Ol Wetnes Blong Jeova Raonabaot Long Wol—Sambia
WAN flat ples we i gat sam smosmol hil long hem, i stap antap long wan bigfala hil, we i 1,200 mita hae—hemia Sambia, wan kantri long medel blong saot Afrika. Long not is saed, i gat ol Bigfala Hil we nem blong olgeta Mujinga, we oli 2,100 mita hae. Bigfala Reva Sambesi, we i ron strong olsem Reva blong Viktoria we plante man long wol oli save long hem, hem i seraotem kantri ya long ol narafala kantri raonabaot. Ol man oli meksgud, i gat bitim 70 defren grup blong ol man. Oli tok long eit stampa lanwis, be i gat plante narafala lanwis tu.
Long yia 1911, i gat wan defren kaen lanwis we oli stat blong yusum mo i kam antap long Sambia. Sam man oli kam wetem sam kopi blong buk ya Studies in the Scriptures. Stat long taem ya, Ol Wetnes blong Jeova oli traehad blong karem “klin lanwis” blong trutok blong Baebol i go long olgeta ples blong Sambia. (Sefanaea 3:9) Wan samting we oli mas faet strong agens, hemia bilif we i no kamaot long Baebol long saed blong ol dedman. !Taem ol man oli lanem trutok mo faenemaot olsem wanem ol gyaman tok ya oli bin mekem olgeta i kalabus, oli glad tumas blong kam fri!—Jon 8:32.
Eksampel: Wan sista we i strong long bilif, i talem se, “Taem angkel blong mi i ded wantaem nomo, mama blong mi, we i wan strong memba blong Yunaeted Jyos blong Sambia, i harem nogud. Afta we oli mekem lafet blong wan wik, mi gobak long velej blong luk mama. Taem mi kasem ples blong hem, mi faenem wan olfala man long haos, mo afta we hem i go finis, mi askem bubu woman blong mi se hu ya olfala ya. Hem i talem se olfala ya hem i wan kleva. Mama blong mi i wantem pem olfala man ya blong hem i givimbak trabol long ol man we oli kilim i ded brata blong hem. Long fasin ya, sol blong hem bambae i save spelgud. Hem i bilif se naoia, sol ya hem i stap ‘wokbaot olbaot nomo,’ olsem hem i talem.
“Bubu woman blong mi i eksplenem tu, se visit blong mi hem i wan blesing, from we famle i stap lukaotem mane blong pem kleva ya. Hem i askem mi blong givim smol mane, be mi eksplenem gud se mi mi wan Kristin, taswe mi no joen long ol samting olsemia. Mi mekem i kliagud long hem tru long ol tok blong Ol Sam 146:4, we i soemaot se ol dedman oli no save tingting—taswe i no gat wan sol we i stap ‘wokbaot olbaot.’ Mitufala i ridim tok blong Rom 12:19, we i soemaot se fasin blong givimbak i stap long Jeova nomo, i no blong yumi. Afta long samting ya, mi toktok wetem mama blong mi long hop ya long saed blong laef bakegen long ded, we Jisas i tokbaot long Jon 5:28, 29. Hem i sapraes long strong bilif blong mi long ol promes ya blong God. Smoltaem biaen, hem i stat stadi wetem wan Wetnes, mo i gohed kwiktaem. Hem i no moa joen nating long jyos blong hem, mo hem i givim laef blong hem long God mo tekem baptaes. Tede hem i wan Wetnes blong Jeova.”
Wan narafala sista i talem se: “Mi go long sevis blong berem woman blong angkel blong mi. Taem mi kasem ples ya, mi luk angkel mo kasen blong mi oli sik from we oli no bin kakae longtaem. Oli no bin kakae wan samting, stat long dei we anti blong mi i ded. Taem mi askem from wanem, oli ansa se folem kastom, oli no mas mekem wan faea blong kuk. Ale mi talem se bambae mi mi kuk. !Be sam memba blong famle oli fraet se sipos mi brekem kastom ya, evriwan bambae oli kam krangke!
“Mi eksplenem se olsem wan Wetnes blong Jeova, mi respektem wanem Baebol i talem long Levitikas 18:30, mo mi no folem sam kastom we oli no stanap long Baebol. Afta, mi soem buklet ya Speret blong ol Dedman long olgeta. Ale fraet blong olgeta i godaon, mo mi gohed blong rerem kakae blong angkel blong mi mo ol narafala man. Ol famle blong woman we i ded, oli sapraes blong luk fasin blong mi we mi no fraet, mo oli agri blong stadi Baebol. Oli pablisa finis, mo ful famle oli gat plan blong tekem baptaes i no longtaem.”
!Yumi glad tumas taem klin lanwis blong trutok i winim ol gyaman tijing blong jyos we i mekem tingting i fasfas, antap moa ol strong tingting we oli mekem ol man oli kalabus! Wetem blesing blong Jeova, klin lanwis i stap gru long Sambia, long sem fasin we hem i stap gru long ful wol.—2 Korin 10:4.
[Bokis blong pija long pej 9]
LUKLUK LONG OL NAMBA BLONG KANTRI YA
1994 Sevis Yia
BIGFALA NAMBA BLONG OLGETA WE OLI STAP PRIJ: 82,926
SKELEM: 1 Wetnes blong 107
NAMBA BLONG OL MAN WE OLI KAM LONG MEMORIOL: 363,372
MEDEL NAMBA BLONG OL PAENIA: 10,713
MEDEL NAMBA BLONG OL BAEBOL STADI: 108,948
NAMBA BLONG OL MAN WE OLI TEKEM BAPTAES: 3,552
NAMBA BLONG OL KONGREGESEN: 2,027
BRANJ OFIS: LUSAKA
[Tok blong pija long pej 9]
Branj ofis blong Wajtaoa Sosaeti jes afsaed long Lusaka
[Tok blong pija long pej 9]
Wok blong prij long Simbala, saot blong Lusaka