Lanem Blong Faenem Glad Long Fasin Blong Fraetgud Long Jeova

‘Yufala ol pikinini blong mi, yufala i kam, yufala i lesin long mi. Bambae mi tijim yufala blong yufala i fraetgud long Jeova.’​—OL SAM 34:11.

1. ?Olsem wanem Kingdom blong God bambae i finisim fasin fraet, mo samting ya i minim se olgeta fasin fraet bambae oli lus?

OL MAN long evri ples, oli wantem kam fri long fasin fraet​—fraet long ol man blong brekem loa mo ol man blong kilim man, fraet blong no gat wok, fraet long ol bigfala sik. !Bambae yumi glad tumas long bigfala dei ya we bambae Kingdom blong God i mekem yumi fri long olgeta samting ya! (Aesea 33:24; 65:​21-23; Maeka 4:4) Be, i no olgeta fasin fraet we bambae oli finis long taem ya. Mo yumi no mas traem tekemaot olgeta fasin fraet long laef blong yumi naoia. I gat fasin fraet we i gud mo fasin fraet we i nogud.

2. (a) ?Wanem kaen fasin fraet we i nogud, mo wanem kaen hem i gud? (b) ?Wanem ya fasin fraetgud long God, mo olsem wanem ol vas long paragraf ya oli soem samting ya?

² Fraet i save kam olsem wan posen long tingting, we i save stopem fasin blong man blong tingting stret. Hem i save mekem fasin no fraet i kam smol, mo i save spolem hop. Fraet olsemia i save hapen long wan man taem wan enemi blong hem i traem blong kilim hem. (Jeremaea 51:30) Maet wan man i fraet olsem sipos hem i tingting tumas se i impoten blong ol haeman oli agri long hem. (Proveb 29:25) Be i gat wan fasin fraet we i gud, hemia fraet we i blokem yumi blong yumi no mekem samting we i no waes, blong yumi no kasem trabol. Be fasin fraetgud long God i no minim hemia nomo. Hem i minim bigfala respek long Jeova tu, mo dip ona long hem, we i joen wetem fasin blong no wantem nating blong mekem wan samting we i save mekem Hem i no glad long yumi. (Ol Sam 89:7) Fasin ya we yumi fraet blong mekem God i kros long yumi, i kamaot long fasin tangkyu we yumi gat long lav mo kaen fasin blong hem, mo long fasin blong hem blong mekem i gud long yumi. (Ol Sam 5:7; Hosea 3:5) Hem i minim tu, fasin blong luksave se Jeova i Bigfala Jaj mo hem i gat olgeta paoa. Hem i gat paoa blong givim panis, mo ded tu, long olgeta we oli no wantem obei long hem.​—Rom 14:​10-12.

3. ?Olsem wanem fasin fraetgud long Jeova i defren long fasin fraet we sam man oli gat long sam hiten god?

³ Fraetgud long God hem i gud, i no mekem man i harem nogud. Hem i pusum wan man blong stanap strong long stret fasin, blong no lego ol stret rul mo mekem samting we i rong. Hem i no olsem fasin fraet we ol man Gris bifo oli gat long god blong olgeta, Fobos. Hem i wan rabis god we i mekem man i fraet. Mo tu, fraet ya i no olsem fraet we ol man Hindu oli gat long woman god blong olgeta, Kali. Samtaem oli soemaot hem olsem wan god we i laekem blong mekem blad i ron, mo we i stap yusum ol dedbodi, ol snek, mo bun blong hed blong man, blong flasem hem. Fasin fraetgud long God i pulum man i kam, i no mekem man i ronwe. Hem i joengud wetem lav mo fasin tangkyu. Taswe, fasin fraetgud long God i pulum yumi blong go kolosap long Jeova.​—Dutronome 10:​12, 13; Ol Sam 2:11.

From Wanem Samfala Oli Gat Mo Samfala Oli No Gat

4. ?Olsem aposol Pol i soem, laef blong ol man i foldaon kasem wanem mak, mo wanem i mekem samting ya i kamaot?

⁴ Ol man long wol olsem wan grup, oli no gat fasin ya blong fraetgud long God. Long Rom 3:​9-18, aposol Pol i tokbaot olsem wanem ol man oli bin go longwe tumas long fasin blong stretgud olgeta we oli gat fastaem. Afta we Pol i talem se evri man i gat sin, hem i talem tok blong Ol Sam, i se: “I no gat wan long olgeta we i stap mekem ol samting we i stret.” (Lukluk Ol Sam 14:1.) Afta, blong eksplenem samting ya, hem i tokbaot ol man we oli no traem faenem God, oli no gat kaen fasin, maot blong olgeta i fulap long ol gyaman tok, oli tok swea, mo oli kwik blong mekem blad blong man i ron. !Samting ya i stret nomo long fasin blong wol tede! Bighaf blong ol man oli no gat intres long God mo ol stampa tingting blong hem. Oli soemaot kaen fasin nomo taem oli wantem kasem wan samting from. Oli talem ol gyaman tok mo rabis tok oltaem. I no long nyus nomo we oli tokbaot fasin blong mekem blad i ron, be long ol video mo sinema blong olgeta tu. ?From wanem i olsem? I tru se, yumi evriwan i kamaot long sinman ya Adam. Be taem ol man oli mekem ol fasin ya we aposol Pol i tokbaot oltaem long laef blong olgeta, i gat narafala samting i rong tu. Vas 18 i eksplenem wanem, i se: ‘Neva olgeta oli bin lanem blong fraetgud long God.’​—Lukluk Ol Sam 36:1.

5. ?From wanem samfala oli gat fasin fraetgud long God be sam narafala oli no gat?

⁵ ?Be from wanem sam man oli gat fasin fraetgud long God, be samfala oli no gat? Blong talem stret, hemia from we sam man oli traehad blong wokem fasin ya, be ol narafala oli no mekem olsem. I no gat wan man we i bon wetem fasin ya blong fraetgud long God, be yumi evriwan i naf blong wokem fasin ya. Fasin fraetgud long God i wan samting we yumi mas lanem. Biaen, blong mekem se hem i kam wan strong paoa we i lidim laef blong yumi, yumi mas mekem fasin ya i kam bigwan moa.

Ol Nambawan Tok Blong Singaot Yumi

6. ?Hu i singaot yumi long Ol Sam 34:​11, mo olsem wanem vas ya i soem se fasin fraetgud long God i wan samting we yumi mas lanem?

⁶ Long Ol Sam 34, i gat ol nambawan tok blong singaot yumi blong lanem fasin fraetgud long Jeova. Hemia wan sam blong Deved. ?Deved i pija blong hu? Hem i pija blong Masta Jisas Kraes. Wan profet tok we aposol Jon i talem se i stret long Jisas, i kamaot long vas 20 blong sam ya. (Jon 19:36) Long taem blong yumi tede, Jisas nao i singaot ol man olsem, long vas 11: ‘Yufala ol pikinini blong mi, yufala i kam, yufala i lesin long mi. Bambae mi tijim yufala blong yufala i fraetgud long Jeova.’ Samting ya i soemaot klia se fasin fraetgud long God i wan samting we yumi save lanem, mo Jisas Kraes i nafgud blong tijim yumi. ?From wanem?

7. ?From wanem Jisas i nambawan rod blong lanem fasin fraetgud long God?

⁷ Jisas Kraes i save se fasin fraetgud long God i impoten. Hibrus 5:7 i talem long saed blong hem, se: ‘Long laef blong hem long wol ya, Kraes i stap prea long God, i stap askem ol samting long hem, i stap krae bigfala, we wora i stap kamaot long ae blong hem. God i gat paoa blong sevem hem long ded, mo from we hem i fraetgud long God, God i harem hem.’ Fasin ya blong fraetgud long God i wan fasin we Jisas Kraes i soem longtaem bifo we hem i ded long pos. Tingbaot Proveb japta 8, we i tokbaot Pikinini blong God olsem wan pija blong fasin waes. Mo long Proveb 9:​10, yumi ridim se: “Fasin fraetgud long Jeova, hemia stat blong waes fasin.” Taswe fasin fraetgud long God i wan stampa fasin blong Pikinini blong God, longtaem bifo we hem i kam long wol.

8. ?Long Aesea 11:​2, 3, yumi lanem wanem long saed blong fasin fraetgud long Jeova?

⁸ Bakegen, long saed blong Jisas olsem Mesaea King, Aesea 11:​2, 3 i talem se: “Speret blong Jeova bambae i stap long hem, hemia speret blong waes mo dip save, speret blong gudfala plan mo bigfala paoa, speret blong save mo fasin fraet long Jeova. Mo bambae hem i glad long fasin fraet long Jeova.” !Hemia wan naesfala rod blong tokbaot fasin ya! Fasin fraetgud long Jeova i no wan nogud samting. Hem i givhan mo bildimap wan man. Hem i wan fasin we bambae i go kasem olgeta ples long taem we Kraes i rul olsem King. Kraes i stap rul naoia, mo hem i stap tijim olgeta we oli kam stap aninit long hem olsem king, blong oli fraetgud long Jeova. ?Olsem wanem hem i tijim olgeta?

9. ?Olsem wanem Jisas Kraes i stap tijim yumi blong fraetgud long God, mo hem i wantem se yumi lanem wanem long saed ya?

⁹ Tru long ol miting blong kongregesen mo ol asembli, Jisas, we Jeova i putumap hem olsem Hed blong kongregesen mo Mesaea King, i halpem yumi blong kasem klia se wanem ya fasin fraetgud long God mo from wanem hem i gud long yumi. Long rod ya, hem i stap traem blong mekem yumi luksave we fasin ya i impoten tumas. Olsemia nao, yumi save lanem blong faenem glad long fasin blong fraetgud long Jeova, olsem Jisas i faenem.

?Bambae Yu Yu Traehad?

10. ?Taem yumi kam long ol Kristin miting, yumi mas mekem wanem blong yumi kasem save long fasin fraetgud long Jeova?

¹⁰ Fasin blong ridim Baebol mo kam long ol Kristin miting long Haos Kingdom i no naf blong mekem yumi gat fasin fraetgud long God. Makem wanem yumi mas mekem sipos yumi rili wantem kasem save long fasin ya blong fraetgud long God. Proveb 2:​1-5 i talem se: “Pikinini blong mi, yu mas kasem gud ol tok blong mi, mo yu mas holem gud ol loa blong mi oli stap kolosap long yu, blong mekem se sora blong yu i lesingud long ol waes tok, mo hat blong yu i laekem fasin luksave. Mo tu, yu mas gohed blong singaot long dip save, mo yu mas singaot strong long fasin luksave, blong oli kam long yu. Yu mas stap lukaot samting ya olsem selva, yu mas traem faenem olgeta olwe we yu no spel, olsem ol sas samting we oli haed. Sipos yu mekem olsem, bambae yu kasem save long fasin fraetgud long Jeova, mo bambae yu faenem save blong God.” Taswe taem yumi joen long ol miting, yumi mas lesingud, putum tingting i stap nomo long ol toktok we yumi harem, mo rimemba ol stampa poen. Yumi mas tingting dip olsem wanem ol filing blong yumi long Jeova oli mas pulum yumi blong lesin long ol advaes we oli kamaot​—yes, oli mas mekem se yumi openem hat blong yumi. Ale, bambae yumi kasem save long fasin fraetgud long Jeova.

11. ?Blong wokem fasin fraetgud long God, wanem samting yumi mas mekem oltaem mo wetem strong tingting?

¹¹ Ol Sam 86:11 i pulum tingting blong yumi long wan narafala impoten poen, hemia prea. Man blong raetem sam ya i prea se, ‘O Jeova, tijim mi long ol rod blong yu, nao bambae mi obei long yu, mi holem ol trutok blong yu. Mekem hat blong mi i fulwan blong mi fraetgud long nem blong yu.’ Jeova i agri long prea ya, taswe hem i mekem se oli raetemdaon long Baebol. Blong wokem fasin fraetgud long God, yumi nidim blong prea long Jeova blong hem i halpem yumi. Mo bambae yumi kasem blesing sipos yumi prea wetem strong tingting, mo prea oltaem.​—Luk 18:​1-8.

Hat Blong Yu i Joen Wetem Fasin Ya

12. ?From wanem yumi mas lukaotgud long hat blong yumi, mo samting ya i nidim we yumi mekem wanem?

¹² Long Ol Sam 86:​11, i gat wan narafala samting tu we yumi mas tingbaot. Man blong raetem sam ya i no stap askem we hem i kasem save long fasin fraetgud long God, long tingting blong hem nomo. Hem i tokbaot hat blong hem. Hat tu i joen long bisnes ya blong wokem fasin fraetgud long God. Yumi mas lukaotgud long hat blong yumi, from we hem i minim ol tingting mo fasin we oli stap haed insaed long yumi, we yumi soemaot long ol samting we yumi mekem long laef. Mo tu, hem i minim ol tingting, ol fasin, ol samting we yumi wantem, ol filing we oli pusum yumi, mo ol mak we yumi traehad blong kasem long laef.

13. (a) ?Wanem samting i save soem se hat blong wan man i stap lidim hem long tu rod wantaem? (b) ?Taem yumi stap wokem fasin fraetgud long God, yumi mas traem kasem wanem mak?

¹³ Baebol i givim woning se hat blong yumi i save lidim yumi long tu defren rod wantaem. Hat i save trikim yumi tu. (Ol Sam 12:2; Jeremaea 17:9) Hem i save pusum yumi blong joen long sam gudfala wok, olsem go long ol miting blong kongregesen mo long wok blong prij. Be hem i save mekem se yumi laekem sam fasin blong ol man blong wol tu. Samting ya i save blokem yumi, blong yumi no mekem wok blong Kingdom wetem ful laef blong yumi. Afta, hat blong yumi i save trikim yumi blong ting se yumi stap mekem plante wok, olsem plante narafala. Maet long skul no long wok, hat i save kam fulap long fraet long man. From samting ya, long ol ples olsem, maet yumi no wantem talemaot se yumi wan Wetnes blong Jeova. Maet yumi go moa, ale yumi mekem sam samting we oli no stret blong wan Kristin i mekem. Be biaen, voes blong hat blong yumi i stikim yumi. Yumi no wantem kam wan man olsem. Taswe, yumi prea long Jeova long sem fasin olsem man blong raetem sam, se: ‘Mekem hat blong mi i fulwan blong mi fraetgud long nem blong yu.’ Yumi wantem se olgeta samting we yumi mekem long laef blong yumi, we oli soemaot ol tingting mo fasin we oli stap haed insaed long yumi, oli givim pruf se yumi stap “fraetgud long trufala God mo folem ol loa blong hem.”​—Eklesiastis 12:13.

14, 15. (a) ?Taem Jeova i talemaot se bambae ol man Isrel oli fri long fasin slef long Babilon, hem i mekem wanem promes long ol man blong hem? (b) ?Jeova i mekem wanem blong putum fasin fraetgud long God long hat blong ol man blong hem? (c) ?From wanem Isrel i tanem baksaed long ol rod blong Jeova?

¹⁴ Jeova i promes se bambae hem i givim wan hat we i fraetgud long God, long ol man blong hem. Hem i talemaot se bambae Isrel i stanap strong bakegen, mo i talem tok ya we i stap long Jeremaea 32:​37-39: “Bambae mi mi karem olgeta oli kambak long ples ya, mo bambae mi mekem se oli laef long pis. Mo bambae oli kam man blong mi, mo mi bambae mi God blong olgeta. Mo bambae mi givim wan hat mo wan rod nomo long olgeta, blong oli save fraetgud long mi oltaem, blong bambae olgeta wetem ol pikinini blong olgeta biaen, oli save kasem blesing.” Long vas 40, God i mekem promes blong hem i strong moa: “Bambae mi putum fasin fraetgud long mi long hat blong olgeta, blong bambae oli no tanem baksaed long mi.” Long yia 537 B.K.T., Jeova i karem olgeta i kambak long Jerusalem, olsem we hem i bin promes. ?Be olsem wanem long narafala haf blong promes ya​—hemia se bambae hem i givim ‘wan hat long olgeta blong oli save fraetgud long hem oltaem’? ?From wanem nesen blong Isrel bifo i tanem baksaed long Jeova, afta we hem i karem olgeta oli aot long Babilon, mekem se ol ami oli kam brekemdaon haos prea blong olgeta long 70 K.T., mo neva ol man oli bildimap bakegen?

¹⁵ Hemia i no fol blong Jeova. Jeova i rili bin traehad blong putum fasin fraetgud blong God long hat blong ol man blong hem. Jeova i sore long olgeta, ale hem i mekem olgeta oli fri long Babilon, mo i karem olgeta oli gobak long kantri blong olgeta. Taswe i gat bigfala risen from wanem oli mas soem dip respek mo ona long hem. Antap long ol samting ya, God i sanem ol profet olsem Hagae, Sekaraea, mo Malakae, blong talem plante toktok long olgeta, blong mekem olgeta oli rimemba ol samting we hem i bin talem, blong givim ol advaes mo blong stretem olgeta. God i sanem Esra blong tijim olgeta, rula ya Nehemaea, mo stret Pikinini blong Hem tu. Samtaem ol man oli lesin mo obei. Oli mekem olsem taem Hagae mo Sekaraea tufala i tok long olgeta, ale oli bildim bakegen haos prea blong Jeova, mo taem oli ronemaot ol hiten waef blong olgeta long taem blong Esra. (Esra 5:​1, 2; 10:​1-4) Be plante taem oli no obei. Oli no gat fasin blong lesin oltaem, oli no gohed blong obei long ol advaes, oli no mekem se hat blong olgeta i open oltaem. Ol man Isrel oli no stap traehad blong wokem fasin fraetgud long God, mo from samting ya, fasin ya i no strong inaf blong lidim laef blong olgeta.​—Malakae 1:6; Matyu 15:​7, 8.

16. ?Jeova i putum fasin fraetgud long God long hat blong hu?

¹⁶ Be promes blong Jeova blong putum fasin fraetgud long God long hat blong ol man blong hem, i no foldaon. Hem i stanemap wan nyufala kontrak wetem Isrel long saed blong speret, hemia olgeta Kristin we hem i givim hop long olgeta blong laef long heven. (Jeremaea 31:33; Galesia 6:16) Long 1919, God i mekem oli fri long Bigfala Babilon, olgeta gyaman skul long wol. Mo hem i putum fasin fraetgud long hem i stap strong long hat blong olgeta. Samting ya i karem ol rij blesing long olgeta mo long ‘bigfala kampani,’ we oli gat hop blong laef olwe long wol olsem ol man blong obei long Kingdom. (Jeremaea 32:39; Revelesen 7:9) Fasin fraetgud long Jeova i stap long hat blong olgeta tu.

Olsem Wanem Fasin Fraetgud Long God i Save Gru Long Hat Blong Yumi

17. ?Olsem wanem Jeova i stap putum fasin fraetgud long God long hat blong yumi?

¹⁷ ?Olsem wanem Jeova i putum fasin fraetgud long hat blong yumi? Tru long paoa blong speret blong hem. ?Mo wanem samting yumi gat we i kamaot long tabu speret? Baebol, Tok blong God. (2 Timote 3:​16, 17) Olgeta wok we Jeova i mekem bifo, mo ol samting we hem i stap mekem long ol man blong hem naoia folem ol profet tok, mo ol profet tok we bambae oli kamtru yet, oli givim ol gudfala risen long yumi blong wokem fasin fraetgud long God.​—Josua 24:​2-15; Hibrus 10:​30, 31.

18, 19. ?Olsem wanem ol asembli, mo ol miting blong kongregesen oli halpem yumi blong gat fasin fraetgud long God?

¹⁸ Yumi mas makem tok blong Jeova long Moses, olsem Dutronome 4:​10 i talem, se: “Singaot ol man oli kam tugeta kolosap long mi, blong oli save harem ol tok blong mi, blong oli save lanem blong fraetgud long mi long olgeta dei we oli laef long graon ya, mo blong oli save tijim ol pikinini blong olgeta tu.” Sem mak tede, Jeova i givim plante samting blong halpem ol man blong hem blong lanem fasin fraetgud long hem. Long olgeta asembli, mo miting blong kongregesen, yumi tokbaot ol samting we Jeova i mekem blong soemaot lav, kaen fasin mo blong mekem i gud long ol man. Hemia nao samting we yumi bin mekem taem yumi stadi long buk ya Man We i Hae Moa Long Olgeta Man. ?Stadi ya i gat wanem paoa long yu mo ol tingting blong yu long saed blong Jeova? Taem yu luk plante bigfala fasin blong Papa blong yumi long heven, we Pikinini blong hem i soemaot, ?samting ya i mekem tingting blong yu i strong moa blong neva mekem wan samting we i save mekem God i harem nogud?​—Kolosi 1:15.

¹⁹ Long ol miting blong yumi, yumi stadi long ol samting we Jeova i mekem long taem bifo, blong sevem ol man blong hem. (2 Samuel 7:23) Taem yumi stadi long buk blong Revelesen long Baebol, wetem help blong buk ya Revelation​—Its Grand Climax At Hand!, yumi tokbaot plante drim we oli olsem profet tok, we oli kamtru finis long wan handred yia we i jes pas. Mo tu, yumi tokbaot ol bigfala samting blong mekem man i fraet we oli mas kamtru yet. Long saed blong ol bigfala wok ya blong God, Ol Sam 66:5 i talem se: “Yufala i kam, yufala i luk ol samting we God i bin mekem. Yufala i traem tingbaot ol bigbigfala wok ya blong hem we i mekem long medel blong ol man.” Yes, taem yumi tingtinggud, olgeta wok ya blong God oli putum long hat blong yumi fasin blong fraetgud long Jeova, wan dip respek. Olsem nao, yumi kasem save olsem wanem Jeova God i stap mekem promes blong hem i kamtru se: “Bambae mi putum fasin fraetgud long mi long hat blong olgeta, blong bambae oli no tanem baksaed long mi.”​—Jeremaea 32:40.

20. ?Blong mekem se fasin fraetgud long God i stap dip insaed long hat blong yumi, yumi mas mekem wanem?

²⁰ Be, i tru se fasin fraetgud long God i no save kam stap long hat blong yumi sipos yumi no traehad tu. Hem i no kamaot hem wan nomo. Jeova i mekem wok blong hem. Yumi mas mekem wok blong yumi tu, yumi mas wokem fasin fraetgud long God. (Dutronome 5:29) Ol man Isrel bifo oli no bin mekem olsem. Be, Isrel long saed blong speret mo ol fren blong olgeta, we oli trastem Jeova, oli stap kasem plante blesing naoia we oli stap kam long ol man we oli fraetgud long God. Bambae yumi tokbaot ol blesing ya long nekis haf.

?Bambae Yu Yu Ansa Olsem Wanem?

◻ ?Wanem ya fasin fraetgud long God?

◻ ?Wanem samting i stap tijim yumi blong faenem glad long fasin blong fraetgud long Jeova?

◻ ?Blong gat fasin fraetgud long God, yumi mas traehad long wanem rod?

◻ ?Olsem wanem fasin fraetgud long God i joen wetem olgeta samting long saed blong hat blong yumi?

[Tok blong pija long pej 13]

Yumi mas stadi oltaem blong kasem save long fasin fraetgud long Jeova