2, 11) Nating se ol tok ya oli go fastaem long ol Kristin we tabu speret i makemaot, olgeta tu we oli folem rod blong Kraes, oli save harem gud bigwan long wanem we Pol i raetem.
Pol i Kasem Paoa Long Kolosi
12, 13. ?Wanem stampa blong leta we hem i raetem i go long ol man Kolosi, mo wanem i kamaot from?
12 Kongregesen long Kolosi, i stap long eria blong Rom long Esia. Ating Kristin man ya Epafras i statem kongregesen ya taem i stap prij long ples ya. I luk olsem se taem Epafras i harem we Pol i stap kalabus long Rom long 58 K.T., hem i wantem visitim aposol ya mo leftemap tingting blong hem wetem nambawan ripot blong lav mo strongfala bilif blong ol brata blong hem long Kolosi. I luk olsem se Epafras i talemaot tu sam problem long kongregesen blong Kolosi, we i nidim blong stretem. Yes, Pol i harem se, hem i mas raetem wan leta i go long kongregesen blong leftemap tingting mo givim advaes long olgeta. Japta 1 blong leta ya i save leftemap tingting blong yu tu, we i pruvum se Jeova i save mekem ol man blong hem oli gat bigfala paoa.
13 Yu yu save tingbaot wanem filing ol brata mo ol sista long Kolosi oli gat, taem Pol i tokbaot olgeta, olsem “ol brata we oli joen long Kraes.” !I nidim blong talem bigfala tangkyu long olgeta from ‘lav blong olgeta long ol tabu man’ mo from we oli ‘karem frut blong gud nyus ya’, stat long taem ya we oli kam Kristin! ?Ol man oli save talem semfala tok ya long saed blong kongregesen, long yumi wanwan?—Kolosi 1:2-8.
14. ?Pol i wantem wanem long saed blong ol man Kolosi?
14 Pol i rili glad long ripot ya we hem i kasem. Nao hem i talem long ol man Kolosi, se hem i no stop blong prea from olgeta mo askem blong “oli waes, oli man blong luksave, blong bambae oli savegud olgeta samting we God i wantem. Nao bambae oli save mekem laef blong olgeta i kam olsem we Masta blong yumi i wantem.” Hem i prea se bambae oli “gat frut long laef blong olgeta, we oli stap mekem ol gudfala wok, mo bambae oli save kam we oli save God moa. Mifala i wantem blong God i mekem yufala i strong long bigfala paoa blong heven. Nao bambae yufala i strong blong karem olgeta trabol, we tingting blong yufala, i no save foldaon, mo oltaem yufala i save harem gud.”—Kolosi 1:9-11.
Tede Tu Oli Kasem Paoa
15. ?Olsem wanem yumi save soemaot semfala fasin ya we Pol i tokbaot taem i raet i go long ol man Kolosi?
15 !Pol i soemaot wan nambawan eksampel long yumi! Ol brata blong yumi long ful wol, oli nidim ol prea blong yumi blong oli save stanap strong longtaem mo stap glad, nating se oli stap harem nogud. Olsem Pol, yumi mas tingbaot ol brata blong yumi long ol prea blong yumi, taem yumi harem nyus se ol brata blong yumi long narafala kongregesen, no narafala kantri, oli stap kasem hadtaem. Maet wan kongregesen kolosap i kasem disasta no i kasem hadtaem long saed blong speret, no maet ol Kristin oli stap stanap strong long kantri we i gat faet no ol faet we oli kamaot from wan laen blong man i no laekem narafala laen blong man. Long prea, yumi mas askem God blong halpem ol brata blong yumi “blong wokbaot long stret fasin blong Jeova,” blong gohed blong karem ol frut we i kamaot long saed blong Kingdom taem oli stanap strong mo blong gat moa save. Long fasin ya ol man blong God oli kasem paoa blong speret blong hem, ‘we i mekem se oli gat bigfala paoa.’ Yufala i save sua se Papa blong yufala bambae i harem mo i ansa.—1 Jon 5:14, 15.
16, 17. (a) ?Olsem we Pol i raetem, yumi mas talem tangkyu long wanem? (b) ?Long wanem rod God i bin fogivim mo i mekem ol man blong hem oli fri?
16 Pol i raet i go long ol man Kolosi i talem se ‘Nao bambae yufala i save talem tangkyu long Papa blong yumi, from we hem i mekem yumi naf blong joen wetem ol narafala man blong hem. Nao bambae yufala i save kasem ol samting ya we hem i putumgud olgeta, oli stap rere blong ol man blong hem long heven, ples ya we i laet olwe.’ Yumi tu i mas talem tangkyu long Papa blong yumi long heven from ples blong yumi long plan blong hem, sipos long heven no aninit long Kingdom blong hem long wol. ?Olsem wanem ol man we oli gat sin oli gud long ae blong God? Pol i raet i go long ol brata blong hem, we tabu speret i makemaot olgeta se: “God i tekemaot yumi finis long paoa blong tudak, i putum yumi long paoa blong Pikinini ya blong hem we i laekem hem tumas. Nao yumi stap singaot Pikinini ya blong hem se King blong yumi.”—Kolosi 1:12-14.
17 Nomata wanem hop yumi gat, blong laef long heven no long wol, from yumi bilif fulwan long ransom sakrifaes blong stret Pikinini blong Jeova, ale yumi stap talem tangkyu long God evridei, from we hem i karemaot yumi long rabis fasin blong naoia we i blong tudak. (Matyu 20:28) Long wan spesel fasin ol tabu Kristin oli haremgud long ransom ya we i wok long olgeta blong oli save ‘go insaed long Kingdom blong Pikinini ya we God i laekem hem tumas.’ (Luk 22:20, 29, 30) Be ol “narafala sipsip” tu, oli haremgud naoia from ransom ya. (Jon 10:16) God i save fogivim olgeta blong oli kam stret man olsem ol fren blong hem long fes blong hem. Oli joen bigwan long wok blong talemaot “gud nyus ya blong Kingdom” long taem blong en. (Matyu 24:14) Antap long samting ya, oli gat wan nambawan hop blong kam stretgud olgeta, mo long en blong wan taosen yia rul blong Kraes, bambae oli kam stretgud olgeta long saed blong bodi. Taem yu ridim Revelesen 7:13-17, maet bambae yu agri nomo se samting ya i wan pruf blong fasin ya blong kam fri mo blong kasem ol blesing.
18. ?God i stap stretem fulwan wanem trabol long Kolosi?
18 Leta blong Pol i halpem yumi blong luksave hamas yumi gat blong pem bak long man ya we i hae moa long olgeta man. ?God i stap mekem wanem i kamtru long Kraes? ‘God i glad blong mekem rod long Kraes, blong tekem olgeta samting oli kam joengud long hem bakegen. From we blad blong Kraes i ron long pos, God i mekem pis long olgeta samting long heven mo long wol nao long Kraes, hem i tekem olgeta oli kam joen bakegen long hem.’ Plan blong God i blong karem bak olgeta samting we hem i wokem oli kam joengud wetem hem fulwan, olsem we i kamaot fastaem long fasin agens long Iden. Man ya we God i yusum blong wokem olgeta samting, i semfala Man ya we hem i yusum blong stretem ol trabol ya fulwan.—Kolosi 1:20.
?Kasem Moa Paoa Blong Wanem?
19, 20. ?Fasin blong yumi blong stap tabu mo no gat poen nating i dipen long wanem?
19 Ol responsabiliti oli kam long yumi we yumi fren bakegen long God. Fastaem yumi sinman mo yumi stap longwe long God. Be, naoia we yumi bilif long sakrifaes blong Jisas mo olgeta tingting blong yumi oli no moa stap long ol samting nogud, yumi stanap long “ples we i tabu i klingud, i no gat poen long yumi nating blong go stanap long fes blong [God].” (Kolosi 1:21, 22) Tingbaot, from we God i no sem long ol wetnes ya blong bifo, i no sem long yumi tu, taem yumi singaotem hem olsem God blong yumi. (Hibrus 11:16) !Tede, man i no save talem long yumi se i rong blong yumi karem nem blong God, no se yumi fraet blong talemaot nem ya long olgeta ples long wol!
20 Tingbaot woning blong Pol long Kolosi 1:23 se: “Yufala i mas stanap strong, yufala i mas folem fasin blong bilif long Kraes. Mo yufala i mas no lusum fasin ya we yufala i stap putum tingting blong yufala i strong blong kasem ol samting ya we i gat promes blong hem i stap long gud nyus ya, yufala i harem finis, ol man oli talemaot finis long olgeta man long wol.” Sem mak long Jisas, i gat plante samting we oli dipen long fasin blong yumi blong holemtaet bilif long Jeova. !Jeova mo Jisas tufala i mekem plante samting blong yumi! I gud yumi soemaot lav blong yumi long tufala taem yumi folem advaes blong Pol.
21. ?From wanem yumi gat bigfala risen blong stap glad tede?
21 Ol man Kolosi we oli Kristin oli mas glad blong harem se ‘gud nyus ya we oli harem’ ol man oli bin “talemaot finis long olgeta man long wol.” (Kolosi 1:23) Tede yumi glad moa taem yumi harem ripot blong wok blong talemaot gud nyus blong Kingdom. Bitim fo mo haf milyan Wetnes oli stap mekem wok ya long bitim 230 kantri. !Yes, evri yia kolosap 300,000 man we oli kamaot long olgeta nesen oli kam fren bakegen long God!—Matyu 24:14; 28:19, 20.
22. Sipos yumi harem nogud, ?God i save mekem wanem blong yumi?
22 Nating se Pol i stap long kalabus long taem ya we hem i raetem leta i go long ol man Kolosi, hem i no soem se hem i harem nogud tumas from. Be, hem i talem se: “Naoia mi mi stap harem i nogud long bodi blong mi, be mi glad tumas, from we hemia i blong givhan long yufala.” Pol i save olsem wanem ‘blong stanap strong mo gat longfala tingting wetem glad.’ (Kolosi 1:11, 24) Be, hem i save se hem i no mekem samting ya wetem prapa paoa blong hem. !Jeova i mekem hem i gat paoa! Sem mak tede. Plante taosen Wetnes we oli bin go long kalabus mo oli kasem trabol, oli no lusum glad blong olgeta blong mekem wok blong Jeova. Be, oli glad long ol trutok blong God we i stap long Aesea 40:29-31 se: “Hem i stap givim paoa long man we i taet . . . Olgeta we oli hop long Jeova bambae oli kasem paoa bakegen.”
23, 24. ?Wanem tok haed ya we Kolosi 1:26 i tokbaot?
23 Minista wok ya blong talemaot gud nyus blong Kraes i impoten tumas long Pol. Hem i wantem ol narafala blong oli gat fasin tangkyu from impoten wok blong Jisas long plan blong God, taswe hem i tokbaot gud nyus ya olsem “Tok ya God i stap haedem longtaem we longtaem, we plante ya i pas finis.” I no samting we i mas stap haed oltaem. Pol i ademap se : “Naoia hem i soemaot finis long ol tabu man blong hem.” (Kolosi 1:26) Taem fasin agens i kamaot long Iden, Jeova i promes long ol nambawan samting we bambae oli kam biaen, taem hem i talemaot profet tok ya se ‘laen blong woman ya bambae i smasem hed blong snek.’ (Jenesis 3:15) ?Samting ya i minim wanem? Blong ol laen blong man, long ol handred yia we i pas, i olsem wan tok haed. Biaen Jisas i kam, mo “long gud nyus ya, hem i tekem laef i kamtru we i no save finis.”—2 Timote 1:10.
24 Yes, “tok haed ya” i stap raon long Kraes mo Kingdom blong Mesaea. Pol i tokbaot “ol samting long heven,” hemia olgeta we bambae oli haf long Kingdom ya blong rul wetem Kraes. Bambae God i yusum olgeta olsem ol tul, blong givim blesing long “olgeta samting blong wol ya,” olgeta ya we bambae oli harem gud long paradaes long wol. Yu yu save luk klia, se i stret we Pol i tokbaot “ol rij samting blong tok haed ya.”—Kolosi 1:20, 27.
25. Olsem we i stap long Kolosi 1:29, ?yumi mas gat wanem fasin naoia?
25 Pol i stap wet long ples we bambae hem i kasem long Kingdom. Mo hem i luksave se hem i no save stap sidaon mo gat hop ya sipos hem i no mekem wan samting nating. “Mi mi stap hadwok tumas. Mo oltaem mi stap yusum olgeta bigfala paoa ya we Kraes i stap givim long mi, blong mekem mi mi strong.” (Kolosi 1:29) Tingbaot se tru long Kraes, Jeova i mekem Pol i gat bigfala paoa blong mekem minista wok ya we i blong sevem laef. Jeova i save mekem sem mak long yumi tede. Be yumi mas askem long yumi wan se, ‘?Mi mi gat speret blong talemaot gud nyus olsem fastaem, taem mi lanem trutok?’ ?Yu yu ansa olsem wanem? ?Wanem i save givhan long yumi wanwan blong gohed blong ‘hadwok tumas’ mo blong ‘yusum bigfala paoa ya we Kraes i stap givim long yumi, blong mekem yumi strong’? Nekis haf blong magasin ya i bambae tokbaot bisnes ya.
?Yu Yu Tingbaot?
◻ ?From wanem yumi save sua se Jeova i save soemaot paoa blong hem long bighaf blong ol man?
◻ ?Wanem stampa blong toktok blong Pol long Kolosi japta 1?
◻ ?Olsem wanem God i stretem trabol we Kolosi 1:20 i tokbaot?
◻ Long paoa blong hem, ?Jeova i save yusum yumi blong mekem wanem i kamtru?
[Map/Foto blong pija long pej 8]
(Lukluk niuspepa)
KOLOSI