Bambae Ol Stret Man Oli Laef Bakegen Long Ded
“Mi putum tingting blong mi long God blong . . . bambae i mekem olgeta man oli laef bakegen long ded, ol man we oli stret, wetem ol man we oli no stret.”—OL WOK 24:15.
1. ?Stat taem Adam mo Iv tufala i foldaon long sin, olgeta man oli stap fesem wanem samting?
“OLGETA samting we han blong yu i save mekem, i gud yu mekem wetem paoa blong yu. From we i no gat wok no plan no save no waes long Seol, ples ya we bambae yu yu go long hem.” (Eklesiastis 9:10) Long ol smol tok ya we waes King Solomon i jusumgud, hem i eksplenem samting we olgeta laen blong man oli bin fesem, stat long taem ya we faswan papa mo mama blong yumi, Adam mo Iv tufala i foldaon long sin. Yes, ded i bin kasem evriwan—ol rij man mo ol pua man, ol king mo ol man olbaot, ol man we oli gat bilif mo ol man we oli no gat bilif. Tru ya, ded i bin “rul olsem king.”—Rom 5:17.
2. ?From wanem sam man blong bilif oli bin harem nogud long taem ya blong en?
2 Nomata we sayens i kam antap naoia long saed blong helt, ded i stap rul yet olsem king long taem blong yumi. Nating se yumi evriwan i save samting ya, samfala oli bin harem nogud taem oli mas fesem enemi ya we i stap longtaem finis. ?From wanem? Long ol yia 1920, Watch Tower Society i talemaot mesej ya, “Plante milyan man we oli laef naoia bambae oli no save ded.” ?Hu ya ol milyan man ya? Hemia “ol sipsip” long tok blong Jisas long saed blong ol sipsip mo ol nani. (Matyu 25:31-46) Profet tok ya i talem se olgeta we oli olsem ol sipsip bambae oli kamtru klia long taem blong en, mo hop blong olgeta i blong kasem laef we i no save finis long paradaes long wol. Taem ol yia oli stap pas, ol man blong God oli kasem moa save long saed blong ol “sipsip” ya, folem stampa tingting blong Jeova. Oli kasem save se olgeta ya we oli obei, oli defren long ol stronghed “nani,” mo se afta we ol nani bambae oli lus, ol sipsip bambae oli stap long wol ya aninit long Kingdom we i rere finis long olgeta.
Hivimap Olgeta Ya We Oli Olsem Ol Sipsip
3. ?Stat long 1935, ol man blong God oli bin wok strong long wanem wok?
3 Stat long 1935, ‘slef we i stret’ i stap traehad blong lukaot olgeta we oli olsem ol sipsip mo i karem olgeta oli kam insaed long ogenaesesen blong Jeova. (Matyu 24:45; Jon 10:16) Ol Kristin ya we oli glad blong narafala i tijim olgeta, oli luksave se naoia Jisas i stap rul long Kingdom blong Jeova long heven, mo se taem i stap pas kwik go kasem en blong ol nogud fasin blong wol ya mo stat blong nyufala wol we stret fasin bambae i stap long hem. (2 Pita 3:13; Revelesen 12:10) Long nyufala wol ya, ol gudfala tok ya blong Aesea bambae i kamtru se: “Bambae hem i finisim ded blong olwe.”—Aesea 25:8.
4. Plante narafala sipsip oli bin hop strong blong luk we Jeova i win long Amageden, ?be wanem i bin kamaot long olgeta?
4 From we en blong wol blong Setan i kolosap tumas, ol Kristin man we oli olsem ol sipsip, bambae oli glad tumas sipos oli save stap laef gogo kasem taem we rul blong Jeova i win. Hemia long bigfala trabol, we kolosap nao i kasem Bigfala Babilon mo ol narafala haf blong wol blong Setan. (Revelesen 19:1-3, 19-21) Be, laef blong plante man i no kamaot olsem. Plante man we oli bin hop blong stap wetem ol “milyan” ya we bambae oli neva ded samtaem, oli ded finis. Samfala oli ded from trutok long ol kalabus mo ol rabis kalabus no long han blong sam man we oli folem ol krangke skul. Sam narafala oli ded long akseden no long ol samting we oli kamaot long yumi evriwan—olsem sik mo olfala. (Ol Sam 90:9, 10; Eklesiastis 9:11) I klia nomo se, plante bambae oli ded yet bifo we en i kam. ?Olsem wanem ol man olsem oli save luk nyufala wol ya we bambae stret fasin nomo i stap long hem, olsem God i promes finis?
Hop Blong Laef Bakegen Long Ded
5, 6. ?Wanem fyuja blong olgeta ya we oli ded bifo Amageden be oli hop blong laef long wol?
5 Aposol Pol i ansa long kwestin ya taem hem i stap toktok long fored blong hedgavman ya blong Rom, Feliks. Olsem we oli raetem long Ol Wok 24:15, Pol i talemaot klia se: “Mi putum tingting blong mi long God blong . . . bambae i mekem olgeta man oli laef bakegen long ded, ol man we oli stret, wetem ol man we oli no stret.” Hop ya blong laef bakegen long ded i save mekem se yumi no fraet, nating se yumi fesem ol trabol we oli nogud olgeta. From hop ya, taem ol gudfala fren blong yumi oli kam sik mo oli save se bambae oli mas ded, tingting blong olgeta i no foldaon. Nomata wanem samting i hapen, oli save se bambae oli kasem pei blong fasin ya blong bilif. From hop ya blong laef bakegen, ol brata mo sista blong yumi we oli no fraet mo oli ded long han blong ol man we oli kilim olgeta, oli save se ol man ya oli no win. (Matyu 10:28) Taem wan man long kongregesen i ded, yumi harem nogud blong lusum man ya. Be, sipos hem i wan long ol narafala sipsip, yumi glad se fren blong yumi ya i bin holemtaet strong bilif blong hem gogo kasem en, mo se naoia hem i stap spel, wetem promes ya blong kasem wan gudfala fyuja long nyufala wol blong God.—1 Tesalonaeka 4:13.
6 Yes, hop ya blong laef bakegen long ded i wan impoten haf blong bilif blong yumi. Be, ?from wanem bilif blong yumi long laef bakegen i strong olsemia, mo hu bakegen i gat hop ya?
7. ?Wanem ya laef bakegen, mo wanem ol vas we oli soemaot pruf blong hem?
7 Grik tok ya blong talem “laef bakegen,” hem i a·naʹsta·sis, we i minim “stanap.” Hem i rili minim girap long ded. Maet yu intres long poen ya se, stret tok ya “laef bakegen” i no stap long Hibru haf blong Baebol, be hop ya blong laef bakegen i kamaot klia long sem haf ya. Eksampel, yumi luk tingting ya long ol tok we Job i talem taem i stap harem nogud tumas long bodi blong hem, se: “!Plis yu haedem mi long Seol, . . . plis yu makem dei we bambae yu yu save tingbaot mi bakegen!” (Job 14:13) Sem mak, long Hosea 13:14, yumi ridim se: “Bambae mi pemaot olgeta long han blong Seol. Bambae mi tekembak olgeta long ded. ?E, Ded, ol nil blong yu blong stikim man, oli stap wea? ?E, Seol, paoa blong yu blong spolem man hem i stap wea?” Long 1 Korin 15:55, aposol Pol i talem ol tok ya bakegen, mo i soemaot se fasin blong winim ded we profet tok ya i talem, bambae i kamtru long laef bakegen. (I tru, long vas ya Pol i stap tokbaot laef bakegen long heven.)
Ol Man Blong Bilif Oli “Kam Stret Man Long Fes Blong God”
8, 9. (a) ?Olsem wanem ol sinman oli save stap wetem ol stret man we bambae oli laef bakegen? (b) ?Wanem faondesen blong hop blong yumi blong laef ya we bambae ded i no save spolem?
8 Long tok blong Pol long Feliks, we i stap long paragraf 5, hem i talem se bambae ol man we oli stret mo ol man we oli no stret oli laef bakegen long ded. ?Hu ya ol stret man we bambae oli girap? Yes, i no gat wan man we i stretgud olgeta. Taem yumi bon, yumi evriwan i sinman, mo yumi mekem sin long ful laef blong yumi—hemia tu risen from wanem i stret we yumi mas ded. (Rom 5:12; 6:23) Be, long Baebol yumi faenem tok ya ‘stret man long fes blong God.’ (Rom 3:28) Hemia i tokbaot ol man we, nating se oli no stretgud olgeta, Jeova i fogivim sin blong olgeta.
9 Baebol i yusum tok ya moa blong tokbaot ol Kristin we tabu speret i makemaot olgeta, we oli gat hop blong laef long heven. Long Rom 5:1, aposol Pol i talem se: “From we yumi bilif, God i mekem yumi stret man finis long fes blong hem. Nao from samting ya, yumi gat pis wetem hem. Masta ya blong yumi Jisas Kraes, hem i putum pis ya long yumi.” Olgeta Kristin we tabu speret i makemaot olgeta, God i mekem se oli kam stret man long fes blong Hem from bilif. ?Bilif long wanem? Olsem we Pol i eksplenemgud long buk blong Rom, hemia bilif long Jisas Kraes. (Rom 10:4, 9, 10) Jisas i ded olsem wan man we i stretgud olgeta, mo biaen hem i laef bakegen long ded mo i go antap long heven blong givim praes blong laef blong hem olsem man, blong pemaot yumi. (Hibrus 7:26, 27; 9:11, 12) Taem Jeova i akseptem sakrifaes ya, i olsem we Jisas i pemaot olgeta man blong oli no moa slef long sin mo ded. Olgeta we oli soemaot bilif long plan ya oli kasem plante blesing from. (1 Korin 15:45) From plan ya, ol man mo woman blong bilif, oli gat hop blong kasem laef ya we bambae enemi ya ded, i no save spolem.—Jon 3:16.
10, 11. (a) ?Ol tru Kristin we tabu speret i makemaot, oli wet long wanem fasin blong laef bakegen? (b) ?Ol man blong wosip long Jeova bifo Kraes, oli gat hop long wanem kaen fasin blong laef bakegen?
10 From ransom sakrifaes blong Jisas, ol tru Kristin we tabu speret i makemaot olgeta mo God i mekem olgeta oli kam stret man long fes blong hem, oli sua long hop ya blong laef bakegen olsem ol speret man we oli no save ded bakegen samtaem, olsem Jisas. (Revelesen 2:10) Revelesen 20:6 i tokbaot fasin blong olgeta ya blong laef bakegen, i talem se: “Olgeta ya we God i mekem olgeta oli laef bakegen long ded fastaem, oli stap haremgud. God i mekem i gud tumas long olgeta, from we seken ded i no moa gat paoa long olgeta. Olgeta ya bambae oli pris blong God mo blong Kraes, mo bambae oli joen wetem Kraes we hem i king, nao oli rul wetem hem, gogo wan taosen yia i pas.” Hemia laef bakegen long heven. Be, tingbaot se Baebol i kolem fasin ya se “laef bakegen long ded fastaem,” we i soemaot se biaen bambae plante moa man oli laef bakegen.
11 Long Hibrus japta 11, Pol i tokbaot longfala laen blong ol man blong God bifo Kraes, we oli soemaot strong bilif long Jeova God. Olgeta ya tu oli bilif long laef bakegen. Long vas 35 blong japta ya, Pol i tokbaot ol merikel we oli givim laef bakegen long samfala long Isrel bifo, i talem se: “Sam woman oli bilif long God, taswe God i mekem ol pikinini blong olgeta oli laef bakegen long ded. Be sam narafala man we oli stap bilif long God, oli letem ol enemi blong olgeta oli stap mekem olgeta oli harem nogud tumas long bodi blong olgeta, from we oli stap bilif. Oli no tingbaot we maet oli save gofri, sipos oli lego fasin blong bilif blong olgeta. Oli stap tingbaot se from samting ya, God bambae i mekem olgeta oli laef bakegen long wan laef we i gud moa.” Olgeta wetnes ya blong bifo we oli gat strong bilif, oli stap tingbaot wan fasin blong laef bakegen we i gud moa long laef bakegen long taem blong ol man olsem Elaeja mo Elaesa. (1 King 17:17-22; 2 King 4:32-37; 13:20, 21) Hop blong olgeta i blong laef bakegen long wan wol we ol man blong God bambae oli no save harem nogud from ol enemi we oli kilim olgeta from bilif blong olgeta, wan wol we ol woman oli no save lusum ol famle blong olgeta long ded. Yes, oli tingbaot blong girap long ded long sem nyufala wol ya we yumi putum hop blong yumi long hem. (Aesea 65:17-25) Jeova i no talemaot plante samting long olgeta olsem we i talem long yumi long saed blong nyufala wol ya. Be, oli save se i stap kam, mo oli wantem stap long hem.
Laef Bakegen Long Wol
12. ?God i mekem ol man blong bilif bifo Kraes oli kam stret man long fes blong hem? Eksplenem.
12 ?Yumi mas tingbaot ol man mo woman blong bilif bifo Kraes we bambae oli laef bakegen long nyufala wol, olsem haf blong ol stret man we bambae oli laef bakegen? Yes, from we Baebol i tokbaot olgeta olsem ol stret man. Eksampel, disaepol Jemes i tokbaot wan man mo wan woman blong bifo we God i mekem tufala i kam stret man long fes blong hem. Man ya i Ebraham, stampa blong laen blong ol man Hibru. Long saed blong hem, yumi ridim se: “‘Ebraham, hem i bilif long God. Mo from we hem i bilif long God olsem, God i mekem hem i stret man long fes blong hem.’ Mo ol man oli stap singaot hem se ‘Fren blong God.’” Woman ya i Rehab, hem i no wan woman Isrel be hem i bilif long Jeova. God i mekem hem i kam “stret woman long fes blong hem” mo i joen long nesen blong ol man Hibru. (Jemes 2:23-25) Olsem nao, ol man mo woman blong bifo we oli bilif strong long Jeova mo ol promes blong hem mo oli stap tru long Hem gogo oli ded, Jeova i mekem olgeta oli stret man long fes blong hem from bilif blong olgeta, mo bambae olgeta tu oli sua blong ‘laef bakegen olsem ol stret man.’
13, 14. (a) ?Olsem wanem yumi save se God i save mekem ol Kristin we oli gat hop blong laef long wol, oli kam stret man long fes blong hem? (b) ?Samting ya i minim wanem long olgeta?
13 Be, ?olsem wanem long ol man we oli olsem sipsip tede, hemia ol man we oli gat hop blong laef long wol, we oli givim olgeta long Jeova mo we oli ded wetem bilif long taem ya blong en? ?Bambae oli joen blong laef bakegen wetem ol stret man? Yes. Long drim, aposol Jon i bin luk wan bigfala kampani blong ol man olsem, we oli bilif strong. Tingbaot olsem wanem hem i tokbaot olgeta: “Mi mi luk bakegen, nao i gat wan bigfala hif blong man, we olgeta i plante tumas, i no gat man i save kaontem olgeta. Ol man ya oli kamaot long olgeta kala mo long olgeta laen, mo long olgeta kantri, mo long olgeta lanwis. Olgeta oli werem waet klos, mo oli stap holem lif kokonas long han blong olgeta. Nao oli stap stanap long fes blong God ya we i stap sidaon long bigfala jea blong hem, mo long fes blong Smol Sipsip ya. Nao oli singaot bigfala, oli talem se ‘God ya blong yumi, we i stap sidaon long bigfala jea blong hem, wetem Smol Sipsip ya, tufala ya nao i wokem rod blong sevem mifala.’”—Revelesen 7:9, 10.
14 Tingbaot we ol kwaet man ya oli bilif fulwan se bambae oli kasem laef, mo oli bilif se Jeova mo Jisas, “Smol Sipsip ya,” bambae tufala nao i sevem olgeta. Antap moa, oli stap stanap long fored blong Jeova mo Smol Sipsip ya, mo oli putum waet klos. ?From wanem oli waet? Wan enjel long heven i talem long Jon se: “Oli wasem klos blong olgeta finis blong mekem oli waet long blad blong Smol Sipsip ya we i ded.” (Revelesen 7:14) Long Baebol, waet i minim klin fulwan, stret fasin. (Ol Sam 51:7; Daniel 12:10; Revelesen 19:8) From we bigfala hif blong man ya oli werem waet klos, samting ya i minim se Jeova i tingbaot olgeta olsem ol stret man. ?Olsem wanem samting ya i kamaot? I olsem we oli wasem klos blong olgeta long blad blong Smol Sipsip. Oli bilif long blad blong Jisas Kraes, mo God i mekem olgeta oli stret man long fes blong hem olsem ol fren blong hem, wetem tingting ya blong laef tru long taem blong bigfala trabol. Taswe, eni Kristin man blong bilif we i givim laef blong hem finis long Jeova mo naoia hem i wan long “bigfala hif blong man,” sipos hem i ded bifo long bigfala trabol, hem i save sua blong laef bakegen wetem ol stret man.
15. Ol man we oli stret mo ol man we oli no stret bambae oli laef bakegen, taswe ?from wanem fasin blong laef bakegen blong ol man we oli stret i gud moa?
15 Revelesen japta 20, vas 13 i tokbaot fasin ya blong laef bakegen, long ol tok ya se: ‘Olgeta we oli ded long solwora oli aot long solwora oli kam. Mo olgeta narafala dedman tu oli kam. Hades i no save holem olgeta, olgeta oli aot, oli kam. Nao man ya i jajem olgeta wanwan from ol wok blong olgeta.’ Olsem nao, long bigfala Jajmen Dei blong Jeova blong wan taosen yia, olgeta we oli stap long tingting blong God bambae oli laef bakegen—ol man we oli stret wetem ol man we oli no stret. (Ol Wok 17:31) !Be bambae i moa gud long ol stret man! Oli soemaot bilif finis long laef blong olgeta. Oli frengud finis wetem Jeova mo oli bilif se ol tingting blong hem bambae oli kamtru. Ol stret man we oli ol wetnes bifo Kristin Taem, bambae oli girap long ded wetem fasin blong wantem lanem olsem wanem ol promes blong Jeova long saed blong Laen ya i bin kamtru. (1 Pita 1:10-12) Ol narafala sipsip we Jeova i tingbaot olgeta olsem ol stret man long taem blong yumi, bambae oli kamaot long beregraon, we bambae oli wantem tumas blong luk Paradaes wol ya we oli bin tokbaot taem oli bin talemaot gud nyus long wol blong naoia. !Hemia bambae i wan taem blong haremgud fulwan!
16. ?Yumi save talem wanem long saed blong laef bakegen long Jajmen Dei blong olgeta we oli ded long taem blong yumi?
16 ?Wetaem stret long Jajmen Dei blong wan taosen yia ya, bambae olgeta we oli bilif mo oli ded long ol laswan yia blong wol ya blong Setan, oli laef bakegen? Baebol i no talem. Be, ?i stret blong ting se olgeta ya we oli olsem stret man we oli ded long taem blong yumi, bambae oli laef bakegen kwiktaem, olsem nao oli save joen wetem bigfala kampani blong ol man we oli laef tru long Amageden blong mekem wok ya blong welkamem ol man blong bifo we bambae oli laef bakegen long ded? !Yes, i stret!
Hop We i Mekem Yumi Haremgud
17, 18. (a) ?Olsem wanem hop ya blong laef bakegen i save mekem ol man oli haremgud? (b) ?Hop ya i pusum yumi blong talemaot wanem long saed blong Jeova?
17 Hop blong laef bakegen i givim paoa mo i mekem olgeta Kristin tede oli haremgud. !Sipos yumi gohed blong bilif strong, olgeta samting we oli hapen long yumi we yumi sek from, mo olgeta enemi blong yumi tu, oli no save stilim pei ya long yumi! Eksampel, long 1992 Yearbook of Jehovah’s Witnesses, long pej 177, i gat sam pija blong ol Kristin blong Itiopia we oli gat strong tingting, we oli ded from we oli no wantem lego bilif blong olgeta. Tok we i stap kolosap long ol pija ya i talem se: “Ol fes we yumi tingbaot blong luk taem oli laef bakegen.” !Bambae i wan blesing blong save ol man ya mo plante narafala we oli bin soemaot semfala fasin blong holemstrong bilif gogo oli ded!
18 ?Olsem wanem long ol famle mo fren blong yumi we oli no save laef tru long bigfala trabol from we oli olfala no oli sik? Folem hop ya blong laef bakegen, oli gat nambawan fyuja sipos oli gohed blong bilif. Mo sipos yumi tu i bilif strong long ransom sakrifaes blong Jisas, bambae yumi gat nambawan fyuja. ?From wanem? From we, olsem Pol, hop blong yumi i olsem se, “God bambae i mekem olgeta man oli laef bakegen long ded, ol man we oli stret wetem ol man we oli no stret.” Wetem fulhat blong yumi, yumi talem tangkyu long Jeova from hop ya. I tru, hop ya i pusum yumi blong talem bakegen ol tok blong Ol Sam se: “Bambae yumi talemaot paoa blong [God] long ol man blong ol narafala kantri. Bambae yumi talemaot ol bigbigfala wok blong hem long fes blong olgeta man. Hae God i hae tumas, mo yumi mas presem hem, yumi mas leftemap nem blong hem.”—Ol Sam 96:3, 4.
?Yu Yu Save Eksplenem?
◻ ?Wanem ol vas we oli halpem yumi blong mekem hop blong yumi blong laef bakegen long wol, i kam strong moa?
◻ ?Fasin ya we God i mekem ol Kristin oli kam stret man long fes blong hem naoia, i stanap long wanem?
◻ ?Olsem wanem hop blong laef bakegen long ded i mekem se yumi no fraet mo yumi gat strong tingting blong gohed?
[Tok blong pija long pej 9]
Olsem Pol, ol Kristin we tabu speret i makemaot olgeta oli hop blong laef bakegen long heven