Ol Merikel Blong Jisas—?Trufala Histri No Kastom Store?

“Ale, kolosap i brok delaet, Jisas i kam long olgeta, i stap wokbaot antap long wora.”​—Matyu 14:​25.

LONG plante milyan man raon long wol, bilif ya se Jisas Kraes i mekem ol merikel, kolosap i impoten olsem bilif we oli gat long God hem wan. Ol man we oli raetem ol Gospel​—Matyu, Mak, Luk, mo Jon—​oli tokbaot 35 long ol merikel blong Jisas. Be ol store blong olgeta, oli soem se hem i bin mekem plante narafala bigfala wok tu long paoa we i bitim paoa blong man.​—Matyu 9:35; Luk 9:11.

Jisas i no wokem ol merikel ya blong mekem ol pleplei we ol man oli save haremgud blong lukluk olgeta, no gat. Oli joen wetem tok blong hem, se hem i Pikinini blong God, Mesaea we ol man oli bin stap wet long hem longtaem finis. (Jon 14:11) Moses i bin mekem ol merikel, taem hem i kamtru long nesen blong Isrel we i stap wok slef. (Eksodas 4:​1-9) Taswe i stret we Mesaea tu, hemia we ol profet oli bin talem se hem i hae moa long Moses, i mas mekem ol saen blong soem se God i stap sapotem hem. (Dutronome 18:15) From samting ya, Baebol i kolem Jisas se “wan man we God i soemaot long [ol man Jyu] finis we hem nomo i sanem hem. God i soemaot samting ya long ol merikel mo ol saen mo ol samting blong sapraes ya we God i givim paoa long hem blong mekem.”​—Ol Wok 2:22.

Bifo, ol man oli agri fulwan long ol tok blong Baebol se Jisas i wan man blong mekem merikel. Be long ol yia we oli jes pas, ol man oli tok agensem ol store blong Gospel. Long buk blong Lloyd Graham, Deceptions and Myths of the Bible, hem i tokbaot store blong Baebol long saed blong Jisas we i stap wokbaot long wora, mo hem i bitim mak, i talem se: “Man we i no gat save nating, hem nao bambae i bilif se store ya i tru. Mo plante milyan man oli rili bilif long hem. Yumi save nao wanem i rong wetem wol blong yumi. ?Olsem wanem yumi save gat wan wol we i moagud, taem i fulap long ol man olsem, we oli no waes nating?”

?Merikel i No Save Kamaot?

Ol strong tok olsem we man i talem agens long fasin blong mekem merikel, oli no stret nating. The World Book Encyclopedia i givim mining blong wan merikel, olsem, “wan wok we i no folem ol prapa loa blong ol samting long wol, olsem ol samting we yumi save finis.” !Folem mining ya, ol samting we yumi gat tede, olsem televisin we i gat kala, telefon we man i save yusum taem i ron long trak, mo kompyuta we man i save karem wetem hem, wan handred yia bifo ol man oli mas tingbaot olgeta olsem ol merikel! ?I stret blong holem strong tingting se i no gat rod blong mekem samting, jes from we save long saed blong sayens i no naf yet blong mekem samting ya?

Hemia wan narafala samting blong tingbaot: Long olfala Grik lanwis, we oli raetem “Nyu Testamen” long hem, wod we oli yusum blong talem merikel, hemia dy’na.mis​—we i minim “paoa.” Hem i minim tu se, ‘ol bigfala wok’ no “save.” (Luk 6:19; 1 Korin 12:​10; Matyu 25:15) Baebol i talem se ol merikel blong Jisas, oli blong soemaot “bigfala paoa blong God.” (Luk 9:43) ?Yu ting se wan God we i gat olgeta paoa​—Hemia we “strongfala paoa i fulap long hem”​— i no save mekem ol wok olsem?​—Aesea 40:26.

Ol Pruf Se Oli Tru

Taem yumi stadigud long ol fo Gospel, yumi faenemaot moa pruf we i mekem se yumi save bilif long ol store blong olgeta. Wan samting se, ol store ya oli defren olgeta long ol gyaman store mo ol kastom store. Eksampel, tingbaot ol gyaman store long saed blong Jisas we ol man oli talemaot olbaot long ol yia afta long ded blong hem. “Gospel blong Thomas,” we i no gat pruf se i tru, i talem se: “Taem boe ya Jisas i gat faef yia . . . , hem i wokbaot insaed long velej, ale wan boe i ron i kam, mo i fas long solda blong hem. Jisas i kros we i kros, nao i talem long hem se: ‘Bambae yu no moa gohed long rod blong yu.’ Nao wantaem nomo, pikinini ya i foldaon mo i ded.” I isi nomo blong luksave se store ya i gyaman​—wan store we man nomo i mekemap. Mo tu, pikinini ya we i kros kwik mo i no glad, olsem store ya i soem, i no sem mak nating long Jisas ya we Baebol i tokbaot.​—Jekemap Luk 2:​51, 52.

Nao, tingbaot ol store blong Gospel we oli rili tru. Oli no ademap sikispen mo oli no kamaot long tingting blong man nomo. Jisas i mekem ol merikel blong givhan long olgeta we oli rili nidim help, i no from we wan tingting i kasem hem se hem i wantem soemaot paoa blong hem. (Mak 10:​46-​52) Hem i neva yusum spesel paoa ya blong kasem samting blong hem wan. (Matyu 4:​2-4) Mo neva hem i yusum paoa blong hem blong mekem flas mo blong spolem ol narafala. Mo tu, taem King Herod i wantem se Jisas i mekem wan “saen” olsem merikel, “Jisas i no givim ansa long hem nating.”​—Luk 23:​8, 9.

Ol merikel blong Jisas oli defren olgeta long wok blong ol man blong mekem ol gyaman trik, ol man blong mekem majik, mo ol man we oli mekem merikel blong mekem sikman i kamgud. Oltaem, ol bigfala wok blong hem oli givim ona long God. (Jon 9:3; 11:​1-4) Ol merikel blong hem oli no joen wetem ol kastom we oli pulum filing, mo wetem wok blong majik, mo oli no blong soem hem wan. Hem i no yusum ol trik mo ‘hypnotism.’a Wan taem, Jisas i mitim wan blaenman we nem blong hem Batimeas, we oltaem i stap askem mane long ol man. Man ya i singaot bigfala se, “Tija, plis mi wantem ae blong mi i open, mi lukluk.” Nao Jisas i talem nomo long hem se: “‘I gud nomo, yu save go. Bilif blong yu i mekem yu yu gud bakegen finis.’ Wantaem nomo, ae blong hem i open, hem i lukluk.”​—Mak 10:​46-52.

Ol store blong Gospel oli no tokbaot we Jisas i yusum ol samting olsem ol man blong sinema oli yusum, olsem ol spesel jea no tebel mo ol spesel laet blong mekem se wok blong hem i luk olsem wan merikel. Hem i no plan fastaem blong mekem wan merikel. Hem i mekem long pablik ples, plante taem long fes blong ol man. (Mak 5:​24-​29; Luk 7:​11-15) Samting we i defren olgeta long ol man blong mekem merikel tede se, taem Jisas i mekem merikel long ol sikman, oltaem oli kamgud bakegen. Neva se wan sikman i no kamgud from we hem i no gat bilif. Matyu 8:16 i talem se: ‘Hem i mekem olgeta sikman oli gud bakegen.’

Long buk blong Arthur Pierson, “Many Infallible Proofs:” The Evidences of Christianity, man ya we i gat hae save i tokbaot ol merikel blong Kraes, se: “Namba blong ol merikel we hem i mekem, fasin ya we hem i mekem man i kamgud wantaem nomo, mo man i kamgud fulwan, mo se i no gat wan dedman nating we Jisas i no naf blong mekem i laef bakegen, olgeta samting ya oli soem se ol merikel ya oli defren olgeta long merikel long taem blong yumi mo long ol narafala taem.”

Ol Narafala Buk Oli Sapotem

Man ya Pierson i givim wan narafala pruf tu blong sapotem ol store blong Gospel, taem hem i talem se: “I no gat samting we i moagud blong pruvum ol merikel blong Baebol bitim we ol enemi blong Jisas oli no talem wan samting agensem ol merikel ya.” Ol lida blong ol man Jyu oli wantem tumas blong daonem ol wok blong Jisas. Be ol man oli savegud ol merikel blong hem, taswe ol enemi ya oli no save haedem. Oli jes talem nomo se, hem i stap mekem ol samting ya long paoa blong ol rabis speret. (Matyu 12:​22-24) Plante handred yia afta long ded blong Jisas, ol man we oli raetem Talmud blong ol man Jyu, oli gohed blong talem se Jisas i bin mekem ol merikel. Long buk ya Jewish Expressions on Jesus oli talem se hem i wan man blong “mekem majik.” ?Yu ting se oli save talem tok ya sipos ol merikel blong Jisas oli kastom store nomo?

I gat moa pruf i kam long Eusebius, we hem i wan man blong raetem histri blong jyos long ol yia biaen long 300. Long buk blong hem, The History of the Church From Christ to Constantine, hem i tokbaot man ya Quadratus, we i sanem wan leta i go long hedgavman, blong leftemap Kristin Skul. Quadratus i raetem se: “Oltaem ol wok blong Sevya blong mifala, oli klia nomo blong luk, from we oli tru​—ol sikman we hem i mekem olgeta oli kamgud bakegen mo ol dedman we hem i mekem oli laef bakegen. I no long taem ya we hem i mekem merikel nomo we ol man oli save luk ol pruf ya. Oltaem oli klia nomo blong luk, i no long taem ya nomo we Sevya i stap wetem yumi, be plante yia afta we hem i go. Mo tu, sam long ol man ya oli laef kasem taem blong mi.” William Barclay, wan man we i gat hae save i talem se: “Quadratus i minim se, kam kasem taem blong hem, sam long ol man we Jisas i mekem merikel long olgeta, oli stap laef yet, olsem pruf blong ol merikel ya. Sipos tok ya i no tru, i isi nomo long gavman blong Rom blong talemaot se ol tok blong ol man olsem i gyaman.”

Yumi save bilif long ol merikel blong Jisas from we i stret nomo blong mekem olsem, i waes blong bilif, mo oli laenap fulwan wetem ol pruf. Be, ol merikel blong Jisas oli no samting blong histri nomo. Hibrus 13:8 i mekem yumi tingbaot se: “Jisas Kraes i no save jenis, fasin blong hem i wan nomo, i stat bifo, i kasem tede, gogo i no save finis.” Yes, naoia hem i stap laef long heven. Hem i save yusum paoa blong hem blong mekem merikel long fasin we i bigwan moa bitim ol merikel we hem i mekem taem hem i stap long wol olsem wan man. !Mo tu, ol store blong Gospel long saed blong ol merikel blong hem (1) oli tijim ol Kristin long ol samting we oli save yusum long laef blong olgeta tede, (2) oli soemaot ol nambawan samting long saed blong prapa fasin blong Jisas mo (3) oli poen i go long wan taem we i kolosap nomo long fyuja we bambae ol samting we oli bigfala moa oli kamaot!

Blong eksplenem ol poen ya, haf we i kam biaen bambae i tokbaot tri store blong Baebol we ol man oli savegud long olgeta.

[Futnot]