Ripot Long Wok Blong Kingdom
Jeova i Strong Moa Bitim Ol Enemi Blong Hem
LONGTAEM finis i kam, Devel Setan mo ol dimon blong hem oli stap yusum ol gyaman skul mo wok blong ol rabis speret blong traem blokem wok blong talemaot gud nyus. Long Seken Korin 4:4, Baebol i tokbaot rabis plan blong Setan, se “rabis god blong wol ya Setan, hem i satem tingting blong olgeta finis, nao oli stap long tudak. Hem i stap blokem olgeta, blong oli no luk laet ya we i stap saenaot i go long olgeta. Laet ya i kamaot long gud nyus blong Jisas Kraes, we hem i gat olgeta paoa, mo hem i stret pija blong God.”
Be Jeova God i strong moa bitim Setan. I no gat wan samting nating we ol enemi blong Jeova oli save mekem blong stopem wil blong hem blong i no kamaot, se “hem i wantem sevem olgeta man, mo i wantem olgeta man bambae oli faenem trutok.” (1 Timote 2:4) Ripot blong ol man blong talemaot Kingdom long Ostrelya, we i kam biaen i soem samting ya.
◻ Afta we wan woman i no bin go long skul blong 20 yia, hem i stat blong ridim Baebol bakegen. Nyufala intres blong hem long Baebol i mekem se hem i gat plante kwestin, ale hem i prea long God, i askem help long hem blong faenem ol ansa. Hem i wantem lukaot trutok, be hem i save se hem i no save faenem trutok, sipos hem i gobak long olfala skul blong hem. Hem i no gobak long skul blong hem, be hem i go long wan sekenhan stoa we i salem buk, mo i askem sipos oli gat sam buk we oli tokbaot skul.
Woman we i lukaot long stoa ya i rimemba se hem i gat wan buk long saed blong skul, we i no stap long stoa, be i stap long haos blong hem. Buk ya, nem blong hem, Yu Save Laef Foreva Long Paradaes Long Wol, wan buk we ol Wetnes blong Jeova oli prentem. Woman ya i glad tumas blong ridim buk ya mo i faenem ansa blong plante long ol kwestin blong hem long saed blong Baebol. Afta we hem i stap lukaot ol Wetnes blong Jeova long buk blong telefon, hem i toktok wetem olgeta mo i stat blong stadi long Baebol oltaem.
◻ Wan yangfala woman i pem blong putum wan notis long wan lokol nyuspepa, long saed blong wan ston blong givim laki, we hem i wantem salem. Pablisiti ya i tokbaot ston ya se wan ‘majik ston blong Medel Ejes we i gat bigfala paoa.’ Wan long ol Wetnes blong Jeova i luk pablisiti ya. Hem i mekem disisen blong telefon long namba we oli talem mo blong toktok wetem woman ya long saed blong stampa blong gyaman paoa blong majik ston ya. Tufala i tokbaot ol poen blong Baebol long saed blong wok blong ol rabis speret. Yangfala woman we i stap kipim majik ston ya i talem se, jes wan dei bifo, hem i bin prea long God blong askem help long hem blong hem i save winim ol problem blong ol rabis speret. Wetnes ya i mekem plan blong gat wan narafala storeyan long telefon.
Taem hem i telefon, yangfala woman ya i no stap. Mama blong hem i ansarem telefon mo i talem se: “!Mi no save wanem samting yu talem long dota blong mi, be samting we i hapen i wan merikel!” Woman ya i talem se, afta long faswan taem we oli toktok long telefon, dota blong hem i sakemaot olgeta pija mo ol buk blong hem we oli tokbaot Setan mo i stat blong ridim Baebol.
Smoltaem biaen, Wetnes ya i mekem plan blong visitim yangfala woman ya. Wantaem nomo, hem i akseptem blong stadi Baebol wetem ol Wetnes blong Jeova. Mo tu, hem i stat blong joen wetem ol Wetnes blong Jeova taem hem i stap go long ol Kristin miting blong olgeta. Bakegen, Jeova i winim ol rabis speret, taem hem i mekem stret save blong trutok blong Baebol i saenaot.