Kam Long Distrik Asembli Ya, “Ol Hapi Man Blong Presem God”
HEMIA wan gudfala stampa tok we oli jusum blong 1995 distrik asembli: !“Ol Hapi Man Blong Presem God”! !Ol Wetnes blong Jeova oli olsem ya! ?Oli presem hu? !Oli presem Jeova God nomo!
Jeova i defren, yumi no save skelem hem wetem narafala man, hem i defren long plante rod. Hem i gat olgeta paoa, olgeta save, hem i stret olgeta long fasin blong jajem man, mo hem i lav. Hem nomo i gat raet blong kasem wosip mo ona.
!Tru ya, yumi wantem stap olsem ol hapi man we oli presem hem! Blong givhan long yumi, Hed Kampani blong ol Wetnes blong Jeova, oli mekemrere program blong wan gudfala asembli blong tri dei. Ol tri dei ya bambae oli givim bigfala glad, mo evri Wetnes blong Jeova, bambae i wantem traehad blong stap long asembli ya, stat long faswan singsing blong hem long Fraede moning, go kasem laswan singsing mo prea long Sande aftenun.