!Holemstrong Long God Mo Stap Laef!
“!I MOA gud yu tok nogud long nem blong God, mo yu ded!” Pija we i stap long fas pej blong magasin ya i soem woman blong Job, we i talem ol strong tok ya agens long Job. Samting ya i hapen samwe long 3,600 yia bifo. Be tok ya we i agensem trufala man blong God, i soem se i gat wan kwestin we ol man oli fesem longtaem finis i kam. Job we i stap tru long God, i safa from plante samting we hem i lusum—ol anamol blong hem, haos blong hem, mo ten pikinini blong hem. Nao hem i harem nogud tumas long bodi blong hem from wan nogud sik. Samting ya i traem fasin blong hem blong stanap strong longtaem, go kasem ful mak blong hem. ?From wanem Job i kasem ol samting ya? Bigfala enemi blong God mo blong ol man, Devel Setan, i mekem ol samting ya blong traem pruvum tok ya we hem i sakem long fes blong God se, man i no save holemstrong long God taem hem i kasem bigfala traem.—Job 1:11, 12; 2:4, 5, 9, 10.
Tede, olsem long taem blong Job, “ful wol i stap aninit long paoa blong hemia we i rabis,” Devel Setan. (1 Jon 5:19, NW) Yes, samting ya i tru moa long taem blong yumi tede. From we naoia ‘hemia we nem blong hem Devel Setan, we i stap gyaman long olgeta man long wol,’ oli sakemaot hem finis long heven, i kamdaon long wol. (Revelesen 12:9) Hemia nao stampa blong ol bigbigfala trabol we oli stap spolem ol man long taem blong yumi. Faswan bigfala faet blong wol, we i faerap long 1914, i makem “stat blong ol trabol we i blong mekem man i harem nogud,” we i gohed moa long ol yia 1900.—Matyu 24:7, 8, NW.
Long nogud wol ya, we i gat plante samting blong mekem man i harem nogud, ?yu stap filim samtaem se fasin blong yu blong holemstrong longtaem i kasem ful mak blong hem? ?Samtaem yu bin tingting se, ‘?I gat mining blong laef?’ Maet Job i bin gat ol filing olsem. Be neva hem i lusum fasin ya blong bilif long God, nating se hem i mekem sam mastik. Hem i talemaot strong tingting blong hem long ol tok ya se: “!Go kasem taem we bambae mi ded, be mi mi no save lusum stret fasin blong mi samtaem!” Hem i gat strong bilif se God bambae i ‘save long fasin blong hem blong fasgud long Hem.’—Job 27:5; 31:6.
Jisas Kraes, stret Pikinini blong God, hem tu i fesem plante hadtaem, taem hem i stap long wol ya. Setan i traem Jisas long ol defren rod. Hem i traem Jisas long ol samting we hem i nidim long saed blong bodi mo long fasin blong Hem blong dipen long Tok blong God, olsem hemia we Setan i traem hem long hil. (Matyu 4:1-11) Hem i mekem Jisas i harem nogud taem hem i yusum ol tija blong loa mo ol Farisi we oli gat fasin blong apostasi, mo ol man we oli biaen long olgeta, blong oli ronem mo mekem i nogud long Jisas, oli talem se hem i tok nogud long nem blong God, mo oli mekem rabis plan blong kilim hem i ded. (Luk 5:21; Jon 5:16-18; 10:36-39; 11:57) Samting we oli mekem long Jisas i moa nogud long hemia we trifala gyaman fren blong Job, oli mekem long Job.—Job 16:2; 19:1, 2.
Long garen blong Getsemane, taem Jisas i kam kolosap long en blong traem ya, hem i talem long ol disaepol blong hem se: “Tingting blong mi i hevi tumas, we kolosap mi mi ded from.” Nao, hem “i foldaon, i slip long fes blong hem blong i prea. . . . Hem i talem se: ‘Papa sipos yu save mekem samting ya, plis yu tekemaot kap ya, blong bambae mi mi no dring long hem. Be yu no mekem olsem we mi mi wantem, yu mekem olsem we yu nomo yu wantem.’ ” Biaen, taem Jisas i stap hang long pos, hem i mekem profet tok blong Ol Sam 22:1 i kamtru, hem i singaot bigfala se: “?God blong mi, God blong mi, from wanem yu livim mi mi stap olsemia?” Be God i no livim Jisas olgeta, from we Jisas i holemstrong long God, hem i givim wan eksampel long ol trufala Kristin blong oli folem. Jeova i givim pei long Jisas from fasin blong hem blong holemstrong long Hem, taem God i mekem hem i laef bakegen long ded, i leftemap hem i go antap olgeta long heven. (Matyu 26:38, 39; 27:46; Ol Wok 2:32-36; 5:30; 1 Pita 2:21) Bambae God i givim pei tu long olgeta we oli holemstrong long hem.
Fasin blong Jisas blong holemstrong long God i givim wan klia ansa long ol traem blong Setan. Be i no hemia nomo. Sakrifaes blong laef blong hem we i stretgud olgeta i wan ransom we ol man we oli holemstrong long God oli save kasem laef blong olwe from. (Matyu 20:28) Fastaem, Jisas i hivimap ‘ol sipsip we oli no plante’ we tabu speret i makemaot olgeta blong oli joen wetem hem long Kingdom blong heven. (Luk 12:32) Afta long samting ya, hem i hivimap “bigfala hif blong man” blong oli pastru long “bigfala trabol.” Yes, oli kamaot long bigfala trabol blong kasem laef blong olwe, aninit long rul blong Kingdom blong God long wol.—Revelesen 7:9, 14-17.
Job, we i holemstrong long God, bambae i stap long medel blong plante milyan man we bambae oli laef bakegen long ded, blong kam haf blong sosaeti blong “nyufala wol” ya we i gat pis. (2 Pita 3:13; Jon 5:28, 29) Olsem bak blong magasin ya i soem, Job i kasem pei from fasin blong hem blong holemstrong long Jeova taem Jeova i “blesem hem biaen . . . bitim bifo.” Hem i kasem paoa long saed blong speret olsem man we “i no mekem sin wetem maot blong hem.” God i ademap 140 yia moa long laef blong hem. Jeova i givim ol samting long saed blong bodi long Job we i dabolem ol samting we hem i gat bifo. Mo Job “i gat seven boe mo tri dota,” trifala gel ya, oli naes moa bitim ol narafala gel long kantri ya. (Job 2:10; 42:12-17) Be ol gudgudfala samting ya, oli smol haf nomo blong ol blesing we ol man we oli holemstrong long God, bambae oli haremgud long olgeta, long Paradaes long “nyufala wol.” !Yu tu, yu save kasem glad ya, olsem ol pej we oli biaen bambae oli eksplenem!
[Tok blong pija long pej 4]
Jisas i soem eksampel long fasin fasgud blong God we i stretgud olgeta