Skul Blong Yu—?Wan Sip We Neva Yu Mas Livim?
WAN sip i stap fesem wan strong win. Ol boskru, we oli stap traehad tumas blong sevem sip blong olgeta, oli mas mekem wan impoten disisen: bambae oli stap long sip no oli livim mo sevem laef blong olgeta wanwan. ?Yu yu save se ol tok ya we oli mekem wan nogud pija long tingting blong yumi, i blong eksplenem fasin blong jyos?
Plante taem, ol man blong mekem dip stadi long saed blong jyos, antap moa, ol Katolik, oli talem se jyos blong olgeta i olsem wan sip we i stap fesem strong win. Oli talem se sip ya, we Jisas no Pita i holem stia blong hem, i rod ya nomo we God i stap yusum blong sevem ol man. Ol lida blong skul, oli talem strong se: ‘Yu neva mas lego sip. Jyos i bin fesem sam bigfala trabol bifo, be hem i wan sip we i winim olgeta strong win blong histri.’ Samfala oli talem se, ‘?From wanem yu wantem lego jyos? ?Weples bakegen yu save go long hem? ?From wanem yu no wantem stap mo givhan blong stiarem hem i go long solwora we i kwaet?’
Folem pija tok ya, plante man we oli stap folem plante defren skul, oli tingting se, ‘Mi save se skul blong mi i rong long plante samting, be mi hop se bambae hem i jenis. Mi no wantem livim hem. Mi wantem blong joen blong givhan long hem blong winim ol hadtaem blong hem.’ Maet tingting ya, wan man i save gat taem hem i laekem tumas skul blong bubu blong hem, no maet hem i fraet from i ting se hem i mas “stap tru” long skul blong hem.
Wan eksampel, hemia Hans Kung, we ol man oli savegud hem olsem man blong mekem dip stadi long saed blong Katolik skul, be hem i no agri long plante samting long Katolik skul, i tingting olsem se: “?Long strong win ya, bambae mi jyamaot long bot, mo livim olgeta we oli bin sel wetem mi kam kasem naoia, blong fesem win, tekemaot wora, mo ating blong traehad blong sevem laef blong olgeta?” Hem i ansa se: “Bambae mi no save lego fasin blong mi blong wokgud long jyos.” Narafala samting we hem i save mekem, se “lego jyos ya, from plante samting we hem i mekem we oli no stret, blong soem fasin blong laekem ol samting we oli stret mo tru, mo maet, blong kam moa olsem trufala Kristin.”—Die Hoffnung bewahren.
?Be wan man i save stap long bot, hemia prapa jyos blong hem wetem tingting ya se God, long fasin sore blong hem, bambae i letem wan longfala taem long ol skul blong oli jenis? Hemia i wan impoten kwestin. Blong gohed moa long pijatok antap, fasin blong hareap blong go long wan bot we i gat hol long hem, i denja tumas olsem fasin ya blong stap antap long wan sip we i stap draon. ?I waes blong stap long wan jyos, nating se wanem samting i save hapen long yu mo wanem fasin i stap gohed insaed long jyos ya? ?Ol skul blong tede, oli stap soemaot se oli wantem jenis? ?Go kasem wetaem bambae God i letem olgeta blong mekem samting we i agensem wil blong hem?
[Foto Credit Line pej 3]
Chesnot/Sipa Press